[๓๕๒] ๖ ปณฺณวีสติวสฺสานิ ยโต ปพฺพชิโต อหํ
อจฺฉราสงฺฆาตมตฺตมฺปิ เจโตสนฺติมนชฺฌคํ ฯ
อลทฺธา จิตฺตสฺเสกคฺคํ กามราเคน อทฺทิโต ๔-
พาหา ปคฺคยฺห กนฺทนฺโต วิหารานุปนิกฺขมึ ๕ ฯ
สตฺถํ วา อาหริสฺสามิ โก อตฺโถ ชีวิเตน เม
กถํ หิ สิกฺขํ ปจฺจกฺขํ กาลํ กุพฺเพถ มาทิโส ฯ
ตทาหํ ขุรมาทาย มญฺจกมฺหิ อุปาวิสึ
ปรินีโต ขุโร อาสิ ธมนึ เฉตฺตุมตฺตโน ฯ
ตโต เม มนสีกาโร โยนิโส อุทปชฺชถ
อาทีนโว ปาตุรหุ นิพฺพิทา สมติฏฺฐถ ฯ
ตโต จิตฺตํ วิมุจฺจิ เม ปสฺส ธมฺมสุธมฺมตํ
#๑ ม. ขโณ โว ฯ ๒ สุตฺตนิปาเต ปมาทาติ ปาโฐ ทิสฺสติ ฯ ๓ ยุ. อพฺพเห ฯ
#อพฺพูเฬฺหติปิ ปาโฐ ฯ ๔ ม. อฏฺฏิโต ฯ ๕ ม. วิหารา อุปนิกฺขมึ ฯ
ติสฺโส วิชฺชา อนุปฺปตฺตา กตํ พุทฺธสฺส สาสนนฺติ ฯ
สปฺปทาโส เถโร ฯ

[๓๕๓] ๗ อุฏฺฐาหิ นิสีท กาติยาน
มา นิทฺทาพหุโล ๑ อหุ ชาครสฺสุ
มา ตํ อลสํ ปมตฺตพนฺธุ
กูเฏเนว ชินาตุ มจฺจุราชา ฯ
เสยฺยถาปิ ๑ มหาสมุทฺทเวโค
เอวํ ชาติชราติวตฺตเต ตํ
โส กโรหิ สุทีปมตฺตโน ตฺวํ
น หิ ตาณํ ตว วิชฺชเตธ ๒ อญฺญํ ฯ
สตฺถา หิ วิเชสิ มคฺคเมตํ
สงฺคา ชาติชราภยา อตีตํ
ปุพฺพาปรรตฺตมปฺปมตฺโต
อนุยุญฺชสฺสุ ทฬฺหํ กโรหิ โยคํ ฯ
ปุริมานิ ปมุญฺจ พนฺธนานิ
สงฺฆาฏีขุรมุณฺฑภิกฺขโภชี
มา ขิฑฺฑารติญฺจ มา นิทฺทํ
อนุยุญฺชิตฺถ ฌิยาย ๓ กาติยาน ฯ
ฌายาหิ ชินาหิ กาติยาน
#๑ สี. ยุ. สยถาปิ ฯ ๒ ม. ยุ. ว ฯ ๓ ม. ฌาย ฯ
โยคกฺเขมปเถ สุโกวิโทสิ
ปปฺปุยฺย อนุตฺตรํ วิสุทฺธึ
ปรินิพฺพาหิสิ วารินาว โชติ ฯ
ปชฺโชตกโร ปริตฺตรํโส
วาเตน วินมฺยเต ลตาว
เอวมฺปิ ตุวํ อนาทิยมาโน ๑
มารํ อินฺทสโคตฺต นิทฺธุนาหิ ฯ
โส เวทยิตาสุ วีตราโค
กาลํ กงฺข อิเธว สีติภูโตติ ฯ
กาติยาโน เถโร ฯ

