[๑๓๗] ยตฺเถโก ลภเต พพฺพุ ทุติโย ตตฺถ ชายติ
ตติโย จ จตุตฺโถ จ อิทนฺเต พพฺพุกา พิลนฺติ ฯ
พพฺพุชาตกํ สตฺตมํ ฯ
___________
๘ โคธชาตกํ

[๑๓๘] กินฺเต ชฏาหิ ทุมฺเมธ กินฺเต อชินสาฏิยา
อพฺภนฺตรนฺเต คหนํ พาหิรํ ปริมชฺชสีติ ฯ
โคธชาตกํ อฏฺฐมํ ฯ
___________
๙ อุภโตภฏฺฐชาตกํ

[๑๓๙] อกฺขี ภินฺนา ปโฏ นฏฺโฐ สขีเคเห จ ภณฺฑนํ
อุภโต ปทุฏฺฐกมฺมนฺตา อุทกมฺหิ ถลมฺหิ จาติ ฯ
อุภโตภฏฺฐชาตกํ นวมํ ฯ
___________
๑๐ กากชาตกํ

[๑๔๐] นิจฺจํ อุพฺพิคฺคหทยา สพฺพโลกวิเหสกา
ตสฺมา เนสํ วสา นตฺถิ กากานมฺหาก ญาตินนฺติ ฯ
กากชาตกํ ทสมํ ฯ
อสมฺปทานวคฺโค จุทฺทสโม ฯ
___________
ตสฺสุทฺทานํ
อิตรีตร รกฺขสิ เขมิโย จ
ปโรสตปเญฺหน อาภสฺสโร ปุน
อถ หํสวรุตฺตม พพฺพุ ชฏํ
ปฏนฏฺฐก กากวเรน ทส ฯ
___________
๑๕ กกณฺฏกวคฺโค
๑ โคธชาตกํ

[๑๔๑] น ปาปชนสํเสวี อจฺจนฺตสุขเมธติ
โคธากุลํ กกณฺฏาว กลึ ปาเปติ อตฺตนนฺติ ฯ
โคธชาตกํ ปฐมํ ฯ
____________
๒ สิคาลชาตกํ

[๑๔๒] เอตํ หิ เต ทุราชานํ ยํ เสสิ มตสายิตํ
ยสฺส เต กฑฺฒมานสฺส หตฺถา ทณฺโฑ น มุจฺจตีติ ฯ
สิคาลชาตกํ ทุติยํ
___________
๓ วิโรจนชาตกํ

[๑๔๓] ลสี จ เต นิปฺผลิตา มตฺถโก จ ปทาลิโต ๑
สพฺพา เต ผาสุกา ภคฺคา อชฺช โข ตฺวํ วิโรจสีติ ฯ
วิโรจนชาตกํ ตติยํ ฯย
___________
๔ นงฺคุฏฺฐชาตกํ

[๑๔๔] พหุมฺเปตํ อสพฺภิ ชาตเวท
ยนฺตํ วาลธินาภิปูชยาม
#๑ สี. ยุ. วิทาลิโต ฯ
มํสารหสฺส นตฺถชฺช มํสํ
นงฺคุฏฺฐมฺปิ ภวํ ปฏิคฺคหาตูติ ฯ
นงฺคุฏฺฐชาตกํ จตุตฺถํ ฯ
___________
๕ ราธชาตกํ

[๑๔๕] น ตฺวํ ราธ วิชานาสิ อฑฺฒรตฺเต อนาคเต
อพฺยายตํ ๑ วิลปสิ วิรตฺเต ๒ โกสิยายเนติ
ราธชาตกํ ปญฺจมํ ฯ
___________
๖ กากชาตกํ ๓

[๑๔๖] อปิ นุ หนุกา สนฺตา มุขญฺจ ปริสุสฺสติ ฯ
โอรมาม น ปาเรม ปูรเตว มโหทธีติ ฯ
กากชาตกํ ฉฏฺฐํ ฯ
___________
๗ ปุปฺผรตฺตชาตกํ