[๑๒] เวฬุริยตฺถมฺภํ รุจิรํ ปภสฺสรํ
วิมานมารุยฺห อเนกจิตฺตํ
ตตฺถจฺฉสิ เทวิ มหานุภาเว
อุจฺจาวจา อิทฺธิวิกุพฺพมานา
อิมา จ เต อจฺฉราโย สมนฺตโต
นจฺจนฺติ คายนฺติ ปโมทยนฺติ
เทวิทฺธิปตฺตาสิ มหานุภาเว
มนุสฺสภูตา กิมกาสิ ปุญฺญํ
เกนาสิ เอวญฺชลิตานุภาวา
วณฺโณ จ เต สพฺพทิสา ปภาสตีติ ฯ
สา เทวตา อตฺตมนา โมคฺคลฺลาเนน ปุจฺฉิตา
ปญฺหํ ปุฏฺฐา วิยากาสิ ยสฺส กมฺมสฺสิทํ ผลํ
อหํ มนุสฺเสสุ มนุสฺสภูตา
อุปาสิกา จกฺขุมโต อโหสึ
ปาณาติปาตา วิรตา อโหสึ
โลเก อทินฺนํ ปริวชฺชยิสฺสํ
อมชฺชปา ๑ นาปิ มุสา อภาณึ
#๑ ม. อมชฺชปาโน จ ฯ
สเกน สามินา อโหสึ ตุฏฺฐา
อนฺนญฺจ ปานญฺจ ปสนฺนจิตฺตา
สกฺกจฺจ ทานํ วิปุลํ อทาสึ
เตน เมตาทิโส วณฺโณ เตน เม อิธมิชฺฌติ
อุปฺปชฺชนฺติ จ เม โภคา เย เกจิ มนโส ปิยา
อกฺขามิ เต ภิกฺขุ มหานุภาว
มนุสฺสภูตา ยมหํ อกาสึ ๑
เตนมฺหิ เอวญฺชลิตานุภาวา
วณฺโณ จ เม สพฺพทิสา ปภาสตีติ ฯ
ทุติยปติพฺพตาวิมานํ ทฺวาทสมํ ฯ

[๑๓] อภิกฺกนฺเตน วณฺเณน ยา ตฺวํ ติฏฺฐสิ เทวเต
โอภาเสนฺตี ทิสา สพฺพา โอสธี วิย ตารกา
เกน เตตาทิโส วณฺโณ เกน เต อิธมิชฺฌติ
อุปฺปชฺชนฺติ จ เต โภคา เย เกจิ มนโส ปิยา
ปุจฺฉามิ ตํ เทวิ มหานุภาเว
มนุสฺสภูตา กิมกาสิ ปุญฺญํ
เกนาสิ เอวญฺชลิตานุภาวา
วณฺโณ จ เต สพฺพทิสา ปภาสตีติ ฯ
สา เทวตา อตฺตมนา โมคฺคลฺลาเนน ปุจฺฉิตา
ปญฺหํ ปุฏฺฐา วิยากาสิ ยสฺส กมฺมสฺสิทํ ผลํ
#๑ ม. ยมกาสิ ปุญฺญํ ฯ
อหํ มนุสฺเสสุ มนุสฺสภูตา
สุณิสา อโหสึ สสุรสฺส ฆเร ๑
อทฺทสํ วิรชํ ภิกฺขุํ วิปฺปสนฺนมนาวิลํ
ตสฺส อทาสิหํ ปูวํ ปสนฺนา สเกหิ ๒ ปาณิหิ
ภาคฑฺฒภาคํ ทตฺวาน โมทามิ นนฺทเน วเน
เตน เมตาทิโส วณฺโณ เตน เม อิธมิชฺฌติ
อุปฺปชฺชนฺติ จ เม โภคา เย เกจิ มนโส ปิยา
เตนมฺหิ เอวญฺชลิตานุภาวา
วณฺโณ จ เม สพฺพทิสา ปภาสตีติ ฯ
