[๒๗] นาลํ กพลํ ปทาตเว
น ๒ ปิณฺฑํ น กุเส น ฆํสิตุํ
มญฺญามิ อภิณฺหทสฺสนา
นาโค สิเนหมกาสิ ๓ กุกฺกุเรติ ฯ
อภิณฺหชาตกํ สตฺตมํ ฯ
___________
#๑ ม. โปถยมนฺวจารี ฯ ๒ ม. น จ ปิณฺฑํ ฯ ๓ ม. เสฺนหมกาสิ ฯ
๘ นนฺทิวิสาลชาตกํ

[๒๘] มนุญฺญเมว ภาเสยฺย นามนุญฺญํ กุทาจนํ
มนุญฺญํ ภาสมานสฺส ครุภารํ อุททฺธริ
ธนญฺจ นํ อลาเภสิ เตน จตฺตมโน อหูติ ฯ
นนฺทิวิสาลชาตกํ อฏฺฐมํ ฯ
___________
๙ กณฺหชาตกํ

[๒๙] ยโต ยโต ครุ ธุรํ ยโต คมฺภีรวตฺตนิ ๑
ตทาสฺสุ กณฺหํ ยุญฺชนฺติ สวาสฺสุ ตํ วหเต ธุรนฺติ ฯ
กณฺหชาตกํ นวมํ ฯ
___________
๑๐ มุณิกชาตกํ

[๓๐] มา มุณิกสฺส ปิหยิ อาตุรนฺนานิ ภุญฺชติ
อปฺโปสฺสุกฺโก ภุสงฺขาท เอตํ ทีฆายุลกฺขณนฺติ ฯ
มุณิกชาตกํ ทสมํ ฯ
กุรุงฺควคฺโค ตติโย ฯ
___________
ตสฺสุทฺทานํ
กุรุงฺคสฺส กุกฺกุร โภชวโร ๒
ปุน วาฬวสฺสสิริวยโน ๓
มหิฬามุข นามนุญฺญวโร
วหเต ธุร มุณิเกน ทส ฯ
#๑ ม. คมฺภีรวตฺตนี ฯ ๒ ม. โคชวโร ฯ ๓ ม. … สิริวหยโน ฯ
๔ กุลาวกวคฺโค
๑ กุลาวกชาตกํ

[๓๑] กุลาวกา มาตลิ สิมฺพลิสฺมึ
อีสามุเขน ปริวชฺชยสฺสุ
กามํ จชาม อสุเรสุ ปาณํ
มายิเม ๑ ทิชา วิกุลาวา อเหสุนฺติ ฯ
กุลาวกชาตกํ ปฐมํ ฯ
__________
๒ นจฺจชาตกํ

[๓๒] รุทํ มนุญฺญํ รุจิรา จ ปิฏฺฐิ
เวฬุริยวณฺณูปฏิภา ๒ จ คีวา
พฺยามมตฺตานิ จ เปกฺขุณานิ
นจฺเจน เต ธีตรํ โน ททามีติ ฯ
นจฺจชาตกํ ทุติยํ ฯ
__________
๓ สมฺโมทมานชาตกํ

[๓๓] สมฺโมทมานา คจฺฉนฺติ ชาลมาทาย ปกฺขิโน
ยทา เต วิวทิสฺสนฺติ ตทา เอหินฺติ เม วสนฺติ ฯ
สมฺโมทมานชาตกํ ตติยํ ฯ
#๑ ม. มาเม ฯ ๒ ม. เวฬุริยวณฺณูปนิภา ฯ
๔ มจฺฉชาตกํ

[๓๔] น มํ สีตํ น มํ อุณฺหํ น มํ ชาลสฺมิ พาธนํ
ยญฺจ มํ มญฺญเต มจฺฉี อญฺญํ โส รติยา คโตติ ฯ
มจฺฉชาตกํ จตุตฺถํ ฯ
__________
๕ วฏฺฏกชาตกํ

[๓๕] สนฺติ ปกฺขา อปตนา สนฺติ ปาทา อวญฺจนา
มาตา ปิตา จ นิกฺขนฺตา ชาตเวท ปฏิกฺกมาติ ฯ
วฏฺฏกชาตกํ ปญฺจมํ ฯ
__________
๖ สกุณชาตกํ

[๓๖] ยนฺนิสฺสิตา ชคติรุหํ (วิหงฺคมา) สฺวายํ อคฺคึ ปมุญฺจติ
ทิสา ภชถ วงฺกงฺคา ๑ ชาตํ สรณโต ภยนฺติ ฯ
สกุณชาตกํ ฉฏฺฐํ ฯ
__________
๗ ติตฺติรชาตกํ