[๓๐๒] ๕ น อุกฺขิเป โน จ ปริกฺขิเป ปเร
น โอกฺขิเป ปารคตํ น เอรเย
#๑ ยสฺสินฺทฺริยานีติปิ ปาโฐ ฯ
น จตฺตวณฺณํ ปริสาสุ พฺยาหเร
อนุทฺธโต สมฺมิตภาณิ สุพฺพโต ฯ
สุสุขุมนิปุณตฺถทสฺสินา มติกุสเลน นิวาตวุตฺตินา
สํเสวิตพุทฺธสีลินา นิพฺพานํ น หิ เตน ทุลฺลภนฺติ ฯ
วิสาโข ปญฺจาลีปุตฺโต เถโร ฯ

[๓๐๓] ๖ นทนฺติ โมรา สุสิขา สุเปขุณา
สุนีลคีวา สุมุขา สุคชฺชิโน
สุสทฺทลา จาปิ มหามหี อยํ
สุพฺยาปิตมฺพุ สุวลาหกํ นภํ ฯ
สุกลฺลรูโป สุมนสฺส ฌายิตํ
สุนิกฺกโม ๑ สาธุ สุพุทฺธสาสเน
สุสุกฺกสุกฺกํ นิปุณํ สุทุทฺทสํ
ผุสาหิ ตํ อุตฺตมมจฺจุตํ ปทนฺติ ฯ
จูฬโก เถโร ฯ

[๓๐๔] ๗ นนฺทมานาคตํ จิตฺตํ สูลมาโถปมานกํ
เตน เตเนว วชสิ เยน สูลํ กลิงฺครํ ฯ
ตาหํ จิตฺต กลึ พฺรูมิ ตํ พฺรูมิ จิตฺตทุพฺภกํ
สตฺถา เต ทุลฺลโภ ลทฺโธ มานตฺเถ มํ นิโยชยีติ ฯ
อนูปโม เถโร ฯ
#๑ ยุ. สุนิกฺขโม ฯ

[๓๐๕] ๘ สํสรํ ทีฆมทฺธานํ คตีสุ ปริวตฺติสํ
อปสฺสํ อริยสจฺจานิ อนฺธภูโต ปุถุชฺชโน ฯ
ตสฺส เม อปฺปมตฺตสฺส สํสารา วินฬีกตา
สพฺพา คตี สมุจฺฉินฺนา นตฺถิทานิ ปุนพฺภโวติ ฯ
วชฺชิโต เถโร ฯ

[๓๐๖] ๙ อสฺสตฺเถ หริโตภาเส สํวิรูฬฺหมฺหิ ปาทเป
เอกํ พุทฺธคตํ สญฺญํ อลภิตฺถํ ปติสฺสโต ฯ
เอกตฺตึเส อิโต กปฺเป ยํ สญฺญํ อลภึ ตทา
ตสฺสา สญฺญาย วาหสา ปตฺโต เม อาสวกฺขโยติ ฯ
สนฺธิโต เถโร ฯ
อุทฺทานํ
กุมารกสฺสโป เถโร ธมฺมปาโล จ พฺรหฺมาลิ
โมฆราชา วิสาโข จ จูฬโก จ อนูปโม
วชฺชิโต สนฺธิโต เถโร กิเลสรชวาหโนติ ฯ
วคฺโค ปญฺจโม ฯ
ตถา ทุกนิปาตมฺหิ นวุติ เจว อฏฺฐ จ
เถรา เอกูนปญฺญาสํ ภาสิตา นยโกวิทา ฯ
ทุกนิปาโต นิฏฺฐิโต ฯ
_______________________
เถรคาถาย ติกนิปาโต

[๓๐๗] ๑ อโยนิสุทฺธิมเนฺวสํ อคฺคึ ปริจรึ วเน
สุทฺธิมคฺคํ อชานนฺโต อกาสึ อปรํ ๑ ตปํ ฯ
ตํ สุเขน สุขํ ลทฺธํ ปสฺส ธมฺมสุธมฺมตํ
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
พฺรหฺมพนฺธุ ปุเร อาสึ อิทานิ โขมฺหิ พฺราหฺมโณ
เตวิชฺโช นฺหาตโก จมฺหิ โสตฺถิโย จมฺหิ เวทคูติ ฯ
องฺคณิกภารทฺวาโช เถโร ฯ

[๓๐๘] ๒ ปญฺจาหาหํ ปพฺพชิโต เสกฺโข ๒ อปฺปตฺตมานโส
วิหารํ เม ปวิฏฺฐสฺส เจตโส ปณิธี อหู
นาสิสฺสํ น ปิวิสฺสามิ วิหารโต น นิกฺขเม
น ปิ ปสฺสํ นิปาเตสฺสํ ตณฺหาสลฺเล อนูหเต ฯ
ตสฺส เมวํ วิหรโต ปสฺส วิริยปรกฺกมํ
ติสฺโส วิชฺชา อนุปฺปตฺตา กตํ พุทฺธสฺส สาสนนฺติ ฯ
ปจฺจโย เถโร ฯ

[๓๐๙] ๓ โย ปุพฺเพ กรณียานิ ปจฺฉา โส กาตุมิจฺฉติ
สุขา โส ธํสเต ฐานา ปจฺฉา จมนุตปฺปติ ฯ
ยญฺหิ กยิรา ตญฺหิ วเท ยํ น กยิรา น ตํ วเท
#๑ ยุ. อมรํ ฯ ๒ ม. ยุ. เสโข ฯ
อกโรนฺตํ ภาสมานํ ปริชานนฺติ ปณฺฑิตา ฯ
สุสุขํ วต นิพฺพานํ สมฺมาสมฺพุทฺธเทสิตํ
อโสกํ วิรชํ เขมํ ยตฺถ ทุกฺขํ นิรุชฺฌตีติ ฯ
พากุโล เถโร ฯฏ

[๓๑๐] ๔ สุขญฺจ ชีวิตุํ อิจฺเฉ สามญฺญสฺมึ อเปกฺขวา
สงฺฆิกํ นาติมญฺเญยฺย จีวรํ ปานโภชนํ ฯ
สุขญฺเจ ชีวิตุํ อิจฺเฉ สามญฺญสฺมึ อเปกฺขวา
อหิ มุสิกโสพฺภํว เสเวถ สยนาสนํ ฯ
สุขญฺเจ ชีวิตุํ อิจฺเฉ สามญฺญสฺมึ อเปกฺขวา
อิตรีตเรน ตุสฺเสยฺย เอกธมฺมญฺจ ภาวเยติ ฯ
ธนิโย เถโร ฯ

[๓๑๑] ๕ อติสีตํ อติอุณฺหํ อติสายมิทํ อหุ
อิติ วิสฏฺฐกมฺมนฺเต ขณา อจฺเจนฺติ มาณเว ฯ
โย จ สีตญฺจ อุณฺหญฺจ ติณา ภิยฺโย น มญฺญติ
กรํ ปุริสกิจฺจานิ โส สุขา น วิหายติ ฯ
ทพฺพํ กุสํ โปฏกิลํ อุสีรํ มุญฺชปพฺพชํ
อุรสา ปนุทหิสฺสามิ ๑ วิเวกมนุพฺรูหยนฺติ ฯ
มาตงฺคปุตฺโต เถโร ฯ