สุณิสาวิมานํ เตรสมํ ฯ

[๑๔] อภิกฺกนฺเตน วณฺเณน ยา ตฺวํ ติฏฺฐสิ เทวเต
โอภาเสนฺตี ทิสา สพฺพา โอสธี วิย ตารกา
เกน เตตาทิโส วณฺโณ เกน เต อิธมิชฺฌติ
อุปฺปชฺชนฺติ จ เต โภคา เย เกจิ มนโส ปิยา
ปุจฺฉามิ ตํ เทวิ มหานุภาเว
มนุสฺสภูตา กิมกาสิ ปุญฺญํ
เกนาสิ เอวญฺชลิตานุภาวา
วณฺโณ จ เต สพฺพทิสา ปภาสตีติ ฯ
สา เทวตา อตฺตมนา โมคฺคลฺลาเนน ปุจฺฉิตา
ปญฺหํ ปุฏฺฐา วิยากาสิ ยสฺส กมฺมสฺสิทํ ผลํ
#๑ ม. เคเห ฯ ๒ ม. เสหิ ฯ
อหํ มนุสฺเสสุ มนุสฺสภูตา
สุณิสา อโหสึ สสุรสฺส ฆเร
อทฺทสํ วิรชํ ภิกฺขุํ วิปฺปสนฺนมนาวิลํ
ตสฺส อทาสิหํ ภาคํ ปสนฺนา สเกหิ ปาณิหิ
กุมฺมาสปิณฺฑํ ทตฺวาน โมทามิ นนฺทเน วเน
เตน เมตาทิโส วณฺโณ เตน เม อิธมิชฺฌติ
อุปฺปชฺชนฺติ จ เม โภคา เย เกจิ มนโส ปิยา
เตนมฺหิ เอวญฺชลิตานุภาวา
วณฺโณ จ เม สพฺพทิสา ปภาสตีติ ฯ
สุณิสาวิมานํ จุทฺทสมํ ฯ

[๑๕] อภิกฺกนฺเตน วณฺเณน ยา ตฺวํ ติฏฺฐสิ เทวเต
โอภาเสนฺตี ทิสา สพฺพา โอสธี วิย ตารกา
เกน เตตาทิโส วณฺโณ เกน เต อิธมิชฺฌติ
อุปฺปชฺชนฺติ จ เต โภคา เย เกจิ มนโส ปิยา
ปุจฺฉามิ ตํ เทวิ มหานุภาเว
มนุสฺสภูตา กิมกาสิ ปุญฺญํ
เกนาสิ เอวญฺชลิตานุภาวา
วณฺโณ จ เต สพฺพทิสา ปภาสตีติ ฯ
สา เทวตา อตฺตมนา โมคฺคลฺลาเนน ปุจฺฉิตา
ปญฺหํ ปุฏฺฐา วิยากาสิ ยสฺส กมฺมสฺสิทํ ผลํ
อิสฺสา จ มจฺฉริยมาโน ๑ ปลาโส
นาโหสิ มยฺหํ ฆรมาวสนฺติยา
อกฺโกธนา ภตฺตุ วสานุวตฺตินี
อุโปสเถ นิจฺจปฺปมตฺตา ๒
จาตุทฺทสึ ปญฺจทสึ ยา จ ปกฺขสฺส อฏฺฐมี
ปาฏิหาริยปกฺขญฺจ อฏฺฐงฺคสุสมาคตํ
อุโปสถํ อุปวสึ ๓ สทา สีเล สุสํวุตา
สญฺญมา สํวิภาคา จ วิมานํ อาวสามหํ
ปาณาติปาตา วิรตา มุสาวาทา จ สญฺญตา
เถยฺยา จ อติจารา จ มชฺชปานา จ อารกา
ปญฺจสิกฺขาปเท รตา อริยสจฺจานโกวิทา
อุปาสิกา จกฺขุมโต โคตมสฺส ยสสฺสิโน
