[๑๓๒] ๑๒ อยญฺจ เต โปกฺขรณี สุรมฺมา
สมา สุปฺปติตฺถา ๑ จ มโหทกา จ
สุปุปฺผิตา ภมรคณานุกิณฺณา
กถํ ตยา ลทฺธา อยํ มนุญฺญา ฯ
อิทญฺจ เต อมฺพวนํ สุรมฺมํ
สพฺโพตุกํ ธารยติ ๒ ผลานิ
สุปุปฺผิตํ ภมรคณานุกิณฺณํ
กถํ ตยา ลทฺธมิทํ วิมานนฺติ ฯ
อมฺพปกฺโกทกํ ยาคุํ สีตจฺฉายํ ๓ มโนรมํ
ธีตาย ทินฺนทาเนน เตน เม อิธ ลพฺภตีติ ฯ
สนฺทิฏฺฐิกํ เอว ปสฺสถ ทานสฺส
ทมสฺส สํยมสฺส วิปากํ
ทาสี อหํ อยฺยกุเลสุ หุตฺวา
สุณิสา โหมิ อคารสฺส อิสฺสราติ ฯ
อสาตํ สาตรูเปน ปิยรูเปน อปฺปิยํ
ทุกฺขํ สุขสฺส รูเปน ปมตฺตํ อติวตฺตตีติ ๔ ฯๆ
อมฺพวนเปตวตฺถุ ทฺวาทสมํ ฯ
#๑ สุติตฺถาติปิ ฯ ๒ ม. ธารยเต ฯ ๓ ม. ยุ. สีตจฺฉายา มโนรมา ฯ
#๔ ม. อสาตํ ฯเปฯ อติวตฺตตีติ นตฺถิ ฯ

[๑๓๓] ๑๓ ยํ ททาติ น ตํ โหติ เทเถว ทานํ ทตฺวาน
อุภยํ ตรติ ๑ อุภยํ เตน ทาเนน ๒ คจฺฉติ
ชาครถ มา ปมชฺชถาติ ฯ
อกฺขรุกฺขเปตวตฺถุ เตรสมํ ฯ

[๑๓๔] ๑๔ มยํ โภเค สํหริมฺห สเมน วิสเมน จ
เต อญฺเญ ปริภุญฺชนฺติ มยํ ทุกฺขสฺส ภาคินีติ ฯ
โภคสํหรเปตวตฺถุ จตุทฺทสมํ ฯ

[๑๓๕] ๑๕ สฏฺฐี วสฺสสหสฺสานิ ปริปุณฺณานิ สพฺพโส
นิรเย ปจฺจมานานํ กทา อนฺโต ภวิสฺสติ ฯ
นตฺถิ อนฺโต กุโต อนฺโต น อนฺโต ปฏิทิสฺสติ
ตถา หิ ปกตํ ปาปํ มม ตุยฺหญฺจ มาริส ฯ
ทุชฺชีวิตมชีวมฺห เย สนฺเต ๓ น ททมฺหเส
สนฺเตสุ เทยฺยธมฺเมสุ ทีปํ นากมฺหมตฺตโน ฯ
โส หิ นูน อิโต คนฺตฺวา โยนึ ลทฺธาน มานุสึ
วทญฺญู สีลสมฺปนฺโน กาหามิ กุสลํ พหุนฺติ ฯ
เสฏฺฐิปุตฺตเปตวตฺถุ ปณฺณรสมํ ฯ

