[๑๒๒] ๒ สุโณถ ยกฺขสฺส จ วาณิชาน จ
ฯเปฯ
(วิมานวตฺถุสฺมึ สตฺตมสฺส สุนิกฺขิตฺตวคฺคสฺส ทสมวตฺถุสฺมึ ทฏฺฐพฺพํ)
เสริสฺสกเปตวตฺถุ ทุติยํ ฯ

[๑๒๓] ๓ ราชา ปิงฺคลโก นาม สุรฏฺฐานํ อธิปติ อหุ
โมริยานํ อุปฏฺฐานํ คนฺตฺวา สุรฏฺฐํ ปุนราคมา ฯ
อุเณฺห มชฺฌนฺติเก กาเล ราชา ปงฺกํ อุปาคมิ
อทฺทส มคฺคํ รมณียํ เปตานํ วณฺณนาปถํ
สารถึ อามนฺตยิ ราชา อยํ มคฺโค รมณีโย
เขโม โสวตฺถิโก สิโว
อิมินาว สารถิ ยาหิ ๓ สุรฏฺฐานํ สนฺติเก อิโต
#๑ ม. ภิกฺขุญฺจ ฯ ๒ ม. อผสฺสยิ ฯ ยุ. ผุสฺสสิ ฯ ๓ ม. ยาม ฯ
เตน ปายาสิ โสรฏฺโฐ เสนาย จตุรงฺคินิยา ฯ
อุพฺพิคฺครูโป ปุริโส สุรฏฺฐํ เอตทพฺรูวิ
กุมคฺคํ ปฏิปนฺนมฺหา ภึสนํ โลมหํสนํ ฯ
ปุรโต ปทิสฺสติ มคฺโค ปจฺฉโต จ น ทิสฺสติ
กุมคฺคํ ปฏิปนฺนมฺหา ยมปุริสานํ สนฺติเก ฯ
อมานุโส วายติ คนฺโธ โฆโส สูยติ ทารุโณ
สํวิคฺโค ราชา สุรฏฺโฐ สารถึ เอตทพฺรูวิ
กุมคฺคํ ปฏิปนฺนมฺหา ภึสนํ โลมหํสนํ
ปุรโตว ทิสฺสติ มคฺโค ปจฺฉโต จ น ทิสฺสติ ฯ
กุมคฺคํ ปฏิปนฺนมฺหา ยมปุริสานํ สนฺติเก
อมานุโส วายติ คนฺโธ โฆโส สูยติ ทารุโณ ฯ
หตฺถิกฺขนฺธญฺจ อารุยฺห โอโลเกนฺโต จตุทฺทิสา
อทฺทส รุกฺขํ นิโคฺรธํ ๑ ปาทปํ ฉายสมฺปนฺนํ
นีลพฺภวณฺณสทิสํ เมฆวณฺณสิรนฺนิภํ
สารถึ อามนฺตยิ ราชา กึ เอโส ทิสฺสติ พฺรหา
นลพฺภวณฺณสทิโส เมฆวณฺณสิรนฺนิโภ ฯ
โส นิโคฺรโธ โส มหาราช ปาทโป ฉายสมฺปนฺโน
นีลพฺภวณฺณสทิโส เมฆวณฺณสิรนฺนิโภ ฯ
เตน ปายาสิ สุรฏฺโฐ เยน โส ทิสฺสติ ๒ พฺรหา
#๑ ม. ยุ. อทฺทส นิโคฺรธํ รมณียํ ฯ ๒ ม. ทิสฺสเต ฯ
นีลพฺภวณฺณสทิโส เมฆวณฺณสิรนฺนิโภ ฯ
หตฺถิกฺขนฺธโต โอรุยฺห ราชา รุกฺขํ อุปาคมิ
นิสีทิ รุกฺขมูลสฺมึ สามจฺโจ สปริชโน
ปูรํ ปานียกรกํ ๑ ปูเว จิตฺเต จ อทฺทส ฯ