สาหํ สเกน สีเลน ยสสา จ ยสสฺสินี
อนุโภมิ สกํ ปุญฺญํ สุขิตา จมฺหิ อนามยา
เตน เมตาทิโส วณฺโณ เตน เม อิธมิชฺฌติ
อุปฺปชฺชนฺติ จ เม โภคา เย เกจิ มนโส ปิยา
อกฺขามิ เต ภิกฺขุ มหานุภาว
มนุสฺสภูตา ยมหํ อกาสึ
เตนมฺหิ เอวญฺชลิตานุภาวา
#๑ ม. มจฺเฉรมโถ ฯ ยุ. มจฺฉริยมโถ ฯ ๒ ม. นิจฺจหมปฺปมตฺตา ฯ
#๓ โป. ม. อุปวสิสฺสํ ฯ
วณฺโณ จ เม สพฺพทิสา ปภาสตีติ ฯ
มม จ ภนฺเต วจเนน ภควโต ปาเท สิรสา วนฺเทยฺยาสิ
อุตฺตรา นาม ภนฺเต อุปาสิกา ภควโต ปาเท สิรสา วนฺทตีติ
อนจฺฉริยํ โข ปเนตํ ภนฺเต ยํ มํ ภควา อญฺญตรสฺมึ สามญฺญผเล
พฺยากเรยฺย ตํ ภควา สกทาคามิผเล พฺยากาสีติ ฯ
อุตฺตราวิมานํ ปณฺณรสมํ ฯ

[๑๖] ยุตฺตา จ เต ปรมอลงฺกตา หยา
อโธมุขา อฆสิ คมา พลี ชวา
อภินิมฺมิตา ปญฺจ รถา สตา จ เต
อเนฺวนฺติ ตํ สารถิโจทิตา หยา
สา ติฏฺฐสิ รถวเร อลงฺกตา
โอภาสยํ ชลมิว โชติปาวโก
ปุจฺฉามิ ตํ วรตนุ อโนมทสฺสเน
กสฺมา กายา อนธิวรํ อุปาคมิ
กามคฺคปตฺตานํ ยมาหุ อนุตฺตรา
นิมฺมาย นิมฺมาย รมนฺติ เทวตา
ตสฺมา กายา อจฺฉรา กามวณฺณินี
อิธาคตา อนธิวรํ นมสฺสิตุํ
กึ ตฺวํ ปุเร สุจริตมาจรี อิธ
เกนาสิ ตฺวํ อมิตยสา สุเขธิตา
อิทฺธี จ เต อนธิวรา วิหงฺคมา
วณฺโณ จ เต ทส ทิสา วิโรจติ
เทเวหิ ตฺวํ ปริวุตา สกฺกตา จสิ
กุโต จุตา สุคติคตาสิ เทวเต
กสฺส วา ตฺวํ วจนกรานุสาสนึ
อาจิกฺข เม ตฺวํ ยทิ พุทฺธสาวิกา (ติ) ฯ
นคนฺตเร นครวเร สุมาปิเต
ปริจาริกา ราชวรสฺส สิรีมโต
นจฺเจหิ คีเตหิ ๑ ปรมสุสิกฺขิตา อหุํ
สิริมาติ มํ ราชคเห อเวทึสุ
พุทฺโธ จ เม อิสินิสโภ วินายโก
อเทสยิ สมุทยทุกฺขนิจฺจตํ
อสงฺขตํ ทุกฺขนิโรธํ สสฺสตํ
มคฺคญฺจิมํ อกุฏิลํ อญฺชสํ สิวํ
สุตฺวานหํ อมตปทํ อสงฺขตํ
ตถาคตสฺส อนธิวรสฺส สาสนํ
สีเลสฺวาหํ ปรมสุสํวุตา อหุํ
ธมฺเม ฐิตา นรวรพุทฺธเทสิเต
