[๖๒] ๑๒ โก นุ ทิพฺเพน ยาเนน สพฺพเสเตน หตฺถินา
ตุริยตาฬิตนิคฺโฆโส อนฺตลิกฺเข มหิยฺยติ
เทวตา นุสิ คนฺธพฺโพ อาทู สกฺโก ปุรินฺทโท
อชานนฺตา ตํ ปุจฺฉาม กถํ ชาเนมุ ตํ มยนฺติ ฯ
นมฺหิ เทโว น คนฺธพฺโพ นาปิ สกฺโก ปุรินฺทโท
สุธมฺมา นาม เย เทวา เตสํ อญฺญตโร อหนฺติ ฯ
ปุจฺฉาม เทว สุธมฺม ปุถุํ กตฺวาน อญฺชลึ
กึ กตฺวา มานุเส กมฺมํ สุธมฺมํ อุปปชฺชสีติ ฯ
อุจฺฉาคารํ ติณาคารํ วตฺถาคารญฺจ โย ทเท
ติณฺณมญฺญตรํ ทตฺวา สุธมฺมํ อุปปชฺชตีติ ฯ
ตติยนาควิมานํ ทฺวาทสมํ ฯ

[๖๓] ๑๓ ทฬฺหธมฺมนิสารสฺส ธนน โอลุพฺภ ติฏฺฐสิ
ขตฺติโย นุสิ ราชญฺโญ อาทู ลุทฺโธ วนาจโรติ ฯ
อสฺสกาธิปติสฺสาหํ ภนฺเต ปุตฺโต วเนจโร
นามํ เม ภิกฺขุ เต พฺรูมิ สุชาโต อิติ มํ วิทู
มิเค คเวสมาโนหํ โอคาหนฺโต พฺรหาวนํ
มิคํ คนฺเตฺวว นาทกฺขึ ตญฺจ ทิสฺวา อหํ ฐิโต (อิติ) ฯ
สฺวาคตนฺเต มหาปุญฺญ อโถ เต อทูราคตํ
อิโต อุทกมาทาย ปาเท ปกฺขาลยสฺสุ เต
อิทํปิ ปานิยํ สีตํ อาภตํ คิริคพฺภรา
ราชปุตฺต ตโต ปิตฺวา สนฺถตสฺมึ อุปาวิสาติ ฯ
กลฺยาณี วต เต วาจา สวนียา มหามุนิ
เนลา ๑ อตฺถวตี วคฺคู มนฺตา อตฺถญฺจ ภาสสิ
กา เต รติ วเน วิหรโต
อิสินิสภ วเทหิ ปุฏฺโฐ
ตว วจนปถํ นิสามยิตฺวา
อตฺถธมฺมปทํ สมาจเรมเสติ ฯ
อหึสา สพฺพปาณินํ กุมารมฺหากํ ๒ รุจฺจติ
เถยฺยา จ อติจารา จ มชฺชปานา จ อารติ
อรติ สมจริยา จ พาหุสจฺจํ กตญฺญุตา
ทิฏฺเฐว ธมฺเม ปสํสา ๓ ธมฺมา เอเต ปสํสิยาติ
สนฺติเก มรณํ ตุยฺหํ โอรํ มาเสหิ ปญฺจหิ
#๑ ยุ. เนฬา ฯ ๒ ม. กุมารมฺหาก ฯ ๓ ม. ปาสํสา ฯ
ราชปุตฺต วิชานาหิ อตฺตานํ ปริโมจยาติ ฯ
กตมํ สฺวาหํ ชนปทํ คนฺตฺวา กึ กมฺมํ กิญฺจิ โปริสํ
กาย วา ปน วิชฺชาย ภเวยฺยํ อชรามโรติ ฯ
น วิชฺชเต โส ปเทโส ๑ กมฺมํ วิชฺชา จ โปริสํ
ยตฺถ คนฺตฺวา ภเว มจฺโจ ราชปุตฺตาชรามโร
มหทฺธนา มหาโภคา รฏฺฐวนฺโตปิ ขตฺติยา
ปหูตธนธญฺญาเส น เตปิ อชรามรา
ยทิ เต สุตา อนฺธกเวณฺฑปุตฺตา ๒
สูรา วีรา วิกฺกนฺตปฺปหาริโน