[๓๕๔] ๘ สุเทสิโต จกฺขุมตา พุทฺเธนาทิจฺจพนฺธุนา
สพฺพสํโยชนาตีโต สพฺพวฏฺฏวินาสโน
นิยฺยานิโก อุตฺตรโณ ตณฺหามูลวิโสสโน
วิสมูลํ อาฆาตนํ เภตฺวา ๒ ปาเปติ นิพฺพุตึ
อญฺญาณมูลเภทาย กมฺมยนฺตวิฆาฏโน
วิญฺญาณานํ ปริคฺคเห ญาณวชิรนิปาตโน
เวทนานํ วิญฺญาปโน อุปาทานปฺปโมจโน
ภวํ องฺคารกาสสว ญาเณน อนุปสฺสโน ๓
มหารโส สุคมฺภีโร ชรามจฺจุนิวารโณ
#๑ ม. ยุ. อนาทิยาโน ฯ ๒ ยุ. เฉตฺวา ฯ ๓ สี. ม. ยุ. อนุปสฺสโก ฯ
อริโย อฏฺฐงฺคิโก มคฺโค ทุกฺขูปสมโน สิโว
กมฺมํ กมฺมนฺติ ญตฺวาน วิปากญฺจ วิปากโต
ปฏิจฺจุปฺปนฺนธมฺมานํ ยถาวาโลกทสฺสโน
มหาเขมงฺคโม สนฺโต ปริโยสานภทฺทโกติ ฯ
มิคชาโล เถโร ฯ

[๓๕๕] ๙ ชาติมเทน มตฺโตหํ โภคอิสฺสริเยน จ
สณฺฐานวณฺณรูเปน มทมตฺโต อจาริหํ ฯ
นาตฺตโน สมกํ กญฺจิ อติเรกญฺจ มญฺญิสํ
อติมานหโต พาโล ปตฺถทฺโธ อุสฺสิตทฺธโช ฯ
มาตรํ ปิตรํ วาปิ ๑ อโถปิ ๒ ครุสมฺมเต
น กิญฺจิ ๓ อภิวาเทสึ มานตฺถทฺโธ อนาทโร ฯ
ทิสฺวา วินายกํ อคฺคํ สารถีนํ วรุตฺตมํ
ตปนฺตมิว อาทิจฺจํ ภิกฺขุสงฺฆปุรกฺขตํ
มานํ มทญฺจ ฉฑฺเฑตฺวา วิปฺปสนฺเนน เจตสา
สิรสา อภิวาเทสึ สพฺพสตฺตานมุตฺตมํ ฯ
อติมาโน จ โอมาโน ปหีนา สุสมูหตา
อสฺมิมาโน สมุจฺฉินฺโน สพฺเพ มานวิธา หตาติ ฯ
เชนฺโต ปุโรหิตปุตฺโต เถโร ฯ
#๑ ม. ยุ. จาปิ ฯ ๒ ม. ยุ. อญฺเญปิ ฯ ๓ ม. ยุ. กญฺจิ ฯ

[๓๕๖] ๑๐ ยทา นโว ปพฺพชิโต ชาติยา สตฺตวสฺสิโก
อิทฺธิยา อภิโภตฺวาน ปนฺนคินฺทํ มหิทฺธิกํ
อุปชฺฌายสฺส อุทกํ อโนตตฺตา มหาสรา
อาหรามิ ตโต ทิสฺวา มํ สตฺถา เอตทพฺรวิ
สารีปุตฺต อิมํ ปสฺส อาคจฺฉนฺตํ กุมารกํ
อุทกุมฺภกมาทาย อชฺฌตฺตํ สุสมาหิตํ ฯ
ปาสาทิเกน วตฺเตน กลฺยาณอิริยาปโถ
สามเณโรนุรุทฺธสฺส อิทฺธิยา จ วิสารโท
อาชานิเยน อาชญฺโญ สาธุนา สาธุการิโต
วินีโต อนุรุทฺเธน กตกิจฺเจน สิกฺขิโต
โส ปตฺวา ปรมํ สนฺตึ สจฺฉิกตฺวา อกุปฺปตํ
สามเณโร ส สุมโน มา มํ ชญฺญาติ อิจฺฉตีติ ฯ
สุมโน เถโร ฯ

