[๑๘๗] โย เว เมตฺเตน จิตฺเตน สพฺพโลกานุกมฺปติ
อุทฺธํ อโธ จ ติริยญฺจ อปฺปมาเณน สพฺพโส ฯ

[๑๘๘] อปฺปมาณํ หิตํ จิตฺตํ ปริปุณฺณํ สุภาวิตํ
ยํ ปมาณํ กตํ ๑ กมฺมํ น ตํ ตตฺราวสิสฺสตีติ ฯ
อรกชาตกํ นวมํ ฯ
___________
๑๐ กกณฺฏกชาตกํ

[๑๘๙] นายํ ปุเร อุนฺนมติ ๒ โตรณคฺเค กกณฺฏโก
มโหสธ วิชานาหิ เกน ถทฺโธ กกณฺฏโก ฯ

[๑๙๐] อลทฺธปุพฺพํ ลทฺธาน อฑฺฒมาสํ กกณฺฏโก
อติมญฺญติ ราชานํ เวเทหํ มิถิลคฺคหนฺติ ฯ
กกณฺฏกชาตกํ ทสมํ ฯ
สนฺถววคฺโค ทุติโย ฯ
___________
ตสฺสุทฺทานํ
อถ อินฺทสมาน สปณฺณกุฏิ
สุสิมุตฺตม คิชฺฌ ชลาพุชโก
อุปสาฬฺหก ภิกฺขุ สลาปวโร
อถ เมตฺตวโร ทส ปุณฺณมาติ ฯ
___________
#๑ ม. ปมาณกตํ ฯ ๒ ม. อุณฺณมติ ฯ
๓ กลฺยาณธมฺมวคฺโค ๑
๑ กลฺยาณธมฺมชาตกํ

[๑๙๑] กลฺยาณธมฺโมติ ยทา ชนินฺท
โลเก สมญฺญํ อนุปาปุณาติ
ตสฺมา น หิยฺเยถ นโร สปญฺโญ
หิริยาปิ สนฺโต ธุรมาทิยนฺติ ฯ

[๑๙๒] สายํ สมญฺญา อิธ มชฺช ปตฺตา
กลฺยาณธมฺโมติ ชนินฺท โลเก
ตาหํ สเมกฺขํ อิธ ปพฺพชิสฺสํ
น หิ มตฺถิ ฉนฺโท อิธ กามโภเคติ ฯ
กลฺยาณธมฺมชาตกํ ปฐมํ ฯ
____________
๒ ททฺทรชาตกํ

[๑๙๓] โก นุ สทฺเทน มหตา อภินาเทติ ททฺทรํ
ตํ ๒ สีหา นปฺปฏินทนฺติ โก นาเมโส มิคาภิภู ๓ ฯ

[๑๙๔] อธโม มิคชาตานํ สิคาโล ตาต วสฺสติ
ชาติมสฺส ชิคุจฺฉนฺตา ตุณฺหี สีหา สมจฺฉเรติ ฯ
ททฺทรชาตกํ ทุติยํ ฯ
___________
#๑ ม. กลฺยาณวคฺโค ฯ ๒ สี. ยุ. กึ ฯ ๓ สี. ม. มิคาธิภู ฯ
๓ มกฺกฏชาตกํ

[๑๙๕] ตาต มาณวโก เอโส ตาลมูลํ อปสฺสิโต
อคารกญฺจิทํ อตฺถิ หนฺท เทมสฺสคารกํ ฯ

[๑๙๖] มา โข ตํ ตาต ปกฺโกสิ ทูเสยฺย โน อคารกํ
เนตาทิสํ มุขํ โหติ พฺราหฺมณสฺส สุสีลิโนติ ฯ
มกฺกฏชาตกํ ตติยํ ฯ
___________
๔ ทุพฺภิยมกฺกฏชาตกํ