[๑๙๒] ๕ อาสนฺทิกุฏิกํ กตฺวา โอคยฺห อญฺชนาวนํ
ติสฺโส วิชฺชา อนุปฺปตฺตา กตํ พุทฺธสฺส สาสนนฺติ ฯ
อญฺชนาวนิโย เถโร ฯ

[๑๙๓] ๖ โก กุฏิกายํ ภิกฺขุ กุฏิกายํ วีตราโค สุสมาหิตจิตฺโต ฯ
เอวํ ชานาหิ อาวุโส อโมฆา เต กุฏิกา กตาติ ฯ
กุฏิวิหารี เถโร ฯ

[๑๙๔] ๗ อยมาหุ ปุราณิยา กุฏิกา ๑ อญฺญํ ปตฺถยเส นวํ กุฏึ
อาสํ กุฏิยา วิราชย ทุกฺขา ภิกฺขุ ปุน นวา กุฏีติ ฯ
กุฏิวิหารี ๒ เถโร ฯ

[๑๙๕] ๘ รมณียา เม กุฏิกา สทฺธาเทยฺยา มโนรมา
น เม อตฺโถ กุมารีหิ เยสํ อตฺโถ ตหึ คจฺฉถ นาริโยติ ฯ
รมณียกุฏิโก เถโร ฯ

[๑๙๖] ๙ สทฺธายาหํ ปพฺพชิโต อรญฺเญ เม กุฏิกา กตา
อปฺปมตฺโต จ อาตาปี สมฺปชาโน ปติสฺสโตติ ฯ
โกสลฺลวิหารี เถโร ฯ

[๑๙๗] ๑๐ เต เม อิชฺฌึสุ สงฺกปฺปา ยทตฺโถ ปาวิสึ กุฏึ
วิชฺชาวิมุตฺตึ ปจฺเจสฺสํ มานานุสยมุชฺชหนฺติ ฯ
สีวลี เถโร ฯ
#๑ ม. ยุ. กุฏิ ฯ ๒ ม. ทุติยกุฏิวิหารี ฯ
อุทฺทานํ
โคธิโก จ สุพาหุ จ วลฺลิโย อุตฺติโย อิสิ
อญฺชนาวนิโย เถโร ทุเว กุฏิวิหาริโน
รมณียกุฏิโก เถโร โกสลฺลวฺหยสีวลีติ ฯ
วคฺโค ฉฏฺโฐ ฯ
__________________
เถรคาถาย เอกนิปาตสฺส สตฺตมวคฺโค

[๑๙๘] ๑ ปสฺสติ ปสฺโส ปสฺสนฺตํ อปสฺสนฺตญฺจ ปสฺสติ
อปสฺสนฺโต อปสฺสนฺตํ ปสฺสนฺตญฺจ น ปสฺสตีติ ฯ
วปฺโป เถโร ฯ

[๑๙๙] ๒ เอกกา มยํ อรญฺเญ วิหราม
อปวิทฺธํว วนสฺมึ ทารุกํ
ตสฺส เม พหุกา ปิหยนฺติ
เนรยิกา วิย สคฺคคามินนฺติ ฯ
วชฺชิปุตฺตโก ๑ เถโร ฯ

[๒๐๐] ๓ จุตา ปตนฺติ ปติตา คิทฺธา จ ปุนราคตา
กตกิจฺจํ รตรมฺมํ สุเขนนฺวาคตํ สุขนฺติ ฯ
ปกฺโข เถโร ฯ

[๒๐๑] ๔ ทุมวฺหยาย อุปฺปนฺโน ชาโต ปณฺฑรเกตุนา
#๑ มุ. ยุ. วชฺชิปุตฺโต ฯ
เกตุหา เกตุนา เยว มหาเกตุํ ปธํสยีติ ฯ
วิมลโกณฺฑญฺโญ เถโร ฯ