ญตฺวาน ตํ ๒ วิรชํ ปทํ อสงฺขตํ
#๑ ม. ยุ. นจฺเจ คีเต ฯ ๒ ญตฺวานหนฺติปิ ฯ
ตถาคเตน อนธิวเรน เทสิตํ
ตตฺเถวหํ สมถสมาธิมาผุสึ
สาเยว เม ปรมนิยามตา อหุ
ลทฺธานหํ อมตวรํ วิเสสนํ
เอกํสิกา อภิสมเย วิเสสิย
อสํสยา พหุชนปูชิตา อหํ
ขิฑฺฑํ รตึ ปจฺจนุโภมนปฺปกํ
เอวํ อหํ อมตรสมฺหิ เทวตา
ตถาคตสฺส อนธิวรสฺส สาวิกา
ธมฺมทฺทสา ปฐมผเล ปติฏฺฐิตา
โสตาปนฺนา น จ ปุนมตฺถิ ทุคฺคติ
สา วนฺทิตุํ อนธิวรํ อุปาคมึ
ปาสาทิเก กุสลรเต จ ภิกฺขโว
นมสฺสิตุํ สมณสมาคมํ สิวํ
สคารวา สิริมโต ธมฺมราชิโน
ทิสฺวา มุนึ มุทิตมนมฺหิ ปีณิตา
ตถาคตํ นรวรทมฺมสารถึ
ตณฺหจฺฉิทํ กุสลรตํ วินายกํ
วนฺทามหํ ปรมหิตานุกมฺปกนฺติ ฯ
สิริมาวิมานํ โสฬสมํ ฯ

[๑๗] อิทํ วิมานํ รุจิรํ ปภสฺสรํ
เวฬุริยตฺถมฺภํ สตตํ สุนิมฺมลํ ๑
สุวณฺณรุกฺเขหิ สมนฺตโมตฺถตํ
ฐานํ มมํ กมฺมวิปากสมฺภวํ
ตตฺรูปปนฺนา ปุริมจฺฉรา อิมา
สตํ สหสฺสานิ สเกน กมฺมุนา
ตุวํสิ อชฺฌูปคตา ยสสฺสินี
โอภาสยํ ติฏฺฐสิ ปุพฺพเทวตา
สสี อธิคฺคยฺห ยถา วิโรจติ
นกฺขตฺตราชาริว ตารกาคณํ
ตเถว ตฺวํ อจฺฉราสงฺคณํ อิมํ
ททฺทลฺลมานา ยสสา วิโรจสิ
กุโต นุ อาคมฺม อโนมทสฺสเน
อุปปนฺนา ตฺวํ ภวนํ มมํ อิทํ
พฺรหฺมํว เทวา ติทสา สหินฺทกา
สพฺเพ น ตปฺปามเส ทสฺสเนน ตนฺติ ฯ
ยเมตํ สกฺก อนุปุจฺฉเส มมํ
กุโต จุตา อิธ อาคตา ตุวํ
พาราณสี นาม ปุรตฺถิ กาสินํ
ตตฺถ ปุเร อโหสึ เปสการิกา ๒
#๑ โป. ม. ยุ. สุนิมฺมิตํ ฯ ๒ โป. ม. ยุ. เกสการิกา ฯ
พุทฺเธ จ ธมฺเม จ ปสนฺนมานสา
สงฺเฆ จ เอกนฺตคตา อสํสยา
อขณฺฑสิกฺขาปทา อาคตปฺผลา
สมฺโพธิธมฺเม นิยตา อนามยาติ
ตนฺตฺยาภินนฺทามเส สฺวาคตญฺจ เต
ธมฺเมน จ ตฺวํ ยสสา วิโรจสิ
พุทฺเธ จ ธมฺเม จ ปสนฺนมานเส
สงฺเฆ จ เอกนฺตคเต อสํสเย
อขณฺฑสิกฺขาปเท อาคตปฺผเล
สมฺโพธิธมฺเม นิยเต อนามเยติ ฯ
