[๔๑๒] ๑๑ สุมุตฺตา สาธุมุตฺตมฺหิ ตีหิ ขุชฺเชหิ มุตฺติยา
อุทุกฺขเลน มุสเลน ปตินา ขุชฺชเกน จ
#๑ ม. ยุ. อาราธยาหิ ฯ
มุตฺตมฺหิ ชาติมรณา ภวเนตฺติ สมูหตา ฯ
มุตฺตา ฯ

[๔๑๓] ๑๒ ฉนฺทชาตา อวสายี ๑ มนสา จ ผุฏฺฐา ๒ สิยา
กาเมสุ อปฺปฏิพทฺธจิตฺตา อุทฺธํโสตาติ วุจฺจติ ฯ
ธมฺมทินฺนา ฯ

[๔๑๔] ๑๓ กโรถ พุทฺธสาสนํ ยํ กตฺวา นานุตปฺปติ
ขิปฺปํ ปาทานิ โธวิตฺวา เอกมนฺเต นิสีทถ ฯ
วิสาขา ฯ

[๔๑๕] ๑๔ ธาตุโย ทุกฺขโต ทิสฺวา มา ชาติ ปุนราคมิ
ภเว ฉนฺทํ วิราเชตฺวา อุปสนฺตา จริสฺสสิ ฯ
สุมนา ฯ

[๔๑๖] ๑๕ กาเยน สํวุตา อาสึ วาจาย อุท เจตสา
สมูลํ ตณฺหํ อพฺพุยฺห สีติภูตมฺหิ นิพฺพุตา ฯ
อุตฺตรา ฯ

[๔๑๗] ๑๖ สุขํ ตฺวํ วุฑฺฒิเก เสหิ กตฺวา โจเฬน ปารุตา
อุปสนฺโต หิ เต ราโค สีติภูตาสิ นิพฺพุตา ฯ
สุมนา วุฑฺฒปพฺพชิตา ฯ

[๔๑๘] ๑๗ ปิณฺฑปาตํ จริตฺวาน ทณฺฑมาทาย ๓ ทุพฺพลา
เวธมาเนหิ คตฺเตหิ ตตฺเถว นิปตึ ฉมา
#๑ ยุ. อวสาเย ฯ ๒ ม. ยุ. ผุฏา ฯ ๓ ม. ยุ. ทณฺฑโมลุพฺภ ฯ
ทิสฺวา อาทีนวํ กาเย อถ จิตฺตํ วิมุจฺจิ เม ฯ
ธมฺมา ฯ

[๔๑๙] ๑๘ หิตฺวา ฆเร ปพฺพชิตฺวา หิตฺวา ปุตฺตํ ปสุํ ปิยํ
หิตฺวา ราคญฺจ โทสญฺจ อวิชฺชญฺจ วิราชิย
สมูลํ ตณฺหํ อพฺพุยฺห อุปสนฺตมฺหิ นิพฺพุตา ฯ
สงฺฆา ฯ
เอกิกา ๑ เถริโย สมตฺตา ฯ
_______________________
เถรีคาถาย ทุกนิปาโต

[๔๒๐] ๑ อาตุรํ อสุจึ ปูตึ ปสฺส นนฺเท สมุสฺสยํ
อสุภาย จิตฺตํ ภาเวหิ เอกคฺคํ สุสมาหิตํ ฯ
อนิมิตฺตญฺจ ภาเวหิ มานานุสยมุชฺชห
ตโต มานาภิสมยา อุปสนฺตา จริสฺสสิ ฯ
อิตฺถํ สุทํ ภควา นนฺทํ สิกฺขมานํ อิมาหิ คาถาหิ อภิณฺหํ
โอวทติ ฯ

[๔๒๑] ๒ เย อิเม สตฺต โพชฺฌงฺคา มคฺคา นิพฺพานปตฺติยา
ภาวิตา เต มยา สพฺเพ ยถา พุทฺเธน เทสิตา ฯ
ทิฏฺโฐ หิ เม โส ภควา อนฺติโมยํ สมุสฺสโย
วิกฺขีโณ ชาติสํสาโร นตฺถิทานิ ปุนพฺภโว ฯ
ชนฺตา ๒ ฯ
#๑ ม. เอกกนิปาโต นิฏฺฐิโต ฯ สพฺพตฺถ อีทิสปาโฐ ทิสฺสติ ฯ ๒ ยุ. เชนฺตี ฯ