[๔๒] ๔ อภิกฺกนฺเตน วณฺเณน ยา ตฺวํ ติฏฺฐสิ เทวเต
โอภาเสนฺตี ทิสา สพฺพา โอสธี วิย ตารกาฎ
เกน เตตาทิโส วณฺโณ … เป …
วณฺโณ จ เต สพฺพทิสา ปภาสตีติ ฯ
สา เทวตา อตฺตมนา โมคฺคลฺลาเนน ปุจฺฉิตา
… เป … ยสฺส กมฺมสฺสิทํ ผลํ
#๑ ม. ยุ. วิตฺตาว ฯ ๒ ม. … สสฺสตํ ฯ ๓ อุปฺปนฺนา ติทสคณํ ฯ
อหญฺจ พาราณสิยํ พุทฺธสฺสาทิจฺจพนฺธุโน
อทาสึ สุกฺขกุมฺมาสํ ปสนฺนา สเกหิ ปาณิหิ
สุกฺขาย อโลณิกาย จ ปสฺส ผลํ กุมฺมาสปิณฺฑิยา
อโลมํ สุขิตํ ทิสฺวา โก ปุญฺญํ น กริสฺสติ
เตน เมตาทิโส วณฺโณ … เป …
วณฺโณ จ เม สพฺพทิสา ปภาสตีติ ฯ
อโลมวิมานํ จตุตฺถํ ฯ

[๔๓] ๕ อภิกฺกนฺเตน วณฺเณน ยา ตฺวํ ติฏฺฐสิ เทวเต
… เป … โอสธี วิย ตารกา
เกน เตตาทิโส วณฺโณ … เป …
วณฺโณ จ เต สพฺพทิสา ปภาสตีติ ฯ
สา เทวตา อตฺตมนา โมคฺคลฺลาเนน ปุจฺฉิตา
… เป … ยสฺส กมฺมสฺสิทํ ผลํ
อหํ อนฺธกวินฺทสฺมึ พุทฺธสฺสาทิจฺจพนฺธุโน
อทาสึ โกลสมฺปากํ กญฺชิกํ เตลธูปิตํ
ปิปฺผลฺยา ลสุเณน จ มิสฺสํ ลามชฺชเกน จ
อทาสึ อุชุภูตสฺมึ วิปฺปสนฺเนน เจตสา
ยา มเหสิตํ กาเรยฺย จกฺกวตฺติสฺส ราชิโน
นารี สพฺพงฺคกลฺยาณี ภตฺตุ จาโนมทสฺสิกา
เอตสฺส กญฺชิกทานสฺส กลํ นาคฺฆนฺติ โสฬสึ
สตํ นิกฺขา สตํ อสฺสา สตํ อสฺสตรีรถา
สตํ กญฺญาสหสฺสานิ อามุตฺตมณิกุณฺฑลา
เอตสฺส กญฺชิกทานสฺส กลํ นาคฺฆนฺติ โสฬสึ
สตํ เหมวตา นาคา อีสาทนฺตา อุรูฬฺหวา
สุวณฺณกจฺฉา มาตงฺคา เหมกปฺปนิวาสสา
เอตสฺส ๑ กญฺชิกทานสฺส กลํ นาคฺฆนฺติ โสฬสึ
จตุนฺนํปิ ปทีปานํ ๒ อิสฺสรํ โยธ การเย
เอตสฺส กญฺชิกทานสฺส กลํ นาคฺฆนฺติ โสฬสินฺติ ฯ
กญฺชิกทายิกาวิมานํ ปญฺจมํ ฯ

[๔๔] ๖ อภิกฺกนฺเตน วณฺเณน ยา ตฺวํ ติฏฺฐสิ เทวเต
… เป … โอสธี วิย ตารกา
ตสฺสา เต นจฺจมานาย องฺคมงฺเคหิ สพฺพโส
ทิพฺพา สทฺทา นิจฺฉรนฺติ สวนียา มโนรมา
ตสฺสา เต นจฺจมานาย องฺคมงฺเคหิ สพฺพโส
