[๑๖๒] ๕ โอภาสชาตํ ผลคํ จิตฺตํ ยสฺส อภิณฺหโส
ตาทิสํ ภิกฺขุมาสชฺช กณฺห ทุกฺขํ นิคจฺฉสีติ ฯ
นนฺทิโย เถโร ฯ

[๑๖๓] ๖ สุตฺวา สุภาสิตํ วาจํ พุทฺธสฺสาทิจฺจพนฺธุโน
ปจฺจพฺยาธึ หิ นิปุณํ วาลคฺคํ อุสุนา ยถาติ ฯ
อภโย เถโร ฯ

[๑๖๔] ๗ ทพฺพํ กุสํ โปฏกิลํ อุสีรํ มุญฺชปพฺพชํ
อุรสา ปนุทหิสฺสามิ วิเวกมนุพฺรูหยนฺติ ฯ
โลมสกงฺคิโย เถโร ฯ

[๑๖๕] ๘ กจฺจิ โน วตฺถปสุโต กจฺจิ โน ภูสนารโต
กจฺจิ สีลมยํ คนฺธํ ตฺวํ วาสิ ๑ เนตรา ปชาติ ฯ
ชมฺพุคามิกปุตฺโต เถโร ฯ

[๑๖๖] ๙ สมุนฺนมยมตฺตานํ อุสุกาโรว เตชนํ
#๑ ม. กึ ตฺวํ วายสิ ฯ
จิตฺตํ อุชุํ กริตฺวาน อวิชฺชํ ภินฺท ๑ หาริตาติ ฯ
หาริโต เถโร ฯ

[๑๖๗] ๑๐ อาพาเธ เม สมุปฺปนฺเน สติ เม อุปปชฺชถ
อาพาโธ เม สมุปฺปนฺโน กาโล เม นปฺปมชฺชิตุนฺติ ฯ
อุตฺติโย เถโร ฯ
อุทฺทานํ
นิโคฺรโธ จิตฺตโก เถโร โคสาลตฺเถโร สุคนฺโธ
นนฺทิโย อภโย เถโร เถโร โลมสกงฺคิโย
ชมฺพุคามิกปุตฺโต จ หาริโต อุตฺติโย อิสีติ ฯ
วคฺโค ตติโย ฯ
______________________
เถรคาถาย เอกนิปาตสฺส จตุตฺถวคฺโค

[๑๖๘] ๑ ผุฏฺโฐ ฑํเสหิ มกเสหิ อรญฺญสฺมึ พฺรหาวเน
นาโค สงฺคามสีเสว สโต ตตฺราธิวาสเยติ ฯ
คหุรตีริโย เถโร ๒ ฯ

[๑๖๙] ๒ อชรํ ชีรมาเนน ตปฺปมาเนน นิพฺพุตึ
นิรามิสํ ๓ ปรมํ สนฺตึ โยคกฺเขมํ อนุตฺตรนฺติ ฯ
สุปฺปิโย เถโร ฯ
#๑ ยุ. ฉินฺท ฯ ๒ ม. ยุ. คหวรตีริโย ภิกฺขุ ฯ ๓ ม. นิมิยํ ฯ ยุ. นิมฺมิสฺสํ ฯ

[๑๗๐] ๓ ยถาปิ เอกปุตฺตสฺมึ ปิยสฺมึ กุสลี สิยา
เอวํ สพฺเพสุ ปาเณสุ สพฺพตฺถ กุสโล สิยาติ ฯ
โสปาโก เถโร

[๑๗๑] ๔ อนาสนฺนวรา เอตา นิจฺจเมว วิชานตา
คามา อรญฺญมาคมฺม ตโต เคหํ อุปาวิสึ
ตโต อุฏฺฐาย ปกฺกามึ อนามนฺเตตฺวา โปสิโยติ ฯ
โปสิโย เถโร ฯ