[๓๓๒] ๑๐ ธมฺโม หเว รกฺขติ ธมฺมจารึ
ธมฺโม สุจิณฺโณ สุขมาวหาติ
เอสานิสํโส ธมฺเม สุจิณฺเณ
น ทุคฺคตึ คจฺฉติ ธมฺมจารี ฯ
น หิ ธมฺโม อธมฺโม จ อุโภ สมวิปากิโน
#๑ โป. ม. ชาลปจฺฉนฺนา ฯ
อธมฺโม นิรยํ เนติ ธมฺโม ปาเปติ สุคตึ ๑ ฯ
ตสฺมา หิ ธมฺเมสุ กเรยฺย ฉนฺทํ
อิติ โมทมาโน สุคเตน ตาทินา
ธมฺเม ฐิตา สุคตวรสฺส สาวกา
นิยฺยนฺติ ธีรา สรณวรคฺคคามิโน ฯ
วิปฺโผฏิโต คณฺฑมูโล ตณฺหาชาโล สมูหโต ฯ
โส ขีณสํสาโร น จตฺถิ กิญฺจนํ
จนฺโท ยถา โทสินาปุณฺณมาสิยาติ ๒ ฯ
ธมฺมิโก เถโร ฯ

[๓๓๓] ๑๑ ยทา พลากา สุจิปณฺฑรจฺฉทา
กาฬสฺส เมฆสฺส ภเยน ตชฺชิตา๓
ปเลหิติ อาลยมาลเยสินี
ตทา นที อชกรณี รเมติ มํ ฯ
ยทา พลากา สุวิสุทฺธปณฺฑรา
กาฬสฺส เมฆสฺส ภเยน ตชฺชิตา
ปริเยสติ เลณมเลณทสฺสินี
ตทา นที อชกรณี รเมติ มํ ฯ
กนฺนุ ตตฺถ น รเมนฺติ ชมฺพุโย อุภโต ตหึ
โสเภนฺติ อาปคากูลํ มหาเลณสฺส ๓ ปจฺฉโต ฯ
ตามตมทสงฺฆสุปฺปหีนา
#๑ ม. ยุ. สุคฺคตึ ฯ ๒ ม. …สิยนฺติ ฯ ๓ ม. มม เลณสฺส ฯ
เภกา มนฺทวตี ปนาทยนฺติ ฯ
นาชฺช คิรินทีหิ วิปฺปวาสสมโย
เขมา อชกรณี สิวา สุรมฺมาติ ฯ
สปฺปโก เถโร ฯ

[๓๓๔] ๑๒ ปพฺพชึ ชีวิกตฺโถหํ ลทฺธาน อุปสมฺปทํ
ตโต สทฺธํ ปฏิลภึ ทฬฺหวิริโย ปรกฺกมึ ฯ
กามํ ภิชฺชตุยํ กาโย มํสเปสี วิสียรุํ
อุโภ ชนฺนุกสนฺธีหิ ชงฺฆาโย ปปตนฺตุ เม ฯ
นาสิสฺสํ น ปิวิสฺสามิ วิหารา จ น นิกฺขเม
นปิ ปสฺสํ นิปาเตสฺสํ ตณฺหาสลฺเล อนูหเต ฯ
ตสฺส เมวํ วิหรโต ปสฺส วิริยปรกฺกมํ
ติสฺโส วิชฺชา อนุปฺปตฺตา กตํ พุทฺธสฺส สาสนนฺติ ฯ
มุทิโต เถโร ฯ
อุทฺทานํ
นาคสมาโล ภคุ จ สภิโย นนฺทโกปิ จ
ชมฺพุโก เสนโก เถโร สมฺภูโต ราหุโลปิ จ
ภวติ จนฺทโน เถโร ทเสเต พุทฺธสาวกา ฯ
ธมฺมิโก สปฺปโก เถโร มุทิโต จาปิ เต ตโย
คาถาโย เทฺว จ ปญฺญาส เถรา สพฺเพปิ เตรสาติ ฯ
จตุกฺกนิปาโต นิฏฺฐิโต ฯ
__________________
เถรคาถาย ปญฺจกนิปาโต