[๑๓๖] ๑๖ กินฺนุ อุมฺมตฺตรูโปว มิโค ภนฺโตว ธาวสิ
นิสํสยํ ปาปกมฺมํ ๔ กินฺนุ สทฺทยเส ตุวนฺติ ฯ
#๑ ม. ธารติ ทานํ ฯ ๒ ม. อยํ ปาโฐ นตฺถิ ฯ ๓ เยสํ โนติปิ ทิสฺสติ ฯ
#๕ ม. ปาปกมฺมนฺโต ฯ
อหํ ภนฺเต เปโตมฺหิ ทุคฺคโต ยมโลกิโก
ปาปกมฺมํ กริตฺวาน เปตโลกํ อิโต คโต ฯ
สฏฺฐี กูฏสหสฺสานิ ปริปุณฺณานิ สพฺพโส
สีเส มยฺหํ นิปตนฺติ เต ภินฺทนฺติ จ มตฺถกนฺติ ฯ
กินฺนุ กาเยน วาจาย มนสา ทุกฺกฏํ กตํ
กิสฺส กมฺมวิปาเกน เปตโลกํ อิโต คโตติ ๑ ฯ
สฏฺฐี กูฏสหสฺสานิ ปริปุณฺณานิ สพฺพโส
สีเส ตุยฺหํ นิปตนฺติ เต ภินฺทนฺติ จ มตฺถกนฺติ ฯ
อถทฺทุสาสึ สมฺพุทฺธํ สุเนตฺตํ ภาวิตินฺทฺริยํ
นิสินฺนํ รุกฺขมูลสฺมึ ฌายนฺตํ อกุโตภยํ ฯ
สาลิตฺตกปฺปหาเรน ภินฺทิสฺสํ ตสฺส มตฺถกํ
ตสฺส กมฺมวิปาเกน อิทํ ทุกฺขํ นิคจฺฉิสฺสํ ฯ
สฏฺฐี กูฏสหสฺสานิ ปริปุณฺณานิ สพฺพโส
สีเส มยฺหํ นิปตนฺติ เต ภินฺทนฺติ จ มตฺถกนฺติ ฯ
ธมฺเมน เต กาปุริส
สฏฺฐี กูฏสหสฺสานิ ปริปุณฺณานิ สพฺพโส
สีเส ตุยฺหํ ๒ นิปตนฺติ เต ภินฺทนฺติ จ มตฺถกนฺติ ฯ
สฏฺฐิกูฏสหสฺสเปตวตฺถุ โสฬสมํ ฯ
#๑ ม. อิทํ ทุกฺขํ นิคจฺฉสิ ฯ ๒ ยุ. มยฺหํ ฯ
ตสฺสุทฺทานํ
อมฺพสกฺขโร เสริสฺสโก จ ปิงฺคโล เรวตี อุจฺฉุขาทโก ๑
เทฺว กุมารา เทฺว คูถโภชนา ๒ ปาฏลิโปกฺขรณี จ ๓
อกฺขโต ๔ โภคสํหรา เสฏฺฐิปุตฺตา สฏฺฐิกูฏสหสฺสานิ
[๕] วคฺโค เตน ปวุจฺจตีติ ๖ ฯ
[๗]
มหาวคฺโค จตุตฺโถ ฯ
เปตวตฺถุ สมตฺตํ ฯ
_________________
#๑ ม. อุจฺฉุ ฯ ๒ ม. คูถา ฯ ๓ ม. คณปาฏลิ อมฺพวนํ ฯ ๔ ม. อกฺขรุกฺข ฯ
#[๕] ม. อิติ โสฬสวตฺถูนิ ฯ ๖ ยุ. อิทํ อุทานํ น ทิสฺสติ ฯ [๗] ม. วคฺคุทฺทานํ
# อุรโค อุปริวคฺโค จูฬมหาติจตุธา
# วตฺถูนิ เอกปญฺญาสํ จตุธา ภาณวารโต ฯ
# เปตวตฺถุปาลิ นิฏฺฐิตา ฯ
สุตฺตนฺตปิฏเก ขุทฺทกนิกายสฺส เถรคาถา
_______________________
นโม ตสฺส ภควโต อรหโต สมฺมาสมฺพุทฺธสฺส ฯ

[๑๓๗] สีหานํว นทนฺตานํ ทาฐีนํ คิริคพฺภเร
สุณาถ ภาวิตตฺตานํ คาถา อตฺถุปนายิกา ๑
ยถานามา ยถาโคตฺตา ยถาธมฺมวิหาริโน
ยถาธิมุตฺตา สปฺปญฺญา วิหรึสุ อตนฺทิตา
ตตฺถ ตตฺถ วิปสฺสิตฺวา ผุสิตฺวา อจฺจุตํ ปทํ
กตนฺตํ ปจฺจเวกฺขนฺตา อิมมตฺถํ อภาสึสุ ๒ ฯ
_______________________
เอกนิปาโต
เถรคาถาย เอกนิปาตสฺส ปฐมวคฺโค

[๑๓๘] ๑ ฉนฺนา เม กุฏิกา สุขา นิวาตา วสฺส เทว ยถาสุขํ
จิตฺตํ เม สุสมาหิตํ วิมุตฺตํ อาตาปี วิหรามิ วสฺสเทวาติ ฯ
อิตฺถํ สุทํ อายสฺมา สุภูติ เถโร คาถํ อภาสิตฺถาติ ฯ

[๑๓๙] ๒ อุปสนฺโต อุปรโต มนฺตภาณี อนุทฺธโต
ธุนาติ ปาปเก ธมฺเม ทุมปตฺตํว มาลุโตติ ฯ
อิตฺถํ สุทํ อายสฺมา มหาโกฏฺฐิโต ๓ เถโร คาถํ อภาสิตฺถ ๔ ฯ
#๑ ยุ. อตฺตุปนายิกา ฯ ๒ ม. ยุ. อภาสิสุํ ฯ ๓ ม. มหาโกฏุฐิโก ฯ
#๔ ม. อภาสิตฺถาติ ฯ สพฺพตฺถ อีทิสเมว ฯ

[๑๔๐] ๓ ปญฺญํ อิมํ ปสฺส ตถาคตานํ
อคฺคิ ยถา ปชฺชลิโต นิสีเว ๑
อาโลกทา จกฺขุททา ภวนฺติ
เย อาคตานํ วินยนฺติ กงฺขนฺติ ฯ
อิตฺถํ สุทํ อายสฺมา กงฺขาเรวโต ๒ เถโร คาถํ อภาสิตฺถ ฯ

[๑๔๑] ๔ สพฺภิเรว สมาเสถ ปณฺฑิเตหตฺถทสฺสิภิ
อตฺถํ มหนฺตํ คมฺภีรํ ทุทฺทสํ นิปุณํ อณณ
ธีรา สมธิคจฺฉนฺติ อปฺปมตฺตา วิจกฺขณาติ ฯ
อิตฺถํ สุทํ อายสฺมา ปุณฺโณ มนฺตานิปุตฺโต เถโร คาถํ อภาสิตฺถ ฯ