[๓๕๗] ๑๑ วาตโรคาภินีโต ตฺวํ วิหรํ กานเน วเน
ปวิฏฺฐโคจเร ๑ ลูเข กถํ ภิกฺขุ กริสฺสสิ ฯ
ปีติสุเขน วิปุเลน ผริตฺวาน สมุสฺสยํ
ลูขมฺปิ อภิสมฺโภนฺโต วิหริสฺสามิ กานเน ฯ
ภาเวนฺโต สตฺต โพชฺฌงฺเค อินฺทฺริยานิ พลานิ จ
ฌานสุขุมสมฺปนฺโน ๒ วิหริสฺสํ อนาสโว ฯ
#๑ ม. ยุ. ปวิทฺธโคจเร ฯ ๒ ยุ. ฌานโสขุมฺมสมฺปนฺโน ฯ
วิปฺปมุตฺตํ กิเลเสหิ สุทฺธจิตฺตํ อนาวิลํ
อภิณฺหํ ปจฺจเวกฺขนฺโต วิหริสฺสํ อนาสโว ฯ
อชฺฌตฺตญฺจ พหิทฺธา จ เย เม วิชฺฌึสุ ๑ อาสวา
สพฺเพ อเสสา อุจฺฉินฺนา น จ อุปฺปชฺชเร ปุน ฯ
ปญฺจกฺขนฺธา ปริญฺญาตา ติฏฺฐนฺติ ฉินฺนมูลกา
ทุกฺขกฺขโย อนุปฺปตฺโต นตฺถิทานิ ปุนพฺภโวติ ฯ
นฺหาตกมุนิ เถโร ฯ

[๓๕๘] ๑๒ อกฺโกธสฺส กุโต โกโธ ทนฺตสฺส สมชีวิโน
สมฺมทญฺญา วิมุตฺตสฺส อุปสนฺตสฺส ตาทิโน ฯ
ตสฺเสว เตน ปาปิโย โย กุทฺธํ ปฏิกุชฺฌติ
กุทฺธํ อปฺปฏิกุชฺฌนฺโต สงฺคามํ เชติ ทุชฺชยํ ฯ
อุภินฺนมตฺถํ จรติ อตฺตโน จ ปรสฺส จ
ปรํ สงฺกุปิตํ ญตฺวา โย สโต อุปสมฺมติ ฯ
อุภินฺนํ ติกิจฺฉนฺตานํ ๒ อตฺตโน จ ปรสฺส จ
ชนา มญฺญนฺติ พาลาติ ๓ เย ธมฺมสฺส อโกวิทา ฯ
อุปฺปชฺชเต สเจ โกโธ อาวชฺชํ กกจูปมํ
อุปฺปชฺเช เจ รเส ตณฺหา ปุตฺตมํสูปมํ สรํ ฯ
สเจ ธาวติ จิตฺตํ ๔ เต กาเมสุ จ ภเวสุ จ
#๑ ม. ยุ. วิชฺชึสุ ฯ ๒ ยุ. ติกิจฺฉนฺตนฺตํ ฯ ๓ ยุ. พาโลติ ฯ
#๔ ยุ. สเจ ธาวติ เต จิตํ ฯ
ขิปฺปํ นิคฺคยฺห สติยา กิฏฺฐาทํ วิย ทุปฺปสุนฺติ ฯ
พฺรหฺมทตฺโต เถโร ฯ

[๓๕๙] ๑๓ ฉนฺนมติวสฺสติ วิวฏํ นาติวสฺสติ
ตสฺมา ฉนฺนํ วิวเรถ เอวนฺตํ นาติวสฺสติ ฯ
มจฺจุนพฺภาหโต โลโก ชราย ปริวาริโต
ตณฺหาสลฺเลน โอติณฺโณ อิจฺฉาธูปายิโต สทา ฯ
มจฺจุนพฺภาหโต โลโก ปริกฺขิตฺโต ชราย จ
หญฺญติ นิจฺจมตฺตาโณ ปตฺตทณฺโฑว ตกฺกโร ฯ
อาคจฺฉนฺตคฺคิกฺขนฺธาว มจฺจุพฺยาธิชรา ตโย
ปจฺจุคฺคนฺตุํ พลํ นตฺถิ ชโว นตฺถิ ปลายิตุํ ฯ
อโมฆํ ทิวสํ กยิรา อปฺเปน พหุเกน วา
ยํ ยํ วิวหเต ๑ รตฺติ ตทูนนฺตสฺส ชีวิตํ ฯ
จรโต ติฏฺฐโต วาปิ อาสีนสยนสฺส วา
อุเปติ จริมา รตฺติ น เต กาโล ปมชฺชิตุนฺติ ฯ
สิริมณฺโฑ เถโร ฯ

