[๑๙๗] อทมฺห เต วาริ พหุตฺตรูปํ ๑
ฆมฺมาภิตตฺตสฺส ปิปาสิตสฺส
โสทานิ ปิตฺวาน กิกึ ๒ กโรสิ
น สงฺคโม ปาปชเนน เสยฺโย ฯ

[๑๙๘] โก เต สุโต วา ทิฏฺโฐ วา สีลวา นาม มกฺกโฏ
อิทานิ โข ตํ โอหจฺจํ ๓ เอสา อสฺมากธมฺมตาติ ฯ
ทุพฺภิยมกฺกฏชาตกํ จตุตฺถํ ฯ
____________
๕ อาทิจฺจุปฏฺฐานชาตกํ

[๑๙๙] สพฺเพสุ กิร ภูเตสุ สนฺติ สีลสมาหิตา
ปสฺส สาขมิคํ ชมฺมํ อาทิจฺจมุปติฏฺฐติ ฯ

[๒๐๐] นาสฺส สีลํ วิชานาถ อนญฺญาย ปสํสถ
#๑ ม. ปหูตรูปํ ฯ ๒ ม. กิธึ ฯ ๓ ม. โอหจฺฉํ ฯ
อคฺคิหุตญฺจ อูหนํ ๑ เทฺว จ ภินฺนา กมณฺฑลูติ ฯ
อาทิจฺจุปฏฺฐานชาตกํ ปญฺจมํ ฯ
___________
๖ กฬายมุฏฺฐิชาตกํ

[๒๐๑] พาโล วตายํ ทุมสาขโคจโร
ปญฺญา ชนินฺท นยิมสฺส วิชฺชติ
กฬายมุฏฺฐึ อวกิริย เกวลํ
เอกํ กฬายํ ปติตํ คเวสติ ฯ

[๒๐๒] เอวเมว มยํ ราช เย จญฺเญ อติโลภิโน
อปฺเปน พหุํ เชยฺยาม ๒ กฬาเยเนว วานโรติ ฯ
กฬายมุฏฺฐิชาตกํ ฉฏฺฐํ ฯ
___________
๗ ตินฺทุกชาตกํ

[๒๐๓] ธนุหตฺถกลาเปหิ เนตฺตึสวรธาริภิ
สมนฺตา ปริกิณฺณมฺหา กถํ โมกฺโข ภวิสฺสติ ฯ

[๒๐๔] อปฺเปว พหุกิจฺจานํ อตฺโถ ชาเยถ โกจิ นํ
อตฺถิ รุกฺขสฺส อจฺฉินฺนํ ขชฺช ตญฺเญว ๓ ตินฺทุกนฺติ ฯ
ตินฺทุกชาตกํ สตฺตมํ ฯ
___________
#๑ ม. อุหนฺนํ ฯ ยุ. อูหนฺติ ฯ ๒ ม. ชิยฺยาม ฯ ๓ ม. ขชฺชถญฺเญว ฯ
๘ กจฺฉปชาตกํ

[๒๐๕] ชนิตํ เม ภวิตํ เม อิติ ปงฺเก อวสฺสยึ
ตํ มํ ปงฺโก อชฺฌภวิ ยถา ทุพฺพลกํ ตถา
ตํ ตํ วทามิ ภคฺคว สุโณหิ วจนํ มม ฯ

[๒๐๖] คาเม วา ยทิวารญฺเญ สุขํ ยตฺราธิคจฺฉติ
ตํ ชนิตํ ภวิตญฺจ ปุริสสฺส ปชานโต
ยหึ ชีเว ตหึ คจฺเฉ น นิเกตหโต สิยาติ ฯ
กจฺฉปชาตกํ อฏฺฐมํ ฯ
___________
๙ สตธมฺมชาตกํ