ปุริโส จ เทววณฺณี สพฺพาภรณภูสิโต
อุปสงฺกมิตฺวา ราชานํ โสรฏฺฐํ เอตทพฺรูวิ
สฺวาคตนฺเต มหาราช อโถ เต อทุราคตํ
ปิวตุ เทโว ปานียํ ปูเว ขาท อรินฺทม ฯ
ปิวิตฺวา ราชา ปานียํ สามจฺโจ สปริชโน
ปูเว ขาทิตฺวา ปิวิตฺวา จ สุรฏฺโฐ เอตทพฺรูวิ
เทวตา นุสิ คนฺธพฺโพ อาทุ สกฺโก ปุรินฺทโท
อชานนฺโต ๒ ตํ ปุจฺฉาม กถํ ชาเนมุ ตํ มยํ ฯ
นมฺหิ เทโว น คนฺธพฺโพ นาปิ สกฺโก ปุรินฺทโท
เปโต อหํ มหาราช สุรฏฺฐา อิธมาคโต ฯ
กึสีโล กึสมาจาโร สุรฏฺฐสฺมึ ปุเร ตุวํ
เกน เต พฺรหฺมจริเยน อานุภาโว อยํ ตว ฯ
ตํ สุโณหิ มหาราช อรินฺทม รฏฺฐวฑฺฒน
อมจฺจา ปาริสชฺชา จ พฺราหฺมโณ จ ปุโรหิโต ฯ
สุรฏฺฐสฺมึ อหํ เทว ปุริโส ปาปเจตโส
มิจฺฉาทิฏฺฐิ จ ทุสฺสีโล กทริโย ปริภาสโก
#๑ ม. ปานียสรกํ ฯ ๒ ม. อชานนฺตา ฯ
ททนฺตานํ กโรนฺตานํ วารยิสฺสํ พหุชนํ
อญฺเญสํ ททมานานํ อนฺตรายํ กโรมหํ ฯ
วิปาโก นตฺถิ ทานสฺส สํยมสฺส กุโต ผลํ
นตฺถิ อาจริโย นาม อทนฺตํ โก ทมิสฺสติ ฯ
สมตุลฺยานิ ภูตานิ กุเล ๑ เชฏฺฐาปจายิโก
นตฺถิ พลํ วิริยํ วา กุโต อุฏฺฐานโปริสํ ฯ
นตฺถิ ทานผลํ นาม น วิโสเธติ เวรินํ
ลทฺเธยฺยํ ลภเต มจฺโจ นียติ ปริณามชํ ฯ
นตฺถิ มาตา ปิตา ภาตา โลโก นตฺถิ อิโต ปรํ
นตฺถิ ทินฺนํ นตฺถิ หุตํ สุนิหิตํปิ น วิชฺชติ ฯ
โยปิ หเนยฺย ปุริสํ ปุริสสฺส ๒ ฉินฺทเต สิรํ
น โกจิ กิญฺจิ หนติ สตฺตนฺนํ วิวรมนฺตเร ฯ
อจฺเฉชฺโช อเภชฺโช ๓ ชีโว อฏฺฐํโส คุฬปริมณฺฑโล
โยชนานิ สตา ๔ ปญฺจ โก ชีวํ เฉตุมรหติ ฯ
ยถา สุตฺตคุเฬ ขิตฺเต นิพฺเพเฐนฺตํ ปลายติ
เอวเมวํปิ โส ชีโว นิพฺเพเฐนฺโต ปลายติ ฯ
ยถา คามโต นิกฺขมฺม อญฺญํ คามํ ปวิสติ
เอวเมวํปิ โส ชีโว อญฺญํ กายํ ๕ ปวิสติ ฯ