เปสการิยวิมานํ สตฺตรสมํ ฯ
อุทฺทานํ
ปญฺจ ปีฐา ตโย นาวา ปทีปา ติลทกฺขิณา
เทฺว ปตี เทฺว สุณิสา อุตฺตรา สิริมา เปสการิกา
วคฺโค เตน ปวุจฺจตีติ ฯ
อิตฺถีวิมาเน วคฺโค ปฐโม ฯ
ทุติโย จิตฺตลตาวคฺโค

[๑๘] ๑ อปิ สกฺโกว เทวินฺโท รมฺเม จิตฺตลตาวเน
สมนฺตา อนุปริยาสิ นารีคณปุรกฺขตา
โอภาเสนฺตี ทิสา สพฺพา โอสธี วิย ตารกา
เกน เตตาทิโส วณฺโณ เกน เต อิธมิชฺฌติ
อุปฺปชฺชนฺติ จ เต โภคา เย เกจิ มนโส ปิยา
ปุจฺฉามิ ตํ เทวิ มหานุภาเว
มนุสฺสภูตา กิมกาสิ ปุญฺญํ
เกนาสิ เอวญฺชลิตานุภาวา
วณฺโณ จ เต สพฺพทิสา ปภาสตีติ ฯ
สา เทวตา อตฺตมนา โมคฺคลฺลาเนน ปุจฺฉิตา
ปญฺหํ ปุฏฺฐา วิยากาสิ ยสฺส กมฺมสฺสิทํ ผลํ
อหํ มนุสฺเสสุ มนุสฺสภูตา
ทาสี อโหสึ ปรเปสฺสิยา กุเล
อุปาสิกา จกฺขุมโต โคตมสฺส ยสสฺสิโน
ตสฺสา เม นิกฺกโม อาสิ สาสเน ตสฺส ตาทิโน
กามํ ภิชฺชตุ ยํ กาโย เนว อตฺเถตฺถ สนฺถนํ
สิกฺขาปทานํ ปญฺจนฺนํ มคฺโค โสวตฺถิโก สิโว
อกณฺฏโก อคหโน อุชุ สพฺภิ ปเวทิโต
นิกฺกมสฺส ผลํ ปสฺส ยถิทํ ปาปุณิตฺถิกา
อามนฺตนิกา รญฺโญมฺหิ สกฺกสฺส วสวตฺติโน
สฏฺฐิ ตุริยสหสฺสานิ ปฏิโพธํ กโรนฺติ เม
อาลมฺโพ คคฺคโม ภีโม สาธุวาทิ ปสํสิโย
โปกฺขโร จ สุผสฺโส จ วีณาโมกฺขา จ นาริโย
นนฺทา เจว สุนนฺทา จ โสณทินฺนา สุจิมฺหิตา
อาลมฺพุสา มิสฺสเกสี ๑ ปุณฺฑรีกาติ ทารุณี
เอนิปสฺสา สุปสฺสา จ สุภทฺทา มุทุกาวที
เอตา อญฺญา จ เสยฺยาเส อจฺฉรานํ ปโพธิกา
ตา มํ กาเลนุปาคนฺตฺวา อภิภาสนฺติ เทวตา
หนฺท นจฺจาม คายาม หนฺท ตํ รมยามเส
นยิทํ อกตปุญฺญานํ กตปุญฺญานเมวิทํ
อโสกํ นนฺทนํ รมฺมํ ติทสานํ มหาวนํ
สุขํ อกตปุญฺญานํ อิธ นตฺถิ ปรตฺถ จ
สุขญฺจ กตปุญฺญานํ อิธ เจว ปรตฺถ จ
เตสํ สหพฺยกามานํ กตฺตพฺพํ กุสลํ พหุํ
กตปุญฺญา หิ โมทนฺติ สคฺเค โภคสมงฺคิโนติ ฯ