เตปิ อายุกฺขยํ ปตฺตา
วิทฺธสฺตา สสฺสตีสมา
ขตฺติยา พฺราหฺมณา เวสฺสา สุทฺทา จณฺฑาลปุกฺกุสา
เอเต จญฺเญ จ ชาติยา เตปิ น อชรามรา
เย มนฺตํ ปริวตฺเตนฺติ ฉฬงฺคํ พฺรหฺมจินฺติตํ
เอเต จญฺเญ จ วิชฺชาย เตปิ น อชรามรา
อิสโย จาปิ เย สนฺตา สญฺญตตฺตา ตปสฺสิโน
สรีรํ เตปิ กาเลน วิชหนฺติ ตปสฺสิโน
ภาวิตตฺตาปิ อรหนฺโต กตกิจฺจา อนาสวา
นิกฺขิปนฺติ อิมํ เทหํ ปุญฺญปาปปริกฺขยา (อิติ) ฯ
สุภาสิตา อตฺถวตี คาถาโย เต มหามุนิ
#๑ ยุ. น. วิชฺชเต หิ เทโส ฯ ๒ สี. อนฺธกเวณฺหุปุตฺตา ฯ ม. อนฺธกเวณฺฑุปุตฺตา ฯ
นิชฺฌตฺโตมฺหิ สุภฏฺเฐน ตฺวญฺจ เม สรณํ ภวาติ ฯ
มา มํ ตฺวํ สรณํ คจฺฉ ตเมว สรณํ วช
สกฺยปุตฺตํ มหาวีรํ ยมหํ สรณํ คโตติ ฯ
กตรสฺมึ โส ชนปเท สตฺถา ตุมฺหาก มาริส
อหมฺปิ ทฏฺฐฐ คจฺฉิสฺสํ ชินํ อปฺปฏิปุคฺคลนฺติ ฯ
ปุรตฺถิมสฺมึ ชนปเท โอกฺกากกุลสมฺภโว
สตฺถาปิ ปุริสาชญฺโญ โส จ โข ปรินิพฺพุโตติ ฯ
สเจ หิ พุทฺโธ ติฏฺเฐยฺย สตฺถา ตุมฺหาก มาริส
โยชนานิ สหสฺสานิ คจฺเฉ ๑ ปยิรุปาสิตุํ
ยโต จ โข ปรินิพฺพุโต สตฺถา ตุมฺหาก มาริส
ปรินิพฺพุตํ มหาวีรํ คจฺฉามิ สรณํ อหํ
อุเปมิ สรณํ พุทฺธํ ธมฺมญฺจาปิ อนุตฺตรํ
สงฺฆญฺจ นรเทวสฺส คจฺฉามิ สรณํ อหํ
ปาณาติปาตา วิรมามิ ขิปฺปํ
โลเก อทินฺนํ ปริวชฺชยามิ
อมชฺชโป โน จ มุสา ภณามิ
สเกน ทาเรน จ โหมิ ตุฏฺโฐติ ฯ
สหสฺสรํสีว ยถา มหปฺปโภ
ทิสํ ยถา ภาติ นเภ อนุกฺกมํ
ตถปฺปกาโร ๒ ตวายํ ๓ มหารโถ
#๑ ม. ยุ. คจฺเฉยฺยํ ฯ ๒ ม. ตถาปกาโร ฯ ๓ สี. ยุ. ตวยํ ฯ
สมนฺตโต โยชนสตํ อายโต ๑
สุวณฺณปฏฺเฏหิ สมนฺตโมนโฏ ๒
อุรสฺส มุตฺตาหิ มณีหิ จิตฺติโต
เลขา สุวณฺณสฺส จ รูปิยสฺส จ
โสภนฺติ เวฬุริยมยา สุนิมฺมิตา
สีสญฺจิทํ เวฬุริยสฺส นิมฺมิตํ
ยุคญฺจิทํ โลหิตกาย จิตฺติตํ
ยุตฺตา สุวณฺณสฺส จ รูปิยสฺส จ
โสภนฺติ อสฺสาปิ จิเม มโนชวา
โส ติฏฺฐสิ เหมรเถ อธิฏฺฐิโต
เทวานมินฺโทว สหสฺสวาหโน
ปุจฺฉามิ ตาหํ ยสวนฺตโกวิทํ
กถํ ตยา ลทฺโธ อยํ อุฬาโรติ ฯ
