[๔๗] ๑๐ เอวมฺเม สุตํ ฯ เอกํ สมยํ ภควา สาวตฺถิยํ
วิหรติ เชตวเน อนาถปิณฺฑิกสฺส อาราเม ฯ เตน โข ปน
สมเยน พาหิโย ทารุจีริโย สุปฺปารเก ปฏิวสติ สมุทฺทตีเร สกฺกโต
โหติ ครุกโต มานิโต ปูชิโต อปจิโต ๔ ลาภี จีวรปิณฺฑปาตเสนาสน-
คิลานปจฺจยเภสชฺชปริกฺขารานํ ฯ อถ โข พาหิยสฺส ทารุจีริยสฺส
รโหคตสฺส ปฏิสลฺลีนสฺส เอวํ เจตโส ปริวิตกฺโก อุทปาทิ เย ๕
โข เกจิ โลเก อรหนฺโต วา อรหตฺตมคฺคํ วา สมาปนฺนา อหํ
เตสํ อญฺญตโรติ ฯ อถ โข พาหิยสฺส ทารุจีริยสฺส ปุราณสาโลหิตา
เทวตา อนุกมฺปิกา ๖ อตฺถกามา พาหิยสฺส ทารุจีริยสฺส
เจตสา เจโตปริวิตกฺกมญฺญาย เยน พาหิโย ทารุจีริโย
เตนุปสงฺกมิ อุปสงฺกมิตฺวา พาหิยํ ทารุจีริยํ เอตทโวจ เนว โข
#๑ โป. ยุ. อุมฺมุชฺชนิมฺมุชฺชํ กโรนฺเตปิ ฯ ม. ปิสทฺโท นตฺถิ ฯ ๒ ม. สุจี ฯ
#๓ โป. โส สุจิ เจว พฺราหฺมโณติ ฯ ๔ โป. อสญฺญิโต ฯ ๕ ยุ. เย นุ ฯ
#๖ โป. อนุกมฺปกามา ฯ
ตฺวํ พาหิย อรหา นาปิ อรหตฺตมคฺคํ วา สมาปนฺโน สาปิ
เต ปฏิปทา นตฺถิ ยาย ตฺวํ อรหา วา อสฺสสิ ๑ อรหตฺตมคฺคํ
วา สมาปนฺโนติ ฯ อถ ๒ เก จรหิ สเทวเก โลเก อรหนฺโต วา
อรหตฺตมคฺคํ วา สมาปนฺนาติ ฯ อตฺถิ พาหิย อุตฺตเรสุ ชนปเทสุ
สาวตฺถี นาม นครํ ตตฺถ โส ภควา เอตรหิ วิหรติ อรหํ
สมฺมาสมฺพุทฺโธ ฯ โส หิ พาหิย ภควา อรหา เจว อรหตฺตาย
จ ธมฺมํ เทเสตีติ ฯ อถ โข พาหิโย ทารุจีริโย ตาย เทวตาย
สํเวชิโต ตาวเทว สุปฺปารกมฺหา ปกฺกามิ สพฺพตฺถ เอกรตฺติปริวาเสน ๓
เยน ภควา สาวตฺถิยํ วิหรติ เชตวเน อนาถปิณฺฑิกสฺส
อาราเม เตนุปสงฺกมิ ฯ

[๔๘] เตน โข ปน สมเยน สมฺพหุลา ภิกฺขู อพฺโภกาเส
จงฺกมนฺติ ฯ อถ โข พาหิโย ทารุจีริโย เยน ๔ ภิกฺขู
เตนุปสงฺกมิ อุปสงฺกมิตฺวา เต ภิกฺขู เอตทโวจ กหํ นุโข ภนฺเต
เอตรหิ ภควา วิหรติ อรหํ สมฺมาสมฺพุทฺโธ ทสฺสนกามมฺหา
