[๑๗๒] ๕ สุขํ สุขตฺโถ ลภเต ตทาจรํ
กิตฺติญฺจ ปปฺโปติ ยสสฺส วฑฺฒติ
โย อริยมฏฺฐงฺคิกมญฺชสํ อุชุํ
ภาเวติ มคฺคํ อมตสฺส ปตฺติยาติ ฯ
สามญฺญกานิ เถโร ฯ

[๑๗๓] ๖ สาธุ สุตํ สาธุ จริตกํ
สาธุ สทา อนิเกตวิหาโร
อตฺถปุจฺฉนํ ปทกฺขิณกมฺมํ
เอตํ สามญฺญํ อกิญฺจนสฺสาติ ฯ
กุมาปุตฺโต เถโร ฯ

[๑๗๔] ๗ นานาชนปทํ ยนฺติ วิจรนฺตา อสญฺญตา
สมาธิญฺจ วิราเธนฺติ กึสุ รฏฺฐจริยา กริสฺสติ ฯ
ตสฺมา วิเนยฺย สารมฺภํ ฌาเยยฺย อปุรกฺขโตติ ฯ
กุมาปุตฺตตฺเถรสฺส สหายโก เถโร ฯ

[๑๗๕] ๘ โย อิทฺธิยา สรภุํ อฏฺฐเปสิ
ควมฺปติ โส อสิโต อเนโช
ตํ สพฺพสงฺคาติคตํ มหามุนึ
เทวา นมสฺสนฺติ ภวสฺส ปารคุนฺติ ฯ
ควมฺปติ เถโร ฯ

[๑๗๖] ๙ สตฺติยา วิย โอมฏฺโฐ ฑยฺหมาเนว ๑ มตฺถเก
กามราคปฺปหานาย สโต ภิกฺขุ ปริพฺพเชติ ฯ
ติสฺโส เถโร ฯ

[๑๗๗] ๑๐ สตฺติยา วิย โอมฏฺโฐ ฑยฺหมาเนว ๑ มตฺถเก
ภวราคปฺปหานาย สโต ภิกฺขุ ปริพฺพเชติ ฯ
วฑฺฒมาโน เถโร ฯ
อุทฺทานํ
คหุรตีริโย ๒ สุปฺปิโย โสปาโก จ ๓ โปสิโย จ ๔
สามญฺญกานิ กุมาปุตฺโต กุมาปุตฺตสหายโก
ควมฺปติ ติสฺสตฺเถโร วฑฺฒมาโน มหายโสติ ฯ
วคฺโค จตุตฺโถ ฯ
______________________
#๑ ม. ฑยุหมาโนว ฯ ๒ ยุ. คหฺวรตีริโย ฯ ๓ ม. เจว ฯ ๔ ม. จสทฺโท นตฺถิ ฯ
เถรคาถาย เอกนิปาตสฺส ปญฺจมวคฺโค

[๑๗๘] ๑ วิวรมนุปตนฺติ วิชฺชุตา
เวภารสฺส จ ปณฺฑวสฺส จ
นควิวรคโต จ ฌายติ
ปุตฺโต อปฺปฏิมสฺส ตาทิโนติ ฯ
สิริวฑฺโฒ เถโร ฯ

[๑๗๙] ๒ หเล ๑ อุปหเล สีสุปหเล หลา ๒ อุปหลา สีสุปหลา
ปติสฺสติกา ๓ นุ โข วิหรถ อาคโต โว วาลํ วิย เวธิยตีติ ฯ ๔
ขทิรวนิโย เถโร ฯ

[๑๘๐] ๓ สุมุตฺติโก สุมุตฺติโก สาหุ สมุตฺติโกมฺหิ ตีหิ ขุชฺชเกหิ
อสิตาสุ มยา นงฺคลาสุ มยา ขุทฺทกุทฺทาลาสุ มยา ฯ
ยทิปิ อิธเมว อิธเมว อถ วาปิ อลเมว อลเมว
ฌาย สุมงฺคล ฌาย สุมงฺคล อปฺปมตฺโต วิหร สุมงฺคลาติ ฯ
สุมงฺคโล เถโร ฯ

[๑๘๑] ๔ มตํ วา อมฺม โรทนฺติ โย วา ชีวํ น ทิสฺสติ
ชีวนฺตํ มํ อมฺม ทิสฺสนฺติ ๕ กสฺมา มํ อมฺม โรทสีติ ฯ
สานุ เถโร ฯ