[๒๙๗] ๔ เอวมฺเม สุตํ ฯ เอกํ สมยํ ภควา มคเธสุ
วิหรติ ทกฺขิณาคิริสฺมึ เอกนาฬายํ พฺราหฺมณคาเม ฯ เตน โข ปน
สมเยน กสิภารทฺวาชสฺส พฺราหฺมณสฺส ปญฺจมตฺตานิ นงฺคลสตานิ
ปยุตฺตานิ โหนฺติ วปฺปกาเล ฯ อถ โข ภควา ปุพฺพณฺหสมยํ
นิวาเสตฺวา ปตฺตจีวรมาทาย เยน กสิภารทฺวาชสฺส พฺราหฺมณสฺส
กมฺมนฺโต เตนุปสงฺกมิ ฯ เตน โข ปน สมเยน กสิภารทฺวาชสฺส
พฺราหฺมณสฺส ปริเวสนา วตฺตติ ฯ อถ โข ภควา
เยน ปริเวสนา เตนุปสงฺกมิ อุปสงฺกมิตฺวา เอกมนฺตํ อฏฺฐาสิ ฯ
อทฺทสา โข กสิภารทฺวาโช พฺราหฺมโณ ภควนฺตํ ปิณฺฑาย ฐิตํ
ทิสฺวาน ภควนฺตํ เอตทโวจ อหํ โข สมณ กสามิ จ วปฺปามิ
จ กสิตฺวา จ วปฺปิตฺวา จ ภุญฺชามิ ฯ ตฺวมฺปิ สมณ กสสฺสุ
จ วปฺปสฺสุ จ กสิตฺวา จ วปฺปิตฺวา จ ภุญฺชาหีติ ๑ ฯ อหมฺปิ
โข พฺราหฺมณ กสามิ จ วปฺปามิ จ กสิตฺวา จ วปฺปิตฺวา
จ ภุญฺชามีติ ฯ น โข ปน ๒ สมณ ปสฺสาม โภโต โคตมสฺส
ยุคํ วา นงฺคลํ วา ผาลํ วา ปาจนํ วา พลิพทฺเธ ๓ วา อถ
จ ปน ภวํ โคตโม เอวมาห อหมฺปิ โข พฺราหฺมณ กสามิ จ
#๑ ม. ยุ. ภุญฺชสฺสติ ฯ ๒ โป. ม. ยุ. ปน มยํ ฯ ๓ ม. ยุ. พลิพทฺเท ฯ
วปฺปามิ จ กสิตฺวา จ วปฺปิตฺวา จ ภุญฺชามีติ ฯ อถ โข
กสิภารทฺวาโช พฺราหฺมโณ ภควนฺตํ คาถาย อชฺฌภาสิ

[๒๙๘] กสฺสโก ปฏิชานาสิ น จ ปสฺสาม เต กสึ
กสึ โน ปุจฺฉิโต พฺรูหิ ยถา ชาเนมุ เต กสึ ฯ
สทฺธา พีชํ ตโป วุฏฺฐิ ปญฺญา เม ยุคนงฺคลํ
หิรี อีสา มโน โยตฺตํ สติ เม ผาลปาจนํ ฯ
กายคุตฺโต วจีคุตฺโต อาหาเร อุทเร ยโต
สจฺจํ กโรมิ นิทฺธานํ โสรจฺจมฺเม ปโมจนํ ฯ
วิริยํ เม ธุรโธรยฺหํ โยคกฺเขมาธิวาหนํ
คจฺฉติ อนิวตฺตนฺตํ ยตฺถ คนฺตฺวา น โสจติ ฯ
เอวํ เม สา กสิ กฏฺฐา สา โหติ อมตปฺผลา
เอตํ กสึ กสิตฺวาน สพฺพทุกฺขา ปมุจฺจตีติ ฯ

