[๓๔๒] ๘ วาตโรคาภินีโต ตฺวํ วิหรํ กานเน วเน
ปวิฏฺฐโคจเร ๔ ลูเข กถํ ภิกฺขุ กริสฺสสิ ฯ
ปีติสุเขน วิปุเลน ผรมาโน สมุสฺสยํ
ลูขมฺปิ อภิสมฺโภนฺโต วิหริสฺสามิ กานเน ฯ
ภาเวนฺโต สติปฏฺฐาเน อินฺทฺริยานิ พลานิ จ
โพชฺฌงฺคานิ จ ภาเวนฺโต วิหริสฺสามิ กานเน ฯ
อารทฺธวิริเย ปหิตตฺเต นิจฺจํ ทฬฺหปรกฺกเม
สมคฺเค สหิเต ทิสฺวา วิหริสฺสามิ กานเน ฯ
อนุสฺสรนฺโต สมฺพุทฺธํ อตฺตทนฺทํ ๕ สมาหิตํ
#๑ ม. ยุ. อหุํ ฯ ๒ ม. ยาถาวกํ ฯ ยุ. ยถาวกํ ฯ ๓ ม. ยุ. สุทฺธสฺส ฯ
#๔ ยุ. ปวิทฺธโคจเร ฯ ๕ โป. ยุ. อคฺคทนฺตํ ฯ ม. อคฺคํ ทนฺตํ ฯ
อตนฺทิโต รตฺตินฺทิวํ วิหริสฺสามิ กานเนติ ฯ
วกฺกลิ เถโร ฯ

[๓๔๓] ๙ โอลคฺคิสฺสามิ เต จิตฺตํ ๑ อาณิทฺวาเรว หตฺถินํ
น ตํ ปาเป นิโยชิสฺสํ กามชาลํ ๒ สรีรชํ ๓ ฯ
ตฺวํ โอลคฺโค น คจฺฉสิ ๔
ทฺวารวิวรํ คโชว อลภนฺโต
น จ จิตฺตกลิ ปุนปฺปุนํ
ปสหํ ๕ ปาปรโต จริสฺสสิ ฯ
ยถา กุญฺชรํ อทนฺตํ
นวคฺคหํ องฺกุสคฺคโห
พลวา อาวตฺเตติ อกามํ
เอวํ อาวตฺตยิสฺสนฺตํ ฯ
ยถา วรหยทมกุสโล
สารถิ ปวโร ทเมติ อาชญฺญํ
เอวํ ทมยิสฺสนฺตํ
ปติฏฺฐิโต ปญฺจสุ พเลสุ ฯ
สติยา ตํ นิพนฺธิสฺสํ
ปยตตฺโต ๖ เต ๗ ทมิสฺสามิ
วิริยธุรนิคฺคหิโต นยิโต
#๑ ม. ยุ. จิตฺต ฯ ๒ ยุ. กามชาล ฯ ๓ ยุ. สรีรช ฯ ๔ ยุ. คจฺฉิสิ ฯ
#๕ ม. ปสกฺก ฯ ๖ ม. ปยุตฺโต ฯ ๗ ยุ. โว ฯ
ทูรํ คมิสฺสเส จิตฺตาติ ฯ
วิชิตเสโน เถโร ฯ

