[๒๐๒] ๕ อุกฺเขปกฏวจฺฉสฺส สงฺกลิตํ พหูหิ วสฺเสหิ
ตํ ภาสติ คหฏฺฐานํ สุนิสินฺโน อุฬารปาโมชฺโชติ ฯ
อุกฺเขปกฏวจฺโฉ เถโร ฯ

[๒๐๓] ๖ อนุสาสิ มหาวีโร สพฺพธมฺมาน ปารคู
ตสฺสาหํ ธมฺมํ สุตฺวาน วิหาสึ สนฺติเก รโต ๑
ติสฺโส วิชฺชา อนุปฺปตฺตา กตํ พุทฺธสฺส สาสนนฺติ ฯ
เมฆิโย เถโร ฯ

[๒๐๔] ๗ กิเลสา ฌาปิตา มยฺหํ ภวา สพฺเพ สมูหตา
วิกฺขีโณ ชาติสํสาโร นตฺถิทานิ ปุนพฺภโวติ ฯ
เอกธมฺมสวนิโย เถโร ฯ

[๒๐๕] ๘ อธิเจตโส อปฺปมชฺชโต มุนิโน โมนปเถสุ สิกฺขโต
โสภา น ภวนฺติ ตาทิโน อุปสนฺตสฺส สทา สตีมโตติ ฯ
เอกุทานิโย เถโร ฯ

[๒๐๖] ๙ สุตฺวาน ธมฺมํ มหโต มหารสํ
สพฺพญฺญุตญฺญาณวเรน เทสิตํ
มคฺคํ ปปชฺชึ อมตสฺส ปตฺติยา
โส โยคกฺเขมสฺส ปถสฺส โกวิโทติ ฯ
ฉนฺโน เถโร ฯ
#๑ โป. ม. สโต ฯ

[๒๐๗] ๑๐ สีลเมว อิธ อคฺคํ ปญฺญวา ปน อุตฺตโม
มนุสฺเสสุ จ เทเวสุ สีลปญฺญาณโต ชยนฺติ ฯ
ปุณฺโณ เถโร ฯ
อุทฺทานํ
วปฺโป จ วชฺชิปุตฺโต จ ปกฺโข วิมลโกณฺฑญฺโญ
อุกฺเขปกฏวจฺโฉ จ เมฆิโย เอกธมฺมิโก
เอกุทานิยฉนฺโน ๑ จ ปุณฺณตฺเถโร มหพฺพโลติ ฯ
วคฺโค สตฺตโม ฯ
______________________
เถรคาถาย เอกนิปาตสฺส อฏฺฐมวคฺโค

[๒๐๘] ๑ สุสุขุมนิปุณตฺถทสฺสินา
มติกุสเลน นิวาตวุตฺตินา
สํเสวิตพุทฺธสีลินา
นิพฺพานํ น หิ เตน ทุลฺลภนฺติ ฯ
วจฺฉปาโล เถโร ฯ

[๒๐๙] ๒ ยถา กลีโร สุสุ วฑฺฒิตคฺโค
ทุนฺนิกฺขโส ๒ โหติ ปสาขชาโต
เอวํ อหํ ภริยายานีตาย
#๑ ม. เอกุทานิยฉนฺนา ฯ ๒ ม. ยุ. ทุนฺนิกฺขโม ฯ
อนุมญฺญ มํ ปพฺพชิโตมฺหิทานีติ ฯ
อาตุโม เถโร ฯ

[๒๑๐] ๓ ชิณฺณญฺจ ทิสฺวา ทุกฺขิตญฺจ พฺยาธิตํ
มตญฺจ ทิสฺวา คตมายุสงฺขยํ
ตโต อหํ นิกฺขมิตูน ปพฺพชึ
ปหาย กามานิ มโนรมานีติ ฯ
มาณโว เถโร ฯ

[๒๑๑] ๔ กามฉนฺโท จ พฺยาปาโท ถีนมิทฺธญฺจ ภิกฺขุโน
อุทฺธจฺจํ วิจิกิจฺฉา จ สพฺพโสว น วิชฺชตีติ ฯ
สุยามโน เถโร ฯ