[๔๓๒] ๓ เย อิเม สตฺต โพชฺฌงฺคา มคฺคา นิพฺพานปตฺติยา
ภาวิตา เต มยา สพฺเพ ยถา พุทฺเธน เทสิตา ฯ
สุญฺญตสฺสานิมิตฺตสฺส ลาภินีหํ ยทิจฺฉิตํ
โอรสา ธีตา พุทฺธสฺส นิพฺพานาภิรตา สทา ฯ
สพฺเพ กามา สมุจฺฉินฺนา เย ทิพฺพา เย จ มานุสา
วิกฺขีโณ ชาติสํสาโร นตฺถิทานิ ปุนพฺภโว ฯ
อญฺญตรา อุตฺตมา ฯ

[๔๓๓] ๔ ทิวาวิหารา นิกฺขมฺม คิชฺฌกูฏมฺหิ ปพฺพเต
นาคํ โอคาหมุตฺติณฺณํ นทีตีรมฺหิ อทฺทสํ ฯ
ปุริโส องฺกุสมาทาย เทหิ ปาทนฺติ ยาจติ
นาโค ปสารยิ ๔ ปาทํ ปุริโส นาคมารุหิ ฯ
#๑ โป. ม. เอกปลฺลงฺเกน ฯ ๒ ยุ. ปีติสุขสมปฺปิตา ฯ ๓ โป. เอตฺถนฺตเร ยโต
#ตณฺหา วิโสสิตา ปจฺฉา ธมฺมเทเสสินฺติ คาถาปาททฺวยํ ทิสฺสติ ฯ ๔ ม. ปสารยี ฯ
ทิสฺวา อทนฺตํ ทมิตํ มนุสฺสานํ วสํ คตํ
ตโต จิตฺตํ สมาเธมิ ๑ ขลุ ตาย วนํ คตา ฯ
ทนฺติกา ฯ

[๔๓๔] ๕ อมฺม ชีวาติ วนมฺหิ กนฺทสิ อตฺตานํ อธิคจฺฉ อุพฺพิริ
จูฬาสีติสหสฺสานิ สพฺพา ชีวสนามิกา
เอตมฺหาฬาหเน ทฑฺฒา ตาสํ กมนุโสจสิ ฯ
อพฺพุหิ ๒ วต เม สลฺลํ ทุทฺทสํ หทยนิสฺสิตํ
ยํ เม โสกปเรตาย ธีตุ โสกํ พฺยปานุทิ ฯ
สาชฺช อพฺพูฬฺหสลฺลาหํ นิจฺฉาตา ปรินิพฺพุตา
พุทฺธํ ธมฺมญฺจ สงฺฆญฺจ อุเปมิ สรณํ มุนึ ฯ
อุพฺพิริ ฯ

[๔๓๕] ๖ กึเม กตา ราชคเห มนุสฺสา มธธ ปีตา ว อจฺฉเร
เย สุกฺกํ น อุปาสนฺติ เทเสนฺตึ พุทฺธสาสนํ ฯ
ตญฺจ อปฺปฏิวานียํ อเสจนกโมชวํ
ปิวนฺติ มญฺเญ สปฺปญฺญา วลาหกมิวทฺธคู ฯ
สุกฺกา สุกฺเกหิ ธมฺเมหิ วีตราคา สมาหิตา
ธาเรหิ อนฺติมํ เทหํ เชตฺวา มารํ สวาหนํ ฯ
สุกฺกา ฯ

[๔๓๖] ๗ นตฺถิ นิสฺสรณํ โลเก กึ วิเวเกน กาหสิ
#๑ โป. ม. สมาเธสึ ฯ ๒ ม. อพฺพหี ฯ
ภุญฺชาหิ กามรติโย มาหุ ปจฺฉานุตาปินี ฯ
สตฺติสูลูปมา กามา ขนฺธาสํ อธิกุฏฺฏนา
ยํ ตฺวํ กามรตึ พฺรูสิ อรติ ทานิ สา มมํ ฯ
สพฺพตฺถ วิหตา นนฺทิ ตโมกฺขนฺโธ ปทาลิโต
เอวํ ชานาหิ ปาปิม นิหโต ตฺวมสิ อนฺตก ฯ
เสลา ฯ

[๔๓๗] ๘ ยนฺตํ อิสีหิ ปตฺตพฺพํ ฐานํ ทุรภิสมฺภวํ
น ตํ ทฺวงฺคุลิปญฺญาย สกฺกา ปปฺโปตุมิตฺถิยา ฯ
อิตฺถิภาโว โน กึ กยิรา จิตฺตมฺหิ สุสมาหิเต
ญาณมฺหิ วตฺตมานมฺหิ สมฺมา ธมฺมํ วิปสฺสโต ฯ
สพฺพตฺถ วิหตา นนฺทิ ตโมกฺขนฺโธ ปทาลิโต
เอวํ ชานาหิ ปาปิม นิหโต ตฺวมสิ อนฺตก ฯ
โสมา ฯ
ติกนิปาโต นิฏฺฐิโต ฯ
_________________
เถรีคาถาย จตุกฺกนิปาโต