ทิพฺพา คนฺธา ปวายนฺติ สุจิคนฺธา มโนรมา
วิวตฺตมานา กาเยน ยา เวณีสุ ปิลนฺธนา
เตสํ สุยฺยติ นิคฺโฆโส ตุริเย ปญฺจงฺคิเก ยถา
วฏํสกา วาตธูตา วาเตน สมฺปกมฺปิตา
เตสํ สุยฺยติ นิคฺโฆโส ตุริเย ปญฺจงฺคิเก ยถา
#๑ ม. เอกสฺส ฯ ๒ โป. ยุ. จ ทีปานํ ฯ ม. ทีปานํ ฯ
ยาปิ เต สิรสิ มาลา สุจิคนฺธา มโนรมา
วาติ คนฺโธ ทิสา สพฺพา รุกฺโข มญฺชูสโก ยถา
ฆายเส ตํ สุจิคนฺธํ รูปํ ปสฺสสิ อมานุสํ
เทวเต ปุจฺฉิตาจิกฺข กิสฺส กมฺมสฺสิทํ ผลนฺติ ฯ
สาวตฺถิยํ มยฺห สขี ภทนฺเต
สงฺฆสฺส กาเรสิ มหาวิหารํ
ตตฺถ ปสนฺนา อหมานุโมทึ
ทิสฺวา อคารญฺจ ปิยญฺจ เมตํ
ตาเยว เม สุทฺธนุโมทนาย
ลทฺธํ วิมานพฺภูตทสฺสเนยฺยํ
สมนฺตโต โสฬสโยชนานิ
เวหาสยํ คจฺฉติ อิทฺธิยา มม
กูฏาคารา นิเวสา เม วิภตฺตา ภาคโส มิตา
ททฺทลฺลมานา อาภนฺติ สมนฺตา สตโยชนํ
โปกฺขรญฺโญ จ เม เอตฺถ ปุถุโลมนิเสวิตา
อจฺโฉทกา วิปฺปสนฺนา โสวณฺณวาลุกสนฺถตา
นานาปทุมสญฺฉนฺนา ปุณฺฑรีกสโมตตา
สุรภี สมฺปวายนฺติ มนุญฺญมาลุเตริตา
ชมฺพุโย ปนสา ตาลา นาฬิเกรา วนานิ จ
อนฺโต นิเวสเน ชาตา นานารุกฺขา อโรปิตา ๑
#๑ โป. ม. ยุ. อโรปิมา ฯ
นานาตุริยสงฺฆุฏฺฐํ อจฺฉราคณโฆสิตํ
โยปิ มํ สุปิเน ปสฺเส โสปิ วิตฺโต สิยา นโร
เอตาทิสํ อพฺภูตทสฺสเนยฺยํ วิมานํ สพฺพโส ปภํ
มม กมฺเมหิ นิพฺพตฺตํ อลํ ปุญฺญานิ กาตเว
ตาเยว เต สุทฺธนุโมทนาย
ลทฺธํ วิมานพฺภูตทสฺสเนยฺยํ
ยา เจว สา ทานมทาสิ นารี
ตสฺสา คตึ พฺรูหิ กุหึ อุปฺปนฺนา สาติ ฯ
ยา สา อหุ มยฺห สขี ภทนฺเต
สงฺฆสฺส กาเรสิ มหาวิหารํ
วิญฺญาตธมฺมา สา อทาสิ ทานํ
อุปฺปนฺนา นิมฺมานรตีสุ เทเวสุ
ปชาปตี ตสฺส สุนิมฺมิตสฺส
อจินฺติยา กมฺมวิปาก ตสฺสา
ยเมตํ ปุจฺฉสิ กุหึ อุปฺปนฺนา สาติ
ภนฺเต วิยากาสึ ๑ อนญฺญถา อหํ
เตน หญฺเญปิ สมาทเปถ
สงฺฆสฺส ทานานิ ททาถ วิตฺตา