[๓๔๔] ๑๐ อุปารมฺภจิตฺโต ทุมฺเมโธ สุณาติ ชินสาสนํ
อารกา โหติ สทฺธมฺมา นภโส ปฐวี ยถา ฯ
อุปารมฺภจิตฺโต ทุมฺเมโธ สุณาติ ชินสาสนํ
ปริหายติ สทฺธมฺมา กาฬปกฺเขว จนฺทิมา ฯ
อุปารมฺภจิตฺโต ทุมฺเมโธ สุณาติ ชินสาสนํ
ปริสุสฺสติ สทฺธมฺเม มจฺโฉ อปฺโปทเก ยถา ฯ
อุปารมฺภจิตฺโต ทุมฺเมโธ สุณาติ ชินสาสนํ
น วิรูหติ สทฺธมฺเม เขตฺเต พีชํว ปูติกํ ฯ
โย จ คุตฺเตน ๑ จิตฺเตน สุณาติ ชินสาสนํ
เขเปตฺวา อาสเว สพฺเพ สจฺฉิกตฺวา อกุปฺปตํ
ปปฺปุยฺย ปรมํ สนฺตึ ปรินิพฺพาติ อนาสโวติ ฯ
ยสทตฺโต เถโร ฯ

[๓๔๕] ๑๑ อุปสมฺปทา จ เม ลทฺธา วิมุตฺโต จมฺหิ อนาสโว
โส จ เม ภควา ทิฏฺโฐ วิหาเร จ สหาวสึ ฯ
พหุเทว รตฺตึ ภควา อพฺโภกาเสตินามยิ
วิหารกุสโล สตฺถา วิหารํ ปาวิสี ตทา ฯ
สนฺถริตฺวาน สงฺฆาฏึ เสยฺยํ กปฺเปสิ โคตโม
#๑ ม. ยุ. ตุฏฺเฐน ฯ
สีโห เสลคุหายํว ปหีนภยเภรโว ฯ
ตโต กลฺยาณวากฺกรโณ สมฺมาสมฺพุทฺธสาวโก
โสโณ อภาสิ สทฺธมฺมํ พุทฺธเสฏฺฐสฺส สมฺมุขา ฯ
ปญฺจกฺขนฺเธ ปริญฺญาย ภาสยิตฺวาน ๑ อญฺชสํ
ปปฺปุยฺย ปรมํ สนฺตึ ปรินิพฺพายิสฺสตฺยนาสโวติ ๒ ฯ
โส โณ กุฏิกณฺโณ เถโร ฯ

[๓๔๖] ๑๒ โย เว ครูนํ วจนญฺญุ ธีโร
วเส จ ตมฺหิ ชนเยถ เปมํ
โส ภตฺติมา นาม จ โหติ ปณฺฑิโต
ญตฺวา จ ธมฺเมสุ วิเสสิ อสฺส ฯ
ยํ อาปทา อุปฺปติตา อุฬารา
นกฺขมฺภยนฺเต ปฏิสงฺขยนฺตํ
โส ถามวา นาม จ โหติ ปณฺฑิโต
ญตฺวา จ ธมฺเมสุ วิเสสิ อสฺส ฯ
โย เว สมุทฺโทว ฐิโต อเนโช
คมฺภีรปญฺโญ นิปุณตฺถทสฺสี
อสํหาริโก ๓ นาม จ โหติ ปณฺฑิโต
ญตฺวา จ ธมฺเมสุ วิเสสิ อสฺส ฯ
พหุสฺสุโต ธมฺมธโร จ โหติ
#๑ ม. ยุ. ภาวยิตฺวาน ฯ ๒ ม. ยุ. ปรินิพฺพิสฺสตฺยนาสโว ฯ ๓ ยุ. อสํหาริโย ฯ
ธมฺมสฺส โหติ อนุธมฺมจารี
โส ตาทิโส นาม จ โหติ ปณฺฑิโต
ญตฺวา จ ธมฺเมสุ วิเสสิ อสฺส ฯ
อตฺถญฺจ โย ชานาติ ภาสิตสฺส
อตฺถญฺจ ญตฺวาน ตถา กโรติ
อตฺถนฺตโร นาม ส โหติ ปณฺฑิโต
ญตฺวา จ ธมฺเมสุ วิเสสิ อสฺสาติ ฯ
โกสิโย เถโร ฯ
อุทฺทานํ
ราชทตฺโต สุภูโต จ คิริมานนฺทสุมโน
วฑฺโฒ จ กสฺสโป เถโร คยากสฺสปวกฺกลิ
วิชิโต ยสทตฺโต จ โสโณ โกสิยสวฺหโย
สฏฺฐี จ ปญฺจคาถาโย เถรา จ เอตฺถ ทฺวาทสาติ ฯ
ปญฺจกนิปาโต นิฏฺฐิโต ฯ
______________________
เถรคาถาย ฉกฺกนิปาโต