มยํ ตํ ภควนฺตํ อรหนฺตํ สมฺมาสมฺพุทฺธนฺติ ฯ อนฺตรฆรํ ปวิฏฺโฐ
โข พาหิย ภควา ปิณฺฑายาติ ฯ อถ โข พาหิโย ทารุจีริโย
ตรมานรูโป เชตวนา นิกฺขมิตฺวา สาวตฺถึ ปวิสิตฺวา อทฺทส ภควนฺตํ
สาวตฺถิยํ ปิณฺฑาย จรนฺตํ ปาสาทิกํ ปาสาทนียํ ๕ สนฺตินฺทฺริยํ
#๑ ม. ยุ. อสฺส ฯ ๒ ยุ. โข ฯ ๓ ม. เยน สาวตฺถี เชตวนํ อนาถปิณฺฑิกสฺส
#อาราโม เตนุปสงฺกมิ ฯ ๔ ม. ยุ. เยน เต ฯ ๕ โป. ปาสาทิยํ ฯ
#ม. ปาสาทนียํ ฯ ยุ. ทสฺสนิยํ ฯ
สนฺตมานสํ อุตฺตมทมถสมถํ อนุปฺปตฺตํ ทนฺตํ คุตฺตํ ยตินฺทฺริยํ ๑
นาคํ ทิสฺวาน เยน ภควา เตนุปสงฺกมิ อุปสงฺกมิตฺวา
ภควโต ปาเท สิรสา นิปติตฺวา ภควนฺตํ เอตทโวจ เทเสตุ เม
ภนฺเต ภควา ธมฺมํ เทเสตุ สุคโต ธมฺมํ ยํ มมสฺส ทีฆรตฺตํ
หิตาย สุขายาติ ฯ

[๔๙] เอวํ วุตฺเต ภควา พาหิยํ ทารุจีริยํ เอตทโวจ อกาโล
โข ตาว พาหิย อนฺตรฆรํ ๒ ปวิฏฺฐมฺหา ปิณฺฑายาติ ฯ ทุติยมฺปิ
โข พาหิโย ทารุจีริโย ภควนฺตํ เอตทโวจ ทุชฺชานํ โข ปเนตํ
ภนฺเต ภควโต วา ชีวิตนฺตรายานํ มยฺหํ วา ชีวิตนฺตรายานํ
เทเสตุ เม ภนฺเต ภควา ธมฺมํ เทเสตุ สุคโต ธมฺมํ ยํ
มมสฺส ทีฆรตฺตํ หิตาย สุขายาติ ฯ ทุติยมฺปิ โข ภควา พาหิยํ ทารุจีริยํ
เอตทโวจ อกาโล โข ตาว พาหิย อนฺตรฆรํ ปวิฏฺฐมฺหา
ปิณฺฑายาติ ฯ ตติยมฺปิ โข พาหิโย ทารุจีริโย ภควนฺตํ เอตทโวจ
ทุชฺชานํ โข ปเนตํ ภนฺเต ภควโต วา ชีวิตนฺตรายานํ มยฺหํ
วา ชีวิตนฺตรายานํ เทเสตุ เม ภนฺเต ภควา ธมฺมํ เทเสตุ
สุคโต ธมฺมํ ยํ มมสฺส ทีฆรตฺตํ หิตาย สุขายาติ ฯ ตสฺมา
ติห เต พาหิย เอวํ สิกฺขิตพฺพํ ทิฏฺเฐ ทิฏฺฐมตฺตํ ภวิสฺสติ สุเต
สุตมตฺตํ ภวิสฺสติ มุเต มุตมตฺตํ ภวิสฺสติ วิญฺญาเต
วิญฺญาตมตฺตํ ภวิสฺสตีติ เอวญฺหิ เต พาหิย สิกฺขิตพฺพํ ฯ ยโต ๓ โข
เต พาหิย ทิฏฺเฐ ทิฏฺฐมตฺตํ ภวิสฺสติ สุเต สุตมตฺตํ ภวิสฺสติ