สุชาโต นามหํ ภนฺเต ราชปุตฺโต ปุเร อหุํ
ตญฺจ ๓ มํ อนุกมฺปาย สญฺญมสฺมึ นิเวสยิ
ขีณายุกญฺจ มํ ญตฺวา สรีรํ ปาทาสิ สตฺถุโน (อิติ) ฯ
อิมํ สุชาต ปูเชหิ ตนฺเต อตฺถาย โหหีติ
ตาหํ คนฺเธหิ มาเลหิ ปูชยิตฺวา สมุยฺยุโก ๔
ปหาย มานุสํ เทหํ อุปปนฺโนมฺหิ นนฺทเน
#๑ ม. โยชนสตฺตมายโต ฯ ๒ ม. สมนฺตโมตฺถโต ฯ ๓ ม. ตฺวญฺจ ฯ ๔ ม. ยุ. สมุยฺยุโต ฯ
นนฺทเน ปวเร ๑ รมฺเม นานาทิชคณายุเต
รมามิ นจฺจคีเตหิ อจฺฉราหิ ปุรกฺขิโตติ ฯ
จูฬรถวิมานํ เตรสมํ ฯ

[๖๔] ๑๔ สหสฺสยุตฺตํ หยวาหนํ สุภํ
อารุยฺหิมํ สนฺทนเนกจิตฺตํ
อุยฺยานภูมึ อภิโต อนุกฺกมํ
ปุรินฺทโท ภูตปตีว วาสโว
โสวณฺณมยา เต รถกุพฺพรา อุโภ
ผเลหิ อํเสหิ อตีว สงฺคตา
สุชาตคุมฺพา นรวีรนิฏฺฐิตา
วิโรจติ ปณฺณรเสว จนฺโท
สุวณฺณชาลาวิตโต ๒ รโถ อยํ
พหูหิ นานารตเนหิ จิตฺติโต
สุนนฺทิโฆโส จ สุภสฺสโร จ
วิโรจติ จามรหตฺถพาหุหิ
อิมา จ นาโภฺย มนสาหิ ๓ นิมฺมิตา
รถสฺส ปาทนฺตรมชฺฌภูสิตา
อิมา จ นาโภฺย สตราชิจิตฺติตา
สเตริตา ๔ วิชฺชุริวปฺปภาสเร
#๑ ม. นนฺทเน จ วเน ฯ ยุ. ปวเน ฯ ๒ สุวณฺณชาลาวตโตติปิ ทิสฺสติ ฯ
#๓ ม. ยุ. มนสาภินิมฺมิตา ฯ ๔ ม. สเตรตา ฯ
อเนกจิตฺตาวิตโต ๑ รโถ อยํ
ปุถู จ เนมี จ สหสฺสรํสิโย ๒
เตสํ สโร สุยฺยติ วคฺคุรูโป
ปญฺจงฺคิกํ ตุริยมิวปฺปวาทิตํ
สิรสฺมึ จิตฺตํ มณิสนฺทกปฺปิตํ ๓
สทา วิสุทฺธํ รุจิรํ ปภสฺสรํ
สุวณฺณราชีหิ อตีว สงฺคตํ
เวฬุริยราชีหิ อตีว โสภติ
อิเม จ วาฬี มณิสนฺทกปฺปิตา ๓
อาโรหกมฺพู สุชวา พฺรหฺมูปมา
พฺรหา มหนฺตา พลิโน มหาชวา
มโน ตวญฺญาย ตเถว สึสเร
อิเม จ สพฺเพ สหิตา จตุกฺกมา
มโน ตวญฺญาย ตเถว สึสเร
สมํ วหนฺติ มุทุกา อนุทฺธตา
อาโมทมานา ตุรคานมุตฺตมา
ธุนนฺติ วคฺคนฺติ ปวตฺตนฺติ อมฺพเร
อพฺภุทฺธุนนฺตา สุกเต ปิลนฺธเน
เตสํ สโร สุยฺยติ วคฺคุรูโป
#๑ อเนกจิตฺตาวตโตติปิ ทิสฺสติ ฯ ๒ ม. สหสฺสรํสิโก ฯ
#๓ …จนฺท… อิติปิ ทิสฺสติ ฯ
ปญฺจงฺคิกํ ตุริยมิวปฺปวาทิตํ
รถสฺส โฆโส อปิลนฺธนานิ ๑