ธมฺมญฺจ สุณาถ ปสนฺนมานสา
สุทุลฺลโภ ลทฺโธ มนุสฺสลาโภ
#๑ โป. พยากาสึ ฯ
ยํ มคฺคํ มคฺคาธิปตี อเทสยิ
พฺรหฺมสฺสโร กญฺจนสนฺนิภตฺตโจ
สงฺฆสฺส ทานานิ ททาถ วิตฺตา
มหปฺผลา ยตฺถ ภวนฺติ ทกฺขิณา
เย ปุคฺคลา อฏฺฐสตํ ปสฏฺฐา
จตฺตาริ เอตานิ ยุคานิ โหนฺติ
เต ทกฺขิเณยฺยา สุคตสฺส สาวกา
เอเตสุ ทินฺนานิ มหปฺผลานิ
จตฺตาโร จ ปฏิปนฺนา จตฺตาโร จ ผเล ฐิตา
เอส สงฺโฆ อุชุภูโต ปญฺญาสีลสมาหิโต
ยชมานานํ มนุสฺสานํ ปุญฺญเปกฺขาน ปาณินํ
กโรนฺตํ โอปธิกํ ปุญฺญํ สงฺเฆ ทินฺนํ มหปฺผลํ
เอโส หิ สงฺโฆ วิปุโล มหคฺฆโต
เอสปฺปเมยฺโย อุทธีว สาคโร
เอเตหิ เสฏฺฐา นรวิริยสาวกา ๑
ปภงฺกรา ธมฺมมุทีรยนฺติ
เตสํ สุทินฺนํ สุหุตฺตํ สุยิฏฺฐํ
เย สงฺฆมุทฺทิสฺส ททนฺติ ทานํ
สา ทกฺขิณา สงฺฆคตา ปติฏฺฐิตา
มหปฺผลา โลกวิทูหิ วณฺณิตา
#๑ ม. ยุ. นรวีรสาวกา ฯ
เอตาทิสํ ปุญฺญมนุสฺสรนฺตา
เย เวทชาตา วิจรนฺติ โลเก
วิเนยฺย มจฺเฉรมลํ สมูลํ
อนินฺทิตา สคฺคมุเปนฺติ ฐานนฺติ ฯ
วิหารวิมานํ ฉฏฺฐํ ฯ
ภาณวารํ ทุติยํ ฯ

[๔๕] ๗ อภิกฺกนฺเตน วณฺเณน … เป …
วณฺโณ จ เต สพฺพทิสา ปภาสตีติ ฯ
สา เทวตา อตฺตมนา โมคฺคลฺลาเนน ปุจฺฉิตา
… เป … ยสฺส กมฺมสฺสิทํ ผลํ
อินฺทีวรานํ หตฺถกํ อหมทาสึ
ภิกฺขุโน ปิณฺฑาย จรนฺตสฺส
เอสิกานํ อุณฺณตสฺมึ นคเร
วเร ปณฺณกเต รมฺเม
เตน เมตาทิโส วณฺโณ … เป …
วณฺโณ จ เม สพฺพทิสา ปภาสตีติ ฯ (๑)
______________________
อภิกฺกนฺเตน วณฺเณน … เป …
วณฺโณ จ เต สพฺพทิสา ปภาสตีติ ฯ
สา เทวตา อตฺตมนา โมคฺคลฺลาเนน ปุจฺฉิตา
… เป … ยสฺส กมฺมสฺสิทํ ผลํ
นีลุปฺปลหตฺถกํ อหมทาสึ
ภิกฺขุโน ปิณฺฑาย จรนฺตสฺส
เอสิกานํ อุณฺณตสฺมึ นคเร
วเร ปณฺณกเต รมฺเม
เตน เมตาทิโส วณฺโณ … เป …ฎ
วณฺโณ จ เม สพฺพทิสา ปภาสตีติ ฯ (๒)
_________________
อภิกฺกนฺเตน วณฺเณน … เป …
