[๒๒๒] ๕ จิตฺตนิมิตฺตสฺส โกวิโท ปวิเวกรสํ วิชานิย
ฌายํ นิปโก ปติสฺสโต อธิคจฺเฉยฺย สุขํ นิรามิสนฺติ ฯ
สุนาโค เถโร ฯ

[๒๒๓] ๖ อิโต พหิทฺธา ปุถุอญฺญวาทินํ
มคฺโค น นิพฺพานคโม ยถา อยํ
อิติสฺสุ สงฺฆํ ภควานุสาสติ
สตฺถา สยํ ปาณิตเลว ทสฺสยนฺติ ฯ
นาคิโต เถโร ฯ

[๒๒๔] ๗ ขนฺธา ทิฏฺฐา ยถาภูตํ ภวา สพฺเพ ปทาลิตา
วิกฺขีโณ ชาติสํสาโร นตฺถิทานิ ปุนพฺภโวติ ฯ
ปวิฏฺโฐ ๑ เถโร ฯ
#๑ โป. สวิฏฺโฐ ฯ

[๒๒๕] ๘ อสกฺขึ วต อตฺตานํ อุทฺธาตุํ อุทกา ถลํ
วุยฺหมาโน มโหโฆว ๑ สจฺจานิ ปฏิวิชฺฌหนฺติ
อชฺชุโน เถโร ฯ

[๒๒๖] ๙ อุตฺติณฺณา ปงฺกา ปลิปา ปาตาลา ปริวชฺชิตา
มุตฺโต โอฆา จ คนฺถา จ สพฺเพ มานา วิสํหตาติ ฯ
เทวสโภ เถโร ฯ

[๒๒๗] ๑๐ ปญฺจกฺขนฺธา ปริญฺญาตา ติฏฺฐนฺติ ฉินฺนมูลกา
วิกฺขีโณ ชาติสํสาโร นตฺถิทานิ ปุนพฺภโวติ ฯ
สามิทตฺโต เถโร ฯ
อุทฺทานํ
เถโร สมิติคุตฺโต จ กสฺสโป สีหสวฺหโย
นีโต สุนาโค นาคิโต ปวิฏฺโฐ อชฺชุโน อิสิ
เทวสโภ จ โย เถโร สามิทตฺโต มหพฺพโลติ ฯ
วคฺโค นวโม ฯ
______________________
เถรคาถาย เอกนิปาตสฺส ทสมวคฺโค

[๒๒๘] ๑ น ตถามตํ สตรสํ สุธนฺนํ ยํ มยชฺช ปริภุตฺตํ
อปริมิตทสฺสินา โคตเมน พุทฺเธน เทสิโต ธมฺโมติ ฯ
ปริปุณฺณโก เถโร ฯ
#๑ ม. ยุ. มโหเฆว ฯ

[๒๒๙] ๒ ยสฺสาสวา ปริกฺขีณา อาหาเร จ อนิสฺสิโต
สุญฺญโต อนิมิตฺโต จ วิโมกฺโข ยสฺส โคจโร
อากาเสว สกุนฺตานํ ปทนฺตสฺส ทุรนฺวยนฺติ ฯ
วิชโย เถโร ฯ

[๒๓๐] ๓ ทุกฺขา กามา เอรก น สุขา กามา เอรก
โย กาเม กามยติ ทุกฺขํ โส กามยติ เอรก
โย กาเม น กามยติ ทุกฺขํ โส น กามยติ เอรกาติ ฯ
เอรโก เถโร ฯ

[๒๓๑] ๔ นโม หิ ตสฺส ภควโต สกฺยปุตฺตสฺส สิรีมโต
เตนายํ อคฺคปุตฺเตน ๑ อคฺคธมฺโม สุเทสิโตติ ฯ
เมตฺตชิ เถโร ฯ