[๑๑๗] อจฺจุคฺคตา อติพลตา ๒ อติเวลํ ปภาสิตา
วาจา หนติ ทุมฺเมธํ ติตฺติรํวาติวสฺสิตนฺติ ฯ
ติตฺติรชาตกํ สตฺตมํ ฯ
___________
๘ วฏฺฏกชาตกํ

[๑๑๘] นาจินฺตยนฺโต ปุริโส วิเสสมธิคจฺฉติ
จินฺติตสฺส ผลํ ปสฺส มุตฺโตสฺมิ วธพนฺธนาติ ฯ
วฏฺฏกชาตกํ อฏฺฐมํ ฯ
___________
๙ อกาลราวิชาตกํ

[๑๑๙] อมาตาปิตุสํวฑฺโฒ อนาจริยกุเล ๓ วสํ
นายํ กาลมกาลํ วา อภิชานาติ กุกฺกุโฏติ ฯ
อกาลราวิชาตกํ นวมํ ฯ
#๑ ม. ลงฺฆยิตฺวาน ฯ ๒ ม. อจฺจุคฺคตาติลปตา ฯ ๓ ม. อนาเจรกุเล วสํ ฯ
๑๐ พนฺธนโมกฺขชาตกํ

[๑๒๐] อพทฺธา ตตฺถ พชฺฌนฺติ ยตฺถ พาลา ปภาสเร
พทฺธาปิ ตตฺถ มุจฺจนฺติ ยตฺถ ธีรา ปภาสเรติ ฯ
พนฺธนโมกฺขชาตกํ ทสมํ ฯ
หํสิวคฺโค ทฺวาทสโม ฯ
___________
ตสฺสุทฺทานํ
อถ คทฺรภ สตฺตุว กํสสตํ
พหุจินฺติ สาสิกายาติกร
อติเวล วิเสุํ มนาจริโยว
ธีรา ปภาสรเตน ทส ฯ
___________
๑๓ กุสนาฬิวคฺโค
๑ กุสนาฬิชาตกํ

[๑๒๑] กเร สริกฺโข อถวาปิ เสฏฺโฐ
นิหีนโก วาปิ กเรยฺย เอโก
กเรยฺยุเมเต ๑ พฺยสเน อุตฺตมตฺถํ
ยถา อหํ กุสนาฬิ รุจายนฺติ ฯ
กุสนาฬิชาตกํ ปฐมํ ฯ
___________
#๑ สี. ยุ. กเรยฺยุํ เต ฯ
๒ ทุมฺเมธชาตกํ

[๑๒๒] ยสํ ลทฺธาน ทุมฺเมโธ อนตฺถํ จรติ อตฺตโน
อตฺตโน จ ปเรสญฺจ หึสาย ปฏิปชฺชตีติ ฯ
ทุมฺเมธชาตกํ ทุติยํ ฯ
___________
๓ นงฺคลีสชาตกํ

[๑๒๓] อสพฺพตฺถคามึ วาจํ พาโล สพฺพตฺถ ภาสติ
นายํ ทธึ เวทิ น นงฺคลีสํ
ทธิปฺปยํ ๑ มญฺญติ นงฺคลีสนฺติ ฯ
นงฺคลีสชาตกํ ตติยํ ฯ
___________
๔ อมฺพชาตกํ

[๑๒๔] วายเมเถว ปุริโส น นิพฺพินฺเทยฺย ปณฺฑิโต
วายามสฺส ผลํ ปสฺส ภุตฺตา อมฺพา อนีติหนฺติ ฯ
อมฺพชาตกํ จตุตฺถํ ฯ
___________
๕ กฏาหกชาตกํ

[๑๒๕] พหุมฺปิ โส วิกตฺเถยฺย อญฺญํ ชนปทํ คโต
อนฺวาคนฺตฺวาน ทูเสยฺย ภุญฺช โภเค กฏาหกาติ ฯ
กฏาหกชาตกํ ปญฺจมํ ฯ
#๑ สี. ยุ. ททิมฺปยํ ฯ
๖ อสิลกฺขณชาตกํ

[๑๒๖] ตเถเวกสฺส ๑ กลฺยาณํ ตเถเวกสฺส ๑ ปาปกํ
ตสฺมา สพฺพํ น กลฺยาณํ สพฺพํ วาปิ น ปาปกนฺติ ฯ
อสิลกฺขณชาตกํ ฉฏฺฐํ ฯ
___________
๗ กลณฺฑุกชาตกํ