[๓๗๒] ๓ อนาคตํ โย ปฏิกจฺจ ปสฺสติ
หิตญฺจ อตฺถํ อหิตญฺจ ตํ ทฺวยํ
วิทฺเทสิโน ตสฺส หิเตสิโน วา
รนฺธํ น ปสฺสนฺติ สเมกฺขมานา ฯ
อานาปานสตี ยสฺส ปริปุณฺณา สุภาวิตา
อนุปุพฺพํ ปริจิตา ยถา พุทฺเธน เทสิตา
โสมํ โลกํ ปภาเสติ อพฺภา มุตฺโตว จนฺทิมา ฯ
โอทาตํ วต เม จิตฺตํ อปฺปมาณํ สุภาวิตํ
นิพทฺธํ ปคฺคหีตญฺจ สพฺพา โอภาสเต ทิสา ฯ
ชีวเตวาปิ สปฺปญฺโญ อปิ วิตฺตปริกฺขยา
ปญฺญาย จ อลาเภน วิตฺตวาปิ น ชีวติ ฯ
ปญฺญา สุตวินิจฺฉินี ปญฺญา กิตฺติสิโลกวฑฺฒนี
ปญฺญาสหิโต นโร อิธ อปิ ทุกฺเขสุ สุขานิ วินฺทติ ฯ
นายํ อชฺชตโน ธมฺโม นจฺเฉโร นปิ อพฺภุโต
ยตฺถ ชาเยถ มีเยถ ตตฺถ กึ วิย อพฺภุตํ ฯ
อนนฺตรํ หิ ชาตสฺส ชีวิตา มรณํ ธุวํ
ชาตา ชาตา มรนฺตีธ เอวํธมฺมา หิ ปาณิโน ฯ
น เหตทตฺถาย มตสฺส โหติ
ยํ ชีวิตตฺถํ ปรโปริสานํ
มตมฺหิ รุณฺณํ น ยโส น โสกฺยํ ๑
#๑ ม. ยุ. โลกยํ ฯ
น วณฺณิตํ สมณพฺราหฺมเณหิ ฯ
จกฺขุํ สรีรํ อุปหนฺติ โรณฺณํ ๑
นิหิยฺยติ วณฺณพลํ มตี จ
อานนฺทิโน ตสฺส ทิสา ภวนฺติ
หิเตสิโน จสฺส ๒ สุขี ภวนฺติ ฯ
ตสฺมา หิ อิจฺเฉยฺย กุเล วสนฺเต
เมธาวิโน เจว พหุสฺสุเต จ
เยสํ หิ ปญฺญาวิภเวน กิจฺจํ
ตรนฺติ นาวาย นทึว ปุณฺณนฺติ ฯ
มหากปฺปิโน เถโร ฯ

[๓๗๓] ๔ ทนฺธา มยฺหํ คตี อาสิ ปริภูโต ปุเร อหํ
ภาตา จ มํ ปณาเมสิ คจฺฉทานิ ตุวํ ฆรํ ฯ
โสหํ ปณามิโต สนฺโต สงฺฆารามสฺส โกฏฺฐเก
ทุมฺมโน ตตฺถ อฏฺฐาสึ สาสนสฺมึ อเปกฺขวา ฯ
ภควา ตตฺถ อาคจฺฉิ สีสํ มยฺหํ ปรามสิ
พาหายํ มํ คเหตฺวาน สงฺฆารามํ ปเวสยิ ฯ
อนุกมฺปาย เม สตฺถา ปาทาสิ ปาทปุญฺฉนึ
เอตํ สุทฺธํ อธิฏฺเฐหิ เอกมนฺตํ สฺวธิฏฺฐิตํ ฯ
ตสฺสาหํ วจนํ สุตฺวา วิหาสึ สาสเน รโต
#๑ ม. เตน ฯ ๒ ม. ยุ. นาสฺส ฯ
สมาธึ ปฏิปาเทสึ อุตฺตมตฺถสฺส ปตฺติยา ฯ
ปุพฺเพนิวาสํ ชานามิ ทิพฺพจกฺขุํ วิโสธิตํ
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
