[๒๖๒] ๕ อปิ เจ โหติ เตวิชฺโช มจฺจุหายี อนาสโว
อปฺปญฺญาโตติ นํ พาลา อวชานนฺติ อชานกา ๔ ฯ
โย จ โข อนฺนปานสฺส ลาภี โหตีธ ปุคฺคโล
ปาปธมฺโมปิ เจ โหติ โส เนสํ โหติ สกฺกโตติ ฯ
อชิโน เถโร ฯ
#๑ ม. ปเวทยุํ ฯ ๒ โป. ม. ยุ. ปสกฺกิย ฯ ๓ ยุ. เนโต ฯ ๔ ม. ยุ. อชานตา ฯ

[๒๖๓] ๖ ยทาหํ ธมฺมมสฺโสสึ ภาสมานสฺส สตฺถุโน
น กงฺขมภิชานามิ สพฺพญฺญู อปราชิเต
สตฺถวาเห มหาวีเร สารถีนํ วรุตฺตเม
มคฺเค ปฏิปทายํ วา กงฺขา มยฺหํ น วิชฺชตีติ ฯ
เมฬชิโน เถโร ฯ

[๒๖๔] ๗ ยถา อคารํ ทุจฺฉนฺนํ วุฏฺฐิ สมติวิชฺฌติ
เอวํ อภาวิตํ จิตฺตํ ราโค สมติวิชฺฌติ ฯ
ยถา อคารํ สุจฺฉนฺนํ วุฏฺฐิ น สมติวิชฺฌติ ฯ
เอวํ สุภาวิตํ จิตฺตํ ราโค น สมติวิชฺฌตีติ ฯ
ราโธ เถโร ฯ

[๒๖๕] ๘ ขีณา หิ มยฺหํ ชาติ วุสิตํ ชินสาสนํ
ปหีโน ชาลสงฺขาโต ภวเนตฺติ สมูหตา ฯ
ยสฺสตฺถาย ปพฺพชิโต อคารสฺมา อนคาริยํ
โส เม อตฺโถ อนุปฺปตฺโต สพฺพสํโยชนกฺขโยติ ฯ
สุราโธ เถโร ฯ

[๒๖๖] ๙ สุขํ สุปนฺติ มุนโย เย อิตฺถีสุ น พชฺฌเร
สทา เว รกฺขิตพฺพาสุ ยาสุ สจฺจํ สุทุลฺลภํ ฯ
วธํ จริมฺห เต กาม อนณาทานิ เต มยํ
คจฺฉามทานิ นิพฺพานํ ยตฺถ คนฺตฺวา น โสจตีติ ฯ
โคตโม เถโร ฯ

[๒๖๗] ๑๐ ปุพฺเพ หนติ อตฺตานํ ปจฺฉา หนติ โส ปเร
สุหตํ หนฺติ อตฺตานํ วีตํเสเนว ปกฺขิมา ฯ
น พฺราหฺมโณ พหิวณฺโณ อนฺโตวณฺโณ หิ พฺราหฺมโณ
ยสฺมึ ปาปานิ กมฺมานิ ส เว กโณฺห สุชมฺปตีติ ฯ
วสโภ เถโร ฯ
อุทฺทานํ
อุตฺตโร เจว ปิณฺโฑโล วลฺลิโย ตีริโย อิสิ
อชิโน จ เมฬชิโน ราโธ สุราโธ โคตโมปิ จ
วสเภน อิเม โหนฺติ ทส เถรา มหิทฺธิกาติ ฯ
วคฺโค ปฐโม ฯ
__________________
เถรคาถาย ทุกนิปาตสฺส ทุติยวคฺโค

[๒๖๘] ๑ สุสฺสูสา สุตวฑฺฒนี สุตํ ปญฺญาย วฑฺฒนํ
ปญฺญาย อตฺถํ ชานาติ ญาโต อตฺโถ สุขาวโห ฯ
เสเวถ ปนฺตานิ เสนาสนานิ
จเรยฺย สํโยชนวิปฺปโมกฺขํ
สเจ รตึ นาธิคจฺเฉยฺย ตตฺถ
สงฺเฆ วเส รกฺขิตตฺโต สตีมาติ ฯ
มหาจุนฺโท เถโร ฯ

[๒๖๙] ๒ เย [๑] โข เต เวฆมิสฺเสน ๒ นานตฺเถน จ กมฺมุนา
มนุสฺเส อุปรุนฺธนฺติ ผรุสุปกฺกมา ชนา
#๑ กตฺถจิ จสทฺโท ทิสฺสติ ฯ ๒ ม. เวฐมิสฺเสน ฯ
เตปิ ตเถว กีรนฺติ น หิ กมฺมํ ปนสฺสติ ฯ
ยํ กโรติ นโร กมฺมํ กลฺยาณํ ยทิ ปาปกํ
ตสฺส ตสฺเสว ทายาโท ยํ ยํ กมฺมํ ปกุพฺพตีติ ฯ
โชติทาโส เถโร ฯ

[๒๗๐] ๓ อจฺจยนฺติ อโหรตฺตา ชีวิตํ อุปรุชฺฌติ
อายุ ขียติ มจฺจานํ กุนฺนทีนํว โอทกํ ฯ
อถ ปาปานิ กมฺมานิ กรํ พาโล น พุชฺฌติ
ปจฺฉาสฺส กฏุกํ โหติ วิปาโก หิสฺส ปาปโกติ ฯ
เหรญฺญกานิ เถโร ฯ

[๒๗๑] ๔ ปริตฺตํ ทารุมารุยฺห ยถา สีเท มหณฺณเว
เอวํ กุสีตมาคมฺม สาธุชีวีปิ สีทติ ฯ
ตสฺมา ตํ ปริวชฺเชยฺย กุสีตํ หีนวีริยํ
วิวิตฺเตหิ อริเยหิ ปหิตตฺเตหิ ฌายิหิ
นิจฺจํ อารทฺธวิริเยหิ ปณฺฑิเตหิ สหาวเสติ ฯ
โสมมิตฺโต เถโร ฯ