[๓๔๗] ๑ ทิสฺวาน ปาฏิหีรานิ โคตมสฺส ยสสฺสิโน
น ตาวาหํ ปณิปตึ อิสฺสามาเนน วญฺจิโต ฯ
มม สงฺกปฺปมญฺญาย โจเทสิ นรสารถิ
ตโต เม อาสิ สํเวโค อพฺภูโต โลมหํสโน ฯ
ปุพฺเพ ชฏิลภูตสฺส ยา เม สิทฺธิ ๑ ปริตฺติกา
ตาหํ ตทา นิรงฺกตฺวา ปพฺพชึ ชินสาสเน ฯ
ปุพฺเพ ยญฺเญน สนฺตุฏฺโฐ กามธาตุ ปุรกฺขโต
ปจฺฉา ราคญฺจ โทสญฺจ โมหญฺจาปิ สมูหนึ ฯ
ปุพฺเพนิวาสํ ชานามิ ทิพฺพจกฺขุํ วิโสธิตํ
อิทฺธิมา ปรจิตฺตญฺญู ทิพฺพโสตญฺจ ปาปุณึ ฯ
ยสฺส จตฺถาย ปพฺพชิโต อคารสฺมา อนคาริยํ
โส เม อตฺโถ อนุปฺปตฺโต สพฺพสํโยชนกฺขโยติ ฯ
อุรุเวลกสฺสโป เถโร ฯ

[๓๔๘] ๒ อติหิตา วีหิ ขลคตา สาลิ
น จ ลเภ ปิณฺฑํ กถมหํ กสฺสํ ฯ
พุทฺธมปฺปเมยฺยํ อนุสฺสร ปสนฺโน
ปีติยา ผุฏฺฐสรีโร โหหิสิ สตฺตมุทคฺโค ๒ ฯ
ธมฺมมปฺปเมยฺยํ ฯเปฯ
สงฺฆมปฺปเมยฺยํ ฯเปฯ
อพฺโภกาเส จ ๓ วิหรสิ
สีตา เหมนฺติกา อิมา รตฺติโย ฯ
มา สีเตน ปเรโต วิหญฺญิตฺโถ
#๑ ยุ. อิทฺธิ ฯ ๒ ม. ยุ. สตุํ … ฯ ๓ ม. ยุ. จสทฺโท นตฺถิ ฯ
ปวิส ตฺวํ วิหารํ ผุสิตคฺคลํ ฯ
ผุสิสฺสํ จตสฺโส อปฺปมญฺญาโย
ตาหิ จ สุขิโต วิหริสฺสํ
นาหํ สีเตน วิหญฺญิสฺสํ
อนิญฺชิโต วิหรนฺโตติ ฯ
เตกิจฺฉกานิ เถโร ฯ

[๓๔๙] ๓ ยสฺส สพฺรหฺมจารีสุ คารโว นูปลพฺภติ
ปริหายติ สทฺธมฺมา มจฺโฉ อปฺโปทเก ยถา ฯ
ยสฺส สพฺรหฺมจารีสุ คารโว นูปลพฺภติ
น วิรูหติ สทฺธมฺเม เขตฺเต พีชํว ปูติกํ ฯ
ยสฺส สพฺรหฺมจารีสุ คารโว นูปลพฺภติ
อารกา โหติ นิพฺพานา ธมฺมราชสฺส สาสเน ฯ
ยสฺส สพฺรหฺมจารีสุ คารโว อุปลพฺภติ
น วิหายติ สทฺธมฺมา มจฺโฉ พโหทเก ๑ ยถา ฯ
ยสฺส สพฺรหฺมจารีสุ คารโว อุปลพฺภติ
โส วิรูหติ สทฺธมฺเม เขตฺเต พีชํว ภทฺทกํ ฯ
ยสฺส สพฺรหฺมจารีสุ คารโว อุปลพฺภติ
สนฺติเก โหติ นิพฺพานํ ธมฺมราชสฺส สาสเนติ ฯ
มหานาโค เถโร ฯ