ขุรสฺส นาทิ อภิหึสนาย จ
โฆโส สุวคฺคู สมิตสฺส สุยฺยติ
คนฺธพฺพตุริยานิ วิจิตฺรสวเน
รเถ ฐิตา ตา มิคมนฺทโลจนา
อาฬารปมฺหา หสิตา ปิยํวทา
เวฬุริยชาลา วินตา ๒ ตนุจฺฉวา
สเทว คนฺธพฺพสุรคฺคปูชิตา
รตฺตา รตฺตมฺพรปีตวาสสา
วิสาลเนตฺตา อภิรตฺตโลจนา
กุเลสุ ชาตา สุตนู สุวิมฺหิตา ๓
รเถ ฐิตา ปญฺชลิกา อุปฏฺฐิตา
ตา กมฺพุกายุรธรา สุวาสสา
สุมชฺฌิมา อูรุถโนปปนฺนา
วฏฺฏงฺคุลิโย สุมุขา สุทสฺสนา
รเถ ฐิตา ปญฺชลิกา อุปฏฺฐิตา
อญฺญาสุ เวณีสุ สุมิสฺสเกสิโย ๔
สมํ วิภตฺตาหิ ปภสฺสราหิ จ
#๑ อปิลนฺธนานญฺจ อิติปิ ทิสฺสติ ฯ ๒ เวฬุริยชาลาวิตตาติปิ ทิสฺสติ ฯ
#๓ สุจิมฺหิตาติปิ ทิสฺสติ ฯ ๔ อญฺญา สุเวณี สุสฺ มิสฺสเกสิโยติปิ ทิสฺสติ ฯ
อนุปุพฺพตา ตา ตว มานเส รตา
รเถ ฐิตา ปญฺชลิกา อุปฏฺฐิตา
อาเวฬินิโย ปทุมุปฺปลจฺฉทา
อลงฺกตา จนฺทนสารโวสิตา ๑
อนุปุพฺพตา ตา ตว มานเส รตา
รเถ ฐิตา ปญฺชลิกา อุปฏฺฐิตา
ตา มาลินิโย ปทุมุปฺปลจฺฉทา
อลงฺกตา จนฺทนสารโวสิตา
อนุปุพฺพตา ตา ตว มานเส รตา
รเถ ฐิตา ปญฺชลิกา อุปฏฺฐิตา
กณฺเฐสุ เต ๒ ยานิ ปิลนฺธนานิ จ
หตฺเถสุ ปาเทสุ ตเถว สีเส
โอภาสยนฺติ ทส สพฺพโต ๓ ทิสา
อพฺภุทฺทยํ สารทิโกว ภาณุมา
วาตสฺส เวเคน จ สมฺปกมฺปิตา
ภุเชสุ มาลา อปิลนฺธนานิ จ
มุญฺจนฺติ โฆสํ รุจิรํ สุจึ สุภํ
สพฺเพหิ วิญฺญูหิ สุสตฺตรูปํ ๔
อุยฺยานภุมฺยา จ ทุวฏฺฐิโต ๕ ฐิตา
#๑ ม … วาสิตา ฯ ๒ ยุ. ตว ฯ ๓ ม. สพฺพโส ฯ
#๔ โป. สุตคฺครูปํ ฯ ม. สุตพฺพรูปํ ฯ ๕ ม. ทุวทฺธโต ฯ ยุ. ทุหฏฺฐโต ฯ
รถา จ นาคา ตุริยานิ วาสโร ๑
ตเมว เทวินฺท ปโมทยนฺติ
วีณา ยถา โปกฺขรปตฺตพาหุหิ
อิมาสุ วีณาสุ พหูสุ วคฺคูสุ
มนุญฺญรูปาสุ หทเยริตมฺปิ ตํ
ปวชฺชมานาสุ อตีว อจฺฉรา
ภมนฺติ กญฺญา ปทุเมสุ สิกฺขิตา
ยถา จ คีตานิ จ วาทิตานิ จ
นจฺจานิ จิมานิ สเมนฺติ เอกโต
อเถตฺถ นจฺจนฺติ อเถตฺถ อจฺฉรา
โอภาสยนฺติ อุภโต ว รตฺติยา
โส โมทสิ ตุริยคณปฺปโพธโน
มหียมาโน วชิราวุโธริว
อิมาสุ วีณาสุ พหูสุ วคฺคูสุ