#๑ โป. ยุ. สนฺตินฺทฺริยํ ฯ ๒ ยุ. อยํ ปาโฐ นตฺถิ ฯ ๓ โป. ตสฺส ฯ
มุเต มุตมตฺตํ ภวิสฺสติ วิญฺญาเต วิญฺญาตมตฺตํ ภวิสฺสติ
ตโต ตฺวํ พาหิย นตฺถิ ๑ ยโต ตฺวํ พาหิย เนวตฺถิ ๒ [๓] ตโต ตฺวํ
พาหิย เนวิธ น หุรํ น อุภยมนฺตเร ๔ เอเสวนฺโต ทุกฺขสฺสาติ ฯ
อถ โข พาหิยสฺส ทารุจีริยสฺส ภควโต อิมาย สงฺขิตฺตาย
ธมฺมเทสนาย ตาวเทว อนุปาทาย อาสเวหิ จิตฺตํ วิมุจฺจิ ฯ
อถ โข ภควา พาหิยํ ทารุจีริยํ อิมินา สงฺขิตฺเตน โอวาเทน
โอวทิตฺวา ปกฺกามิ ฯ

[๕๐] อถ โข อจิรปกฺกนฺตสฺส ภควโต พาหิยํ ทารุจีริยํ
คาวี ตรุณวจฺฉา อธิปาเตตฺวา ๕ ชีวิตา โวโรเปสิ ฯ อถ โข
ภควา สาวตฺถิยํ ปิณฺฑาย จริตฺวา ปจฺฉาภตฺตํ ปิณฺฑปาตปฏิกฺกนฺโต
สมฺพหุเลหิ ภิกฺขูหิ สทฺธึ นครมฺหา นิกฺขมิตฺวา อทฺทส พาหิยํ
ทารุจีริยํ กาลกตํ ทิสฺวาน ภิกฺขู อามนฺเตสิ คณฺหาถ ภิกฺขเว
พาหิยสฺส ทารุจีริยสฺส สรีรกํ มญฺจกํ อาโรเปตฺวา นีหริตฺวา
ฌาเปถ ถูปญฺจสฺส กโรถ สพฺรหฺมจารี โว ภิกฺขเว กาลกโตติ ฯ
เอวํ ภนฺเตติ โข เต ภิกฺขู ภควโต ปฏิสฺสุตฺวา ๖ พาหิยสฺส
ทารุจีริยสฺส สรีรกํ มญฺจกํ อาโรเปตฺวา นีหริตฺวา ฌาเปตฺวา
ถูปญฺจสฺส กริตฺวา เยน ภควา เตนุปสงฺกมึสุ อุปสงฺกมิตฺวา
[๗] เอกมนฺตํ นิสีทึสุ เอกมนฺตํ นิสินฺนา โข เต ภิกฺขู ภควนฺตํ
เอตทโวจุํ ทฑฺฒํ ภนฺเต พาหิยสฺส ทารุจีริยสฺส สรีรํ ถูโป
#๑ ม. น เตน ยุ. น ตตฺถ ฯ ๒ ม. น เตน ยุ. เนวตฺถ ฯJ
#๓ ตโต ตฺวํ พาหิย น ตตฺถ ฯ ยโต ตฺวํ พาหิย น ตตฺถ ฯ
#๔ ม. ยุ. น อุภยมนฺตเรน ฯ ๕ ม. อธิปติตฺวา ฯ ๖ ยุ. ปฏิสุณิตฺวา ฯ
#๗ ม. ยุ. ภควนฺตํ อภิวาเทตฺวา ฯ
จสฺส กโต ตสฺส กา คติ โก อภิสมฺปราโยติ ฯ ปณฺฑิโต
ภิกฺขเว พาหิโย ทารุจีริโย ปจฺจปาทิ ๑ ธมฺมสฺสานุธมฺมํ น จ [๒]
ธมฺมาธิกรณํ วิเหเสติ ๓ ปรินิพฺพุโต ภิกฺขเว พาหิโย ทารุจีริโยติ ฯ อถ
