[๒๙๒] ๕ เทโว จ วสฺสติ เทโว จ คฬคฬายติ
เอกโก จาหํ เภรเว พิเล วิหรามิ
ตสฺส มยฺหํ เอกกสฺส เภรเว พิเล วิหรโต
นตฺถิ ภยํ วา ฉมฺภิตตฺตํ วา โลมหํโส วา ฯ
ธมฺมตา มเมสา ยสฺส เม เอกกสฺส เภรเว พิเล
วิหรโต นตฺถิ ภยํ วา ฉมฺภิตตฺตํ วา โลมหํโส วาติ ฯ
สมฺพุลกจฺจาโน เถโร ฯ

[๒๙๓] ๖ กสฺส เสลูปมํ จิตฺตํ ฐิตํ นานุปกมฺปติ
วิรตฺตํ รชนีเยสุ กุปฺปนีเย น กุปฺปติ ฯ
ยสฺเสวํ ภาวิตํ จิตฺตํ กุโต ตํ ทุกฺขเมสฺสติ ฯ
มม เสลูปมํ จิตฺตํ ฐิตํ นานุปกมฺปติ
วิรตฺตํ รชนีเยสุ กุปฺปนีเย น กุปฺปติ ฯ
มเมวํ ภาวิตํ จิตฺตํ กุโต มํ ทุกฺขเมสฺสตีติ ฯ
ขิตโก ๑ เถโร ฯ

[๒๙๔] ๗ น ตาว สุปิตุํ โหติ รตฺติ นกฺขตฺตมาลินี
ปฏิชคฺคิตุเมเวสา รตฺติ โหติ วิชานตา ฯ
#๑ ม. นิตโก ฯ
หตฺถิกฺขนฺธาวปติตํ กุญฺชโร เจ อนุกฺกเม
สงฺคาเม เม มตํ เสยฺโย ยญฺเจ ชีเว ปราชิโตติ ฯ
โสโณ โปฏิริยปุตฺโต ๑ เถโร ฯ

[๒๙๕] ๘ ปญฺจ กามคุเณ หิตฺวา ปิยรูเป มโนรเม
สทฺธาย ฆรา นิกฺขมฺม ๒ ทุกฺขสฺสนฺตกโร ภเว ฯ
นาภินนฺทามิ มรณํ นาภินนฺทามิ ชีวิตํ
กาลญฺจ ปฏิกงฺขามิ สมฺปชาโน ปติสฺสโตติ ฯ
นิสโภ เถโร ฯ

[๒๙๖] ๙ อมฺพปลฺลวสงฺกาสํ อํเส กตฺวาน จีวรํ
นิสินฺโน หตฺถิคีวายํ คามํ ปิณฺฑาย ปาวิสึ ฯ
หตฺถิกฺขนฺธโต โอรุยฺห สํเวคํ อลภึ ตทา
โสหํ ทิตฺโต ตทา สนฺโต ปตฺโต เม อาสวกฺขโยติ ฯ
อุสโภ เถโร ฯ

[๒๙๗] ๑๐ อยมิติ กปฺปโฏ กปฺปฏกุโร
อจฺฉาย อจฺจํภราย ๓
อมตฆฏิกายํ ธมฺมกฏปตฺโต ๔
กฏปทํ ฌานานิ โอเจตุํ ฯ
มา โข ตฺวํ กปฺปฏ ปจาเลสิ
มา ตํ ๕ อุปกณฺณกมฺหิ ๖ ตาเฬสฺสํ
#๑ โป. คิริปุตฺโต ฯ ๒ ยุ. สทฺธาย อภินิกฺขมฺม ฯ ๓ ม. ยุ. อติภริตาย ฯ
#๔ ม. ยุ. ธมฺมกฏมตฺโต ฯ ๕ ม. ตฺวํ ฯ ๖ ม. อุปกณฺณมฺหิ ฯ
น หิ ตฺวํ กปฺปฏ มตฺตมญฺญาสิ
สงฺฆมชฺฌมฺหิ ปจลายมาโนติ ฯ
กปฺปฏกุโร เถโร ฯ
อุทฺทานํ
มิคสิโร สิวโก จ อุปวาโณ จ ปณฺฑิโต
อิสิทินฺโน จ กจฺจาโน ขิตโก จ มหาวสี
โปฏิริยปุตฺโต นิสโภ อุสโภ กปฺปฏกุโรติ ฯ
วคฺโค จตุตฺโถ ฯ
______________________
เถรคาถาย ทุกนิปาตสฺส ปญฺจมวคฺโค

[๒๙๘] ๑ อโห พุทฺธา อโห ธมฺมา อโห โน สตฺถุ สมฺปทา
ยตฺถ เอตาทิสํ ธมฺมํ สาวโก สจฺฉิกาหิติ ฯ
อสงฺเขยฺเยสุ กปฺเปสุ สกฺกายาธิคตา อหุํ
เตสมยํ ปจฺฉิมโก จริโมยํ สมุสฺสโย
ชาติมรณสํสาโร นตฺถิทานิ ปุนพฺภโวติ ฯ
กุมารกสฺสโป เถโร ฯ

[๒๙๙] ๒ โย หเว ทหโร ภิกฺขุ ยุญฺชติ พุทฺธสาสเน
ชาคโร ๑ ส หิ สุตฺเตสุ อโมฆนฺตสฺส ชีวิตํ ฯ
#๑ สี. ยุ. ปติสุตฺเตสุ ฯ
ตสฺมา สทฺธญฺจ สีลญฺจ ปสาทํ ธมฺมทสฺสนํ
อนุยุญฺเชถ เมธาวี สรํ พุทฺธาน สาสนนฺติ ฯ
ธมฺมปาโล เถโร ฯ

[๓๐๐] ๓ กสฺสินฺทฺริยานิ ๑ สมถํ คตานิ
อสฺสา ยถา สารกินา สุทนฺตา
ปหีนมานสฺส อนาสวสฺส
เทวาปิ ตสฺส ปิหยนฺติ ตาทิโน ฯ
มยฺหินฺทฺริยานิ สมถํ คตานิ
อสฺสา ยถา สารถินา สุทนฺตา
ปหีนมานสฺส อนาสวสฺส
เทวาปิ มยฺหํ ปิหยนฺติ ตาทิโนติ ฯ
พฺรหฺมาลิ เถโร ฯ

[๓๐๑] ๔ ฉวิปาปก จิตฺตภทฺทก โมฆราช สตตํ สมาหิโต
เหมนฺติกสีตกาลรตฺติโย ภิกฺขุ ตฺวํสิ กถํ กริสฺสสิ ฯ
สมฺปนฺนสสฺสา มคธา เกวลา อิติ เม สุตํ
ปลาลจฺฉนฺนโก เสยฺยํ ยถญฺเญ สุขชีวิโนติ ฯ
โมฆราชา เถโร ฯ