#๑ ม. กุโต ฯ ๒ ม. ยุ. ปรสฺส ฯ ๓ ยุ. อจฺเฉชฺชเภชุโช ฯ ๔ ม. โยชนานํ สตํ ฯ
#๕ ม. โพนฺทึ ฯ
ยถา เคหโต นิกฺขมฺม อญฺญํ เคหํ ปวิสติ
เอวเมวํปิ โส ชีโว อญฺญํ โพนฺทึ นิวีสติ ๑ ฯ
จูฬาสีติ มหากปฺปิโน สตสหสฺสานิ เย พาลา เย จ ปณฺฑิตา
สํสารํ เขปยิตฺวาน ทุกฺขสฺสนฺตํ กริสฺสเร ฯ
มิตานิ สุขทุกฺขานิ โทเณหิ ปิฏเกหิ จ
ชิโน สพฺพํ ปชานาติ สมูฬฺหา อิตรา ปชา ฯ
เอวํทิฏฺฐิ ปุเร อาสึ สมูโฬฺห โมหปารุโต
มิจฺฉาทิฏฺฐิ จ ทุสฺสีโล กทริโย ปริภาสโก ฯ
โอรํ เม ฉหิ มาเสหิ กาลกิริยา ภวิสฺสติ ฯ
เอกนฺตํ กฏุกํ โฆรํ นิริยํ ปปติสฺสาหํ
จตุกฺกณฺณํ จตุทฺวารํ วิภตฺตํ ภาคโส มิตํ
อโยปาการปริยนฺตํ อยสา ปฏิกุชฺชิตํ ฯ
ตสฺส อโยมยา ภูมิ ชลิตา เตชสา ยุตา
สมนฺตา โยชนสตํ ผริตฺวา ติฏฺฐติ สพฺพทา ฯ
วสฺสสตสหสฺสานิ ๒ โฆโส สูยติ ตาวเท ฯ
ลกฺโข เอโส มหาราช สตภาคา วสฺสโกฏิโย
โกฏิสตสหสฺสานิ นิรเย ปจฺจเร ชนา
มิจฺฉาทิฏฺฐี จ ทุสฺสีลา เย จ อริยูปวาทิโน ฯ
ตตฺถาหํ ทีฆมทฺธานํ ทุกฺขํ เวทิสฺสํ เวทนํ
ผลํ ปาปสฺส กมฺมสฺส ตสฺมา โสจามหํ ภุสํ ฯ
#๑ ม. ปวีสติ ฯ ๒ ม. วสฺสานิ สตสหสฺสานิ ฯ
ตํ สุโณหิ มหาราช อรินฺทม รฏฺฐวฑฺฒน
ธีตา มยฺหํ มหาราช อุตฺตรา ภทฺทมตฺถุ เต ฯ
กโรติ ภทฺทกํ กมฺมํ สีเลสูโปสเถ รตา
ทานรตา ๑ สํวิภาคี จ วทญฺญู ๒ วีตมจฺฉรา
อขณฺฑการี สิกฺขายํ สุณฺหา ปรกุเลสุ จ
อุปาสิกา สกฺยมุนิโน สมฺพุทฺธสฺส สิรีมโต ฯ
ภิกฺขุ จ สีลสมฺปนฺโน คามํ ปิณฺฑาย ปาวิสิ
โอกฺขิตฺตจกฺขุ สติมา คุตฺตทฺวาโร สุสํวุโต
สปทานํ จรมาโน อคมา ตํ นิเวสนํ ฯ
ตมทฺทส มหาราช อุตฺตรา ภทฺทมตฺถุ เต
ปูรํ ปานียกรกํ ปูเว จิตฺเต จ สา อทา
ปิตา เม กาลกโต ภนฺเต ตสฺเสตํ อุปกปฺปตุ ฯ
สมนนฺตรานุทิฏฺเฐ วิปาโก อุปปชฺชถ
ภุญฺชามิ กามกามี ๓ ราชา เวสฺสวโณ ยถา ฯ