โข ภควา เอตมตฺถํ วิทิตฺวา ตายํ เวลายํ อิมํ อุทานํ อุทาเนสิ
ยตฺถ อาโป จ ปฐวี เตโช วาโย น คาธติ
น ตตฺถ สุกฺกา โชตนฺติ อาทิจฺโจ นปฺปกาสติ
น ตตฺถ จนฺทิมา ภาติ ตโม ตตฺถ น วิชฺชติ ฯ
ยทา จ อตฺตนาเวทิ มุนิ โมเนน พฺราหฺมโณ
อถ รูปา อรูปา จ สุขทุกฺขา ปมุจฺจตีติ ฯ ทสมํ ฯ
[๔] … … … … … … … … … … …
โพธิวคฺโค ปฐโม ฯ
ตสฺสุทฺทานํ
ตโย ๕ จ โพธิ นิโคฺรโธ เต เถรา กสฺสเปน จ
ปาวาย ๖ สงฺคามชิ ชฏิลา พาหิเยน เต รสาติ ฯ
อุทาเน ทุติโย มุจฺจลินฺทวคฺโค

[๕๑] ๑ เอวมฺเม สุตํ ฯ เอกํ สมยํ ภควา อุรุเวลายํ
วิหรติ นชฺชา เนรญฺชราย ตีเร มุจฺจลินฺทมูเล ปฐมาภิสมฺพุทฺโธ ฯ
เตน โข ปน สมเยน ภควา สตฺตาหํ เอกปลฺลงฺเกน นิสินฺโน
โหติ วิมุตฺติสุขํ ปฏิสํเวที ฯ เตน โข ปน สมเยน มหาอกาลเมโฆ
#๑ โป. ปจฺจุปฺปาทิ ฯ ๒ ม. ยุ. มํ ฯ ๓ โป. วิเหสติ ฯ ม. วิเหเสสิ ฯ
#๔ โป. ม. ยุ. อยมฺปิ อุทาโน วุตฺโต ภควตา อิติ เม สุตนฺติ ฯ ๕ ม. ตโย
#โพธี จ หหหุงฺโก พฺราหฺมณา กสฺสเปน จ อชสงฺคามชฏิลา พาหิเยนาติ เตรสาติ ฯ
#๖ ยุ. ปาเตฬี ฯ
อุทปาทิ ฯ สตฺตาหวทฺทลิกา สีตวาตา ทุทฺทนี ๑ ฯ อถ โข
มุจฺจลินฺโท นาคราชา สกภวนา นิกฺขมิตฺวา ภควโต กายํ
สตฺตกฺขตฺตุํ โภเคหิ ปริกฺขิปิตฺวา อุปริ มุทฺธนิ มหนฺตํ ผณํ
วิหจฺจ อฏฺฐาสิ มา ภควนฺตํ สีตํ มา ภควนฺตํ อุณฺหํ มา
ภควนฺตํ ฑํสมกสวาตาตปสิรึสปสมฺผสฺสาติ ๒ ฯ อถ โข ภควา
ตสฺส สตฺตาหสฺส อจฺจเยน ตมฺหา สมาธิมฺหา วุฏฺฐาสิ ฯ อถ
โข มุจฺจลินฺโท นาคราชา วิทฺธํ วิคตพลาหกํ เทวํ วิทิตฺวา
ภควโต กายํ ๓ โภเคหิ นิเวเฐตฺวา สกวณฺณํ อภินิมฺมิตฺวา ภควโต
ปุรโต ว อฏฺฐาสิ ปญฺชลิโก ภควนฺตํ นมสฺสมาโน ฯ อถ โข
ภควา เอตมตฺถํ วิทิตฺวา ตายํ เวลายํ อิมํ อุทานํ อุทาเนสิ
สุโข วิเวโก ตุฏฺฐสฺส สุตธมฺมสฺส ปสฺสโต
อพฺยาปชฺชํ สุขํ โลเก ปาณภูเตสุ สญฺญโม ๔
