[๓๒๒] ๑๖ ปาปมิตฺเต วิวชฺเชตฺวา ภเชยฺยุตฺตมปุคฺคเล ๑
โอวาเท จสฺส ติฏฺเฐยฺย ปตฺเถนฺโต อจลํ สุขํ ฯ
ปริตฺตํ ทารุมารุยฺห ยถา สีเท มหณฺณเว
เอวํ กุสีตมาคมฺม สาธุชีวีปิ สีทติ ฯ
ตสฺมา ตํ ปริวชฺเชยฺย กุสีตํ หีนวีริยํ ฯ
ปวิวิตฺเตหิ อริเยหิ ปหิตตฺเตหิ ฌายิหิ
#๑ โป. ม. ภเชยฺยุตฺตมปุคฺคลํ ฯ
นิจฺจํ อารทฺธวิริเยหิ ปณฺฑิเตหิ สหาวเสติ ฯ
วิมโล เถโร ฯ
อุทฺทานํ
องฺคณิโก ภารทฺวาโช ปจฺจโย พากุโล อิสิ
ธนิโย มาตงฺคปุตฺโต จ โสภิโต วารโณ อิสิ
ปสฺสิโก จ ยโสโช จ สาฏิมตฺติยุปาลิ จ
อุตฺตรปาโล อภิภูโต โคตโม หาริโตปิ จ
เถโร ติกนิปาตมฺหิ นิพฺพาเน วิมโล กโต
อฏฺฐตาฬีส คาถาโย เถรา โสฬส กิตฺติตาติ ฯ
ติกนิปาโต นิฏฺฐิโต ฯ
__________________
เถรคาถาย จตุกฺกนิปาโต

[๓๒๓] ๑ อลงฺกตา สุวสนา มาลินี จนฺทนุสฺสทา
มชฺเฌ มหาปเถ นารี ตุริเย นจฺจติ นฏฺฏกี ฯ
ปิณฺฑิกาย ปวิฏฺโฐหํ คจฺฉนฺโต นํ อุทิกฺขิสํ
อลงฺกตํ สุวสนํ มจฺจุปาสํว โอฑฺฑิตํ ฯ
ตโต เม มนสีกาโร โยนิโส อุทปชฺชถ
อาทีนโว ปาตุรหุ นิพฺพิทา สมติฏฺฐถ ๑ ฯ
ตโต จิตฺตํ วิมุจฺจิ เม ปสฺส ธมฺมสุธมฺมตํ
#๑ ยุ. สมติฏฺฐติ ฯ
ติสฺโส วิชฺชา อนุปฺปตฺตา กตํ พุทฺธสฺส สาสนนฺติ ฯ
นาคสมาโล เถโร ฯ

[๓๒๔] ๒ อหํ มิทฺเธน ปกโต วิหารา อุปนิกฺขมึ
จงฺกมํ อภิรูหนฺโต ตตฺเถว ปปตึ ฉมา ฯ
คตฺตานิ ปริมชฺชิตฺวา ปุน ปารุยฺห จงฺกมํ
จงฺกมึ จงฺกเม ๑ โสหํ อชฺฌตฺตํ สุสมาหิโต ฯ
ตโต เม มนสีกาโร โยนิโส อุทปชฺชถ
อาทีนโว ปาตุรหุ นิพฺพิทา สมติฏฺฐถ ฯ
ตโต จิตฺตํ วิมุจฺจิ เม ปสฺส ธมฺมสุธมฺมตํ
ติสฺโส วิชฺชา อนุปฺปตฺตา กตํ พุทฺธสฺส สาสนนฺติ ฯ
ภคุ เถโร ฯ

[๓๒๕] ๓ ปเร จ น วิชานนฺติ มยเมตฺถ ยมามฺหเส ๒
เย จ ตตฺถ วิชานนฺติ ตโต สมฺมนฺติ เมธคา ฯ
ยทา จ อวิชานนฺตา อิริยนฺตฺยมรา วิย ๓
วิชานนฺติ จ เย ธมฺมํ อาตุเรสุ อนาตุรา ฯ
ยงฺกิญฺจิ สิถิลํ กมฺมํ สงฺกิลิฏฺฐญฺจ ยํ วตํ
สงฺกสฺสรํ พฺรหฺมจริยํ น ตํ โหติ มหปฺผลํ ฯ
ยสฺส สพฺรหฺมจารีสุ คารโว นูปลพฺภติ
อารกา โหติ สทฺธมฺมา นภํ ปฐวิยา ยถาติ ฯ
สภิโย เถโร ฯ
#๑ ม. ยุ. จงฺกเม จงฺกมึ ฯ ๒ ม. ยุ. ยมามเส ฯ ๓ ยุ. วิยา ฯ

[๓๒๖] ๔ ธิรตฺถุ ปูเร ทุคฺคนฺเธ มารปกฺเข อวสฺสุเต
นว โสตานิ เต กาเย ยานิ สนฺทนฺติ สพฺพทา ฯ
มา ปุราณํ อมญฺญิตฺโถ มาสาเทสิ ตถาคเต
สคฺเคปิ เต น รชฺชนฺติ กิมงฺคํ ปน มานุเส ฯ
เย จ โข พาลา ทุมฺเมธา ทุมฺมนฺตี โมหปารุตา
ตาทิสา ตตฺถ รชฺชนฺติ มารขิตฺตสฺมิ พนฺธเน ฯ
เยสํ ราโค จ โทโส จ อวิชฺชา จ วิราชิตา
ตาที ตตฺถ น รชฺชนฺติ ฉินฺนสุตฺตา อพนฺธนาติ ฯ
นนฺทโก เถโร ฯ

