[๖๗] อุจฺฉงฺเค เทว เม ปุตฺโต ปเถ ธาวนฺติยา ปติ
ตญฺจ เทสํ น ปสฺสามิ ยโต โสทริยมานเยติ ฯ
อุจฺฉงฺคชาตกํ สตฺตมํ ฯ
___________
#๑ ม. น มิจฺฉติ ฯ ๒ ม. อฬารกฺขี ฯ
๘ สาเกตชาตกํ

[๖๘] ยสฺมึ มโน นิวีสติ จิตฺตญฺจาปิ ปสีทติ
อทิฏฺฐปุพฺพเก โปเส กามํ ตสฺมึปิ วิสฺสเสติ ฯ
สาเกตชาตกํ อฏฺฐมํ ฯ
___________
๙ วิสวนฺตชาตกํ

[๖๙] ธิรตฺถุ ตํ วิสํ วนฺตํ ยมหํ ชีวิตการณา
วนฺตํ ปจฺจาวมิสฺสามิ มตํ เม ชีวิตา วรนฺติ ฯ
วิสวนฺตชาตกํ นวมํ ฯ
___________
๑๐ กุทฺทาลชาตกํ

[๗๐] น ตํ ชิตํ สาธุ ชิตํ ยํ ชิตํ อวชิยฺยติ
ตํ โข ชิตํ สาธุ ชิตํ ยํ ชิตํ นาวชิยฺยตีติ ฯ
กุทฺทาลชาตกํ ทสมํ ฯ
อิตฺถีวคฺโค สตฺตโม ฯ
___________
ตสฺสุทฺทานํ
สิขี สพฺพคฺฆโสปิจ วีณวโร
ปิสุณา มิตฺตเภทิกา นนฺทิ นที
มุทุลกฺขณ โสทริยา จ มโน
วิส สาธุชิเตน ภวนฺติ ทส ฯ
๘ วรุณวคฺโค
๑ วรุณชาตกํ

[๗๑] โย ปุพฺเพ กรณียานิ ปจฺฉา โส กาตุมิจฺฉติ
วรุณกฏฺฐํ ๑ ภญฺโชว ส ปจฺฉา อนุตปฺปตีติ ฯ
วรุณชาตกํ ปฐมํ ฯ
__________
๒ สีลวนาคชาตกํ ๒

[๗๒] อกตญฺญุสฺส โปสสฺส นิจฺจํ วิวรทสฺสิโน
สพฺพญฺเจ ปฐวึ ทชฺชา เนว นํ อภิราธเยติ ฯ
สีลวนาคชาตกํ ทุติยํ
__________
๓ สจฺจงฺกิรชาตกํ

[๗๓] สจฺจํ กิเรวมาหํสุ นรา เอกจฺจิยา อิธ
กฏฺฐํ นิปฺผวิตํ ๓ เสยฺโย น เตฺวเวกจฺจิโย นโรติ ฯ
สจฺจงฺกิรชาตกํ ตติยํ ฯ
__________
๔ รุกฺขธมฺมชาตกํ

[๗๔] สาธุ สมฺพหุลา ญาตี อปิ รุกฺขา อรญฺญชา
#๑ ม. วรุณกฏฺฐ ฯ สี. ยุ. วรณกฏฺฐ ฯ ๒ ม. สีลวหตฺถิชาตกํ ฯ ๓ ม. นิปฺลวิตํ ฯ
#สี. ยุ. วิปลาวิตํ ฯ
วาโต วหติ เอกฏฺฐํ พฺรหนฺตมฺปิ วนปฺปตินฺติ ฯ
รุกฺขธมฺมชาตกํ จตุตฺถํ ฯ
___________
๕ มจฺฉชาตกํ

[๗๕] อภิตฺถนย ปชฺชุนฺน นิธึ กากสฺส นาสย
กากํ โสกาย รนฺเธหิ มญฺจ โสกา ปโมจยาติ ฯ
มจฺฉชาตกํ ปญฺจมํ ฯ
___________
๖ อสงฺกิยชาตกํ

[๗๖] อสงฺกิโยมฺหิ คามมฺหิ อรญฺเญ นตฺถิ เม ภยํ
อุชุมคฺคํ สมารูโฬฺห เมตฺตาย กรุณาย จาติ ฯ
อสงฺกิยชาตกํ ฉฏฺฐํ ฯ
___________
๗ มหาสุปินชาตกํ