สุขา วิราคตา โลเก กามานํ สมติกฺกโม
อสฺมิมานสฺส [๕] วินโย เอตํ เว ปรมํ สุขนฺติ ฯ ปฐมํ ฯ

[๕๒] ๒ เอวมฺเม สุตํ ฯ เอกํ สมยํ ภควา สาวตฺถิยํ
วิหรติ เชตวเน อนาถปิณฺฑิกสฺส อาราเม ฯ เตน โข ปน
สมเยน สมฺพหุลานํ ภิกฺขูนํ ปจฺฉาภตฺตํ ปิณฺฑปาตปฏิกฺกนฺตานํ
อุปฏฺฐานสาลายํ สนฺนิสินฺนานํ สนฺนิปติตานํ อยมนฺตรากถา อุทปาทิ
โก นุโข อาวุโส อิเมสํ ทฺวินฺนํ ราชูนํ มหทฺธนตโร วา มหาโภคตโร
วา มหาโกสตโร วา มหาวิชิตตโร วา มหาวาหนตโร
#๑ ม. ยุ. ทุทฺทินี ฯ ๒ ม. … สรีสปสมฺผสฺโสติ ฯ ๓ ม. ยุ. กายา
#โภเค วินิเวเฐตฺวา สกวณฺณํ ปฏิสํหริตฺวา มาณวกวณฺณํ อภินิมฺมินิตฺวา ฯ ๔ ม.
#๔ ม. ยุ. สํยโม ฯ ๕ ม. ยุ. โย ฯ
วา มหพฺพลตโร วา มหิทฺธิกตโร วา มหานุภาวตโร วา ราชา
วา มาคโธ เสนิโย พิมฺพิสาโร ราชา วา ปเสนทิ โกสโลติ ฯ
อยญฺจรหิ เตสํ ภิกฺขูนํ อนฺตรากถา ๑ วิปฺปกตา ฯ อถ โข ภควา
สายณฺหสมยํ ปฏิสลฺลานา วุฏฺฐิโต เยน อุปฏฺฐานสาลา
เตนุปสงฺกมิ อุปสงฺกมิตฺวา ปญฺญตฺเต อาสเน นิสีทิ ฯ นิสชฺช
โข ภควา ภิกฺขู อามนฺเตสิ กาย นุตฺถ ภิกฺขเว เอตรหิ กถาย
สนฺนิสินฺนา สนฺนิปติตา กา จ ปน โว อนฺตรากถา วิปฺปกตาติ ฯ
อิธ ภนฺเต อมฺหากมฺปิ ปจฺฉาภตฺตํ ปิณฺฑปาตปฏิกฺกนฺตานํ
อุปฏฺฐานสาลายํ สนฺนิสินฺนานํ สนฺนิปติตานํ อยมนฺตรากถา อุทปาทิ
โก นุ โข อาวุโส อิเมสํ ทฺวินฺนํ ราชูนํ มหทฺธนตโร วา
มหาโภคตโร วา มหาโกสตโร วา มหาวิชิตตโร วา มหาวาหนตโร
วา มหพฺพลตโร วา มหิทฺธิกตโร วา มหานุภาวตโร วา ราชา
วา มาคโธ เสนิโย พิมฺพิสาโร ราชา วา ปเสนทิ โกสโลติ
อยํ โข โน ภนฺเต อนฺตรากถา วิปฺปกตา อถ ภควา อนุปฺปตฺโตติ ฯ
น เขฺวตํ ภิกฺขเว ตุมฺหากํ ปฏิรูปํ กุลปุตฺตานํ สทฺธา ๒ อคารสฺมา
อนคาริยํ ปพฺพชิตานํ ยํ ตุเมฺห เอวรูปํ ๓ กถํ กเถยฺยาถ
สนฺนิปติตานํ โว ภิกฺขเว ทฺวยํ กรณียํ ธมฺมี ๔ วา กถา อริโย