วณฺโณ จ เต สพฺพทิสา ปภาสตีติ ฯ
สา เทวตา อตฺตมนา โมคฺคลฺลาเนน ปุจฺฉิตา
… เป … ยสฺส กมฺมสฺสิทํ ผลํ
โอทาตมูลกํ หรีตปตฺตํ
อุทกมฺหิ สเร ชาตํ อหมทาสึ
ภิกฺขุโน ปิณฺฑาย จรนฺตสฺส
เอสิกานํ อุณฺณตสฺมึ นคเร
วเร ปณฺณกเต รมฺเม
เตน เมตาทิโส วณฺโณ … เป …
วณฺโณ จ เม สพฺพทิสา ปภาสตีติ ฯ (๓)
_________________
อภิกฺกนฺเตน วณฺเณน … เป …
วณฺโณ จ เต สพฺพทิสา ปภาสตีติ ฯ
สา เทวตา อตฺตมนา โมคฺคลฺลาเนน ปุจฺฉิตา
… เป … ยสฺส กมฺมสฺสิทํ ผลํ
อหํ สุมนา สุมนสฺส สุมนมกุลานิ
ทนฺตวณฺณานิ อหมทาสึ
ภิกฺขุโน ปิณฺฑาย จรนฺตสฺส
เอสิกานํ อุณฺณตสฺมึ นคเร
วเร ปณฺณกเต รมฺเม
เตน เมตาทิโส วณฺโณ … เป …
วณฺโณ จ เม สพฺพทิสา ปภาสตีติ ฯ (๔)
จตุริตฺถิวิมานํ สตฺตมํ ฯ

[๔๖] ๘ ทิพฺพนฺเต อมฺพวนํ รมฺมํ ปาสาเทตฺถ มหลฺลโก
นานาตุริยสงฺฆุฏฺโฐ อจฺฉราคณโฆสิโต
ปทีโป เจตฺถ ชลติ นิจฺจํ โสวณฺณโย มหา
ทุสฺสผเลหิ รุกฺเขหิ สมนฺตา ปริวาริโต
เกน เต อมฺพวนํ รมฺมํ ปาสาเทตฺถ มหลฺลโก
เกน เตตาทิโส วณฺโณ … เป …
วณฺโณ จ เต สพฺพทิสา ปภาสตีติ ฯ
สา เทวตา อตฺตมนา โมคฺคลฺลาเนน ปุจฺฉิตา
… เป … ยสฺส กมฺมสฺสิทํ ผลํ
อหํ มนุสฺเสสุ มนุสฺสภูตา
ปุริมาย ชาติยา มนุสฺสโลเก
วิหารํ สงฺฆสฺส กาเรสึ อมฺเพหิ ปริวาริตํ!
ปริโยสิเต วิหาเร กาเรนฺเต นิฏฺฐิเต มเห
อมฺเพหจฺฉาทยิตฺวาน กตฺวา ทุสฺสมเย ผเล
ปทีปํ ตตฺถ ชาเลตฺวา โภชยิตฺวา คณุตฺตมํ
นิยฺยาเทสึ ตํ สงฺฆสฺส ปสนฺนา สเกหิ ปาณิหิ
เตน เม อมฺพวนํ รมฺมํ ปาสาเทตฺถ มหลฺลโก
นานาตุริยสงฺฆุฏฺโฐ อจฺฉราคณโฆสิโต
ปทีโป เจตฺถ ชลติ นิจฺจํ โสวณฺณโย มหา
ทุสฺสผเลหิ รุกฺเขหิ สมนฺตา ปริวาริโต
เตน เมตาทิโส วณฺโณ … เป …
วณฺโณ จ เม สพฺพทิสา ปภาสตีติ ฯ
อมฺพวิมานํ อฏฺฐมํ ฯ

[๔๗] ๙ ปีตวตฺเถ ปีตธเช ปีตาลงฺการภูสิเต
ปีตจนฺทนลิตฺตงฺเค ปีตุปฺปลมธารินี
