[๒๘๒] ๕ เกเส เม โอลิขิสฺสนฺติ กปฺปโก อุปสงฺกมิ
#๑ ม. ยุ. อพฺพหิตฺวาน ฯ ๒ โป. สุวณฺณมโย ฯ ม. ยุ. สุวณฺณโก ฯ ๓ สี.
#ยุ. โสฬสปพฺเพโธ ฯ ๔ โป. ม. ยุ. อุพฺภมาหุ ฯ ๕ ยุ. สหสฺสกณฺฑุ สตเภณฺฑุ ฯ
ตโต อาทาสมาทาย สรีรํ ปจฺจเวกฺขิสํ ฯ
ตุจฺโฉ กาโย อทิสฺสิตฺถ อนฺธกาเร ๑ ตโม พฺยคา ๒
สพฺเพ โจฬา สมุจฺฉินฺนา นตฺถิทานิ ปุนพฺภโวติ ฯ
วีตโสโก เถโร ฯ

[๒๘๓] ๖ ปญฺจ นีวรเณ หิตฺวา โยคกฺเขมสฺส ปตฺติยา
ธมฺมาทาสํ คเหตฺวาน ญาณทสฺสนมตฺตโน
ปจฺจเวกฺขึ อิมํ กายํ สพฺพํ สนฺตรพาหิรํ
อชฺฌตฺตญฺจ พหิทฺธา จ ตุจฺโฉ กาโย อทิสฺสถาติ ฯ
ปุณฺณมาโส เถโร ฯ

[๒๘๔] ๗ ยถาปิ ภทฺโท อาชญฺโญ ขลิตฺวา ปติติฏฺฐติ
ภิยฺโย ลทฺธาน สํเวคํ อทีโน วหเต ธุรํ
เอวํ ทสฺสนสมฺปนฺนํ สมฺมาสมฺพุทฺธสาวกํ
อาชานิยํ มํ ธาเรถ ปุตฺตํ พุทฺธสฺส โอรสนฺติ ฯ
นนฺทโก เถโร ฯ

[๒๘๕] ๘ เอหิ นนฺทก คจฺฉาม อุปชฺฌายสฺส สนฺติกํ
สีหนาทํ นทิสฺสาม พุทฺธเสฏฺฐสฺส สมฺมุขา ฯ
ยาย โน อนุกมฺปาย อเมฺห ปพฺพาชยี มุนิ
โส โน อตฺโถ อนุปฺปตฺโต สพฺพสํโยชนกฺขโยติ ฯ
ภารโต ๓ เถโร ฯ
#๑ ม. อนฺธกาโร ฯ ๒ โป. พฺยโค ฯ ๓ ม. ยุ. ภรโต ฯ

[๒๘๖] ๙ นทนฺติ เอวํ สปฺปญฺญา สีหาว คิริคพฺภเร
ธีรา ๑ วิชิตสงฺคามา เชตฺวา มารํ สวาหนํ ๒ ฯ
สตฺถา จ ปริจิณฺโณ เม ธมฺโม สงฺโฆ จ ปูชิโต
อหญฺจ จิตฺโต ๓ สุมโน ปุตฺตํ ทิสฺวา อนาสวนฺติ ฯ
ภารทฺวาโช เถโร ฯ

[๒๘๗] ๑๐ อุปาสิตา สปฺปุริสา สุตา ธมฺมา อภิณฺหโส
สุตฺวาน ปฏิปชฺชิสฺสํ อญฺชสํ อมโตคธํ ฯ
ภวราคหตสฺส เม สโต ภวราโค ปุน เม น วิชฺชติ
น จาหุ น จ เม ภวิสฺสติ น จ เม เอตรหิปิ ๔ วิชฺชตีติ ฯ
กณฺหทินฺโน เถโร ฯ
อุทฺทานํ
อุตฺตโร ภทฺทชิ เถโร โสภิโต วลฺลิโย อิสิ
วีตโสโก จ โส เถโร ปุณฺณมาโส จ นนฺทโก
ภารโต ๕ ภารทฺวาโช จ กณฺหทินฺโน มหามุนีติ ฯ
วคฺโค ตติโย ฯ
__________________
เถรคาถาย ทุกนิปาตสฺส จตุตฺถวคฺโค

[๒๘๘] ๑ ยโต อหํ ปพฺพชิตฺวา ๖ สมฺมาสมฺพุทฺธสาสเน
วิมุจฺจมาโน อุคฺคจฺฉึ กามธาตุํ อุปจฺจคํ ฯ
#๑ ม. ยุ. วีรา ฯ ๒ ม. สวาหนึ ฯ ๓ ม. ยุ. วิตฺโต ฯ ๔ ม. ปิสทฺโท นตฺถิ ฯ
#๕ ม. ยุ. ภรโต ฯ ๖ ม. ยุ. ปพฺพชิโต ฯ
พฺรหฺมุโน เปกฺขมานสฺส ตโต จิตฺตํ วิมุจฺจิ เม
อกุปฺปา เม วิมุตฺตีติ สพฺพสํโยชนกฺขยาติ ฯ
มิคสิโร เถโร ฯ

[๒๘๙] ๒ อนิจฺจานิ คหกานิ ตตฺถ ตตฺถ ปุนปฺปุนํ
คหการํ คเวสนฺโต ทุกฺขา ชาติ ปุนปฺปุนํ ฯ
คหการก ทิฏฺโฐสิ ปุน เคหํ น กาหสิ
สพฺพา เต ผาสุกา ภคฺคา ๑ ถูณิรา จ ปทาลิตา
วิมริยาทิกตํ จิตฺตํ อิเธว วิธมิสฺสตีติ ฯ
สิวโก เถโร ฯ

[๒๙๐] ๓ อรหํ สุคโต โลเก วาเตหาพาธิโต มุนิ
สเจ อุโณฺหทกํ อตฺถิ มุนิโน เทหิ พฺราหฺมณ ฯ
ปูชิโต ปูชเนยฺยานํ สกฺกเรยฺยาน สกฺกโต
อปจิโต อปจิเนยฺยานํ ๑ ตสฺส อิจฺฉามิ หาตเวติ ฯ
อุปวาโณ เถโร ฯ

[๒๙๑] ๔ ทิฏฺฐา มยา ธมฺมธรา อุปาสกา
กามา อนิจฺจา อิติ ภาสมานา
สา รตฺตรตฺตา มณิกุณฺฑเลสุ
ปุตฺเตสุ ทาเรสุ จ เต อเปกฺขา ฯ
อทฺธาน ชานนฺติ ยโต ๒ จ ธมฺมํ
#๑ ม. ปเจยฺยานํ ฯ ๒ ยุ. ยถาว ธมฺมํ ฯ
กามา อนิจฺจา อิติ จาปิ อาหุ
ราคญฺจ เตสํ น พลตฺถิ เฉตฺตุํ
ตสฺมา สิตา ปุตฺตทารํ ธนญฺจาติ ฯ
อิสิทินฺโน เถโร ฯ