วา ตุณฺหีภาโวติ ฯ อถ โข ภควา เอตมตฺถํ วิทิตฺวา ตายํ
เวลายํ อิมํ อุทานํ อุทาเนสิ
ยญฺจ กามสุขํ โลเก ยญฺจิทํ ทิวิยํ สุขํ
#๑ ม. ยุ. โหติ ฯ ๒ โป. ยุ สทฺธาย ฯ ๓ ม. ยุ. เอวรูปึ ฯ
#๔ โป. ยุ. ธมฺมิกถา วา ฯ
ตณฺหกฺขยสุขสฺส ๑ เต กลํ นคฺฆนฺติ โสฬสินฺติ ฯ ทุติยํ ฯ

[๕๓] ๓ เอวมฺเม สุตํ ฯ เอกํ สมยํ ภควา สาวตฺถิยํ
วิหรติ เชตวเน อนาถปิณฺฑิกสฺส อาราเม ฯ เตน โข ปน สมเยน
สมฺพหุลา กุมารกา อนฺตรา จ สาวตฺถึ ๒ อนฺตรา จ เชตวนํ อหึ
ทณฺเฑน หนนฺติ ฯ อถ โข ภควา ปุพฺพณฺหสมยํ นิวาเสตฺวา
ปตฺตจีวรมาทาย สาวตฺถึ ปิณฺฑาย ปาวิสิ ฯ อทฺทสา โข ภควา
เต ๓ สมฺพหุเล กุมารเก อนฺตรา จ สาวตฺถึ อนฺตรา จ เชตวนํ
อหึ ทณฺเฑน หนนฺเต ฯ อถ โข ภควา เอตมตฺถํ วิทิตฺวา ตายํ
เวลายํ อิมํ อุทานํ อุทาเนสิ
สุขกามานิ ภูตานิ โย ทณฺเฑน วิหึสติ
อตฺตโน สุขเมสาโน เปจฺจ โส น ลภเต สุขํ ฯ
สุขกามานิ ภูตานิ โย ทณฺเฑน น หึสติ
อตฺตโน สุขเมสาโน เปจฺจ โส ลภเต สุขนฺติ ฯ ตติยํ ฯ

[๕๔] ๔ เอวมฺเม สุตํ ฯ เอกํ สมยํ ภควา สาวตฺถิยํ
วิหรติ เชตวเน อนาถปิณฺฑิกสฺส อาราเม ฯ เตน โข ปน
สมเยน ภควา สกฺกโต โหติ ครุกโต มานิโต ปูชิโต อปจิโต
ลาภี จีวรปิณฺฑปาตเสนาสนคิลานปจฺจยเภสชฺชปริกฺขารานํ ฯ
ภิกฺขุสงฺโฆปิ สกฺกโต โหติ ครุกโต มานิโต ปูชิโต อปจิโต ลาภี
จีวรปิณฺฑปาตเสนาสนคิลานปจฺจยเภสชฺชปริกฺขารานํ ฯ อญฺญติตฺถิยา
ปน ปริพฺพาชกา อสกฺกตา โหนฺติ อครุกตา อมานิตา
#๑ ม. ตณฺหกฺขยสุขสฺเสเต กลํ นาคฺฆนฺติ ฯ ๒ โป. สาวตฺถิยํ อนฺตรา จ เชตวเน
#อหึ ทณฺเฑหิ ฯ ๓ ม. ยุ. อยํ ปาโฐ นตฺถิ ฯ
อปูชิตา น ๑ อปจิตา น ลาภิโน จีวรปิณฺฑปาตเสนาสนคิลานปจฺจย-
เภสชฺชปริกฺขารานํ ฯ อถ โข เต อญฺญติตฺถิยา ปริพฺพาชกา ภควโต
สกฺการํ อสหมานา ภิกฺขุสงฺฆสฺส จ คาเม จ อรญฺเญ จ
