[๑๖๗] อุเทตยญฺจกฺขุมา เอกราชา
หริสฺสวณฺโณ ปฐวิปฺปภาโส
ตํ ตํ นมสฺสามิ หริสฺสวณฺณํ ปฐวิปฺปภาสํ
ตยชฺช คุตฺตา วิหเรมุ ทิวสํ
เย พฺราหฺมณา เวทคุ สพฺพธมฺเม
เต เม นโม เต จ มํ ปาลยนฺตุ
นมตฺถุ พุทฺธานํ นมตฺถุ โพธิยา
นโม วิมุตฺตานํ นโม วิมุตฺติยา
อิมํ โส ปริตฺตํ กตฺวา โมโร จรติ เอสนา ฯ
#๑ ม. มาติมญฺญิฏฺโฐ ฯ ๒ ม. สุหนูสห ฯ ๓ ม. สุหนูปิ ฯ ๔ ม. อสตา อสนฺติ ฯ

[๑๖๘] อเปตยญฺจกฺขุมา เอกราชา
หริสฺสวณฺโณ ปฐวิปฺปภาโส
ตํ ตํ นมสฺสามิ หริสฺสวณฺณํ ปฐวิปฺปภาสํ
ตยชฺช คุตฺตา วิหเรมุ รตฺตึ
เย พฺราหฺมณา เวทคุ สพฺพธมฺเม
เต เม นโม เต จ มํ ปาลยนฺตุ
นมตฺถุ พุทฺธานํ นมตฺถุ โพธิยา
นโม วิมุตฺตานํ นโม วิมุตฺติยา
อิมํ โส ปริตฺตํ กตฺวา โมโร วาสมกปฺปยีติ ฯ
โมรชาตกํ นวมํ ฯ
___________
๑๐ วินีลกชาตกํ

[๑๖๙] เอวเมว นูน ราชานํ เวเทหํ มิถิลคฺคหํ
อสฺสา วหนฺติ อาชญฺญา ยถา หํสา วินีลกํ ฯ

[๑๗๐] วินีล ทุคฺคํ ภชติ อภูมึ ตาต เสวสิ
คามนฺตกานิ เสวสฺสุ เอตํ มาตาลยํ ตุวนฺติ ๑ ฯ
วินีลกชาตกํ ทสมํ ฯ
ทฬฺหวคฺโค ปฐโม ฯ
___________
#๑ ม. ตวาติ ฯ
ตสฺสุทฺทานํ
วรพลฺลิก ททฺทร สูกรโก
อุรคุตฺตม ปญฺจมภคฺควโร
มหตีจมุยาว สิคาลวโร
สุหนุตฺตม โมร วินีลํ ทส ฯ
___________
๒ สนฺถววคฺโค
๑ อินฺทสมานโคตฺตชาตกํ

[๑๗๑] น สนฺถวํ กาปุริเสน กยิรา
อริโยนริเยน ปชานมตฺถํ
จิรานุวุฏฺโฐปิ กโรติ ปาปํ
คโช ยถา อินฺทสมานโคตฺตํ ฯ

[๑๗๒] ยเทว ๑ ชญฺญา สทิโส มมนฺติ
สีเลน ปญฺญาย สุเตน จาปิ
เตเนว เมตฺตึ กยิราถ สทฺธึ
สุโข หเว ๒ สปฺปุริเสน สงฺคโมติ ฯ
อินฺทสมานโคตฺตชาตกํ ปฐมํ ฯ
___________
#๑ ม. ยํ เตฺวว ฯ ๒ สี. ม. สุขาวโห ฯ
๒ สนฺถวชาตกํ

[๑๗๓] น สนฺถวสฺมา ปรมตฺถิ ปาปิโย
โย สนฺถโว กาปุริเสน โหติ
สนฺตปฺปิโต สปฺปินา ปายาเสน
กิจฺฉา กตํ ปณฺณกุฏึ อทฑฺฒหิ ๑ ฯ

[๑๗๔] น สนฺถวสฺมา ปรมตฺถิ เสยฺโย
โย สนฺถโว สปฺปุริเสน โหติ
สีหสฺส พยคฺฆสฺส จ ทีปิโน จ
สามา มุขํ เลหติ สนฺถเวนาติ ฯ
สนฺถวชาตกํ ทุติยํ ฯ
___________
๓ สุสีมชาตกํ

[๑๗๕] กาฬา มิคา เสตทนฺตา ตวีเม
ปโรสตํ เหมชาลาภิฉนฺนา
เต เต ททามีติ สุสีม พฺรูสิ
อนุสฺสรํ เปตฺติปิตามหานํ ฯ

[๑๗๖] กาฬา มิคา เสตทนฺตา มมีเม
ปโรสตํ เหมชาลาภิฉนฺนา
เต เต ททามีติ วทามิ มาณว
#๑ ม. อทยฺหิ ฯ ยุ. อทฏฺฐหิ ฯ
อนุสฺสรํ เปตฺติปิตามหานนฺติ ฯ
สุสีมชาตกํ ตติยํ ฯ
___________
๔ คิชฺฌชาตกํ