ทาสีวิมานํ ปฐมํ ฯ

[๑๙] ๒ อภิกฺกนฺเตน วณฺเณน ยา ตฺวํ ติฏฺฐสิ เทวเต
โอภาเสนฺตี ทิสา สพฺพา โอสธี วิย ตารกา
เกน เตตาทิโส วณฺโณ … เป …
วณฺโณ จ เต สพฺพทิสา ปภาสตีติ ฯ
สา เทวตา อตฺตมนา โมคฺคลฺลาเนน ปุจฺฉิตา
#๑ โป. ม. ยุ. อลมฺพุสา มิสฺสเกสี จ ฯ
ปญฺหํ ปุฏฺฐา วิยากาสิ ยสฺส กมฺมสฺสิทํ ผลํ
เกวฏฺฏทฺวารา นิกฺขมฺม อหุ มยฺหํ นิเวสนํ
ตตฺถ สํสรมานานํ สาวกานํ มเหสินํ
โอทนํ กุมฺมาสํ ฑากํ โลณโสวีรกญฺจหํ
อทาสึ อุชุภูเตสุ วิปฺปสนฺเนน เจตสา
จาตุทฺทสึ ปญฺจทสึ ยา จ ปกฺขสฺส อฏฺฐมี
ปาฏิหาริยปกฺขญฺจ อฏฺฐงฺคสุสมาคตํ
อุโปสถํ อุปวสึ สทา สีเลสุ สํวุตา
สญฺญมา สํวิภาคา จ วิมานํ อาวสามหํ
ปาณาติปาตา วิรตา มุสาวาทา จ สญฺญตา
เถยฺยา จ อติจารา จ มชฺชปานา จ อารกา
ปญฺจสิกฺขาปเท รตา อริยสจฺจานโกวิทา
อุปาสิกา จกฺขุมโต โคตมสฺส ยสสฺสิโน
เตน เมตาทิโส วณฺโณ … เป …
วณฺโณ จ เม สพฺพทิสา ปภาสตีติ ฯ
มม จ ภนฺเต วจเนน ภควโต ปาเท สิรสา วนฺเทยฺยาสิ
ลขุมา นาม ภนฺเต อุปาสิกา ภควโต ปาเท สิรสา วนฺทตีติ
อนจฺฉริยํ โข ปเนตํ ภนฺเต ยํ มํ ภควา อญฺญตรสฺมึ สามญฺญผเล
พฺยากเรยฺย ตํ ภควา สกทาคามิผเล พฺยากาสีติ ฯ
ลขุมาวิมานํ ทุติยํ ฯ

[๒๐] ๓ ปิณฺฑาย เต จรนฺตสฺส ตุณฺหีภูตสฺส ติฏฺฐโต
ทฬิทฺทา กปณา นารี ปราคารํ อวสฺสิตา ๑
ยา เต อทาสิ อาจามํ ปสนฺนา สเกหิ ปาณิหิ
สา หิตฺวา มานุสํ เทหํ กํ นุ สาทิสตํ คตาติ ฯ
ปิณฺฑาย เม จรนฺตสฺส ตุณฺหีภูตสฺส ติฏฺฐโต
ทฬิทฺทา กปณา นารี ปราคารํ อวสฺสิตา ๑
ยา เม อทาสิ อาจามํ ปสนฺนา สเกหิ ปาณิหิ
สา หิตฺวา มานุสํ เทหํ วิปฺปมุตฺตา อิโต จุตา
นิมฺมานรติโน นาม สนฺติ เทวา มหิทฺธิกา
ตตฺถ สา สุขิตา นารี โมทิตาจามทายิกา
อโห ทานํ วรากิยา กสฺสเป สุปติฏฺฐิตํ
ปราภเตน ทาเนน อิชฺฌิตฺถ วต ทกฺขิณา