[๓๒๗] ๕ ปญฺจปญฺญาส วสฺสานิ รโชชลฺลมธารยึ
ภุญฺชนฺโต มาสิกภตฺตํ เกสมสฺสุํ อโลจยึ ฯ
เอกปาเทน อฏฺฐาสึ อาสนํ ปริวชฺชยึ
สุกฺขคูถานิ จ ขาทึ อุทฺเทสญฺจ น สาทิยึ ฯ
เอตาทิสํ กริตฺวาน พหุํ ทุคฺคติคามินํ
วุยฺหมาโน มโหเฆน พุทฺธํ สรณมาคมํ ฯ
สรณคมนํ ปสฺส ปสฺส ธมฺมสุธมฺมตํ
ติสฺโส วิชฺชา อนุปฺปตฺตา กตํ พุทฺธสฺส สาสนนฺติ ฯ
ชมฺพุโก เถโร ฯ

[๓๒๘] ๖ สฺวาคตํ วต เม อาสิ คยายํ คยผคฺคุยา
ยํ อทฺทสาสึ สมฺพุทฺธํ เทเสนฺตํ ธมฺมมุตฺตมํ
มหปฺปภํ คณาจริยํ อคฺคปฺปตฺตํ วินายกํ
สเทวกสฺส โลกสฺส ชินํ อตุลทสฺสนํ
มหานาคํ มหาวีรํ มหาชุติมนาสวํ
สพฺพาสวปริกฺขีณํ สตฺถารมกุโตภยํ ฯ
จิรสงฺกิลิฏฺฐํ วต มํ ทิฏฺฐิสนฺทานสนฺธิตํ ๑
วิโมจยิ โส ภควา สพฺพคนฺเถหิ เสนกนฺติ ฯ
เสนโก เถโร ฯ

[๓๒๙] ๗ โย ทนฺธกาเล ตรติ ตรณีเย จ ทนฺธเย
อโยนิโสสํวิธาเนน พาโล ทุกฺขํ นิคจฺฉติ ฯ
ตสฺสตฺถา ปริหายนฺติ กาฬปกฺเขว จนฺทิมา
อายสกฺยญฺจ ปปฺโปติ มิตฺเตหิ จ วิรุชฺฌติ ฯ
โย ทนฺธกาเล ทนฺเธติ ตรณีเย จ ตารเย
โยนิโสสํวิธาเนน สุขํ ปปฺโปติ ปณฺฑิโต ฯ
ตสฺสตฺถา ปริปูเรนฺติ สุกฺกปกฺเขว จนฺทิมา
ยโส กิตฺติญฺจ ปปฺโปติ มิตฺเตหิ น วิรุชฺฌตีติ ฯ
สมฺภูโต เถโร ฯ

[๓๓๐] ๘ อุภเยเนว สมฺปนฺโน ราหุลภทฺโทติ มํ วิทู
ยญฺจมฺหิ ปุตฺโต พุทฺธสฺส ยญฺจ ธมฺเมสุ จกฺขุมา ฯ
ยญฺจ เม อาสวา ขีณา ยญฺจ นตฺถิ ปุนพฺภโว
#๑ ยุ. …สนฺทิตํ ฯ ม. …พนฺธิตํ ฯ
อรหา ทกฺขิเณยฺโยมฺหิ เตวิชฺโช อมตทฺทโส ฯ
กามนฺธา ชาลสญฺฉนฺนา ๑ ตณฺหาฉทนฉาทิตา
ปมตฺตพนฺธุนา พทฺธา มจฺฉาว กุมินามุเข ฯ
ตํ กามํ อหมุชฺฌิตฺวา เฉตฺวา มารสฺส พนฺธนํ
สมูลํ ตณฺหํ อพฺพุยฺห สีติภูโตสฺมิ นิพฺพุโตติ ฯ
ราหุโล เถโร ฯ

[๓๓๑] ๙ ชาตรูเปน สญฺฉนฺนา ทาสีคณปุรกฺขตา
องฺเกน ปุตฺตมาทาย ภริยา มํ อุปาคมิ ฯ
ตญฺจ ทิสฺวาน อายนฺตึ สกปุตฺตสฺส มาตรํ
อลงฺกตํ สุวสนํ มจฺจุปาสํว โอฑฺฑิตํ ฯ
ตโต เม มนสีกาโร โยนิโส อุทปชฺชถ
อาทีนโว ปาตุรหุ นิพฺพิทา สมติฏฺฐถ ฯ
ตโต จิตฺตํ วิมุจฺจิ เม ปสฺส ธมฺมสุธมฺมตํ
ติสฺโส วิชฺชา อนุปฺปตฺตา กตํ พุทฺธสฺส สาสนนฺติ ฯ
จนฺทโน เถโร ฯ