สหสฺสกฺขตฺตุํ อตฺตานํ นิมฺมินิตฺวาน ปนฺถโก
นิสีทิ อมฺพวเน ๑ รมฺเม ยาว กาลปฺปเวทนํ ฯ
ตโต เม สตฺถา ปาเหสิ ทูตํ กาลปฺปเวทกํ
ปเวทิตมฺหิ กาลมฺหิ เวหาสานุปสงฺกมึ ฯ
วนฺทิตฺวา สตฺถุโน ปาเท เอกมนฺตํ นิสีทหํ
นิสินฺนํ มํ วิทิตฺวาน อถ สตฺถา ปฏิคฺคหิ ฯ
อายาโค สพฺพโลกสฺส อาหุตีนํ ปฏิคฺคโห
ปุญฺญกฺเขตฺตํ มนุสฺสานํ ปฏิคฺคณฺหิตฺถ ทกฺขิณนฺติ ฯ
จูฬปนฺถโก เถโร ฯ

[๓๗๔] ๕ นานากุลมลสมฺปุณฺโณ มหาอุกฺการสมฺภโว
จนฺทนิกํว ปริปกฺกํ มหาคณฺโฑ มหาวโณ
ปุพฺพรุหิรสมฺปุณฺโณ คูถกูเป นิคาฬฺหิโก ๒
อาโปปคฺฆรณี ๓ กาโย สทา สนฺทติ ปูติกํ ฯ
สฏฺฐิกณฺฑรสมฺพนฺโธ มํสเลปนเลปิโต
จมฺมกญฺจุกสนฺนทฺโธ ปูติกาโย นิรตฺถโก
อฏฺฐิสงฺฆาฏฆฏิโต นฺหารุสุตฺตนิพนฺธโน
เนเกสํ สงฺคติภาวา กปฺเปติ อิริยาปถํ ฯ
#๑ ม. นิสีทมฺพวเน ฯ ๒ ม. คูถกูเป นคาฬฺหิโก ฯ ๓ ม. อาโปปคฺฆรโณ กาโย ฯ
ธุวปฺปยาโต มรณสฺส ๑ มจฺจุราชสฺส สนฺติเก
อิเธว ฉฑฺฑยิตฺวาน เยนกามงฺคโม นโร ฯ
อวิชฺชาย นิวุโต กาโย จตุคนฺเถน คนฺถิโต
โอฆสํสีทโน กาโย อนุสยชาลโมตฺถโต
ปญฺจนีวรเณ ยุตฺโต วิตกฺเกน สมปฺปิโต
ตณฺหามูเลนานุคโต โมหจฺฉทนฉาทิโต
เอวายํ วตฺตตี ๒ กาโย กมฺมยนฺเตน ยนฺติโต ฯ
สมฺปตฺติ จ วิปตฺยนฺตา นานาภโว วิปชฺชติ ฯ
เยมํ กายํ มมายนฺติ อนฺธพาลา ปุถุชฺชนา
วฑฺเฒนฺติ กฏสึ โฆรํ อาทิยนฺติ ปุนพฺภวํ ฯ
เยมํ กายํ วิวชฺเชนฺติ คูถลิตฺตํว ปนฺนคํ
ภวมูลํ วมิตฺวาน ปรินิพฺพิสฺสนฺตฺยนาสวาติ ฯ
กปฺโป เถโร ฯ

[๓๗๕] ๖ วิวิตฺตํ อปฺปนิคฺโฆสํ วาฬมิคนิเสวิตํ
เสเว เสนาสนํ ภิกฺขุ ปฏิสลฺลานการณา ฯ
สงฺการปุญฺชา อาหตฺวา สุสานา รถิยาหิ จ
ตโต สงฺฆาฏิกํ กตฺวา ลูขํ ธาเรยฺย จีวรํ ฯ
นีจํ มนํ กริตฺวาน สปทานํ กุลา กุลํ
ปิณฺฑิกาย จเร ภิกฺขุ คุตฺตทฺวาโร สุสํวุโต ฯ
ลูเขนปิ จ ๓ สนฺตุสฺเส นาญฺญํ ปตฺเถ รสํ พหุํ
