[๕๒] ๒ จิรปฺปวาสึ ปุริสํ ทูรโต โสตฺถิมาคตํ
ญาตี มิตฺตา สุหชฺชา จ อภินนฺทนฺติ อาคตํ
ตเถว กตปุญฺญํปิ อสฺมา โลกา ปรํ คตํ
ปุญฺญานิ ปฏิคฺคณฺหนฺติ ปิยํ ญาตีว อาคตํ
อุฏฺเฐหิ เรวเต สุปาปธมฺเม
อปารุตํ ทฺวารํ อทานสีเล
เนสฺสาม ตํ ยตฺถ ถุนนฺติ ทุคฺคตา
สมปฺปิตา เนรยิกา ทุกฺเขนาติ
อิจฺเจวํ วตฺวาน ยมสฺส ทูตา
เต เทฺว ยกฺขา โลหิตกฺขา พฺรหนฺตา
ปจฺเจกพาหาสุ คเหตฺวา เรวตึ
ปกฺกามยึสุ เทวคณสฺส สนฺติเก
อาทิจฺจวณฺณํ รุจิรํ ปภสฺสรํ
พฺยมฺหํ สุภํ กญฺจนชาลฉนฺนํ
กสฺเสตํ อากิณฺณชนํ วิมานํ
สุริยสฺส รํสีริว โชตมานํ
นารีคณา จนฺทนสารานุลิตฺตา ๑
อุภโต วิมานํ อุปโสภยนฺติ
ตนฺทิสฺสติ สุริยสมานวณฺณํ
โก โมทติ สคฺคปฺปตฺโต วิมาเนติ ฯ
พาราณสิยํ นนฺทิโย นามาสิ อุปาสโก
อมจฺฉรี ทานปตี วทญฺญู
ตสฺเสตํ อากิณฺณชนํ วิมานํ
สุริยสฺส รํสีริว โชตมานํ
นารีคณา จนฺทนสารานุลิตฺตา ๒
อุภโต วิมานํ อุปโสภยนฺติ
ตนฺทิสฺสติ สุริยสมานวณฺณํ
โส โมทติ สคฺคปฺปตฺโต วิมาเน
นนฺทิยสฺสาหํ ภริยา
อคารินี สพฺพกุลสฺส อิสฺสรา
ภตฺตุวิมาเน รมิสฺสามิ ทานิหํ
น ปตฺถเย นิรยํ ทสฺสนาย
เอเสว เต นิรโย สุปาปธมฺเม
#๑-๒ ยุ. จนฺทนสารลิตฺตา ฯ
ปุญฺญํ ตยา อกตํ ชีวโลเก
น หิ มจฺฉริโย โรสโก ปาปธมฺโม
สคฺคูปคานํ ลภติ สหพฺยตํ
กึ นุ คูถญฺจ มุตฺตญฺจ อสุจิ ปฏิทิสฺสติ
ทุคฺคนฺธํ กิมิทํ มิฬฺหํ กิเมตํ อุปวายติ
เอส สํสวโก นาม นิรโย ๑ คมฺภีโร สตโปริโส
ยตฺถ วสฺสสหสฺสานิ ตุวํ ปจฺจสิ เรวเตติ ฯ
กึ นุ กาเยน วาจาย มนสา ทุกฺกฏํ กตํ
เกน สํสวโก ลทฺโธ นิรโย ๑ คมฺภีโร สตโปริโส (อิติ) ฯ
สมเณ พฺราหฺมเณ จาปิ อญฺเญ จาปิ ๒ วณิพฺพเก
มุสาวาเทน วญฺเจสิ ตํ ปาปํ ปกตํ ตยา
เตน สํสวโก ลทฺโธ นิรโย ๑ คมฺภีโร สตโปริโส
ตตฺถ วสฺสสหสฺสานิ ตุวํ ปจฺจสิ เรวเต
หตฺเถปิ ฉินฺทนฺติ อโถปิ ปาเท
กณฺเณปิ ฉินฺทนฺติ อโถปิ นาสํ
อโถปิ กาโกลคณา สเมจฺจ
สงฺคมฺม ขาทนฺติ วิผนฺทมานนฺติ ฯ
สาธุ โข มํ ปฏิเนถ กาหามิ กุสลํ พหุํ
ทาเนน สมจริยาย สญฺญเมน ทเมน จ
ยํ กตฺวา สุขิตา โหนฺติ น จ ปจฺฉานุตปฺปเรติ ฯ
#๑ ม. ยุ. อยํ ปาโฐ นตฺถิ ฯ ๒ ม. ยุ. วาปิ ฯ
ปุเร ตฺวํ ปมชฺชิตฺวา อิทานิ ปริเทวสิ
สยํ กตานํ กมฺมานํ วิปากํ อนุโภสฺสสิ
โก เทวโลกโต มนุสฺสโลกํ
คนฺตฺวาน ปุฏฺโฐ เม เอวํ วเทยฺย
นิกฺขิตฺตทณฺเฑสุ ททาถ ทานํ
อจฺฉาทนํ สยนมถนฺนปานํ ๑
น หิ มจฺฉริโย โรสโก ปาปธมฺโม
สคฺคูปคานํ ลภติ สหพฺยตํ (อิติ) ฯ
สาหํ นูน อิโต คนฺตฺวา โยนึ ลทฺธาน มานุสึ
วทญฺญู สีลสมฺปนฺนา กาหามิ กุสลํ พหุํ
ทาเนน สมจริยาย สญฺญเมน ทเมน จ
อารามานิ จ โรปิสฺสํ ทุคฺเค สงฺกมนานิ จ
ปปญฺจ อุทปานญฺจ วิปฺปสนฺเนน เจตสา
จาตุทฺทสึ ปญฺจทสึ ยา จ ปกฺขสฺส อฏฺฐมี
ปาฏิหาริยปกฺขญฺจ อฏฺฐงฺคสุสมาคตํ
อุโปสถํ อุปวสิสฺสํ สทา สีเลสุ สํวุตา
น จ ทาเน ปมชฺชิสฺสํ สามํ ทิฏฺฐมิทํ มยาติ ฯ
อิจฺเจวํ วิลปนฺติญฺจ ๒ ผนฺทมานํ ตโต ตโต
ขิปึสุ นิรเย โฆเร อุทฺธปาทํ อวํสิรํ
อหํ ปุเร มจฺฉรินี อโหสึ
#๑ ม. เสยฺยมถนฺนปานํ ฯ ๒ ม. ยุ. วิปฺปลปนฺตึ ฯ โป. วิปฺปลปนฺติญฺจ ฯ
ปริภาสิกา สมณพฺราหฺมณานํ
วิตเถน จ สามิกํ วญฺจยิตฺวา
ปจฺจามหํ นิรเย โฆรรูเปติ ฯ
เรวติวิมานํ ทุติยํ ฯ