[๓๕๐] ๔ กุลฺโล สีวถิกํ คนฺตฺวา อทฺทสํ อิตฺถิมุชฺฌิตํ
#๑ สี. พหฺโวทเก ฯ
อปวิทฺธํ สุสานสฺมึ ขชฺชนฺตึ กิมิหี ผุฏํ ฯ
อาตุรํ อสุจึ ปูตึ ปสฺส กุลฺล สมุสฺสยํ
อุคฺฆรนฺตํ ปคฺฆรนฺตํ พาลานํ อภินนฺทิตํ ฯ
ธมฺมาทาสํ คเหตฺวาน ญาณทสฺสนปตฺติยา
ปจฺจเวกฺขึ อิมํ กายํ ตุจฺฉํ สนฺตรพาหิรํ ฯ
ยถา อิทํ ตถา เอตํ ยถา เอตํ ตถา อิทํ
ยถา อโธ ตถา อุทฺธํ ยถา อุทฺธํ ตถา อโธ ฯ
ยถา ทิวา ตถา รตฺติ ๑ ยถา รตฺติ ๑ ตถา ทิวา
ยถา ปุเร ตถา ปจฺฉา ยถา ปจฺฉา ตถา ปุเร ฯ
ปญฺจงฺคิเกน ตุริเยน น รติ โหติ ตาทิสี
ยถา เอกคฺคจิตฺตสฺส สมฺมา ธมฺมํ วิปสฺสโตติ ฯ
กุลฺโล เถโร ฯ

[๓๕๑] ๕ มนุชสฺส ปมตฺตจาริโน ตณฺหา วฑฺฒติ มาลุวา วิย
โส ปริปฺลวติ ๒ หุราหุรํ ผลมิจฺฉํว วนสฺมึ วานโร ฯ
ยํ เอสา สหเต ๓ ชมฺมี ตณฺหา โลเก วิสตฺติกา
โสกา ตสฺส ปวฑฺฒนฺติ อภิวุฏฺฐํว ๔ วีรณํ ฯ
โย เจตํ ๕ สหเต ๓ ชมฺมึ ตณฺหํ โลเก ทุรจฺจยํ
โสกา ตมฺหา ปปตนฺติ อุทพินฺทุว โปกฺขรา ฯ
ตํ โว วทามิ ภทฺทํ โว ยาวนฺเตตฺถ สมาคตา
#๑ ม. ยุ. รตฺตึ ฯ ๒ ม. ปฺลวตี ฯ ยุ. ปลวตี ฯ ๓ ยุ. สหตี ฯ ๔ ม. ยุ. อติวฏฺฐํว ฯ
#๕ ยุ. โย เวตํ ฯ
ตณฺหาย มูลํ ขณถ อุสีรตฺโถว วีรณํ
มา โว นฬํว โสโตว มาโร ภญฺชิ ปุนปฺปุนํ ฯ
กโรถ พุทฺธวจนํ ขโณ เว ๑ มา อุปจฺจคา
ขณาตีตา หิ โสจนฺติ นิรยมฺหิ สมปฺปิตา ฯ
ปมาโท รโช ๒ ปมาทานุปติโต รโช
อปฺปมาเทน วิชฺชาย อพฺพุเห ๓ สลฺลมตฺตโนติ ฯ
มาลุงฺกฺยปุตฺโต เถโร ฯ