#๑ ม. มรณาย ฯ ๒ ม. วตฺตเต ฯ ๓ ม. ลูเขนปิ วา ฯ
รเสสุ อนุคิทฺธสฺส ฌาเน น รมตี มโน ฯ
อปฺปิจฺโฉ เจว สนฺตุฏฺโฐ ปวิวิตฺโต วเส มุนิ
อสํสฏฺโฐ คหฏฺเฐหิ อนาคาเรหิ จูภยํ ฯ
ยถา ชโฬ จ มูโค จ อตฺตานํ ทสฺสเย ตถา
นาติเวลํ ปภาเสยฺย ๑ สงฺฆมชฺฌมฺหิ ปณฺฑิโต ฯ
น โส อุปวเท กญฺจิ อุปฆาตํ วิวชฺชเย
สํวุโต ปาติโมกฺขสฺมึ มตฺตญฺญู จสฺส โภชเน ฯ
สุคฺคหีตนิมิตฺตสฺส จิตฺตสฺสุปฺปาทโกวิโท
สมถํ อนุยุญฺเชยฺย กาเลน จ วิปสฺสนํ ฯ
วิริยสาตจฺจสมฺปนฺโน ยุตฺตโยโค สทา สิยา
น จ อปฺปตฺวา ทุกฺขนฺตํ ๒ วิสฺสาสํ เอยฺย ปณฺฑิโต ฯ
เอวํ วิหรมานสฺส สุทฺธิกามสฺส ภิกฺขุโน
ขิยฺยนฺติ อาสวา สพฺเพ นิพฺพุติญฺจาธิคจฺฉตีติ ฯ
อุปเสโน วงฺคนฺตปุตฺโต เถโร ฯ

[๓๗๖] ๗ วิชาเนยฺย สกํ อตฺถํ อวโลเกยฺยาถ ปาวจนํ
ยญฺเจตฺถ อสฺส ปฏิรูปํ สามญฺญํ อชฺฌุปคตสฺส ฯ
มิตฺตํ อิเธว ๓ กลฺยาณํ สิกฺขา วิปุลํ สมาทานํ
สุสฺสูสา จ ครูนํ เอตํ สมณสฺส ปฏิรูปํ ฯ
พุทฺเธสุ สคารวตา ธมฺเม อปจิติ ยถาภูตํ
#๑ ม. สมฺภาเสยฺย ฯ ๒ ยุ. ทุกฺขสฺสนฺตํ ฯ ๓ ม. อิธ เจ ฯ ยุ. อิธ ฯ
สงฺเฆ จ จิตฺติกาโร เอตํ สมณสฺส ปฏิรูปํ ฯ
อาจารโคจเร ยุตฺโต อาชีโว โสธิโต อคารโยฺห
จิตฺตสฺส จ สณฺฐปนํ ๑ เอตํ สมณสฺส ปฏิรูปํ ฯ
จาริตฺตํ อถ วาริตฺตํ อิริยาปถิยํ ปสาทนิยํ
อธิจิตฺเต จ อาโยโค เอตํ สมณสฺส ปฏิรูปํ ฯ
อารญฺญกานิ เสนาสนานิ ปนฺตานิ อปฺปสทฺทานิ
ภชิตพฺพานิ มุนินา เอตํ สมณสฺส ปฏิรูปํ ฯ
สีลญฺจ พาหุสจฺจญฺจ ธมฺมานํ ปวิจโย ยถาภูตํ
สจฺจานํ อภิสมโย เอตํ สมณสฺส ปฏิรูปํ ฯ
ภาเวยฺย จ อนิจฺจนฺติ อนตฺตสญฺญํ อสุภสญฺญญฺจ
โลกมฺหิ จ อนภิรตึ เอตํ สมณสฺส ปฏิรูปํ ฯ
ภาเวยฺย จ โพชฺฌงฺเค อิทฺธิปาทานิ อินฺทฺริยพลานิ
อฏฺฐงฺคมคฺคมริยํ เอตํ สมณสฺส ปฏิรูปํ ฯ
ตณฺหํ ปชเหยฺย มุนี สมูลเก อาสเว ปทาเลยฺย
วิหเรยฺย วิปฺปมุตฺโต เอตํ สมณสฺส ปฏิรูปนฺติ ฯ