[๒๙๙] อถ โข กสิภารทฺวาโช พฺราหฺมโณ มหติยา
กํสปาติยา ปายาสํ วฑฺเฒตฺวา ภควโต อุปนาเมสิ ภุญฺชตุ ภวํ
โคตโม ปายาสํ กสฺสโก ภวํ ยญฺหิ ภวํ โคตโม อมตปฺผลํ
กสึ กสตีติ ฯ
คาถาภิคีตมฺเม อโภชเนยฺยํ
สมฺปสฺสตํ พฺราหฺมณ เนส ธมฺโม
คาถาภิคีตํ ปนุทนฺติ พุทฺธา
ธมฺเม สตี พฺราหฺมณ ๑ วุตฺติเรสา ฯ
#๑ โป. พฺราหฺมณสฺส ฯ
อญฺเญน จ เกวลินํ มเหสึ
ขีณาสวํ กุกฺกุจฺจวูปสนฺตํ
อนฺเนน ปาเนน อุปฏฺฐหสฺสุ
เขตฺตญฺหิ ตํ ปุญฺญเปกฺขสฺส โหตีติ ฯ

[๓๐๐] อถ กสฺส จาหํ โภ โคตม อิมํ ปายาสํ ทมฺมีติ ฯ
น ขฺวาหํ ตํ พฺราหฺมณ ปสฺสามิ สเทวเก โลเก สมารเก สพฺรหฺมเก
สสฺสมณพฺราหฺมณิยา ปชาย สเทวมนุสฺสาย เยน ๑ โส
ปายาโส ภุตฺโต สมฺมา ปริณามํ คจฺเฉยฺย อญฺญตฺร ตถาคตสฺส
วา ตถาคตสาวกสฺส วา เตน หิ ตฺวํ พฺราหฺมณ ตํ ปายาสํ
อปฺปหริเต วา ฉฑฺเฑหิ อปฺปาณเก วา อุทเก โอปิลาเปหีติ ฯ
อถ โข กสิภารทฺวาโช พฺราหฺมโณ ตํ ปายาสํ อปฺปาณเก อุทเก
โอปิลาเปสิ ฯ อถ โข โส ปายาโส อุทเก ปกฺขิตฺโต จิจฺจิฏายติ
จิฏิจิฏายติ สํธูมายติ ๒ สมฺปธูมายติ ฯ เสยฺยถาปิ นาม อโยคุโล
ทิวสสนฺตตฺโต ๓ อุทเก ปกฺขิตฺโต จิจฺจิฏายติ จิฏิจิฏายติ
สํธูมายติ สมฺปธูมายติ เอวเมว โส ปายาโส อุทเก ปกฺขิตฺโต
จิจฺจิฏายติ จิฏิจิฏายติ สํธูมายติ สมฺปธูมายติ ฯ

[๓๐๑] อถ โข กสิภารทฺวาโช พฺราหฺมโณ สํวิคฺโค โลมหฏฺฐชาโต
เยน ภควา เตนุปสงฺกมิ อุปสงฺกมิตฺวา ภควโต ปาเทสุ
สิรสา นิปติตฺวา ภควนฺตํ เอตทโวจ อภิกฺกนฺตํ โภ โคตม
#๑ ม. ยุ. ยสฺส ฯ ๒ ม. ยุ. สนฺธูปายติ สมฺปธูปายติ ฯ ๓ ม. ทิวสํ สนฺตตฺโต ฯ8
อภิกฺกนฺตํ โภ โคตม ฯ เสยฺยถาปิ โภ โคตม นิกฺกุชฺชิตํ วา
อุกฺกุชฺเชยฺย ปฏิจฺฉนฺนํ วา วิวเรยฺย มูฬฺหสฺส วา มคฺคํ