มนุญฺญรูปาสุ หทเยริตมฺปิ ตํ่
กึ ตฺวํ ปุเร กมฺมมกาสิ อตฺตนา
มนุสฺสภูโต ปุริมาย ชาติยา
อุโปสถํ กึ ว ตุวํ อุปาวิสิ
กึ ธมฺมจริยํ วตมาภิโรจสิ
นยิทํ อปฺปสฺส กตสฺส กมฺมุโน
ปุพฺเพ สุจิณฺณสฺส อุโปสถสฺส วา
#๑ จ สโรติปิ ทิสฺสติ ฯ
อิทฺธานุภาโว วิปุโล อยํ ตว
ยํ เทวสงฺฆํ อภิโรจเส ภุสํ
ทานสฺส เต อิทํ ผลํ อโถ สีลสฺส วา ปน
อโถ อญฺชลิกมฺมสฺส ตมฺเม อกฺขาหิ ปุจฺฉิโต (อิติ) ฯ
โส เทวปุตฺโต อตฺตมโน โมคฺคลฺลาเนน ปุจฺฉิโต
ปญฺหํ ปุฏฺโฐ วิยากาสิ ยสฺส กมฺมสฺสิทํ ผลํ
ชิตินฺทฺริยํ พุทฺธมโนมนิกฺกมํ
นรุตฺตมํ กสฺสปมคฺคปุคฺคลํ
อปาปุรนฺตํ อมตสฺส ทฺวารํ
เทวาติเทวํ สตปุญฺญลกฺขณํ
ตมทฺทสํ กุญฺชรโมฆติณฺณํ
สุวณฺณสิงฺคินทพิมฺพสาทิสํ
ทิสฺวาน ตํ ขิปฺปมหุํ สุจิมโน
ตเมว ทิสฺวาน สุภาสิตทฺธชํ
ตมนฺนปานํ อถ วาปิ จีวรํ
สุจึ ปณีตํ รสสา อุเปตํ
ปุปฺผาภิกิณฺณมฺหิ สเก นิวาสเน
ปติฏฺฐเปสึ ส อสงฺคมานโส
ตมนฺนปาเนน จ จีวเรน จ
ขชฺเชน โภชฺเชน จ สายเนน จ
สนฺตปฺปยิตฺวา ทิปทานมุตฺตมํ
โส สคฺคโส เทวปุเร รมามหํ
เอเตนุปาเยน อิมํ นิรคฺคลํ
ยญฺญํ ยชิตฺวา ติวิธํ วิสุทฺธํ
ปหายหํ มานุสฺสกํ สมุสฺสยํ
อินฺทสโม เทวปุเร รมามหํ
อายุญฺจ วณฺณญฺจ สุขํ พลญฺจ
ปณีตรูปํ อภิกงฺขตา มุนิ
อนฺนญฺจ ปานญฺจ พหุํ สุสงฺขตํ
ปติฏฺฐเปตพฺพมสงฺคมานโส
อิมสฺมึ โลเก ปรสฺมึ วา ปน
พุทฺเธน เสฏฺโฐ จ สโม น วิชฺชติ
อาหุเนยฺยานํ ปรมาหุตํ ๑ คโต
ปุญฺญตฺถิกานํ วิปุลปฺผเลสินนฺติ ฯ
มหารถวิมานํ จุทฺทสมํ ฯ
อุทฺทานํ
มณฺฑูโก เรวตี ฉตฺโต กกฺกฏโก ๒ ทฺวารปาลโก
เทฺว กรณียา เทฺว สูจี ตโย นาคา จ เทฺว รถา
ปุริสานํ ปญฺจโม วคฺโคติ ปฐโม วคฺโค ๓ ปวุจฺจตีติ ฯ
ภาณวารํ ตติยํ ฯ
#๑ ม. ยุ. ปรมาหฺตึ ฯ ๒ ม. ยุ. กกฺกโฏ ฯ ๓ ยุ. ปฐโม วคฺโคติ อิเม ปาฐา นตฺถิ ฯ
ฉฏฺโฐ ปายาสิกวคฺโค

[๖๕] ๑ ยถา วนํ จิตฺตลตํ ปภาสติ
อุยฺยานเสฏฺฐํ ติทสานมุตฺตมํ
ตถูปมํ ตุยฺหมิทํ วิมานํ
โอภาสยํ ติฏฺฐติ อนฺตลิกฺเข