โคตโม เถโร ฯ
อุทฺทานํ
กาฬุทายี จ โส เถโร เอกวิหารี จ กปฺปิโน
จูฬปนฺถโก กปฺโป จ อุปเสโน จ โคตโม
สตฺติเม ทสเก เถรา คาถาโย เจตฺถ สตฺตตีติ ฯ
ทสกนิปาโต นิฏฺฐิโต ฯ
________________
#๑ โป. สณฺฑาปนํ ฯ
เถรคาถาย เอกาทสกนิปาโต

[๓๗๗] ๑ กินฺตวตฺโถ วเน ตาต อุชฺชุหาโนว ปาวุเส
เวรมฺพา ๑ รมณียา เต ปวิเวโก หิ ฌายินํ ฯ
ยถา อพฺภานิ เวรมฺโพ วาโต นุทติ ปาวุเส
สญฺญา เม อภิกีรนฺติ วิเวกปฏิสญฺญุตา ฯ
อปณฺฑโร อณฺฑสมฺภโว สีวถิกาย นิเกตจาริโก
อุปฺปาทยเตว เม สตึ สนฺเทหสฺมึ วิราคนิสฺสิตํ ฯ
ยญฺจ อญฺเญ น รกฺขนฺติ โย จ อญฺเญ น รกฺขติ
ส เว ภิกฺขุ สุขํ เสติ กาเมสุ อนเปกฺขวา ฯ
อจฺโฉทิกา ปุถุสิลา โคนงฺคุลมิคายุตา
อมฺพุเสวาลสญฺฉนฺนา เต เสลา รมยนฺติ มํ ฯ
วสิตํ เม อรญฺเญสุ กนฺทราสุ คุหาสุ จ
เสนาสเนสุ ปนฺเตสุ วาฬมิคนิเสวิเต ฯ
อิเม หญฺญนฺตุ วชฺฌนฺตุ ทุกฺขํ ปปฺโปนฺตุ ปาณิโน
สงฺกปฺปํ นาภิชานามิ อนริยํ โทสสํหิตํ ฯ
ปริจิณฺโณ มยา สตฺถา กตํ พุทฺธสฺส สาสนํ
โอหิโต ครุโก ภาโร ภวเนตฺติ สมูหตา ฯ
ยสฺสตฺถาย ๒ ปพฺพชิโต อคารสฺมา อนคาริยํ
โส เม อตฺโถ อนุปฺปตฺโต สพฺพสํโยชนกฺขโย ฯ
#๑ ม. เวรมฺภา ฯ ๒ ม. ยุ. ยสฺส จตฺถาย ฯ
นาภินนฺทามิ มรณํ นาภินนฺทามิ ชีวิตํ
กาลญฺจ ปฏิกงฺขามิ นิพฺพิสํ ภตโก ยถา ฯ
นาภินนฺทามิ มรณํ นาภินนฺทามิ ชีวิตํ
กาลญฺจ ปฏิกงฺขามิ สมฺปชาโน ปติสฺสโตติ ฯ
สงฺกิจฺโจ เถโร ฯ
อุทฺทานํ
สงฺกิจฺจตฺเถโร เอโกว กตกิจฺโจ อนาสโว
เอกาทสนิปาตมฺหิ คาถา เอกาทเสว ตาติ ฯ
เอกาทสกนิปาโต นิฏฺฐิโต ฯ
__________________
เถรคาถาย ทฺวาทสกนิปาโต

[๓๗๘] ๑ สีลเมวิธ สิกฺเขถ อสฺมึ โลเก สุสิกฺขิตํ
สีลํ หิ สพฺพสมฺปตฺตึ อุปนาเมติ เสวิตํ ฯ
สีลํ รกฺเขยฺย เมธาวี ปตฺถยาโน ตโย สุเข
ปสํสํ วิตฺติลาภญฺจ เปจฺจ สคฺเค ๑ ปโมทนํ ฯ
สีลวา หิ พหู มิตฺเต สญฺญเมนาธิคจฺฉติ