ตํ สุโณหิ มหาราช อรินฺทม รฏฺฐวฑฺฒน
สเทวกสฺส โลกสฺส พุทฺโธ อคฺโค ปวุจฺจติ
ตํ พุทฺธํ สรณํ คจฺฉ สปุตฺตทาโร อรินฺทม ฯ
อฏฺฐงฺคิเกน มคฺเคน ผุสนฺติ อมตํ ปทํ
ตํ ธมฺมํ สรณํ คจฺฉ สปุตฺตทาโร อรินฺทม ฯ
#๑ ม. ยุ. สญฺญตา ฯ ๒ ยุ. วทญฺญา ฯ ๓ ม. กามกามีหํ ฯ
จตฺตาโร จ ปฏิปนฺนา จตฺตาโร จ ผเล ฐิตา
เอส สงฺโฆ อุชุภูโต ปญฺญาสีลสมาหิโต
ตํ สงฺฆํ สรณํ คจฺฉ สปุตฺตทาโร อรินฺทม ฯ
ปาณาติปาตา วิรมสฺสุ ขิปฺปํ
โลเก อทินฺนํ ปริวชฺชยสฺสุ
อมชฺชโป โน ๑ จ มุสา อภาณิ
สเกน ทาเรน จ โหหิ ตุฏฺโฐ ฯ
อตฺถกาโมสิ เม ยกฺข หิตกาโมสิ เทวเต
กโรมิ ตุยฺหํ วจนํ ตฺวมสิ อาจริโย มม ฯ
อุเปมิ สรณํ พุทฺธํ ธมฺมญฺจาปิ อนุตฺตรํ
สงฺฆญฺจ นรเทวสฺส คจฺฉามิ สรณํ อหํ ฯ
ปาณาติปาตา วิรมามิ ขิปฺปํ
โลเก อทินฺนํ ปริวชฺชยามิ
อมชฺชโป โน จ มุสา ภณามิ
สเกน ทาเรน [๒] โหมิ ตุฏฺโฐ ฯ
โอผุนามิ ๓ มหาวาเต นทิยา วา ๔ สีฆคามิยา ๕
วมามิ ปาปกํ ทิฏฺฐึ พุทฺธานํ สาสเน รโต ฯ
อิทํ วตฺวาน สุรฏฺโฐ วิรมิตฺวา ปาปทสฺสนํ ๖
#๑ ม. มา ฯ ๒ ม. จ ฯ ๓ ยุ. โอธุนามิ ฯ ๔ ม. วาสทฺโท นตฺถิ ฯ
#๕ ยุ. สีฆงฺคมิยา ฯ ๖ ม. ปาปทสฺสนา ฯ
นโม ภควโต กตฺวา ปาโมกฺโข รถมารุยฺหีติ ฯ
นนฺทิกาเปตวตฺถุ ตติยํ ฯ

[๑๒๔] ๔ อุฏฺเฐหิ เรวเต สุปาปธมฺเม
ฯเปฯ
(วิมานวตฺถุสฺมึ ปญฺจมสฺส มหารถวคฺคสฺส ทุติยวตฺถุสฺมึ ทฏฺฐพฺพํ)
เรวติเปตวตฺถุ จตุตฺถํ ฯ

[๑๒๕] ๕ อิทํ มม อุจฺฉุวนํ มหนฺตํ
นิพฺพตฺตติ ปุญฺญผลํ อนปฺปกํ
ตํ ทานิ เม น ปริโภคํ อุเปติ ๑
อาจิกฺข ภนฺเต กิสฺส อยํ วิปาโก ฯ
วิหญฺญามิ ๒ ขชฺชามิ จ วายมามิ จ
ปริสกฺกามิ ปริภุญฺชิตุํ กิญฺจิ
สฺวาหํ ฉินฺนาตุโม ๓ กปโณ ลาลปามิ
กิสฺส กมฺมสฺส อยํ วิปาโก ฯ
วิฆาโต จาหํ ปริปตามิ ฉมายํ
