[๒๑๗] ทูสิโต คิริทตฺเตน ๓ หโย สามสฺส ปณฺฑโว
โปราณํ ปกตึ หิตฺวา ตสฺเสวานุวิธิยฺยติ ฯ
#๑ ม. อพฺพห ฯ ๒ ม. ปุฏฺโฐ ฯ ๓ ยุ. คิริทนฺเตน ฯ

[๒๑๘] สเจ จ ตนุโช โปโส สิงฺคาราการกปฺปิโต ๑
อานเน ตํ คเหตฺวาน มณฺฑเล ปริวตฺตเย
ขิปฺปเมว ปหนฺตฺวาน ตสฺเสวานุวิธิยฺยตีติ ฯ
คิริทตฺตชาตกํ จตุตฺถํ ฯ
___________
๕ อนภิรติชาตกํ

[๒๑๙] ยโถทเก อาวิเล อปฺปสนฺเน
น ปสฺสติ สิปฺปิกสมฺพุกญฺจ
สกฺขรํ วาลุกํ มจฺฉคุมฺพํ
เอวํ อาวิลมฺหิ จิตฺเต
น โส ปสฺสติ อตฺตทตฺถํ ปรตฺถํ ฯ

[๒๒๐] ยโถทเก อจฺเฉ วิปฺปสนฺเน
โส ปสฺสติ สิปฺปิกสมฺพุกญฺจ
สกฺขรํ วาลุกํ มจฺฉคุมฺพํ
เอวํ อนาวิลมฺหิ จิตฺเต
โส ปสฺสติ อตฺตทตฺถํ ปรตฺถนฺติ ฯ
อนภิรติชาตกํ ปญฺจมํ ฯ
___________
#๑ สี. ม. สิขราการกปฺปิโต ฯ
๖ ทธิวาหนชาตกํ

[๒๒๑] วณฺณคนฺธรสูเปโต อมฺโพยํ อหุวา ปุเร
ตเมว ปูชํ ลภมาโน เกนมฺโพ กฏุกปฺผโล ฯ

[๒๒๒] ปุจิมนฺทปริวาโร อมฺโพ เต ทธิวาหน
มูลํ มูเลน สํสฏฺฐํ สาขา สาขํ นิเสวเร ๑
อสาตสนฺนิวาเสน เตนมฺโพ กฏุกปฺผโลติ ฯ
ทธิวาหนชาตกํ ฉฏฺฐํ ฯ
___________
๗ จตุมฏฺฐชาตกํ

[๒๒๓] อุจฺเจ วิฏปิมารุยฺห มนฺตยโวฺห รโหคตา
นีเจ โอรุยฺห มนฺตโวฺห มิคราชาปิ โสสฺสติ ฯ

[๒๒๔] ยํ สุปณฺโณ สุปณฺเณน ๒ เทโว เทเวน มนฺตเย
กึ ตตฺถ ๓ จตุมฏฺฐสฺส วิลํ ปวิส ชมฺพุกาติ ฯ
จตุมฏฺฐชาตกํ สตฺตมํ ฯ
___________
๘ สีหโกตฺถุกชาตกํ

[๒๒๕] สีหงฺคุลิ สีหนโข สีหปาทปฺปติฏฺฐิโต
โส สีโห สีหสงฺฆมฺหิ เอโก นทติ อญฺญถา ฯ
#๑ ม. นิวีสเร ฯ ๒ ม. ยํ สุวณฺโณ สุวณฺเณน ฯ ๓ ม. กึเตตฺถ ฯ

[๒๒๖] มา ตฺวํ นทิ ราชปุตฺต อปฺปสทฺโท วเน วส
สเรน โข ตํ ชาเนยฺยุํ น หิ เต เปตฺติโก สโรติ ฯ
สีหโกตฺถุกชาตกํ อฏฺฐมํ
____________
๙ สีหจมฺมชาตกํ