เทวิทฺธิปตฺโตสิ มหานุภาโว
มนุสฺสภูโต กิมกาสิ ปุญฺญํ
เกนาสิ เอวญฺชลิตานุภาโว
วณฺโณ จ เต สพฺพทิสา ปภาสตีติ ฯ
โส เทวปุตฺโต อตฺตมโน โมคฺคลฺลาเนน ปุจฺฉิโต
ปญฺหํ ปุฏฺโฐ วิยากาสิ ยสฺส กมฺมสฺสิทํ ผลํ
อหญฺจ ภริยา จ มนุสฺสโลเก
โอปานภูตา ฆรมาวสิมฺหา
อนฺนญฺจ ปานญฺจ ปสนฺนจิตฺตา
สกฺกจฺจ ทานํ วิปุลํ อทมฺห
เตน เมตาทิโส วณฺโณ … เป …
วณฺโณ จ เม สพฺพทิสา ปภาสตีติ ฯ
อคาริยวิมานํ ปฐมํ ฯ

[๖๖] ๒ ยถา วนํ จิตฺตลตํ ปภาสติ
อุยฺยานเสฏฺฐํ ติทสานมุตฺตมํ
ตถูปมํ ตุยฺหมิทํ วิมานํ
โอภาสยํ ติฏฺฐติ อนฺตลิกฺเข
เทวิทฺธิปตฺโตสิ มหานุภาโว
มนุสฺสภูโต กิมกาสิ ปุญฺญํ
เกนาสิ เอวญฺชลิตานุภาโว
วณฺโณ จ เต สพฺพทิสา ปภาสตีติ ฯ
โส เทวปุตฺโต อตฺตมโน โมคฺคลฺลาเนน ปุจฺฉิโต
… เป … ยสฺส กมฺมสฺสิทํ ผลํ
อหญฺจ ภริยา จ มนุสฺสโลเก
โอปานภูตา ฆรมาวสิมฺหา
อนฺนญฺจ ปานญฺจ ปสนฺนจิตฺตา
สกฺกจฺจ ทานํ วิปุลํ อทมฺห
เตน เมตาทิโส วณฺโณ … เป …
วณฺโณ จ เม สพฺพทิสา ปภาสตีติ ฯ
อคาริยวิมานํ ทุติยํ ฯ

[๖๗] ๓ อุจฺจมิทํ มณิถูณํ วิมานํ
สมนฺตโต ทฺวาทส ๑ โยชนานิ
กูฏาคารา สตฺตสตา อุฬารา
เวฬุริยตฺถมฺภา รุจิรตฺถตา ๒ สุภา
ตตฺถจฺฉสิ ปิวสิ ขาทสิ จ
#๑ โป. ม. ยุ. โสฬส ฯ ๒ ม. รุจกตฺถตา ฯ
ทิพฺพา จ วีณา ปวทนฺติ วคฺคู ๑
อฏฺฐฏฺฐกา สิกฺขิตา สาธุรูปา
ทิพฺพา จ กญฺญา ติทสจรา ๒ อุฬารา
นจฺจนฺติ คายนฺติ ปโมทยนฺติ
เทวิทฺธิปตฺโตสิ มหานุภาโว
มนุสฺสภูโต กิมกาสิ ปุญฺญํ
เกนาสิ เอวญฺชลิตานุภาโว
วณฺโณ จ เต สพฺพทิสา ปภาสตีติ ฯ
โส เทวปุตฺโต อตฺตมโน โมคฺคลฺลาเนน ปุจฺฉิโต
ปญฺหํ ปุฏฺโฐ วิยากาสิ ยสฺส กมฺมสฺสิทํ ผลํ
ผลทายี ผลํ วิปุลํ ลภติ
ททมุชุคเตสุ ปสนฺนมานโส
โส หิ โมทติ สคฺคปฺปตฺโต ติทิเว
อนุโภติ จ ปุญฺญผลํ วิปุลํ
ตเถวาหํ ๓ มหามุนิ อทาสึ จตุโร ผเล
ตสฺมา หิ ผลํ อลเมว ทาตุํ
นิจฺจํ มนุสฺเสน สุขตฺถิเกน
ทิพฺพานิ วา ปตฺถยตา สุขานิ
มนุสฺสโสภาคฺยตมิจฺฉิตา ๔ วาติ ฯ
#๑ ม. วคฺคุํ ฯ ๒ ยุ. ติทสา วรา ฯ ๓ ม. ตเววาหํ ฯ