ปริวตฺตามิ วาริจโรว ฆมฺเม
ทูรโต ๔ จ เม อสฺสุกานิ คลนฺติ
อาจิกฺข ภนฺเต กิสฺส อยํ วิปาโก ฯ
ฉาโต กิลนฺโต จ ปิปาสิโต จ
#๑ ม. ปริโภคเมติ ฯ ๒ ม. หญฺญามิ ฯ ๓ ม. ฉินฺนถาโม ฯ ๔ ยุ. รุทโต จ
#เม อสฺสุกา นิคฺคลนฺติ ฯ
สํตสิโต สาตสุขํ น วินฺเท
ปุจฺฉามิ ตํ เอตมตฺถํ ภทนฺเต
กถนฺนุ อุจฺฉุปริโภคํ ลเภยฺยํ ฯ
ปุเร ตุวํ กมฺมมกาสิ อตฺตนา ฯ
มนุสฺสภูโต ปุริมาย ชาติยา
อหญฺจ ตํ เอตมตฺถํ วทามิ
สุตฺวาน ตฺวํ เอตมตฺถํ วิชานํ ฯ
อุจฺฉู ตุวํ ขาทมาโน ปยาโต
ปุริโส จ เต ปิฏฺฐิโต อนุคญฺฉิ
โส จ ตํ ปจฺจาสนฺโต กเถสิ
ตสฺส ตุวํ น กิญฺจิ อาลปิตฺถ ฯ
โส จ ตํ ๑ อภณนฺตํ อยาจิ
เทเหยฺย อุจฺฉุนฺติ จ ตํ อโวจ
ตสฺส ตุวํ ปิฏฺฐิโต อุจฺฉฉ อทาสิ
ตสฺเสตํ กมฺมสฺส อยํ วิปาโก ฯ
อิงฺฆ ตฺวํ ๒ คนฺตฺวาน ปิฏฺฐิโต คเณฺหยฺยาสิ
คเหตฺวาน ขาทสฺสุ ยาวทตฺถํ
เตเนว ตฺวํ อตฺตมโน ภวิสฺสสิ
หฏโฐ อุทคฺโค ๓ จ ปโมทิโต จ ฯ
#๑ ยุ. อภิณฺหํ อายาจิ ฯ ๒ ยุ. ตุวํ ปิฏฺฐิโต คณฺห อุจฺฉฉ ฯ ๓ ม. จุทคฺโค ฯ
คนฺตฺวาน โส ปิฏฺฐิโต อคฺคเหสิ
คเหตฺวาน ตํ ขาทิ ยาวทตฺถํ
เตเนว โส อตฺตมโน อโหสิ
หฏฺโฐ อุทคฺโค จ ปโมทิโตติ ๑ ฯ
อุจฺฉุเปตวตฺถุ ปญฺจมํ ฯ

[๑๒๖] ๖ สาวตฺถี นาม นครํ หิมวนฺตสฺส ปสฺสโต
ตตฺถาสุํ เทฺว กุมารา ราชปุตฺตาติ เม สุตํ ฯ
ปมตฺตา ๒ รชนีเยสุ กามสฺสาทาภินนฺทิโน
ปจฺจุปฺปนฺเน สุเข คิทฺธา น เต ปสฺสึสุ นาคตํ ฯ
เต ปุตฺตา ๓ จ มนุสฺสตฺตา ปรโลกํ อิโต คตา
เต จ ๔ โฆเสนฺติ ๕ น ทิสฺสนฺโต ปุพฺเพ ทุกฺกฏมตฺตโน ฯ
พหูสุ วต สนฺเตสุ เทยฺยธมฺเม อุปฏฺฐิเต
นาสกฺขิมฺหา จ อตฺตานํ ปริตฺตโสตฺถึ ๖ กาตุํ สุขาวหํ ฯ
กึ ตโต ปาปกํ อสฺส ยนฺโน ราชกุลา จุตา
อุปปนฺนา เปตวิสยํ ขุปฺปิปาสาสมปฺปิตา ฯ
