[๑๕๒] ๕ ปญฺจ ฉินฺเท ปญฺจ ชเห ปญฺจ จุตฺตริ ภาวเย
ปญฺจสงฺคาติโค ภิกฺขุ โอฆติณฺโณติ วุจฺจตีติ ฯ
กุณฺฑธาโน เถโร ฯ

[๑๕๓] ๖ ยถาปิ ภทฺโท อาชญฺโญ นงฺคลาวตฺตนี สิขี
คจฺฉติ อปฺปกสิเรน เอวํ รตฺตินฺทิวา มม
คจฺฉนฺติ อปฺปกสิเรน สุเข ลทฺเธ นิรามิเสติ ฯ
เพลฏฺฐสีโส เถโร ฯ

[๑๕๔] ๗ มิทฺธี ยทา โหติ มหคฺฆโส จ
นิทฺทายิตา สมฺปริวตฺตสายี
มหาวราโหว นิวาปปุฏฺโฐ
ปุนปฺปุนํ คพฺภมุเปติ มนฺโทติ ฯ
ทาสโก เถโร ฯ

[๑๕๕] ๘ อหุ ๑ พุทฺธสฺส ทายาโท ภิกฺขุ เภสกฬาวเน
เกวลํ อฏฺฐิสญฺญาย อผริ ปฐวึ อิมํ
มญฺเญหํ กามราคํ โส ขิปฺปเมว ปหียตีติ ฯ
สิงฺคาลปิตา เถโร ฯ

[๑๕๖] ๙ อุทกํ หิ นยนฺติ เนตฺติกา อุสุการา นมยนฺติ เตชนํ
#๑ ยุ. อหู ฯ
ทารุํ นมยนฺติ ตจฺฉกา อตฺตานํ ทมยนฺติ สุพฺพตาติ ฯ
กุโฬ เถโร ฯ

[๑๕๗] ๑๐ มรเณ เม ภยํ นตฺถิ นิกนฺติ นตฺถิ ชีวิเต
สนฺเทหํ นิกฺขิปิสฺสามิ สมฺปชาโน ปติสฺสโตติ ฯ
อชิโต เถโร ฯ
อุทฺทานํ
จูฬวจฺโฉ มหาวจฺโฉ วนวจฺโฉ จ สีวโก
กุณฺฑธาโน จ เพลฏฺฐิ ทาสโก จ ตโต ปรํ
สิงฺคาลปิติโก เถโร กุโฬ จ อชิโต ทสาติ ฯ
วคฺโค ทุติโย ฯ
______________________
เถรคาถาย เอกนิปาตสฺส ตติยวคฺโค

[๑๕๘] ๑ นาหํ ภยสฺส ภายามิ สตฺถา โน อมตสฺส โกวิโท
ยตฺถ ภยํ นาวติฏฺฐติ เตน มคฺเคน วชนฺติ ภิกฺขโวติ ฯ
นิโคฺรโธ เถโร ฯ

[๑๕๙] ๒ นีลา สุคีวา สิขิโน โมรา การวิยํ ๑ อภินทนฺติ
เต สีตวาตกลิตา ๒ สุตฺตํ ฌานํ ๓ นิโพเธนฺตีติ
จิตฺตโก เถโร ฯ
#๑ ยุ. การํวิยํ ฯ ม. การมฺภิยํ ฯ ๒ ม. สีตวาตกีลิตา ฯ ๓ ม. ยุ. ฌายํ ฯ

[๑๖๐] ๓ อหํ โข เวฬุคุมฺพสฺมึ ภุตฺวาน มธุปายาสํ
ปทกฺขิณํ สมฺมสนฺโต ขนฺธานํ อุทยพฺพยํ
สานน ปฏิคฺคมิสฺสามิ วิเวกมนุพฺรูหยนฺติ ฯ
โคสาโล เถโร ฯ

[๑๖๑] ๔ อนุวสฺสิโก ปพฺพชิโต ปสฺส ธมฺมสุธมฺมตํ
ติสฺโส วิชฺชา อนุปฺปตฺตา กตํ พุทฺธสฺส สาสนนฺติ ฯ
สุคนฺโธ เถโร ฯ