[๒๗๗] ปุณฺณํ นทึ เยน จ เปยฺยมาหุ
#๑ ม. กุรุชาตกํ ฯ ๒ ม. กุรุราชาติ ฯ ๓ ยุ. รฏฺเฐน ฯ
ชาตํ ยวํ เยน จ คุยฺหมาหุ
ทูรํ คตํ เยน จ อวฺหยนฺติ
โส ตฺยาภโต หนฺท จ ภุญฺช พฺราหฺมณ ฯ

[๒๗๘] ยโต มํ สรตี ราชา วายสมฺปิ ปเหตเว
หํสา โกญฺจา มยูรา จ อสติเยว ปาปิยาติ ฯ
ปุณฺณนทีชาตกํ จตุตฺถํ ฯ
___________
๕ กจฺฉปชาตกํ

[๒๗๙] อวธิ วต อตฺตานํ กจฺฉโปว ปพฺยาหรํ ๑
สุคฺคหิตสฺมึ กฏฺฐสฺมึ วาจาย สกิยา วธิ ฯ

[๒๘๐] เอตมฺปิ ทิสฺวา นรวีรเสฏฺฐ
วาจํ ปมุญฺเจ กุสลํ นาติเวลํ
ปสฺสสิ พหุภาเณน กจฺฉปํ พฺยสนํ คตนฺติ ฯ
กจฺฉปชาตกํ ปญฺจมํ ฯ
___________
๖ มจฺฉชาตกํ

[๒๘๑] น มายมคฺคิ ตปติ น สูโล สาธุ ตจฺฉิโต
ยญฺจ มํ มญฺญเต มจฺฉี อญฺญํ โส รติยา คโต ฯ
#๑ สี. ม. กจฺฉโป วยาหรํ คิรํ ฯ

[๒๘๒] โส มํ ทหติ ราคคฺคิ จิตฺตญฺจูปตเปติ มํ
ชาลิโน มุญฺจถยิรา มํ น กาเม หญฺญเต กฺวจีติ ฯ
มจฺฉชาตกํ ฉฏฺฐํ ฯ
___________
๗ เสคฺคุชาตกํ

[๒๘๓] สพฺโพ โลโก อตฺตมโน อโหสิ
อโกวิทา คามธมฺมสฺส เสคฺคุ
โกมาริโก นาม ตวชฺช ธมฺโม
ยํ ตฺวํ คหิตา ปวเน ปโรทสิ ฯ

[๒๘๔] โย ทุกฺขผุฏฺฐาย ภเวยฺย ตาณํ
โส เม ปิตา ทุพฺภิ วเน กโรติ
สา กสฺส กนฺทามิ วนสฺส มชฺเฌ
โย ตายิตา โส สหสา กโรตีติ ฯ
เสคฺคุชาตกํ สตฺตมํ ฯ
___________
๘ กูฏวาณิชชาตกํ

[๒๘๕] สฐสฺส สาเฐยฺยมิทํ สุจินฺติตํ
ปจฺโจฑฺฑิตํ ปฏิกูฏสฺส กูฏํ
ผาลํ เจ ขาเทยฺยุํ ๑ มูสิกา
กสฺมา กุมารํ กุลลา โน หเรยฺยุํ ฯ
#๑ สี. ยุ. อเทยฺยุํ ฯ

[๒๘๖] กูฏสฺส หิ สนฺติ กูฏกูฏา
ภวติ ปโร ๑ นิกติโน นิกตฺยา
เทหิ ปุตฺตนฏฺฐ ผาลนฏฺฐสฺส ผาลํ
มา เต ปุตฺตมหาสิ ผาลนฏฺโฐติ ฯ
กูฏวาณิชชาตกํ อฏฺฐมํ ฯ
___________
๙ ครหิตชาตกํ