อาจิกฺเขยฺย อนฺธกาเร วา เตลปชฺโชตํ ธาเรยฺย จกฺขุมนฺโต
รูปานิ ทกฺขนฺตีติ เอวเมวํ โภตา โคตเมน อเนกปริยาเยน ธมฺโม
ปกาสิโต ฯ เอสาหํ ภวนฺตํ โคตมํ สรณํ คจฺฉามิ ธมฺมญฺจ
ภิกฺขุสงฺฆญฺจ อุปาสกํ มํ ภวํ โคตโม ธาเรตุ อชฺชตคฺเค
ปาณุเปตํ สรณํ คตํ ฯ ลเภยฺยาหํ โภโต โคตมสฺส สนฺติเก
ปพฺพชฺชํ ลเภยฺยํ อุปสมฺปทนฺติ ฯ อลตฺถ โข กสิภารทฺวาโช
พฺราหฺมโณ ภควโต สนฺติเก ปพฺพชฺชํ อลตฺถ อุปสมฺปทํ ฯ
อจิรูปสมฺปนฺโน โข ปนายสฺมา ภารทฺวาโช เอโก วูปกฏฺโฐ
อปฺปมตฺโต อาตาปี ปหิตตฺโต วิหรนฺโต นจิรสฺเสว ยสฺสตฺถาย
กุลปุตฺตา สมฺมเทว อาคารสฺมา อนคาริยํ ปพฺพชนฺติ ตทนุตฺตรํ
พฺรหฺมจริยปริโยสานํ ทิฏฺเฐว ธมฺเม สยํ อภิญฺญา สจฺฉิกตฺวา
อุปสมฺปชฺช วิหาสิ ขีณา ชาติ วุสิตํ พฺรหฺมจริยํ กตํ กรณียํ
นาปรํ อิตฺถตฺตายาติ อพฺภญฺญาสิ ฯ อญฺญตโร โข ๑ ปนายสฺมา
ภารทฺวาโช อรหตํ อโหสีติ ฯ
กสิภารทฺวาชสุตฺตํ จตุตฺถํ ฯ
______________
#๑ ม. จ ฯ ยุ. จ โข ฯ
สุตฺตนิปาเต อุรควคฺคสฺส ปญฺจมํ จุนฺทสุตฺตํ

[๓๐๒] ๕ ปุจฺฉามิ มุนึ ปหุตปญฺญํ (อิติ จุนฺโท กมฺมารปุตฺโต)
พุทฺธํ ธมฺมสฺสามึ วีตตณฺหํ
ทิปทุตฺตมํ ๑ สารถีนํ ๒ ปวรํ
กติ โลเก สมณา ตทึฆ พฺรูหิ ฯ
จตุโร สมณา ปญฺจมตฺถิ ๓ (จุนฺทาติ ภควา)
เต เต อาวิกโรมิ สกฺขิปุฏฺโฐ
มคฺคชิโน มคฺคเทสโก จ
มคฺเค ชีวติ โย จ มคฺคทูสี ฯ
กมฺมคฺคชินํ ๔ วทนฺติ พุทฺธา (อิติ จุนฺโท กมฺมารปุตฺโต)
มคฺคชฺฌายี ๕ อตุโลฺย โหติ
มคฺเค ชีวติ เม พฺรูหิ ปุฏฺโฐ
อถ เม อาวิกโรหิ มคฺคทูสึ ฯ
โย ติณฺณกถงฺกโถ วิสลฺโล
นิพฺพานาภิรโต อนานุคิทฺโธ
โลกสฺส สเทวกสฺส เนตา
ตาทึ มคฺคชินํ วทนฺติ พุทฺธา ฯ
ปรมํ ปรมนฺติ โยธ ญตฺวา
#๑ ม. ทฺวิปทุตฺตมํ ฯ ๒ โป. สารถึ ฯ ๓ ยุ. น ปญฺจโมตฺถิ ฯ ๔ โป. ม.