ปีตปาสาทสยเน ปีตาสเน ปีตโภชเน ๑
ปีตฉตฺเต ปีตรเถ ปีตสฺเส ปีตวีชเน
#๑ ม. ปีตภาชเน ฯ
กึ กมฺมํ อกรี ภทฺเท ปุพฺเพ มานุสเก ภเว
เทวเต ปุจฺฉิตาจิกฺข กิสฺส กมฺมสฺสิทํ ผลํ (อิติ) ฯ
โกสาตกี ๑ นาม ลตตฺถิ ภนฺเต ติตฺติกา อนภิชฺฌิตา
ตสฺสา จตฺตาริ ปุปฺผานิ ถูปํ อภิหรึ อหํ่
สตฺถุ สรีรํ อุทฺทิสฺส วิปฺปสนฺเนน เจตสา
นาสฺส มคฺคํ อเวกฺขิสฺสํ ตทงฺคมนสา สตี
ตโต มํ อวธิ คาวี ถูปํ อปฺปตฺตมานสํ
ตญฺจาหํ อภิสญฺเจยฺยํ ภิยฺโย ๒ นูน อิโต สิยา
เตน กมฺเมน เทวินฺท มฆวา เทวกุญฺชร
ปหาย มานุสํ เทหํ ตว สหพฺยตมาคตาติ ฯ
อิทํ สุตฺวา ติทสาธิปติ มฆวา เทวกุญฺชโร
ตาวตึเส ปสาเทนฺโต มาตลึ เอตทพฺรวิ
ปสฺส มาตลิ อจฺเฉรํ จิตฺตํ กมฺมผลํ อิทํ
อปฺปกมฺปิ กตํ เทยฺยํ ปุญฺญํ โหติ มหปฺผลํ
นตฺถิ จิตฺเต ปสนฺนมฺหิ อปฺปกา นาม ทกฺขิณา
ตถาคเต วา สมฺพุทฺเธ อถ วา ตสฺส สาวเก
เอหิ มาตลิ อเมฺหปิ ภิยฺโย ภิยฺโย ๒ มเหมฺหเส ๓
ตถาคตสฺส ธาตุโย สุโข ปุญฺญานมุจฺจโย
ติฏฺฐนฺเต นิพฺพุเต วาปิ สเม จิตฺเต สมํ ผลํ
#๑ ยุ. โกสาติกี ฯ ๒ ยุ. ภีโย ฯ ๓ ม. ยุ. มเหมเส ฯ
เจโตปณิธิเหตู หิ สตฺตา คจฺฉนฺติ สุคฺคตึ
พหุนฺนํ วต อตฺถาย อุปฺปชฺชนฺติ ตถาคตา
ยตฺถ การํ กริตฺวาน สคฺคํ คจฺฉนฺติ ทายกาติ ฯ
ปีตวิมานํ นวมํ ฯ

[๔๘] ๑๐ โอภาสยิตฺวา ปฐวึ สเทวกํ
อติโรจสิ จนฺทิมสุริยา วิย
สิริยา จ วณฺเณน ๑ ยเสน เตชสา
พฺรหฺมาว เทเว ติทเส สหินฺทเก
ปุจฺฉามิ ตํ อุปฺปลมาลธาริเนป
อาเวฬิเน กญฺจนสนฺนิภตฺตเจ
อลงฺกเต อุตฺตมวตฺถธาริเน
กา ตฺวํ สุเภ เทวเต วนฺทเส มมํ ๒ [๓]
ทานํ สุจิณฺณํ อถ สีลสญฺญโม ๔
เกนูปปนฺนา สุคตึ ยสสฺสินี
เทวเต ปุจฺฉิตาจิกฺข กิสฺส กมฺมสฺสิทํ ผลํ (อิติ) ฯ
อิทานิ ภนฺเต อิมเมว คามํ
ปิณฺฑาย อมฺหาก ฆรํ อุปาคมิ
ตโต เต อุจฺฉุสฺส อทาสึ ขณฺฑิกํ
ปสนฺนจิตฺตา อตุลาย ปีติยา