[๓๓๕] ๑ ภิกฺขุ สีวถิกํ คนฺตฺวา อทฺทส ๑ อิตฺถิมุชฺฌิตํ
อปวิทฺธํ สุสานสฺมึ ขชฺชนฺตึ กิมิหี ผุฏํ ฯ
ยํ หิ เอเก ชิคุจฺฉนฺติ มตํ ทิสฺวาน ปาปกํ
กามราโค ปาตุรหุ อนฺโธว สวตี อหุ ๒ ฯ
โอรํ โอทนปากมฺหา ตมฺหา ฐานา อปกฺกมึ
สติมา สมฺปชาโนหํ เอกมนฺตํ อุปาวิสึ ฯ
ตโต เม มนสีกาโร โยนิโส อุทปชฺชถ
อาทีนโว ปาตุรหุ นิพฺพิทา สมติฏฺฐถ ฯ
ตโต จิตฺตํ วิมุจฺจิ เม ปสฺส ธมฺมสุธมฺมตํ
ติสฺโส วิชฺชา อนุปฺปตฺตา กตํ พุทฺธสฺส สาสนนฺติ ฯ
ราชทตฺโต เถโร ฯ

[๓๓๖] ๒ อโยเค ยุญฺชมตฺตานํ ปุริโส กิจฺจมิจฺฉโก ๓
จรํ เจ นาธิคจฺเฉยฺย ตํ เว ๔ ทุพฺภคลกฺขณํ ฯ
อพฺพูฬฺหํ อฆตชีวิตํ ๕
เอกญฺเจ โอสฺสชฺเชยฺย กลีว สิยา
สพฺพานิปิ เจ โอสฺสชฺเชยฺย อนฺโธว สิยา
สมวิสมสฺส อทสฺสนโต ฯ
#๑ ยุ. อทฺทสํ ฯ ๒ ม. ยุ. อหุํ ฯ ๓ สี. ยุ. กิจฺจมิจฺฉโต ฯ ๔ ม. ยุ. เม ฯ
#๕ ม. อฆคตํ วิชิตํ ฯ ยุ. อฆตํ วิชิตํ ฯ
ยญฺหิ กยิรา ตญฺหิ วเท ยํ น กยิรา น ตํ วเท
อกโรนฺตํ ภาสมานํ ปริชานนฺติ ปณฺฑิตา ฯ
ยถาปิ รุจิรํ ปุปฺผํ วณฺณวนฺตํ อคนฺธกํ
เอวํ สุภาสิตา วาจา อผลา โหติ อกุพฺพโต ฯ
ยถาปิ รุจิรํ ปุปฺผํ วณฺณวนฺตํ สคนฺธกํ ๑
เอวํ สุภาสิตา วาจา สผลา โหติ สุกุพฺพโตติ ๒
สุภูโต เถโร ฯ

[๓๓๗] ๓ วสฺสติ เทโว ยถา สุคีตํ
ฉนฺนา เม กุฏิกา สุขา นิวาตา
ตสฺสํ วิหรามิ วูปสนฺโต
อถ เจ ปตฺถยสิ ปวสฺส เทว ฯ
วสฺสติ เทโว ยถา สุคีตํ
ฉนฺนา เม กุฏิกา สุขา นิวาตา
ตสฺสํ วิหรามิ สนฺตจิตฺโต
อถ เจ ปตฺถยสิ ปวสฺส เทว ฯ
ฯเปฯ
ตสฺสํ วิหรามิ วีตราโค
ฯเปฯ
ตสฺสํ วิหรามิ วีตโทโส
ฯเปฯ
#๑ โป. ม. สุคนฺธกํ ฯ ๒ สี. ยุ. สกุพฺพโตติ ฯ ม. กุพฺพโตติ ฯ
ตสฺสํ วิหรามิ วีตโมโห
อถ เจ ปตฺถยสิ ปวสฺส เทวาติ ฯ
คิริมานนฺโท เถโร ฯ

[๓๓๘] ๔ ยํ ปตฺถยมาโน ๑ ธมฺเมสุ อุปชฺฌาโย อนุคฺคหิ
อมตํ อภิกงฺขนฺตํ กตํ กตฺตพฺพกํ มยา ฯ
อนุปฺปตฺโต สจฺฉิกโต สยํ ธมฺโม อนีติโห
วิสุทฺธญาโณ ๒ นิกฺกงฺโข พฺยากโรมิ ตวนฺติเก ฯถ
ปุพฺเพนิวาสํ ชานามิ ทิพฺพจกฺขุํ วิโสธิตํ
สทตฺโถ เม อนุปฺปตฺโต กตํ พุทฺธสฺส สาสนํ ฯ
อปฺปมตฺตสฺส เม สิกฺขา สุสฺสุตา ตว สาสเน
สพฺเพ เม อาสวา ขีณา นตฺถิทานิ ปุนพฺภโว ฯ
อนุสาสิ มํ อริยวตา อนุกมฺปี อนุคฺคหิ
อโมโฆ ตุมฺหโมวาโท ๓ อนฺเตวาสิมฺหิ สิกฺขิโตติ ฯ
สุมโน เถโร ฯ