ทุสฺสีโล ปน มิตฺเตหิ ธํสเต ปาปมาจรํ ฯ
อวณฺณญฺจ อกิตฺติญฺจ ทุสฺสีโล ลภเต นโร
วณฺณํ กิตฺตึ ปสํสญฺจ สทา ลภติ สีลวา ฯ
#๑ สี. ยุ. เปจฺจ สคฺเค จ ฯ
อาทิ สีลํ ปติฏฺฐา จ กลฺยาณานญฺจ มาตุกํ
ปมุขํ สพฺพธมฺมานํ ตสฺมา สีลํ วิโสธเย ฯ
เวลา จ สํวรํ สีลํ จิตฺตสฺส อภิหาสนํ ๑
ติตฺถญฺจ สพฺพพุทฺธานํ ตสฺมา สีลํ วิโสธเย ฯ
สีลํ พลํ อปฺปฏิมํ สีลํ อาวุธมุตฺตมํ
สีลํ อาภรณํ ๒ เสฏฺฐํ สีลํ กวจมพฺภุตํ ฯ
สีลํ เสตุ มเหสกฺโข สีลํ คนฺโธ อนุตฺตโร
สีลํ วิเลปนํ เสฏฺฐํ เยน วาติ ทิโส ทิสํ ฯ
สีลํ สมฺพลเมวคฺคํ ๓ สีลํ ปาเถยฺยมุตฺตมํ
สีลํ เสฏฺโฐ อติวาโห เยน วาติ ทิโส ทิสํ ฯ
อิเธว นินฺทํ ลภติ เปจฺจาปาเย จ ทุมฺมโน
สพฺพตฺถ ทุมฺมโน พาโล สีเลสุ อสมาหิโต ฯ
อิเธว กิตฺตึ ลภติ เปจฺจ สคฺเค จ สุมโน
สพฺพตฺถ สุมโน ธีโร สีเลสุ สุสมาหิโต ฯ
สีลเมว อิธ อคฺคํ ปญฺญวา ปน อุตฺตโม
มนุสฺเสสุ จ เทเวสุ สีลปญฺญาณโต ชยนฺติ ฯ
สีลวตฺเถโร ฯ

[๓๗๙] ๒ นีเจ กุลมฺหิ ชาโตหํ ทลิทฺโท อปฺปโภชโน
หีนํ กมฺมํ มมํ อาสิ อโหสึ ปุปฺผฉฑฺฑโก ฯ
#๑ ยุ. อภิภาสนํ ฯ ๒ ม. ยุ. สีลมาภรณํ ฯ ๓ โป. สพลเมวคฺคํ ฯ
ชิคุจฺฉิโต มนุสฺสานํ ปริภูโต จ วมฺภิโต
นีจํ มนํ กริตฺวาน วนฺทิสฺสํ พหุกํ ชนํ ฯ
อถทฺทสาสึ สมฺพุทฺธํ ภิกฺขุสงฺฆปุรกฺขตํ
ปวิสนฺตํ มหาวีรํ มคธานํ ปุรุตฺตมํ ฯ
นิกฺขิปิตฺวาน พฺยาภงฺคึ วนฺทิตุํ อุปสงฺกมึ
มเมว อนุกมฺปาย อฏฺฐาสิ ปุริสุตฺตโม ฯ
วนฺทิตฺวา สตฺถุโน ปาเท เอกมนฺตํ ฐิโต ตทา
ปพฺพชฺชํ อหมายาจึ สพฺพสตฺตานมุตฺตมํ ฯ
ตโต การุณิโก สตฺถา สพฺพโลกานุกมฺปโก
เอหิ ภิกฺขูติ มํ อาห สา เม อาสูปสมฺปทา ฯ
โสหํ เอโก อรญฺญสฺมึ วิหรนฺโต อตนฺทิโต
อกาสึ สตฺถุ วจนํ ยถา มํ โอวที ชิโน ฯ
รตฺติยา ปฐมํ ยามํ ปุพฺพชาติมนุสฺสรึ
รตฺติยา มชฺฌิมํ ยามํ ทิพฺพจกฺขุํ วิโสธยึ ๑
รตฺติยา ปจฺฉิเม ยาเม ตโมกฺขนฺธํ ปทาลยึ ฯ
