[๒๑๒] ๕ สาธุ สุวหิตานํ ๑ ทสฺสนํ กงฺขา ฉิชฺชติ พุทฺธิ วฑฺฒติ
พาลมฺปิ กโรนฺติ ปณฺฑิตํ ตสฺมา สาธุ สตํ สมาคโมติ ฯ
สุสารโท เถโร ฯ

[๒๑๓] ๖ อุปฺปตนฺเตสุ นิปเต นิปตนฺเตสุ อุปฺปเต
วเส อวสมาเนสุ รมมาเนสุ โน รเมติ ฯ
ปิยญฺชโห เถโร ฯ

[๒๑๔] ๗ อิทํ ปุเร จิตฺตมจาริ จาริกํ
เยนิจฺฉกํ ยตฺถกามํ ยถาสุขํ
ตทชฺชหํ นิคฺคหิสฺสามิ โยนิโส
หตฺถึ ปภินฺนํ วิย องฺกุสคฺคาโหติ ฯ
หตฺถาโรหปุตฺโต เถโร
#๑ ม. ยุ. สุวิหิตา ฯ

[๒๑๕] ๘ อเนกชาติสํสารํ สนฺธาวิสฺสํ อนิพฺพิสํ
ตสฺส เม ทุกฺขชาตสฺส ทุกฺขกฺขนฺโธ ปรทฺธโตติ ๑ ฯ
เมณฺฑสิโร เถโร ฯ

[๒๑๖] ๙ สพฺโพ ราโค ปหีโน เม สพฺโพ โทโส สมูหโต
สพฺโพ เม วิคโต โมโห สีติภูโตสฺมิ นิพฺพุโตติ ๑ ฯ
รกฺขิโต เถโร ฯ

[๒๑๗] ๑๐ ยํ มยา ปกตํ กมฺมํ อปฺปํ วา ยทิ วา พหุํ
สพฺพเมตํ ปริกฺขีณํ นตฺถิทานิ ปุนพฺภโวติ ฯ
อุคฺโค เถโร ฯ
อุทฺทานํ
วจฺฉปาโล จ โย เถโร อาตุโม มาณโว อิสิ
สุยามโน สุสารโท เถโร โย จ ปิยญฺชโห
อาโรหปุตฺโต เมณฺฑสิโร รกฺขิโต อุคฺคสวฺหโยติ ฯ
วคฺโค อฏฺฐโม ฯ
______________________
เถรคาถาย เอกนิปาตสฺส นวมวคฺโค

[๒๑๘] ๑ ยํ มยา ปกตํ ปาปํ ปุพฺเพ อญฺญาสุ ชาติสุ
อิเธว ตํ เวทนิยํ วตฺถุ อญฺญํ น วิชฺชตีติ ฯ
สมิติคุตฺโต เถโร ฯ
#๑ ม. ยุ. อปรทฺโธ ฯ

[๒๑๙] ๒ เยน เยน สุภิกฺขานิ สิวานิ อภยานิ จ
เตน ปุตฺตก คจฺฉสฺสุ มา โสกา ปหโต ภวาติ ฯ
กสฺสโป เถโร ฯ

[๒๒๐] ๓ สีหปฺปมตฺโต วิหร รตฺตินฺทิวมตนฺทิโต
ภาเวหิ กุสลํ ธมฺมํ ชห สีฆํ สมุสฺสยนฺติ ฯ
สีโห เถโร ฯ

[๒๒๑] ๔ สพฺพรตฺตึ สุปิตฺวาน ทิวา สงฺคณิเก รโต
กุทาสฺสุ นาม ทุมฺเมโธ ทุกฺขสฺสนฺตํ กริสฺสตีติ ฯ
นีโต เถโร ฯ