#กํมคฺคชินํ ฯ ๕ โป. ม. มคฺคกฺขายี กถํ ฯ ยุ. มคฺคชฺฌายี กถํ ฯ
อกฺขาติ วิภชติ ๑ อิเธว ธมฺมํ
ตํ กงฺขจฺฉิทํ ๒ มุนึ อเนชํ
ทุติยํ ภิกฺขุนมาหุ มคฺคเทสึ ฯ
โย ธมฺมปเท สุเทสิเต
มคฺเค ชีวติ สญฺญโต สติมา
อนวชฺชปทานิ เสวมาโน
ตติยํ ภิกฺขุนมาหุ มคฺคชีวึ ฯ
ฉทนํ กตฺวาน สุพฺพตานํ
ปกฺขนฺที กุลทูสโก ปคพฺโภ
มายาวี อสญฺญโต ปลาโป
ปฏิรูเปน จ จรํ ส มคฺคทูสี ฯ
เอเต จ ปฏิวิชฺฌิ โย คหฏฺโฐ
สุตวา อริยสาวโก สปญฺโญ
สพฺเพ เน ตาทิสาติ ๓ ญตฺวา
อิติ ทิสฺวา น หาเปติ ตสฺส สทฺธา
กถญฺหิ ทุฏฺเฐน อสมฺปทุฏฺฐํ
สุทฺธํ อสุทฺเธน สมํ กเรยฺยาติ ฯ
จุนฺทสุตฺตํ ปญฺจมํ ฯ
______________
#๑ ม. วิภชเต ฯ ๒ โป. กงฺขจฺเฉทํ ฯ ๓ โป. ม. ยุ. เนตาทิสาติ ฯ
สุตฺตนิปาเต อุรควคฺคสฺส ฉฏฺฐํ ปราภวสุตฺตํ

[๓๐๓] ๖ เอวมฺเม สุตํ ฯ เอกํ สมยํ ภควา สาวตฺถิยํ
วิหรติ เชตวเน อนาถปิณฺฑิกสฺส อาราเม ฯ อถ โข
อญฺญตรา เทวตา อภิกฺกนฺตาย รตฺติยา อภิกฺกนฺตวณฺณา เกวลกปฺปํ
เชตวนํ โอภาเสตฺวา เยน ภควา เตนุปสงฺกมิ อุปสงฺกมิตฺวา
ภควนฺตํ อภิวาเทตฺวา เอกมนฺตํ อฏฺฐาสิ ฯ เอกมนฺตํ ฐิตา โข
สา เทวตา ภควนฺตํ คาถาย อชฺฌภาสิ

[๓๐๔] ปราภวนฺตํ ปุริสํ มยํ ปุจฺฉาม โคตมํ ๑
ภควนฺตํ ปุฏฺฐุมาคมฺม กึ ปราภวโต มุขํ ฯ
สุวิชาโน ภวํ โหติ ทุวิชาโน ปราภโว
ธมฺมกาโม ภวํ โหติ ธมฺมเทสฺสี ปราภโว
อิติ เหตํ วิชานาม ปฐโม โส ปราภโว ฯ
ทุติยํ ภควา พฺรูหิ กึ ปราภวโต มุขํ ฯ
อสนฺตสฺส ปิยา โหนฺติ สนฺเต น กุรุเต ปิยํ
อสตํ ธมฺมํ โรเจติ ตํ ปราภวโต มุขํ
อิติ เหตํ วิชานาม ทุติโย โส ปราภโว ฯ
ตติยํ ภควา พฺรูหิ กึ ปราภวโต มุขํ ฯ
นิทฺทาสีลี สภาสีลี อนุฏฺฐาตา จ โย นโร
อลโส โกธปญฺญาโณ ตํ ปราภวโต มุขํ
#๑ โป. ม. โคตม ฯ
อิติ เหตํ วิชานาม ตติโย โส ปราภโว ฯ
จตุตฺถํ ภควา พฺรูหิ กึ ปราภวโต มุขํ ฯ
โย มาตรํ วา ๑ ปิตรํ วา ชิณฺณกํ คตโยพฺพนํ
ปหุสนฺโต น ภรติ ตํ ปราภวโต มุขํ
อิติ เหตํ วิชานาม จตุตฺโถ โส ปราภโว ฯ
ปญฺจมํ ภควา พฺรูหิ กึ ปราภวโต มุขํ ฯ