ตโต รตฺยา วิวสเน สุริยสฺสุคฺคมนํ ปติ
อินฺโท พฺรหฺมา จ อาคนฺตฺวา มํ นมสฺสึสุ ปญฺชลี
นโม เต ปุริสาชญฺญ นโม เต ปุริสุตฺตม
ยสฺส เต อาสวา ขีณา ทกฺขิเณยฺโยสิ มาริส ฯ
#๑ ยุ. วิโสธิตํ ฯ
ตโต ทิสฺวาน มํ สตฺถา เทวสงฺฆปุรกฺขตํ
สิตํ ปาตุกริตฺวาน อิมมตฺถํ อภาสถ
ตเปน พฺรหฺมจริเยน สญฺญเมน ทเมน จ
เอเตน พฺราหฺมโณ โหติ เอตํ พฺราหฺมณมุตฺตมนฺติ ฯ
สุนีโต เถโร ฯ
อุทฺทานํ
สีลวา จ สุนีโต จ เถรา เทฺวเต มหิทฺธิกา
ทฺวาทสมฺหิ นิปาตมฺหิ คาถาโย จตุวีสตีติ ฯ
ทฺวาทสกนิปาโต นิฏฺฐิโต ฯ
__________________
เถรคาถาย เตรสกนิปาโต

[๓๘๐] ๑ ยาหุ รฏฺเฐ สมุกฺกฏฺโฐ รญฺโญ องฺคสฺส ปตฺถคู ๑
สฺวาชฺช ธมฺเมสุ อุกฺกฏฺโฐ โสโณ ทุกฺขสฺส ปารคู ฯ
ปญฺจ ฉินฺเท ปญฺจ ชเห ปญฺจ จุตฺตริ ภาวเย
ปญฺจสงฺคาติโค ภิกฺขุ โอฆติณฺโณติ วุจฺจติ ฯ
อุนฺนฬสฺส ปมตฺตสฺส พาหิราสสฺส ภิกฺขุโน
สีลํ สมาธิ ปญฺญา จ ปาริปูรึ น คจฺฉติ ฯ
ยญฺหิ กิจฺจํ ตทปวิทฺธํ อกิจฺจํ ปน กยีรติ
#๑ โป. ยุ. ปทฺธคุ ฯ ม. ปตฺถคู ฯ
อุนฺนฬานํ ปมตฺตานํ เตสํ วฑฺฒนฺติ อาสวา ฯ
เยสญฺจ สุสมารทฺธา นิจฺจํ กายคตา สติ
อกิจฺจนฺเต น เสวนฺติ กิจฺเจ สาตจฺจการิโน
สตานํ สมฺปชานานํ อตฺถํ คจฺฉนฺติ อาสวา ฯ
อุชุมคฺคมฺหิ อกฺขาเต คจฺฉถ มา นิวตฺตถ
อตฺตนา โจทยตฺตานํ นิพฺพานมภิหารเย ฯ
อจฺจารทฺธมฺหิ วิริยมฺหิ สตฺถา โลเก อนุตฺตโร
วีโณปมํ กริตฺวาน ๑ ธมฺมํ เทเสสิ จกฺขุมา ฯ
ตสฺสาหํ วจนํ สุตฺวา วิหาสึ สาสเน รโต
สมถํ ๒ ปฏิปาเทสึ อุตฺตมตฺถสฺส ปตฺติยา
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
เนกฺขมฺเม อธิมุตฺตสฺส ปวิเวกญฺจ เจตโส
อพฺยาปชฺฌาธิมุตฺตสฺส อุปาทานกฺขยสฺส จ
ตณฺหกฺขยาธิมุตฺตสฺส อสมฺโมหญฺจ เจตโส
ทิสฺวา อายตนุปฺปาทํ สมฺมา จิตฺตํ วิมุจฺจติ ฯ
ตสฺส สมฺมา วิมุตฺตสฺส สนฺตจิตฺตสฺส ภิกฺขุโน
