[๒๐๗] ตญฺจ อปฺปญฺจ อุจฺฉิฏฺฐํ ตญฺจ กิจฺเฉน โน อทา
โสหํ พฺราหฺมณชาติโก ยํ ภุตฺตํ ตมฺปิ อุคฺคตํ ฯ

[๒๐๘] เอวํ ธมฺมํ นิรงฺกตฺวา โย อธมฺเมน ชีวติ
สตธมฺโมว ลาเภน ลทฺเธนาปิ น นนฺทตีติ ฯ
สตธมฺมชาตกํ นวมํ ฯ
___________
๑๐ ทุทฺททชาตกํ

[๒๐๙] ทุทฺททํ ททมานานํ ทุกฺกรํ กมฺมกุพฺพตํ
อสนฺโต นานุกุพฺพนฺติ สตํ ธมฺโม ทุรนฺวโย ฯ

[๒๑๐] ตสฺมา สตญฺจ อสตญฺจ นานา โหติ อิโต คติ
อสนฺโต นิรยํ ยนฺติ สนฺโต สคฺคปรายนาติ ฯ
ทุทฺททชาตกํ ทสมํ ฯ
กลฺยาณธมฺมวคฺโค ตติโย ฯ
____________
ตสฺสุทฺทานํ
สุสมญฺญ มิคาธิภู มาณวโก
วาริพหุตรูปาทิจฺจุปฏฺฐานา
สกฬาย สตินฺทุก ปงฺก ปุน
สตธมฺม สุทุทฺททเกน ทส ฯ
___________
๔ อสทิสวคฺโค
๑ อสทิสชาตกํ

[๒๑๑] ธนุคฺคโห อสทิโส ราชปุตฺโต มหพฺพโล
ทูเร ปาตี อกฺขณเวธี มหากายปฺปทาลโน ฯ

[๒๑๒] สพฺพามิตฺเต รณํ กตฺวา น จ กิญฺจิ วิเหฐยิ
ภาตรํ โสตฺถึ กตฺวาน สญฺญมํ อชฺฌุปาคมีติ ฯ
อสทิสชาตกํ ปฐมํ ฯ
___________
๒ สงฺคามาวจรชาตกํ

[๒๑๓] สงฺคามาวจโร สูโร พลวา อิติ วิสฺสุโต
กินฺนุ โตรณมาสชฺช ปฏิกฺกมสิ กุญฺชร ฯ

[๒๑๔] โอมทฺท ขิปฺปํ ปลีฆํ เอสิกานิ จ อุพฺพห ๑
โตรณานิ จ มทฺทิตฺวา ขิปฺปํ ปวิส กุญฺชราติ ฯ
สงฺคามาวจรชาตกํ ทุติยํ ฯ
____________
๓ วาโลทกชาตกํ

[๒๑๕] วาโลทกํ อปฺปรสํ นิหีนํ
ปิตฺวา มโท ชายติ คทฺรภานํ
อิมญฺจ ปิตฺวาน รสํ ปณีตํ
มโท น สญฺชายติ สินฺธวานํ ฯ

[๒๑๖] อปฺปมฺปิวิตฺวาน นิหีนชจฺโจ
โส มชฺชตี เตน ชนินฺท ผุฏฺโฐ ๒
โธรยฺหสีลี จ กุลมฺหิ ชาโต
น มชฺชตี อคฺครสํ ปิวิตฺวาติ ฯ
วาโลทกชาตกํ ตติยํ ฯ
___________
๔ คิริทตฺตชาตกํ