[๔๓๘] ๑ ปุตฺโต พุทฺธสฺส ทายาโท กสฺสโป สุสมาหิโต
ปุพฺเพนิวาสํ โสเวทิ ๑ สคฺคาปายญฺจ ปสฺสติ
#๑ ม. ยุ. โย ฯ
อโถ ชาติกฺขยํ ปตฺโต อภิญฺญาโวสิโต มุนิ
เอตาหิ ตีหิ วิชฺชาหิ เตวิชฺโช โหติ พฺราหฺมโณ ฯ
ตเถว ภทฺทกาปิลานี ๑ เตวิชฺชา มจฺจุหายินี
ธาเรติ อนฺติมํ เทหํ เชตฺวา มารํ สวาหนํ ฯ
ทิสฺวา อาทีนวํ โลเก อุโภ ปพฺพชิตา มยํ
ตฺยมฺห ขีณาสวา ทนฺตา สีติภูตมฺห นิพฺพุตาติ ฯ
ภทฺทกาปิลานี ๑ ฯ
จตุกฺกนิปาโต นิฏฺฐิโต ฯ
_________________
เถรีคาถาย ปญฺจกนิปาโต

[๔๓๙] ๑ ปณฺณวีสติ วสฺสานิ ยโต ปพฺพชิตา อหํ
อจฺฉราสงฺฆาตมตฺตมฺปิ ๒ จิตฺตสฺสุปสมชฺฌคํ ฯ
อลทฺธา เจตโส สนฺตึ กามราเคนวสฺสุตา
พาหา ปคฺคยฺห กนฺทนฺตี วิหารํ ปาวิสึ อหํ ฯ
สา ภิกฺขุนึ อุปาคจฺฉึ ยา เม สทฺธายิกา อหุ
สา เม ธมฺมมเทเสสิ ขนฺธายตนธาตุโย ฯ
ตสฺสา ธมฺมํ สุณิตฺวาน เอกมนฺเต อุปาวิสึ
ปุพฺเพนิวาสํ ชานามิ ทิพฺพจกฺขุํ วิโสธิตํ ฯ
#๑ ม. ภทฺทากาปิลานี ฯ ยุ. ภทฺทากปฺปิลานี ฯ ๒ ม. นาจฺฉรา ฯ
เจโต ปริจฺจญาณญฺจ โสตธาตุ วิโสธิตา
อิทฺธิปิ เม สจฺฉิกตา ปตฺโต เม อาสวกฺขโย
ฉ เมภิญฺญา ๑ สจฺฉิกตา กตํ พุทฺธสฺส สาสนํ ฯ
อญฺญตรา ภิกฺขุนี อปญฺญาตา ฯ

[๔๔๐] ๒ มตฺตา วณฺเณน รูเปน โสภคฺเคน ยเสน จ
โยพฺพเนน จุปตฺถทฺธา อญฺญา สมติมญฺญิหํ ฯ
วิภูเสตฺวา อิมํ กายํ สุจิตฺตํ พาลลาปนํ ๒
อฏฺฐาสึ เวสิทฺวารมฺหิ ลุทฺโท ปาสมิโวฏฺฏิยา ๓ ฯ
ปิลนฺธนํ วิทสฺเสนฺตี ๔ คุยฺหํ ปกาสิตํ พหุํ
อกาสึ วิวิธํ มายํ อุชฺชคฺฆนฺตี พหุํ ชนํ ฯ
สาชฺช ปิณฺฑํ จริตฺวาน มุณฺฑา สงฺฆาฏิปารุตา
นิสินฺนา รุกฺขมูลมฺหิ อวิตกฺกสฺส ลาภินี ฯ
สพฺเพ โยคา สมุจฺฉินฺนา เย ทิพฺพา เย จ มานุสา
เขเปตฺวา อาสเว สพฺเพ สีติภูตมฺหิ นิพฺพุตา ฯ
วิมลา ปุราณคณิกา ฯ

[๔๔๑] ๓ อโยนิโสมนสิการา กามราเคน อทฺธิตา ๕
อโหสึ อุทฺธฏา ปุพฺเพ จิตฺเต อวสวตฺตินี ฯ
ปริยุฏฺฐิตา กิเลเสหิ สุขสญฺญานุวตฺตินี ๖
สมํ จิตฺตสฺส นาลภึ ราคจิตฺตวสานุคา ฯ
#๑ ม. ฉฬภิญฺญา ฯ ๒ ยุ. พาลาลปนํ ฯ ๓ ม. ยุ. โวฑฺฑิย ฯ ๔ ยุ. วิทํเสนฺตี ฯ
#๕ ม. อฏฺฏิตา ฯ ยุ. อทฺทิตา ฯ ๖ ม. สุภสญฺญา … ฯ
กิสา ปณฺฑุ วิวณฺณา จ สตฺต วสฺสานิ จาริหํ
นาหํ ทิวา วา รตฺตึ วา สุขํ วินฺทึ สุทุกฺขิตา ฯ
ตโต รชฺชุํ คเหตฺวาน ปาวิสึ วนมนฺตรํ
วรมฺเม อิธ อุพฺพนฺธํ ยญฺจ หีนํ ปุนาจเร ฯ
ทฬฺหปาสํ กริตฺวาน รุกฺขสาขาย พนฺธิย
ปกฺขิปึ ปาสํ คีวายํ อถ จิตฺตํ วิมุจฺจิ เม ฯ
สีหา ฯ