กตสฺส ปฏิจโย นตฺถิ กรณียํ น วิชฺชติ ฯ
เสโล ยถา เอกฆโน วาเตน น สมีรติ
เอวํ รูปา รสา สทฺทา คนฺธา ผสฺสา จ เกวลา
#๑ ม. ยุ. กริตฺวา เม ฯ ๒ ยุ. สมตํ ฯ
อิฏฺฐา ธมฺมา อนิฏฺฐา จ นปฺปเวเธนฺติ ตาทิโน
ฐิตํ จิตฺตํ วิสญฺญุตฺตํ วยญฺจสฺสานุปสฺสตีติ ฯ
โสโณ โกฬิวิโส เถโร ฯ
อุทฺทานํ
โสโณ โกฬิวิโส เถโร เอโกเยว มหิทฺธิโก
เตรสมฺหิ นิปาตมฺหิ คาถาโย เจตฺถ เตรสาติ ฯ
เตรสกนิปาโต นิฏฺฐิโต ฯ
______________________
เถรคาถาย จุทฺทสกนิปาโต

[๓๘๑] ๑ ยทา อหํ ปพฺพชิโต อคารสฺมา อนคาริยํ
นาภิชานามิ สงฺกปฺปํ อนริยํ โทสสํหิตํ ฯ
อิเม หญฺญนฺตุ วชฺฌนฺตุ ทุกฺขํ ปปฺโปนฺตุ ปาณิโน
สงฺกปฺปํ นาภิชานามิ อิมสฺมึ ทีฆมนฺตเร ฯ
เมตฺตญฺจ อภิชานามิ อปฺปมาณํ สุภาวิตํ
อนุปุพฺพํ ปริจิตํ ยถา พุทฺเธน เทสิตํ ฯ
สพฺพมิตฺโต สพฺพสโข สพฺพภูตานุกมฺปโก
เมตฺตํ จิตฺตญฺจ ภาเวมิ อพฺยาปชฺฌรโต สทา ฯ
อสํหีรํ อสํกุปฺปํ จิตฺตํ อาโมทยามหํ
พฺรหฺมวิหารํ ภาเวมิ อกาปุริสเสวิตํ ฯ
อวิตกฺกํ สมาปนฺโน สมฺมาสมฺพุทฺธสาวโก
อริเยน ตุณฺหีภาเวน อุเปโต โหติ ตาวเท ฯ
ยถาปิ ปพฺพโต เสโล อจโล สุปฺปติฏฺฐิโต
เอวํ โมหกฺขยา ภิกฺขุ ปพฺพโตว น เวธติ ฯ
อนงฺคณสฺส โปสสฺส นิจฺจํ สุจิคเวสิโน
วาลคฺคมตฺตํ ปาปสฺส อพฺภมตฺตํว ขายติ ฯ
นครํ ยถา ปจฺจนฺตํ คุตฺตํ สนฺตรพาหิรํ
เอวํ โคเปถ อตฺตานํ ขโณ โว มา อุปจฺจคา ฯ
นาภินนฺทามิ มรณํ นาภินนฺทามิ ชีวิตํ
กาลญฺจ ปฏิกงฺขามิ นิพฺพิสํ ภตโก ยถา ฯ
นาภินนฺทามิ มรณํ นาภินนฺทามิ ชีวิตํ
กาลญฺจ ปฏิกงฺขามิ สมฺปชาโน ปติสฺสโต ฯ
ปริจิณฺโณ มยา สตฺถา กตํ พุทฺธสฺส สาสนํ
โอหิโต ครุโก ภาโร ภวเนตฺติ สมูหตา ฯ
ยสฺส จตฺถาย ปพฺพชิโต อคารสฺมา อนคาริยํ
โส เม อตฺโถ อนุปฺปตฺโต สพฺพสํโยชนกฺขโย ฯ
สมฺปาเทถปฺปมาเทน เอสา เม อนุสาสนี
หนฺทาหํ ปรินิพฺพิสฺสํ วิปฺปมุตฺโตมฺหิ สพฺพธีติ ฯ
เรวโต เถโร ฯ