#๑ สรีรวณฺเณนาติปิ ทิสฺสติ ฯ ๒ โป. ยุ. มม ฯ ๓ กึ ตฺวํ ปุเร กมฺมมกาสิ
#อตฺตนา มนุสฺสภูตา ปุริมาย ชาติยา ฯ ๔ ม. สีลสญฺญมํ ฯ
สสฺสุ จ ปจฺฉา อนุยุญฺชเต มมํ
กหํ นุ อุจฺฉฉ วธุ เต อวากริ
น ฉฑฺฑิตํ น ปน ขาทิตํ มยา
สนฺตสฺส ภิกฺขุสฺส สยํ อทาสิหํ
ตุยฺหญฺจิทํ อิสฺสริยํ อโถ มม
อิติสฺส สสฺสุ ปริภาสเต มมํ
เลฑฺฑฑ คเหตฺวา ปหารํ อทาสิ เม
ตโต จุตา กาลกตมฺหิ เทวตา
ตเทว กมฺมํ กุสลํ กตํ มยา
สุขญฺจ กมฺมํ อนุโภมิ อตฺตนา
เทเวหิ สทฺธึ ปริจาริยามหํ
โมทามหํ กามคุเณหิ ปญฺจหิ
ตเทว กมฺมํ กุสลํ กตํ มยา
สุขญฺจ กมฺมํ อนุโภมิ อตฺตนา
เทวินฺทคุตฺตา ติทเสหิ รกฺขิตา
สมปฺปิตา กามคุเณหิ ปญฺจหิ
เอตาทิสํ ปุญฺญผลํ อนปฺปกํ
มหาวิปากา มม อุจฺฉุทกฺขิณา
เทเวหิ สทฺธึ ปริจาริยามหํ
โมทามหํ กามคุเณหิ ปญฺจหิ
เอตาทิสํ ปุญฺญผลํ อนปฺปกํ
มหาชุติกา มม อุจฺฉุทกฺขิณา
เทวินฺทคุตฺตา ติทเสหิ รกฺขิตา
สหสฺสเนตฺโตริว นนฺทเน วเน
ตุวญฺจ ภนฺเต อนุกมฺปกํ วิทุํ
อุเปจฺจ วนฺทึ กุสลญฺจ ปุจฺฉิมํ
ตโต เต อุจฺฉุสฺส อทาสิ ขณฺฑิกํ
ปสนฺนจิตฺตา อตุลาย ปีติยาติ ฯ
อุจฺฉุวิมานํ ทสมํ ฯ

[๔๙] ๑๑ อภิกฺกนฺเตน วณฺเณน ยา ตฺวํ ติฏฺฐสิ เทวเต
โอภาเสนฺตี ทิสา สพฺพา โอสธี วิย ตารกา
เกน เตตาทิโส วณฺโณ … เป …
วณฺโณ จ เต สพฺพทิสา ปภาสตีติ ฯ
สา เทวตา อตฺตมนา โมคฺคลฺลาเนน ปุจฺฉิตา
… เป … ยสฺส กมฺมสฺสิทํ ผลํ
อหํ มนุสฺเสสุ มนุสฺสภูตา
ทิสฺวาน สมเณ สีลวนฺเต
ปาทานิ วนฺทิตฺวา มนํ ปสาทยึ
วิตฺตา จหํ อญฺชลิกํ อกาสึ
เตน เมตาทิโส วณฺโณ … เป …
วณฺโณ จ เม สพฺพทิสา ปภาสตีติ ฯ
วนฺทนวิมานํ เอกาทสมํ ฯ

[๕๐] ๑๒ อภิกฺกนฺเตน วณฺเณน ยา ตฺวํ ติฏฺฐสิ เทวเต
หตฺเถ ปาเท จ วิคฺคยฺห นจฺจสิ สุปฺปวาทิเต
ตสฺสา เต นจฺจมานาย ๑ องฺคมงฺเคหิ สพฺพโส
ทิพฺพา สทฺทา นิจฺฉรนฺติ สวนียา มโนรมา