สามิโน อิธ หุตฺวาน โหนฺติ อสฺสามิโน ตหึ
มรนฺติ ๗ ขุปฺปิปาสาย มนุสฺสา อุนฺนโตนตา ฯ
เอวมาทีนวํ ๘ ญตฺวา อิสฺสรมานสมฺภวํ
#๑ ยุ. อิเม ปาฐา น ทิสฺสนฺติ ฯ ๒ ม. สมฺมตฺตา ฯ ๓ ยุ. จุตา ฯ
#๔ ยุ. เตธ ฯ ๕ ม. โฆเสนฺตยทิสฺสนฺตา ฯ ๖ ม. ปริตฺตํ ฯ
#๗ ยุ. จรนฺติ ฯ ม. ภมนฺติ ฯ ๘ ม. เอตมาทีนวํ ฯ
ปหาย อิสฺสรมทํ ภเว สคฺคคโต นโร
กายสฺส เภทา สปฺปญฺโญ สคฺคํ โส อุปปชฺชตีติ ฯ
กุมารเปตวตฺถุ ฉฏฺฐํ ฯ

[๑๒๗] ๗ ปุพฺเพ กตานํ กมฺมานํ วิปาโก มถเย มนํ
รูเป สทฺเท รเส คนฺเธ โผฏฺฐพฺเพ จ มโนรเม ฯ
นจฺจํ คีตํ รตึ ขิฑฺฑํ อนุภุตฺวา อนปฺปกํ
อุยฺยาเน ปริจาริตฺวา ๑ ปวิสนฺโต คิริพฺพชํ ฯ
อิสึ สุเนตฺตมทฺทกฺขิ อตฺตทนฺตํ สมาหิตํ
อปฺปิจฺฉํ หิรีสมฺปนฺนํ อุญฺเฉ ปตฺตคเต รตํ ฯ
หตฺถิกฺขนฺธโต โอรุยฺห ลทฺธา ภนฺเตติ จ พฺรูวิ
ตสฺส ปตฺตํ คเหตฺวาน อุจฺจํ ปคฺคยฺห ขตฺติโย ฯ
ถณฺฑิเล ปตฺตํ ภินฺทิตฺวา หสมาโน อปกฺกมิ
รญฺโญ กิตวสฺสาหํ ปุตฺโต กึ มํ ภิกฺขุ กริสฺสสิ ฯ
ตสฺส กมฺมสฺส ผรุสสฺส วิปาโก กฏุโก อหุ
ยํ ราชปุตฺโต เวเทสิ นิรยมฺหิ สมปฺปิโต ฯ
ฉเฬว จตุราสีติ วสฺสานิ นหุตานิ จ
ภุสํ ทุกฺขํ นิคจฺฉิฏฺโฐ นิรเย กตกิพฺพิโส ฯ
อุตฺตาโนปิ จ ปจฺจิตฺถ นิกุชฺโช วามทกฺขิโณ
อุทฺธํปาโท ฐิโต เจว จิรํ พาโล อปจฺจิถ ฯ
#๑ ยุ. จริตฺวาน ฯ
พหูนิ วสฺสสหสฺสานิ ปูคานิ นหุตานิ จ
ภุสํ ทุกฺขํ นิคจฺฉิฏฺโฐ นิรเย กตกิพฺพิโส ฯ
เอตาทิสํ โข กฏุกํ อปฺปทุฏฺฐปโทสินํ
ปจฺจนฺติ ปาปกมฺมนฺตา อิสึ อาสชฺช สุพฺพตํ ฯ
โส ตตฺถ พหุวสฺสานิ เวทยิตฺวา พหุทุกฺขํ
ขุปฺปิปาสหโต นาม เปโต อาสิ ตโต จุโต ฯ
เอวมาทีนวํ ญตฺวา อิสฺสรมทสมฺภวํ
ปหาย อิสฺสรมทํ นิวาตมนุวตฺตเย ฯ
ทิฏฺเฐว ธมฺเม ปาสํโส โย พุทฺเธสุ สคารโว