ยา มเหสิตฺตํ กเรยฺย จกฺกวตฺติสฺส ราชิโน
นารี สพฺพงฺคกลฺยาณี ภตฺตุ จาโนมทสฺสิกา
เอตสฺสาจามทานสฺส กลํ นาคฺฆนฺติ โสฬสึ
สตํ นิกฺขา สตํ อสฺสา สตํ อสฺสตรี รถา
สตํ กญฺญาสหสฺสานิ อามุตฺตมณิกุณฺฑลา
เอตสฺสาจามทานสฺส กลํ นาคฺฆนฺติ โสฬสึ
สตํ เหมวตา นาคา อีสา ทนฺตา อุรูฬฺหวา
สุวณฺณกจฺฉา มาตงฺคา เหมกปฺปนิวาสสา
#๑ อปสฺสิตาติปิ ฯ
เอตสฺสาจามทานสฺส กลํ นาคฺฆนฺติ โสฬสึ
จตุนฺนํ มหาทีปานํ อิสฺสรํ โยธ การเย
เอตสฺสาจามทานสฺส กลํ นาคฺฆนฺติ โสฬสินฺติ ฯ
อาจามทายิกาวิมานํ ตติยํ ฯ

[๒๑] ๔ จณฺฑาลิ วนฺท ปาทานิ โคตมสฺส ยสสฺสิโน
ตเมว อนุกมฺปาย อฏฺฐาสิ อิสิสตฺตโม
อภิปฺปสาเทหิ มนํ อรหนฺตมฺหิ ตาทิเน ๑
ขิปฺปมญฺชลิกา ๒ วนฺท ปริตฺตํ ตว ชีวิตนฺติ ฯ
โจทิตา ภาวิตตฺเตน สรีรนฺติมธารินา
จณฺฑาลี วนฺทิ ปาทานิ โคตมสฺส ยสสฺสิโน
ตเมนํ อวธิ คาวี จณฺฑาลึ ปญฺชลึ ฐิตํ
นมสฺสมานํ สมฺพุทฺธํ อนฺธกาเร ปภงฺกรํ
ขีณาสวํ วิคตรชํ อเนญฺชํ
[๓]
เทวิทฺธิปตฺตา อุปสงฺกมิตฺวา
วนฺทามิ ตํ วีร มหานุภาว
สุวณฺณวณฺณา ชลิตา มหายสา
วิมานโมรุยฺห อเนกจิตฺตา
ปริวาริตา อจฺฉราสงฺคเณน
กา ตฺวํ สุเภ เทวเต วนฺทเส มมํ (อิติ) ฯ
อหํ ภทนฺเต จณฺฑาลี ตยา ๔ วีเรน เปสิตา
#๑ โป. ตาทิโน ฯ ม. ยุ. ตาทินิ ฯ ๒ ม. ยุ. ขิปฺปํ ปญฺชลิกา ฯ ๓ โป. ม. ยุ. เอกํ
#อารญฺญมฺหิ รโห นิสินฺนํ ฯ ๔ ยุ. ตโย ฯ
วนฺทึ อรหโต ปาเท โคตมสฺส ยสสฺสิโน
สาหํ วนฺทิตฺวา ปาทานิ จุตา จณฺฑาลโยนิยา
วิมานํ สพฺพโส ภทฺทํ อุปปนฺนมฺหิ นนฺทเน
อจฺฉรานํ สหสฺสานิ ปุรกฺขิตฺวา มํ ติฏฺฐนฺติ
ตาสาหํ ปวรา เสฏฺฐา วณฺเณน ยสสายุนา
ปหูตกตกลฺยาณา สมฺปชานา ปติสฺสตา
มุนึ การุณิกํ โลเก ภนฺเต วนฺทิตุมาคตาติ
อิทํ วตฺวาน จณฺฑาลี กตญฺญุกตเวทินี
วนฺทิตฺวา อรหโต ปาเท ตตฺเถวนฺตรธายตีติ ฯ
จณฺฑาลิวิมานํ จตุตฺถํ ฯ