ตสฺสา เต นจฺจมานาย องฺคมงฺเคหิ สพฺพโส
ทิพฺพา คนฺธา ปวายนฺติ สุจิคนฺธา มโนรมา
วิวตฺตมานา กาเยน ยา เวณีสุ ปิลนฺธนา
เตสํ สุยฺยติ นิคฺโฆโส ตุริเย ปญฺจงฺคิเก ยถา
วฏํสกา วาตธูตา วาเตน สมฺปกมฺปิตา
เตสํ สุยฺยติ นิคฺโฆโส ตุริเย ปญฺจงฺคิเก ยถา
สาปิ เต สิรสิ มาลา สุจิคนฺธา มโนรมา
วาติ คนฺโธ ทิสา สพฺพา รุกฺโข มญฺชูสโก ยถา
ฆายเส ตํ สุจิคนฺธํ รูปํ ปสฺสสิ อมานุสํ
เทวเต ปุจฺฉิตาจิกฺข กิสฺส กมฺมสฺสิทํ ผลํ (อิติ) ฯ
ทาสี อหํ ปุเร อาสึ คยายํ พฺราหฺมณสฺสหํ
อปฺปปุญฺญา อลกฺขิกา รชฺชุมาลาติ มํ วิทู
อกฺโกสานํ วธานญฺจ ตชฺชนาย จ อุกฺกตา ๒
#๑ ยุ. นนฺทมานาย ฯ ๒ อุคฺคตาติปิ ทิสฺสติ ฯ
กุฏํ คเหตฺวา นิกฺขมฺม อาคจฺฉึ อุทกหาริยา
วิปเถ กุฏํ นิกฺขิปิตฺวา วนสณฺฑํ อุปาคมึ
อิเธวาหํ มริสฺสามิ กฺวตฺโถปิ ชีวิเตน เม
ทฬฺหปาสํ กริตฺวาน อาลมฺพิตฺวาน ปาทเป
ตโต ทิสา วิโลเกสึ โก นุ โขว นมสฺสิโต
ตตฺถทฺทสาสึ ๑ สมฺพุทฺธํ สพฺพโลกหิตํ มุนึ
นิสินฺนํ รุกฺขมูลสฺมึ ฌายนฺตํ อกุโตภยํ
ตสฺสา เม อหุ สํเวโค อพฺภูโต โลมหํสโน
โก นุ โขว นมสฺสิโต มนุสฺโส อุทาหุ เทวตา
ปาสาทิกํ ปสาทนียํ วนา นิพฺพนมาคตํ
ทิสฺวา มโน เม ปสีทิ นายํ ยาทิสิกีทิโส
คุตฺตินฺทฺริโย ฌานรโต อพหิคตมานโส
หิโต สพฺพสฺส โลกสฺส พุทฺโธ อยํ ภวิสฺสติ
ภยเภรโว ทุราสโท สีโหว คูหนิสฺสิโต
ทุลฺลภายํ ทสฺสนาย ปุปฺผํ อุทุมฺพรํ ยถา
โส มํ มุทูหิ วาจาหิ อาลปิตฺวา ตถาคโต
รชฺชุมาเลติ มํ อโวจ สรณํ คจฺฉ ตถาคตํ
ตาหํ คิรํ สุณิตฺวาน เนลํ อตฺถวตึ สุจึ
สณฺหํ มุทุญฺจ วคฺคุญฺจ สพฺพโสกาปนูทนํ
กลฺลจิตฺตญฺจ มํ ญตฺวา ปสนฺนํ สุทฺธมานสํง
#๑ ยุ. ตตฺถทฺทสามิ ฯ
หิโต สพฺพสฺส โลกสฺส อนุสาสิ ตถาคโต
อิทํ ทุกฺขนฺติ มํ อโวจ อยํ ทุกฺขสฺส สมฺภโว
อยํ ทุกฺขนิโรโธ จ อญฺชโส อมโตคโธ
อนุกมฺปกสฺส กุสลสฺส โอวาทมฺหิ อหํ ฐิตา
