[๒๙๗] ยสฺเสเต จตุโร ธมฺมา คุณา ปรมภทฺทกา ๑
สจฺจํ ธมฺโม ธิติ จาโค ทิฏฺฐํ โส อติวตฺตติ ฯ

[๒๙๘] ยสฺส เจเต น วิชฺชนฺติ คุณา ปรมภทฺทกา
สจฺจํ ธมฺโม ธิติ จาโค ทิฏฺฐํ โส นาติวตฺตตีติ ฯ
กุมฺภีลชาตกํ จตุตฺถํ ฯ
___________
๕ ขนฺติวณฺณนชาตกํ

[๒๙๙] อตฺถิ เม ปุริโส เทว สพฺพกิจฺเจสุ พฺยาวโฏ
ตสฺส เจโกปราธตฺถิ ตตฺถ ตฺวํ กินฺติ มญฺญสิ ฯ

[๓๐๐] อมฺหากํ อตฺถิ ๒ ปุริโส เอทิโส อิธ วิชฺชติ
ทุลฺลโภ องฺคสมฺปนฺโน ขนฺติ อสฺมาก รุจฺจตีติ ฯ
ขนฺติวณฺณนชาตกํ ปญฺจมํ ฯ
___________
๖ โกสิยชาตกํ

[๓๐๑] กาเล นิกฺขมนา สาธุ นากาเล สาธุ นิกฺขโม
อกาเลน หิ นิกฺขมฺม เอกกมฺปิ พหุชฺชโน
น กิญฺจิ อตฺถํ ชาเตติ ๓ ธงฺกเสนาว โกสิยํ ฯ

[๓๐๒] ธีโร ๔ วิธิวิธานญฺญู ปเรสํ วิวรานุคู
#๑ สี. ม. วานรินฺท ยถา ตว ฯ ๒ ม. อมฺหากมฺปตฺถิ ปุริโส ฯ ๓ ม. โชเตติ ฯ
#๔ ม. ธีโร จ ฯ
สพฺพามิตฺเต วสีกตฺวา โกสิโยว สุขี สิยาติ ฯ
โกสิยชาตกํ ฉฏฺฐํ ฯ
___________
๗ คูถปาณกชาตกํ

[๓๐๓] สูโร สูเรน สงฺคมฺม วิกฺกนฺเตน ปหารินา
เอหิ นาค นิวตฺตสฺสุ กินฺนุ ภีโต ปลายสิ
ปสฺสนฺตุ องฺคมคธา มม ตุยฺหญฺจ วิกฺกมํ ฯ

[๓๐๔] น ตํ ปาทา วธิสฺสามิ น ทนฺเตหิ น โสณฺฑิยา
มีเฬฺหน ตํ วธิสฺสามิ ปูติ หญฺญตุ ปูตินาติ ฯ
คูถปาณกชาตกํ สตฺตมํ ฯ
___________
๘ กามนีตชาตกํ

[๓๐๕] ตโย คิรึ อนฺตรํ กามยามิ
ปญฺจาโล ๑ กุรุโย เกกเก จ
ตตุตฺตรึ พฺราหฺมณ กามยามิ
ติกิจฺฉ มํ พฺราหฺมณ กามนีตํ ฯ

[๓๐๖] กณฺหาหิ ทฏฺฐสฺส กโรนฺติ เหเก
อมนุสฺสวิฏฺฐสฺส ๒ กโรนฺติ ปณฺฑิตา
น กามนีตสฺส กโรติ โกจิ
#๑ สี. ม. ปญฺจาลา ฯ ๒ สี. ยุ. อมนุสฺสวทฺธสฺส ฯ ม. อมนุสฺสปวิฏฺฐสฺส ฯ
โอกฺกนฺตสุกฺกสฺส หิ กา ติกิจฺฉาติ ฯ
กามนีตชาตกํ อฏฺฐมํ ฯ
___________
๙ ปลายิชาตกํ