โย พฺราหฺมณํ วา ๒ สมณํ วา อญฺญํ วาปิ วนิพฺพกํ
มุสาวาเทน วญฺเจติ ตํ ปราภวโต มุขํ
อิติ เหตํ วิชานาม ปญฺจโม โส ปราภโว ฯ
ฉฏฺฐมํ ภควา พฺรูหิ กึ ปราภวโต มุขํ ฯ
ปหุตวิตฺโต ๓ ปุริโส สหิรญฺโญ สโภชโน
เอโก ภุญฺชติ สาทูนิ ตํ ปราภวโต มุขํ
อิติ เหตํ วิชานาม ฉฏฺฐโม โส ปราภโว ฯ
สตฺตมํ ภควา พฺรูหิ กึ ปราภวโต มุขํ ฯ
ชาติถทฺโธ ธนถทฺโธ โคตฺตถทฺโธ จ โย นโร
สญฺญาตึ อติมญฺเญติ ตํ ปราภวโต มุขํ
อิติ เหตํ วิชานาม สตฺตโม โส ปราภโว ฯ
อฏฺฐมํ ภควา พฺรูหิ กึ ปราภวโต มุขํ ฯ
อิตฺถีธุตฺโต สุราธุตฺโต อกฺขธุตฺโต จ โย นโร
ลทฺธํ ลทฺธํ วินาเสติ ตํ ปราภวโต มุขํ
#๑-๒ ม. วาสทฺโท นตฺถิ ฯ ๓ ม. ยุ. ปหูตวิตฺโต ฯ
อิติ เหตํ วิชานาม อฏฺฐโม โส ปราภโว ฯ
นวมํ ภควา พฺรูหิ กึ ปราภวโต มุขํ ฯ
เสหิ ทาเรหิ อสนฺตุฏฺโฐ เวสิยาสุ ปทุสฺสติ ๑
ทุสฺสติ ๒ ปรทาเรสุ ตํ ปราภวโต มุขํ
อิติ เหตํ วิชานาม นวโม โส ปราภโว ฯ
ทสมํ ภควา พฺรูหิ กึ ปราภวโต มุขํ ฯ
อตีตโยพฺพโน โปโส อาเนติ ติมฺพรุตฺถนึ
ตสฺสา อิสฺสา น สุปติ ตํ ปราภวโต มุขํ
อิติ เหตํ วิชานาม ทสโม โส ปราภโว ฯ
เอกาทสมํ ภควา พฺรูหิ กึ ปราภวโต มุขํ ฯ
อิตฺถึ ๓ โสณฺฑึ วิกิรณึ ปุริสํ วาปิ ตาทิสํ
อิสฺสริยสฺมึ ฐเปติ ๔ ตํ ปราภวโต มุขํ
อิติ เหตํ วิชานาม เอกาทสโม ปราภโว ฯ
ทฺวาทสมํ ภควา พฺรูหิ กึ ปราภวโต มุขํ ฯ
อปฺปโภโค มหาตโณฺห ขตฺติเย ชายเต กุเล
โส ๕ จ รชฺชํ ปตฺถยติ ตํ ปราภวโต มุขํ ฯ
เอเต ปราภเว โลเก ปณฺฑิโต สมเวกฺขิย
อริยทสฺสนสมฺปนฺโน ส โลกํ ภชเต สิวนฺติ ฯ
ปราภวสุตฺตํ ฉฏฺฐํ ฯ
_____________
#๑ ยุ. ปทิสฺสติ ฯ ๒ ยุ. ทิสฺสติ ฯ ๓ ยุ. อิตฺถิโสณฺฑึ ฯ ๔ ยุ. ฐาเปติ ฯ
#๕ ยุ. โสธ ฯ
สุตฺตนิปาเต อุรควคฺคสฺส สตฺตมํ วสลสุตฺตํ

[๓๐๕] ๗ เอวมฺเม สุตํ ฯ เอกํ สมยํ ภควา สาวตฺถิยํ วิหรติ
เชตวเน อนาถปิณฺฑิกสฺส อาราเม ฯ อถ โข ภควา ปุพฺพณฺหสมยํ
นิวาเสตฺวา ปตฺตจีวรมาทาย สาวตฺถึ ปิณฺฑาย ปาวิสิ ฯ
เตน โข ปน สมเยน อคฺคิกภารทฺวาชสฺส พฺราหฺมณสฺส นิเวสเน