อชฺฌคา อมตํ สนฺตึ นิพฺพานํ ปทมจฺจุตํ
สาหํ อวตฺถิตา ๑ เปมา ทสฺสเน อวิกมฺปินี
มูลชาตาย สทฺธาย ธีตา พุทฺธสฺส โอรสา
สาหํ รมามิ กีฬามิ โมทามิ อกุโตภยา
ทิพฺพมาลํ ธารยามิ ปิวามิ มธุมทฺธุวํ ๒
สฏฺฐิตุริยสหสฺสานิ ปฏิโพธํ กโรนฺติ เม
อาฬมฺโพ คคฺคโร ภีโม สาธุวาที จ สํสโย
โปกฺขโร จ สุผสฺโส จ วีณา โมกฺขา จ นาริโย
นนฺทา เจว สุนนฺทา จ โสณทินฺนา สุจิมฺหิตา ๓
อลมฺพุสา มิสฺสเกสี จ ปุณฺฑรีกาติทารุณี
เอณิปสฺสา สุปสฺสา จ สุภทฺทา มุทุกาวที
เอตา จญฺญา จ เสยฺยาเส อจฺฉรานํ ปโพธิยา
ตา มํ กาเลนุปาคนฺตฺวา อภิภาสนฺติ เทวตา
หนฺท นจฺจาม คายาม หนฺท ตํ รมยามเส
นยิทํ อกตปุญฺญานํ กตปุญฺญานเมวิทํ
#๑ ยุ. อวฏฺฐิตา ฯ ๒ ม. มธุมทฺทวํ ฯ ๓ ยุ. สุวิมฺหิตา ฯ
อโสกํ นนฺทนํ รมฺมํ ติทสานํ มหาวนํ
สุขํ อกตปุญฺญานํ อิธ นตฺถิ ปรตฺถ จ
สุขญฺจ กตปุญฺญานํ อิธ เจว ปรตฺถ จ
เตสํ สหพฺยกามานํ กาตพฺพํ กุสลํ พหุํ
กตปุญฺญา หิ โมทนฺติ สคฺเค โภคสมงฺคิโน
พหุนฺนํ วต อตฺถาย อุปฺปชฺชนฺติ ตถาคตา
ทกฺขิเณยฺยา มนุสฺสานํ ปุญฺญกฺเขตฺตานมากรา
ยตฺถ การํ กริตฺวาน สคฺเค โมทนฺติ ทายกาติ ฯ
รชฺชุมาลาวิมานํ ทฺวาทสมํ ฯ
อุทฺทานํ
มญฺชิฏฺฐา ปภสฺสรา นาคา อโลมา กญฺชิกทายิกา
วิหารจตุริตฺถมฺพา ปีตา อุจฺฉุวนฺทนรชฺชุมาลา จ
วคฺโค เตน ปวุจฺจตีติ ฯ
อิตฺถิวิมาเน วคฺโค จตุตฺโถ ฯ
ปญฺจโม มหารถวคฺโค

[๕๑] ๑ โก เม วนฺทติ ปาทานิ อิทฺธิยา ยสสา ชลํ
อภิกฺกนฺเตน วณฺเณน สพฺพา โอภาสยํ ทิสาติ ฯ
มณฺฑุโกหํ ปุเร อาสึ อุทเก วาริโคจโร
ตว ธมฺมํ สุณนฺตสฺส อวธิ วจฺฉปาลโก
มุหุตฺตํ จิตฺตปสาทสฺส อิทฺธึ ปสฺส ยสญฺจ เม
อานุภาวญฺจ เม ปสฺส วณฺณํ ปสฺส ชุติญฺจ เม
เย จ เต ทีฆมทฺธานํ ธมฺมํ อสฺโสสุํ โคตม
ปตฺตา เต อจลฏฺฐานํ ยตฺถ คนฺตฺวา น โสจเรติ ฯ
มณฺฑุกเทวปุตฺตวิมานํ ปฐมํ ฯ