[๒๗๒] ๕ ชโน ชนสฺมึ สมฺพนฺโธ ชนเมวสฺสิโต ชโน
ชโน ชเนน เหฐิยติ เหเฐติ จ ชโน ชนํ ฯ
โก หิ ตสฺส ชเนนตฺโถ ชเนน ชนิเตน วา
ชนํ โอหาย คจฺเฉยฺย ๑ เหฐยิตฺวา พหุํ ชนนฺติ ฯ
สพฺพมิตฺโต เถโร ฯ
#๑ ม. ยุ. คจฺฉนฺ-ตํ ฯ

[๒๗๓] ๖ กาฬี อิตฺถี พฺรหตี ธงฺกรูปา
สตฺถิญฺจ เภตฺวา อปรญฺจ สตฺถึ
พาหญฺจ เภตฺวา อปรญฺจ พาหุํ ๑
สีสญฺจ เภตฺวา ทธิถาลกํว
เอสา นิสินฺนา อภิสนฺทหิตฺวา ๒ ฯต
โย เว อวิทฺวา อุปธึ กโรติ
ปุนปฺปุนํ ทุกฺขมุเปติ มนฺโท
ตสฺมา ปชานํ อุปธึ น กยิรา
มาหํ ปุน ภินฺนสิโร สยิสฺสนฺติ ฯ
มหากาโล เถโร ฯ

[๒๗๔] ๗ พหู สปตฺเต ลภติ มุณฺโฑ สงฺฆาฏิปารุโต
ลาภี อนฺนสฺส ปานสฺส วตฺถสฺส สยนสฺส จ ฯ
เอตมาทีนวํ ญตฺวา สกฺกาเรสุ มหพฺภยํ
อปฺปลาโภ อนวสฺสุโต สโต ภิกฺขุ ปริพฺพเชติ ฯ
ติสฺโส เถโร ฯ

[๒๗๕] ๘ ปาจีนวํสทายมฺหิ สกฺยปุตฺตา สหายกา
ปหายนปฺปเก โภเค อุญฺฉาปตฺตาคเต รตา
อารทฺธวิริยา ปหิตตฺตา นิจฺจํ ทฬฺหปรกฺกมา
รมนฺติ ธมฺมรติยา หิตฺวาน โลกิยํ รตินฺติ ฯ
กิมฺพิโล เถโร ฯ
#๑ ม. พาหํ ฯ ๒ ยุ. อภิสทฺทหิตฺวา ฯ

[๒๗๖] ๙ อโยนิโสมนสีการา มณฺฑนํ อนุยุญฺชิสํ
อุทฺธโต จปโล จาสึ กามราเคน อฏฺฏิโต ฯ
อุปายกุสเลนาหํ พุทฺเธนาทิจฺจพนฺธุนา
โยนิโส ปฏิปชฺชิตฺวา ภเว จิตฺตํ อุทพฺพหินฺติ ฯ
นนฺโท เถโร ฯ

[๒๗๗] ๑๐ ปเร จ นํ ปสํสนฺติ อตฺตา เจ อสมาหิโต
โมฆํ ปเร ปสํสนฺติ อตฺตา หิ อสมาหิโต ฯ
ปเร จ นํ ครหนฺติ อตฺตา เจ สุสมาหิโต
โมฆํ ปเร ครหนฺติ อตฺตา หิ สุสมาหิโตติ ฯ
สิริมา เถโร ฯ
อุทฺทานํ
จุนฺโท จ โชติทาโส จ เถโร เหรญฺญกานิ โย ๑
โสมมิตฺโต สพฺพมิตฺโต กาโล ติสฺโส จ กิมฺพิโล
นนฺโท จ สิริมา เจว ทส เถรา มหิทฺธิกาติ ฯ
วคฺโค ทุติโย ฯ
__________________
เถรคาถาย ทุกนิปาตสฺส ตติยวคฺโค

[๒๗๘] ๑ ขนฺธา มยา ปริญฺญาตา ตณฺหา เม สุสมูหตา
ภาวิตา มม โพชฺฌงฺคา ปตฺโต เม อาสวกฺขโย ฯ
#๑ ม. จ ฯ
โสหํ ขนฺเธ ปริญฺญาย อพฺภหิตฺวาน ๑ ชาลินึ
ภาวยิตฺวาน โพชฺฌงฺเค นิพฺพายิสฺสํ อนาสโวติ ฯ
อุตฺตโร เถโร ฯ

[๒๗๙] ๒ ปนาโท นาม โส ราชา ยสฺส ยูโป สุวณฺณิโย ๒
ติริยํ โสฬสุพฺเพโธ ๓ อุจฺจมาหุ ๔ สหสฺสธา ฯ
สหสฺสกณฺโฑ สตเคณฺฑุ ๕ ธชาลุ หริตามโย
อนจฺจุํ ตตฺถ คนฺธพฺพา ฉสหสฺสานิ สตฺตธาติ ฯ
ภทฺทชิ เถโร ฯ

[๒๘๐] ๓ สติมา ปญฺญวา ภิกฺขุ อารทฺธพลวีริโย
ปญฺจ กปฺปสตานาหํ เอกรตฺตึ อนุสฺสรึ ฯ
จตฺตาโร สติปฏฺฐาเน สตฺต อฏฺฐ จ ภาวยํ
ปญฺจ กปฺปสตานาหํ เอกรตฺตึ อนุสฺสรินฺติ ฯ
โสภิโต เถโร ฯ

[๒๘๑] ๔ ยํ กิจฺจํ ทฬฺหวิริเยน ยํ กิจฺจํ โพธุมิจฺฉตา
กริสฺสํ นาวรชฺฌิสฺสํ ปสฺส วิริยํ ปรกฺกมํ ฯ
ตฺวญฺจ เม มคฺคมกฺขาหิ อญฺชสํ อมโตคธํ
อหํ โมเนน โมนิสฺสํ คงฺคาโสโตว สาครนฺติ ฯ
วลฺลิโย เถโร ฯ