#๔ ม. ยุ. มนุสฺสโสภาคุยตมิจฺฉตา ฯ
เตน เมตาทิโส วณฺโณ … เป …
วณฺโณ จ เม สพฺพทิสา ปภาสตีติ ฯ
ผลทายกวิมานํ ตติยํ ฯ

[๖๘] ๔ จนฺโท ยถา วิคฺคตวลาหเก นเภ
โอภาสยํ ติฏฺฐติ อนฺตลิกฺเข
ตถูปมํ ตุยฺหมิทํ วิมานํ
โอภาสยํ ติฏฺฐติ อนฺตลิกฺเข
เทวิทฺธิปตฺโตสิ มหานุภาโว
มนุสฺสภูโต กิมกาสิ ปุญฺญํ
เกนาสิ เอวญฺชลิตานุภาโว
วณฺโณ จ เต สพฺพทิสา ปภาสตีติ ฯ
โส เทวปุตฺโต อตฺตมโน โมคฺคลฺลาเนน ปุจฺฉิโต
… เป … ยสฺส กมฺมสฺสิทํ ผลํ
อหญฺจ ภริยา จ มนุสฺสโลเก
อุปสฺสยํ อรหโต อทมฺห
อนฺนญฺจ ปานญฺจ ปสนฺนจิตฺตา
สกฺกจฺจ ทานํ วิปุลํ อทมฺห
เตน เมตาทิโส วณฺโณ … เป …
วณฺโณ จ เม สพฺพทิสา ปภาสตีติ ฯ
อุปสฺสยทายกวิมานํ จตุตฺถํ ฯ

[๖๙] ๕ สุริโย ยถา วิคฺคตวลาหเก นเภฟ
… เป …
(ยถา เหฏฺฐาวิมานํ ตถา วิตฺถาเรตพฺพํ)
วณฺโณ จ เม สพฺพทิสา ปภาสตีติ ฯ
ทุติยอุปสฺสยทายกวิมานํ ปญฺจมํ ฯ

[๗๐] ๖ อุจฺจมิทํ มณิถูณํ วิมานํ
สมนฺตโต ทฺวาทส โยชนานิ
กูฏาคารา สตฺตสตา ๑ อุฬารา
เวฬุริยตฺถมฺภา รุจิรตฺถตา สุภา
เทวิทฺธิปตฺโตสิ มหานุภาโว
… เป …
วณฺโณ จ เต สพฺพทิสา ปภาสตีติ ฯ
โส เทวปุตฺโต อตฺตมโน โมคฺคลฺลาเนน ปุจฺฉิโต
… เป … ยสฺส กมฺมสฺสิทํ ผลํ
อหํ มนุสฺเสสุ มนุสฺสภูโต
ทิสฺวาน ภิกฺขุํ ตสิตํ กิลนฺตํ
เอกาหํ ภิกฺขํ ปฏิปาทยิสฺสํ
สมงฺคิภตฺเตน ตทา อกาสึ ๒
#๑ ยุ. สตฺตรสา ฯ ๒ ยุ. อทาสึ ฯ
เตน เมตาทิโส วณฺโณ … เป …
วณฺโณ จ เม สพฺพทิสา ปภาสตีติ ฯ
ภิกฺขาทายกวิมานํ ฉฏฺฐํ ฯ

[๗๑] ๗ อุจฺจมิทํ มณิถูณํ วิมานํ
… เป …
วณฺโณ จ เต สพฺพทิสา ปภาสตีติ ฯ
โส เทวปุตฺโต อตฺตมโน โมคฺคลฺลาเนน ปุจฺฉิโต
… เป … ยสฺส กมฺมสฺสิทํ ผลํ
อหํ มนุสฺเสสุ มนุสฺสภูโต
อโหสึ ยวปาลโก
อทฺทสํ วิรชํ ภิกฺขุํ วิปฺปสนฺนมนาวิลํ
ตสฺส อทาสหํ ๑ ภาคํ ๒ ปสนฺโน สเกหิ ปาณิหิ
กุมฺมาสปิณฺฑํ ทตฺวาน โมทามิ นนฺทเน วเน
เตน เมตาทิโส วณฺโณ … เป …
วณฺโณ จ เม สพฺพทิสา ปภาสตีติ ฯ
ยวปาลกวิมานํ สตฺตมํ ฯ