[๓๓๙] ๕ สาธุ หิ กิร เม มาตา ปโตทํ อุปทํสยิ
ยสฺสาหํ วจนํ สุตฺวา อนุสิฏฺโฐ ชเนตฺติยา
อารทฺธวิรโย ปหิตตฺโต ปตฺโต สมฺโพธิมุตฺตมํ ฯ
อรหา ทกฺขิเณยฺโยมฺหิ เตวิชฺโช อมตทฺทโส
เชตฺวา ๔ นมุจิโน เสนํ วิหรามิ อนาสโว ฯ
#๑ ม. ยุ. ปตฺถยาโน ฯ ๒ ม. วิสุทฺธิญาโณ ฯ ๓ ม. ยุ. ตุยฺหโมวาโท ฯ
#๔ ยุ. ชิตฺวา ฯ
อชฺฌตฺตญฺจ พหิทฺธา จ เย เม วิชฺชึสุ อาสวา
สพฺเพ อเสสา อุจฺฉินฺนา น จ อุปฺปชฺชเร ปุน ฯ
วิสารทา โข ภคินี เอตมตฺถํ อภาสยิ
อปิ หา นูน มยิปิ วนโถ เต น วิชฺชติ ฯ
ปริยนฺตกตํ ทุกฺขํ อนฺติโมยํ สมุสฺสโย
ชาติมรณสํสาโร นตฺถิทานิ ปุนพฺภโวติ ฯฏ
วฑฺโฒ เถโร ฯ

[๓๔๐] ๖ อตฺถาย วต เม พุทฺโธ นทึ เนรญฺชรํ อคา
ยสฺสาหํ ธมฺมํ สุตฺวาน มิจฺฉาทิฏฺฐึ วิวชฺชยึ ฯ
ยชึ อุจฺจาวเจ ยญฺเญ อคฺคิหุตํ ชุหึ อหํ
เอสา สุทฺธีติ มญฺญนฺโต อนฺธภูโต ปุถุชฺชโน ฯ
ทิฏฺฐิคหณปกฺขนฺโน ปรามาเสน โมหิโต
อสุทฺธึ มญฺญิสํ สุทฺธึ อนฺธภูโต อวิทฺทสุ ฯ
มิจฺฉาทิฏฺฐิ ปหีนา เม ภวา สพฺเพ ปทาลิตา ๑
ชุหามิ ทกฺขิเณยฺยคฺคึ นมสฺสามิ ตถาคตํ ฯ
โมหา สพฺเพ ปหีนา เม ภวตณฺหา ปทาลิตา
วิกฺขีโณ ชาติสํสาโร นตฺถิทานิ ปุนพฺภโวติ ฯ
นทีกสฺสโป เถโร ฯ

[๓๔๑] ๗ ปาโต มชฺฌนฺติกํ สายํ ติกฺขตฺตุํ ทิวสสฺสหํ
โอตรึ อุทกํ โสหํ ๒ คยาย คยผคฺคุยา ฯ
#๑ ม. ยุ. วิทาลิตา ฯ ๒ ยุ. โสตํ ฯ
ยํ มยา ปกตํ ปาปํ ปุพฺเพ อญฺญาสุ ชาติสุ
ตนฺทานีธ ปวาเหมิ เอวํทิฏฺฐิ ปุเร อหุ ๑ ฯ
สุตฺวา สุภาสิตํ วาจํ ธมฺมตฺถสหิตํ ปทํ
ตถํ ยาถาวตํ ๒ อตฺถํ โยนิโส ปจฺจเวกฺขิสํ ฯ
นินฺหาตสพฺพปาโปมฺหิ นิมฺมโล ปยโต สุจิ
สุทฺโธ พุทฺธสฺส ๓ ทายาโท ปุตฺโต พุทฺธสฺส โอรโส ฯ
โอคยฺหฏฺฐงฺคิกํ โสตํ สพฺพํ ปาปํ ปวาหยึ
ติสฺโส วิชฺชา อชฺฌคมึ กตํ พุทฺธสฺส สาสนนฺติ ฯ
คยากสฺสโป เถโร ฯ