[๓๖๐] ๑๔ ทิปาทโกยํ อสุจิ ทุคฺคนฺโธ ปริหีรติ
นานากุณปปริปูโร วิสฺสวนฺโต ตโต ตโต ฯ
มิคํ นิลีนํ กูเฏน พลิเสเนว อมฺพุชํ
วานรํ วิย เลเปน พาธยนฺติ ปุถุชฺชนํ
#๑ สี. วิรหเต รตฺตึ ฯ ม. ยุ. วิชหเต รตฺตึ ฯ
รูปา สทฺทา รสา คนฺธา โผฏฺฐพฺพา จ มโนรมา
ปญฺจ กามคุณา เอเต อิตฺถิรูปสฺมึ ทิสฺสเร ฯ
เย เอตา อุปเสวนฺติ รตฺตจิตฺตา ปุถุชฺชนา
วฑฺเฒนฺติ กฏสึ โฆรํ อาจินนฺติ ปุนพฺภวํ ฯ
โย เจตา ๑ ปริวชฺเชติ สปฺปสฺเสว ปทา สิโร
โสมํ วิสตฺติกํ โลเก สโต สมติวตฺตติ ฯ
กาเมสฺวาทีนวํ ทิสฺวา เนกฺขมฺมํ ทฏฺฐุ เขมโต
นิสฺสโฏ สพฺพกาเมหิ ปตฺโต เม อาสวกฺขโยติ ฯ
สพฺพกาโม ๒ เถโร ฯ
อุทฺทานํ
อุรุเวลกสฺสโป จ เถโร ติกิจฺฉกานิ ๓ จ
มหานาโค จ กุลฺโล จ มาลุงฺโกฺย ๔ สปฺปทาสโก
กาติยาโน จ ๕ มิคชาโล เชนฺโต สุมนสวฺหโย
นฺหาตมุนิ พฺรหฺมทตฺโต สิริมณฺโฑ สพฺพกามโก ๒
คาถาโย จตุราสีติ เถรา เจตฺถ จตุทฺทสาติ ฯ
ฉกฺกนิปาโต นิฏฺฐิโต ฯ
_________________
#๑ ยุ. โย เอตา ฯ ๒ ม. สพฺพกามี ฯ ๓ ม. เถโร เต กิจฺฉการิ ฯ ยุ. เถโร
#เต ฯ ๔ ม. มาลุกฺโย ฯ สี. ยุ. มาลุโต ฯ ๕ ม. จสทฺโท นตฺถิ ฯ
เถรคาถาย สตฺตกนิปาโต

[๓๖๑] ๑ อลงฺกตา สุวสนา มาลภารี ๑ วิภูสิตา
อลตฺตกกตา ปาทา ปาทุการุยฺห เวสิกา ๒
ปาทุกา โอรุหิตฺวาน ปุรโต ปญฺชลีกตา
สา มํ สเณฺหน มุทุนา มิตปุพฺพมภาสถ ๓
ยุวาสิ ตฺวํ ปพฺพชิโต ติฏฺฐาหิ มม สาสเน
ภุญฺช มานุสเก กาเม อหํ วิตฺตํ ททามิ เต ฯ๔
สจฺจนฺเต ปฏิชานามิ อคฺคึ วา เต หรามหํ ฯQ
ยทา ชิณฺณา ภวิสฺสาม อุโภ ทณฺฑปรายนา
อุโภปิ ปพฺพชิสฺสาม อุภยตฺถ กฏคฺคโห ฯ
ตญฺจ ทิสฺวาน อายนฺตึ เวสิกํ ปญฺชลีกตํ
อลงฺกตํ สุวสนํ มจฺจุปาสํว โอฑฺฑิตํ
ตโต เม มนสีกาโร โยนิโส อุทปชฺชถ
ฯเปฯ ๔
สุนฺทรสมุทฺโท เถโร ฯ