อคฺคิ ปชฺชลิโต โหติ อาหุตี ๑ ปคฺคหิตา ฯ อถ โข ภควา
สาวตฺถิยํ สปทานํ ปิณฺฑาย จรมาโน เยน อคฺคิกภารทฺวาชสฺส
พฺราหฺมณสฺส นิเวสนํ เตนุปสงฺกมิ ฯ อทฺทสา โข อคฺคิกภารทฺวาโช
พฺราหฺมโณ ภควนฺตํ ทูรโต ว อาคจฺฉนฺตํ ทิสฺวาน
ภควนฺตํ เอตทโวจ อเตฺรว ๒ มุณฺฑก อเตฺรว ๒ สมณก อเตฺรว ๒
วสลก ติฏฺฐาหีติ ฯ
เอวํ วุตฺเต ภควา อคฺคิกภารทฺวาชํ พฺราหฺมณํ เอตทโวจ
ชานาสิ ปน ตฺวํ พฺราหฺมณ วสลํ วา วสลกรเณ วา ธมฺเมติ ฯ
น ขฺวาหํ โภ โคตม ชานามิ วสลํ วา วสลกรเณ วา ธมฺเม
สาธุ เม ภวํ โคตโม ตถา ธมฺมํ เทเสตุ ยถาหํ ชาเนยฺยํ วสลํ
วา วสลกรเณ วา ธมฺเมติ ฯ เตน หิ พฺราหฺมณ สุณาหิ ๓ สาธุกํ
มนสิกโรหิ ภาสิสฺสามีติ ฯ เอวํ โภติ โข อคฺคิกภารทฺวาโช
พฺราหฺมโณ ภควโต ปจฺจสฺโสสิ ฯ ภควา เอตทโวจ

[๓๐๖] โกธโน อุปนาหี จ ปาปมกฺขี จ โย นโร
#๑ โป. ม. อาหุติ ฯ ๒ ม. ยุ. ตเตรว ฯ ๓ โป. สุโณหิ ฯ
วิปนฺนทิฏฺฐิ มายาวี ตํ ชญฺญา วสโล อิติ ฯ ๑
เอกชํ วา ทฺวิชํ ๑ วาปิ โยธ ปาณํ วิหึสติ
ยสฺส ปาเณ ทยา นตฺถิ ตํ ชญฺญา วสโล อิติ ฯ ๒
โย หนฺติ อุปรุนฺเธติ ๒ คามานิ นิคมานิ จ
นิคฺคาหโก สมญฺญาโต ตํ ชญฺญา วสโล อิติ ฯ ๓
คาเม วา ยทิ วารญฺเญ ยํ ปเรสํ มมายิตํ
เถยฺยา อทินฺนํ อาเนติ ๓ ตํ ชญฺญา วสโล อิติ ฯ ๔
โย หเว อิณมาทาย ภุญฺชมาโน ปลายติ
น หิ เต อิณมตฺถีติ ตํ ชญฺญา วสโล อิติ ฯ ๕
โย เว กิญฺจิกฺขกมฺยตา ปนฺถสฺมึ วชตํ ชนํ
หนฺตา กิญฺจิกฺขมาเทติ ตํ ชญฺญา วสโล อิติ ฯ ๖R
โย อตฺตเหตุ ปรเหตุ ธนเหตุ จ โย นโร
สกฺขิปุฏฺโฐ มุสา พฺรูติ ตํ ชญฺญา วสโล อิติ ฯ ๗
โย ญาตีนํ สขีนํ วา ทาเรสุ ปฏิทิสฺสติ
สหสา ๔ สมฺปิเยน วา ตํ ชญฺญา วสโล อิติ ฯ ๘
โย มาตรํ วา ปิตรํ วา ชิณฺณกํ คตโยพฺพนํ
ปหุสนฺโต น ภรติ ตํ ชญฺญา วสโล อิติ ฯ ๙
โย มาตรํ วา ปิตรํ วา ภาตรํ ภคินึ สสุํ ๕
หนฺติ โรเสติ วาจาย ตํ ชญฺญา วสโล อิติ ฯ ๑๐
โย อตฺถํ ปุจฺฉิโต สนฺโต อนตฺถมนุสาสติ
#๑ ยุ. ทิชํ ฯ ๒ ม. ยุ. ปริรุนฺธติ ฯ โป. อุปรุนฺธติ ฯ ๓ ม. อทินฺนมาเนติ ฯ
#ยุ. อทินฺนํ อาทิยติ ฯ ๔ ม. สาหสา ฯ ๕ โป. สขึ ฯ