กายสฺส เภทา สปฺปญฺโญ สคฺคํ โส อุปปชฺชตีติ ฯ
ราชปุตฺตเปตวตฺถุ สตฺตมํ ฯ

[๑๒๘] ๘ คูถกูปโต อุคฺคนฺตฺวา โก นุ ทิฏฺโฐว ๑ ติฏฺฐสิ
นิสํสยํ ปาปกมฺมนฺโต กินฺนุ สทฺทยเส ตุวนฺติ ฯ
อหํ ภทนฺเต ๒ เปโตมฺหิ ทุคฺคโต ยมโลกิโก
ปาปกมฺมํ กริตฺวาน เปตโลกํ อิโต คโตติ ฯ
กึ นุ กาเยน วาจาย มนสา ทุกฺกฏํ กตํ
กิสฺส กมฺมวิปาเกน อิทํ ทุกฺขํ นิคจฺฉสีติ ฯ
อหุ อาวาสิโก มยฺหํ อิสฺสุกี กุลมจฺฉรี
อชฺโฌสิโต ๓ มยฺหํ ฆเร กทริโย ปริภาสโก ฯ
#๑ ม. ทีโน ปติฏฺฐสิ ฯ ๒ ยุ. ภนฺเต ฯ ๓ ยุ. อชฺฌาสิโต ฯ
ตสฺสาหํ วจนํ สุตฺวา ภิกฺขโว ปริภาสิสฺสํ
ตสฺส กมฺมวิปาเกน เปตโลกํ อิโต คโตติ ฯ
อมิตฺโต มิตฺตวณฺเณน โย เต อาสิ กุลูปโก
กายสฺส เภทา ทุปฺปญฺโญ กินฺนุ เปจฺจ คตึ คโตติ ฯญ
ตสฺเสวาหํ ปาปกมฺมสฺส สีเส ติฏฺฐามิ มตฺถเก
โส จ ปรวิสยํ ปตฺโต มเมว ปริวารโก ฯ
ยํ ภทนฺเตหนนฺตญฺเญ เอตํ เม โหตุ โภชนํ
อหญฺจ โข ยํหนามิ เอตํ โส อุปชีวตีติ ฯ
คูถขาทกเปตวตฺถุ อฏฺฐมํ ฯ

[๑๒๙] ๙ คูถกูปโต อุคฺคนฺตฺวา กา นุ ทิฏฺฐาว ติฏฺฐสิ
นิสํสยํ ปาปกมฺมนฺตา กินฺนุ สทฺทยเส ตุวนฺติ ฯ
อหํ ภทนฺเต ๑ เปตีมฺหิ ทุคฺคตา ยมโลกิกา
ปาปกมฺมํ กริตฺวาน เปตโลกํ อิโต คตาติ ฯ
กึ นุ กาเยน วาจาย มนสา ทุกฺกฏํ กตํ
กิสฺส กมฺมวิปาเกน อิทํ ทุกฺขํ นิคจฺฉสีติ ฯ
อหุ อาวาสิโก มยฺหํ อิสฺสุกี กุลมจฺฉรี
อชฺโฌสิโต ๒ มยฺหํ ฆเร กทริโย ปริภาสโก ฯ
ตสฺสาหํ วจนํ สุตฺวา ภิกฺขโว ปริภาสิสฺสํ
ตสฺส กมฺมวิปาเกน เปตโลกํ อิโต คตาติ ฯ
#๑ ยุ. ภนฺเต ฯ ๒ ยุ. อชฺฌาสิโต ฯ
อมิตฺโต มิตฺตวณฺเณน โย เต อาสิ กุลูปโก
กายสฺส เภทา ทุปฺปญฺโญ กินฺนุ เปจฺจ คตึ คโตติ ฯ
ตสฺเสวาหํ ปาปกมฺมสฺส สีเส ติฏฺฐามิ มตฺถเก
โส จ ปรวิสยํ ปตฺโต มเมว ปริวารโก ฯ
