[๓๑๒] ๖ เย จิตฺตกถี พหุสฺสุตา สมณา ปาตลิปุตฺตวาสิโน
เตสญฺญตโรยมายุวา ทฺวาเร ติฏฺฐติ ขุชฺชโสภิโต ฯ
#๑ ม. ปนุทิสฺสานิ ฯ
เย จิตฺตกถี พหุสฺสุตา สมณา ปาตลิปุตฺตวาสิโน
เตสญฺญตโรยมายุวา ทฺวาเร ติฏฺฐติ มาลุเตริโต ฯ
สุยุทฺเธน สุยิฏฺเฐน สงฺคามวิชเยน จ
พฺรหฺมจริยานุจิณฺเณน เอวายํ สุขเมธตีติ ฯ
ขุชฺชโสภิโต เถโร ฯk

[๓๑๓] ๗ โยธ โกจิ มนุสฺเสสุ ปรปาณานิ หึสติ
อสฺมา โลกา ปรมฺหา จ อุภยา ธํสเต นโร ฯ
โย จ เมตฺเตน จิตฺเตน สพฺพปาณานุกมฺปติ
พหุํ หิ โส ปสวติ ปุญฺญํ ตาทิสโก นโร ฯ
สุภาสิตสฺส สิกฺเขถ สมณุปาสนสฺส จ
เอกาสนสฺส จ รโห จิตฺตวูปสมสฺส จาติ ฯ
วารโณ เถโร ฯ

[๓๑๔] ๘ เอโกปิ สทฺโธ เมธาวี อสฺสทฺธานํ จ ๑ ญาตินํ
ธมฺมฏฺโฐ สีลสมฺปนฺโน โหติ อตฺถาย พนฺธุนํ ฯ
นิคฺคยฺห อนุกมฺปาย โจทิตา ญาตโย มยา
ญาติพนฺธวเปเมน การํ กตฺวาน ภิกฺขุสุ ฯ
เต อพฺภตีตา กาลกตา ปตฺตา เต ติทิวํ สุขํ
ภาตโร มยฺหํ มาตา จ โมทนฺติ กามกามิโนติ ฯ
ปสฺสิโก เถโร ฯ

[๓๑๕] ๙ กาลาปพฺพงฺคสงฺกาโส กีโส ๒ ธมนิสณฺฐิโต
#๑ ม. ยุ. อสฺสทฺธานิธ ฯ ๒ ม. ยุ. ธมนิสนฺตโต ฯ
มตฺตญฺญู อนฺนปานสฺมึ อลีนมนโส ๑ นโร ฯ
ผุฏฺโฐ ฑํเสหิ มกเสหิ อรญฺญสฺมึ พฺรหาวเน
นาโค สงฺคามสีเสว สโต ตตฺราธิวาสเย ฯ
ยถา พฺรหฺมา ตถา เอโก ยถา เทโว ตถา ทุเว
ยถา คาโม ตถา ตโย โกลาหลํ ตตุตฺตรินฺติ ฯ
ยโสโช เถโร ฯ

[๓๑๖] ๑๐ อหุ ตุยฺหํ ปุเร สทฺธา สา เต อชฺช น วิชฺชติ
ยํ ตุยฺหํ ตุยฺหเมเวตํ นตฺถิ ทุจฺจริตํ มม ฯ
อนิจฺจา หิ จลา สทฺธา เอวํ ทิฏฺฐา หิ สา มยา
รชฺชนฺติปิ วิรชฺชนฺติ ตตฺถ กึ ชิยฺยเต มุนิ ฯ
ปจฺจติ มุนิโน ภตฺตํ โถกํ โถกํ กุเล กุเล
ปิณฺฑิกาย จริสฺสามิ อตฺถิ ชงฺฆพลํ มมาติ ฯ
สาฏิมตฺติโย เถโร ฯ(

[๓๑๗] ๑๑ สทฺธาย อภินิกฺขมฺม นวปพฺพชิโต นโว
มิตฺเต ภเชยฺย กลฺยาเณ สุทฺธาชีเว อตนฺทิเต ฯ
สทฺธาย อภินิกฺขมฺม นวปพฺพชิโต นโว
สงฺฆสฺมึ วิหรํ ภิกฺขุ สิกฺเขถ วินยํ พุโธ ฯ
สทฺธาย อภินิกฺขมฺม นวปพฺพชิโต นโว
กปฺปากปฺเปสุ กุสโล จเรยฺย อปุรกฺขโตติ ฯ
อุปาลิ เถโร ฯ
#๑ ม. ยุ. อทีนมนโส ฯ

[๓๑๘] ๑๒ ปณฺฑิตํ วต มํ สนฺตํ อลมตฺถวิจินฺตกํ
ปญฺจ กามคุณา โลเก สมฺโมหา ปาตยึสุ มํ ฯ
ปกฺขนฺโน มารวิสเย ทฬฺหสลฺลสมปฺปิโต
อสกฺขึ มจฺจุราชสฺส อหํ ปาสา ปมุจฺจิตุํ ฯ
สพฺเพ กามา ปหีนา เม ภวา สพฺเพ ปทาลิตา
วิกฺขีโณ ชาติสํสาโร นตฺถิทานิ ปุนพฺภโวติ ฯ
อุตฺตรปาโล เถโร ฯ

[๓๑๙] ๑๓ สุณาถ ญาตโย สพฺเพ ยาวนฺเตตฺถ สมาคตา
ธมฺมํ โว เทสยิสฺสามิ ทุกฺขา ชาติ ปุนปฺปุนํ ฯ
อารภถ ๑ นิกฺขมถ ยุญฺชถ พุทฺธสาสเน
ธุนาถ มจฺจุโน เสนํ นฬาคารํว กุญฺชโร ฯ
โย อิมสฺมึ ธมฺมวินเย อปฺปมตฺโต วิเหสฺสติ
ปหาย ชาติสํสารํ ทุกฺขสฺสนฺตํ กริสฺสตีติ ฯ
อภิภูโต เถโร ฯ

[๓๒๐] ๑๔ สํสรํ หิ นิรยํ อคจฺฉิสํ
เปตโลกมคมํ ปุนปฺปุนํ
ทุกฺขมมฺหิปิ ติรจฺฉานโยนิยา
เนกธา หิ วุสิตํ จิรํ มยา ฯ
มานุโสปิ จ ภโวภิราธิโต
สคฺคกายมคมํ สกึ สกึ
#๑ โป. ม. อารมฺภถ ฯ
รูปธาตูสุ อรูปธาตูสุ
เนวสญฺญีสุ อสญฺญีสุฏฺฐิตํ ฯ
สมฺภวา สุวิทิตา อสารกา
สงฺขตา ปจลิตา สเทริตา
ตํ วิทิตฺวา มหมตฺตสมฺภวํ
สนฺติเมว สติมา สมชฺฌคนฺติ ฯ
โคตโม เถโร ฯ

[๓๒๑] ๑๕ โย ปุพฺเพ กรณียานิ ปจฺฉา โส กาตุมิจฺฉติ
สุขา โส ธํสเต ฐานา ปจฺฉา จมนุตปฺปติ ฯ
ยญฺหิ กยิรา ตญฺหิ วเท ยํ น กยิรา น ตํ วเท
อกโรนฺตํ ภาสมานํ ปริชานนฺติ ปณฺฑิตา ฯ
สุสุขํ วต นิพฺพานํ สมฺมาสมฺพุทฺธเทสิตํ
อโสกํ วิรชํ เขมํ ยตฺถ ทุกฺขํ นิรุชฺฌตีติ ฯ
หาริโต เถโร ฯ