ปฏิจฺฉนฺเนน มนฺเตติ ตํ ชญฺญา วสโล อิติ ฯ ๑๑
โย กตฺวา ปาปกํ กมฺมํ มา มํ ชญฺญาติ อิจฺฉติ
โย ปฏิจฺฉนฺนกมฺมนฺโต ตํ ชญฺญา วสโล อิติ ฯ ๑๒
โย เว ปรกุลํ คนฺตฺวา ภุตฺวา ๑ จ สุจิโภชนํ
อาคตํ นปฺปฏิปูเชติ ตํ ชญฺญา วสโล อิติ ฯ ๑๓
โย พฺราหฺมณํ วา สมณํ วา อญฺญํ วาปิ วนิพฺพกํ
มุสาวาเทน วญฺเจติ ตํ ชญฺญา วสโล อิติ ฯ ๑๔
โย พฺราหฺมณํ วา สมณํ วา ภตฺตกาเล อุปฏฺฐิเต
โรเสติ วาจา น จ เทติ ตํ ชญฺญา วสโล อิติ ฯ ๑๕
อสตํ โยธ ปพฺรูติ โมเหน ปลิคุณฺฐิโต
กิญฺจิกฺขํ นิชิคึสาโน ตํ ชญฺญา วสโล อิติ ฯ ๑๖
โย จตฺตานํ สมุกฺกํเส ปเร ๒ จ อวชานติ
นิหีโน เสน มาเนน ตํ ชญฺญา วสโล อิติ ฯ ๑๗
โรสโก กทริโย จ ปาปิจฺโฉ มจฺฉรี สโฐ
อหิริโก อโนตฺตปฺปี ตํ ชญฺญา วสโล อิติ ฯ ๑๘
โย พุทฺธํ ปริภาสติ อถ วา ตสฺส สาวกํ
ปริพฺพาชกํ ๓ คหฏฺฐํ วา ตํ ชญฺญา วสโล อิติ ฯ ๑๙
โย เว อนรหํ ๔ สนฺโต อรหํ ปฏิชานติ ๕
โจโร สพฺรหฺมเก โลเก เอโส ๖ โข วสลาธโม ฯ ๒๐
เอเต โข วสลา วุตฺตา มยา เย เต ปกาสิตา ฯ
#๑ ม. ยุ. ภุตฺวาน สุจิโภชนํ ฯ ๒ ม. ปเร จ มวชานาติ ฯ ยุ. ปรญฺจ มวชานาติ ฯ
#๓ ม. ยุ. ปริพฺพาชํ ฯ ๔ ยุ. อนรหา ฯ ๕ ม. ปฏิขานาติ ฯ ๖ โป. เอโส โข
#วสโลธโม. ฯ ยุ เอส โข วสลาธโม ฯ
น ชจฺจา วสโล โหติ น ชจฺจา โหติ พฺราหฺมโณ
กมฺมุนา วสโล โหติ กมฺมุนา โหติ พฺราหฺมโณ ฯ
ตทมินาปิ ชานาถ ยถา เมทํ นิทสฺสนํ
จณฺฑาลปุตฺโต โสปาโก มาตงฺโค อิติ วิสฺสุโต
โส ยสปฺปรมปฺปตฺโต ๑ มาตงฺโค ยํ สุทุลฺลภํ
อาคญฺฉฉ ๒ ตสฺสุปฏฺฐานํ ขตฺติยา พฺราหฺมณา พหู ฯ
โส ๓ เทวยานํ อภิรุยฺห วิรชํ โส มหาปถํ
กามราคํ วิราเชตฺวา พฺรหฺมโลกูปโค อหุ ฯ
น นํ ชาติ นิวาเรสิ พฺรหฺมโลกูปปตฺติยา ฯ
อชฺฌายิกกุเล ๔ ชาตา พฺราหฺมณา มนฺตพนฺธวา
เต จ ปาเปสุ กมฺเมสุ อภิณฺหมุปทิสฺสเร
ทิฏฺเฐว ธมฺเม คารยฺหา สมฺปราเย จ ทุคฺคติ ฯ
น เน ชาติ นิวาเรติ ทุคฺคจฺจา ๕ ครหาย วา ฯ
น ชจฺจา วสโล โหติ น ชจฺจา โหติ พฺราหฺมโณ
กมฺมุนา วสโล โหติ กมฺมุนา โหติ พฺราหฺมโณติ ฯ