ยํ ภทนฺเตหนนฺตญฺเญ เอตํ เม โหตุ โภชนํ
อหญฺจ โข ยํหนามิ เอตํ โส อุปชีวตีติ ฯ
คูถขาทกเปตวตฺถุ นวมํ ฯ

[๑๓๐] ๑๐ นคฺคา ทุพฺพณฺณรูปาถ กีสา ธมนิสณฺฐิตา
อุปฺผาสุลิกา กีสกา เก นุ ตุเมฺหถ มาริสาติ ฯ
มยํ ภทนฺเต เปตมฺหา ทุคฺคตา ยมโลกิกา
ปาปกมฺมํ กริตฺวาน เปตโลกํ อิโต คตาติ ฯ
กึ นุ กาเยน วาจาย มนสา ทุกฺกฏํ กตํ
กิสฺส กมฺมวิปาเกน เปตโลกํ อิโต คตาติ ฯ
อนวชฺเชสุ ๑ ติตฺเถสุ วิจินิมฺหฑฺฒมาสกํ
สนฺเตสุ เทยฺยธมฺเมสุ ทีปํ นากมฺหมตฺตโน ฯ
นทึ อุเปม ตสิตา ริตฺตกา ปริวตฺตติ
ฉายํ อุเปม อุเณฺหสุ อาตโป ปริวตฺตติ ฯ
อคฺคิวณฺโณว โน วาโต ฑหนฺโต อุปวายติ
เอตญฺจ ภนฺเต อรหาม อญฺญญฺจ ปาปกํ ตโต ฯ
อปิ โยชนานิ คจฺฉาม ฉาตา อาหารคิทฺธิโน
#๑ อนาวเฏสูติปิ ทิสฺสติ ฯ
อลทฺธา เยว นิวตฺตาม อโห โน อปฺปปุญฺญตา ฯ
ฉาตา ปมุจฺฉิตา ภนฺเต ภูมิยํ ปฏิสุมฺภิตา
อุตฺตานา ปติกิราม อวกุชฺชา ปตามเส ฯ
เต จ ตตฺเถว ปติตา ภูมิยํ ปฏิสุมฺภิตา
อุรํ สีสญฺจ ฆฏฺเฏม อโห โน อปฺปปุญฺญตา ฯ
เอตญฺจ ภนฺเต อรหาม อญฺญญฺจ ปาปกํ ตโต
สนฺเตสุ เทยฺยธมฺเมสุ ทีปํ นากมฺหมตฺตโน ฯ
เต หิ นูน อิโต คนฺตฺวา โยนึ ลทฺธาน มานุสึ
วทญฺญู สีลสมฺปนฺนา กาหาม กุสลํ พหุนฺติ ฯ
คณเปตวตฺถุ ทสมํ ฯ

[๑๓๑] ๑๑ ทิฏฺฐา ตยา นิรยา ติรจฺฉานโยนี
เปตา อสุรา วาปิ ๑ มนุสฺสเทวา
สยมทฺทส กมฺมวิปากมตฺตโน
เนสฺสามิ ตํ ปาฏลิปุตฺตมกฺขตํ
ตตฺถ คนฺตฺวา กุสลํ กโรหิ กมฺมนฺติ ฯ
อตฺถกา โมสิ เม ยกฺข หิตกาโมสิ เทวเต
กโรมิ ตุยฺหํ วจนํ ตฺวมสิ อาจริโย เม ฯ
ทิฏฺฐา มยา นิรยา ติรจฺฉานโยนี
เปตา อสุรา วาปิ มนุสฺสเทวา
#๑ ม. ยุ. อถ วาปิ มนุสฺสา เทวา ฯ
สยมทฺทส กมฺมวิปากมตฺตโน
กาหามิ ปุญฺญานิ อนปฺปกานีติ ฯด
ปาฏลิปุตฺตเปตวตฺถุ เอกาทสมํ ฯ