[๔๒๒] ๓ สุมุตฺติเก สุมุตฺติกา สาธุมุตฺติกมฺหิ มุสลสฺส
อหิริโก เม ฉตฺตกํ วาปิ อุกฺขลิกา เม ทลิทฺทภาวาติ ๑ ฯ
ราคญฺจ อหํ โทสญฺจ วิจฺฉินฺทนฺตี วิหรามิ
สา รุกฺขมูลมุปคมฺม อโห สุขนฺติ สุขโต ฌายามิ ฯ
อญฺญตรา เถรีภิกฺขุนี อปญฺญาตา ฯ

[๔๒๓] ๔ ยาว กาสิชนปโท สุงฺโก เม ตตฺตโก อหุ
ตํ กตฺวา นิคโม ๒ อคฺฆํ อคฺเฆนคฺฆํ ฐเปสิ มํ ฯ
อถ นิพฺพินฺทหํ รูเป นิพฺพินฺทญฺจ วิรชฺชหํ
มา ปุน ชาติสํสารํ สนฺธาเวยฺยํ ปุนปฺปุนํ
ติสฺโส วิชฺชา สจฺฉิกตา กตํ พุทฺธสฺส สาสนํ ฯ
อฑฺฒกาสี ๓ ฯ

[๔๒๔] ๕ กิญฺจาปิ โขมฺหิ กิสิกา คิลานา พาฬฺหทุพฺพลา
ทณฺฑโมลุพฺภ คจฺฉามิ ปพฺพตํ อภิรูหิย ฯ
สงฺฆาฏึ นิกฺขิปิตฺวาน ปตฺตกญฺจ นิกุชฺชิย
เสเล ขมฺเภสึ อตฺตานํ ตโมกฺขนฺธํ ปทาลิย ฯ
จิตฺตา ฯ

[๔๒๕] ๖ กิญฺจาปิ โขมฺหิ ทุกฺขิตา ทุพฺพลา คตโยพฺพนา
ทณฺฑโมลุพฺภ คจฺฉามิ ปพฺพตํ อภิรูหิย ฯ
นิกฺขิปิตฺวาน สงฺฆาฏึ ปตฺตกญฺจ นิกุชฺชิย
นิสินฺนา จมฺหิ เสลมฺหิ อถ จิตฺตํ วิมุจฺจิ เม
#๑ ม. เทฑฺฑุภํ วาติ ฯ ๒ โป. ม. เนคโม ฯ ๓ โป. ม. อฑฺฒกาสิ ฯ
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
เมตฺติกา ฯ

[๔๒๖] ๗ จาตุทฺทสี ปญฺจทสี ๑ ยา จ ปกฺขสฺส อฏฺฐมี
ปาฏิหาริกปกฺขญฺจ อฏฺฐงฺคสุสมาคตํ
อุโปสถํ อุปคจฺฉึ เทวกายาภินนฺทินี ฯ
สาชฺช เอเกน ภตฺเตน มุณฺฑา สงฺฆาฏิปารุตา
เทวกายํ น ปตฺเถหํ วิเนยฺย หทเย ทรํ ฯ
มิตฺตา ฯ

[๔๒๗] ๘ อุทฺธํ ปาทตลา อมฺม อโธ เจ ๒ เกสมตฺถกา
ปจฺจเวกฺขสฺสุมํ กายํ อสุจึ ปูติคนฺธิกํ ฯ
เอวํ วิหรมานาย สพฺโพ ราโค สมูหโต
ปริฬาโห สมุจฺฉินฺโน สีติภูตมฺหิ นิพฺพุตา ฯ
อภยมาตา ฯ

[๔๒๘] ๙ อภเย ภิทุโร กาโย ยตฺถ สตฺตา ปุถุชฺชนา
นิกฺขิปิสฺสามิมํ เทหํ สมฺปชานา ปฏีสตา ๓ ฯ
พหูหิ ทุกฺขธมฺเมหิ อปฺปมาทรตาย เม
ตณฺหกฺขโย อนุปฺปตฺโต กตํ พุทฺธสฺส สาสนํ ฯ
อภยตฺเถรี ฯ
#๑ ม. จาตุทฺทสึ ปญฺจทสึ ฯ ๒ โป. ม. อโธ เว ฯ ๓ ม. ยุ. สตีมตี ฯ

[๔๒๙] ๑๐ จตุกฺขตฺตุํ ปญฺจกฺขตฺตุํ วิหารา อุปนิกฺขมึ
อลทฺธา เจตโส สนฺตึ จิตฺเต อวสวตฺตินี ฯ
ตสฺสา เม อฏฺฐมี รตฺติ ยโต ตณฺหา สมูหตา
พหูหิ ทุกฺขธมฺเมหิ อปฺปมาทรตาย เม
ตณฺหกฺขโย อนุปฺปตฺโต กตํ พุทฺธสฺส สาสนํ ฯ
สามา ฯ
ทุกนิปาโต สมตฺโต ฯ
_________________
เถรีคาถาย ติกนิปาโต

[๔๓๐] ๑ ปณฺณวีสติ วสฺสานิ ยโต ปพฺพชิตาย เม
นาภิชานามิ จิตฺตสฺส สมํ ลทฺธํ กุทาจนํ ฯ
อลทฺธา เจตโส สนฺตึ จิตฺเต อวสวตฺตินี
ตโต สํเวคมาปาทึ สริตฺวา ชินสาสนํ ฯ
พหูหิ ทุกฺขธมฺเมหิ อปฺปมาทรตาย เม
ตณฺหกฺขโย อนุปฺปตฺโต กตํ พุทฺธสฺส สาสนํ
อชฺช เม สตฺตมี รตฺติ ยโต ตณฺหา วิโสสิตา ฯ
อญฺญตรา สามา ฯ

[๔๓๑] ๒ จตุกฺขตฺตุํ ปญฺจกฺขตฺตุํ วิหารา อุปนิกฺขมึ
อลทฺธา เจตโส สนฺตึ จิตฺเต อวสวตฺตินี ฯ
สา ภิกฺขุนึ อุปาคจฺฉึ ยา เม สทฺธายิกา อหุ
สา เม ธมฺมมเทเสสิ ขนฺธายตนธาตุโย ฯ
ตสฺสา ธมฺมํ สุณิตฺวาน ยถา มํ อนุสาสิ สา
สตฺตาหํ เอกปลฺลงฺเก ๑ นิสีทึ ปีติสุขมปฺปีตา ๒ ฯ
อฏฺฐมิยา ปาเท ปสาเรสึ [๓] ตโมกฺขนฺธํ ปทาลิย ฯ
อุตฺตมา ฯ