ภิกฺขู ทิสฺวา อสพฺภาหิ ผรุสาหิ วาจาหิ อกฺโกสนฺติ ปริภาสนฺติ
โรเสนฺติ วิเหสนฺติ ๒ ฯ อถ โข สมฺพหุลา ภิกฺขู เยน ภควา
เตนุสปงฺกมึสุ อุปสงฺกมิตฺวา ภควนฺตํ อภิวาเทตฺวา เอกมนฺตํ
นิสีทึสุ ฯ เอกมนฺตํ นิสินฺนา โข เต ภิกฺขู ภควนฺตํ เอตทโวจุํ
เอตรหิ ภนฺเต ภควา สกฺกโต โหติ ๓ ครุกโต มานิโต ปูชิโต
อปจิโต ลาภี จีวรปิณฺฑปาตเสนาสนคิลานปจฺจยเภสชฺชปริกฺขารานํ ฯ
ภิกฺขุสงฺโฆปิ สกฺกโต โหติ ครุกโต มานิโต ปูชิโต อปจิโต ลาภี
จีวรปิณฺฑปาตเสนาสนคิลานปจฺจยเภสชฺชปริกฺขารานํ ฯ อญฺญติตฺถิยา
ปน ปริพฺพาชกา อสกฺกตา โหนฺติ อครุกตา อมานิตา
อปูชิตา น อปจิตา น ลาภิโน จีวรปิณฺฑปาตเสนาสนคิลานปจฺจย-
เภสชฺชปริกฺขารานํ ฯ อถ โข เต ภนฺเต อญฺญติตฺถิยา ปริพฺพาชกา
ภควโต สกฺการํ อสหมานา ภิกฺขุสงฺฆสฺส จ คาเม จ อรญฺเญ
จ ภิกฺขุสงฺฆํ ๔ ทิสฺวา อสพฺภาหิ ผรุสาหิ วาจาหิ อกฺโกสนฺติ
ปริภาสนฺติ โรเสนฺติ วิเหสนฺติ ๕ ฯ อถ โข ภควา เอตมตฺถํ
วิทิตฺวา ตายํ เวลายํ อิมํ อุทานํ อุทาเนสิ
คาเม อรญฺเญ สุขทุกฺขผุฏฺฐา ๖
เนวตฺตโต โน ปรโต ทเหถ
#๑ ม. อนปจิตา ฯ ๒ ม. วิเหเสนฺติ ฯ ๓ โป. ม. ยุ. อยํ ปาโฐ นตฺถิ ฯ
#๔ ม. ภิกฺขู ฯ ๕ ม. ยุ วิเหเสนฺตีติ ฯ ๖ ม. ยุ. ผุฏฺโฐ ฯ
ผุสนฺติ ผสฺสา อุปธึ ปฏิจฺจ
นิรูปธึ เกน ผุเสยฺยุ ๑ ผสฺสาติ ฯ จตุตฺถํ ฯ

[๕๕] ๕ เอวมฺเม สุตํ ฯ เอกํ สมยํ ภควา สาวตฺถิยํ
วิหรติ เชตวเน อนาถปิณฺฑิกสฺส อาราเม ฯ เตน โข ปน
สมเยน อญฺญตโร อิจฺฉานงฺคลโก อุปาสโก สาวตฺถึ อนุปฺปตฺโต
โหติ เกนจิเทว กรณีเยน ฯ อถ โข โส อุปาสโก สาวตฺถิยํ
ตํ กรณียํ ตีเรตฺวา เยน ภควา เตนุปสงฺกมิ อุปสงฺกมิตฺวา
ภควนฺตํ อภิวาเทตฺวา เอกมนฺตํ นิสีทิ ฯ เอกมนฺตํ นิสินฺนํ โข|
ตํ อุปาสกํ ภควา เอตทโวจ จิรสฺสํ โข ตฺวํ อุปาสก อิมํ
ปริยายมกาสิ ยทิทํ อิธาคมนายาติ ฯ จิรปฏิกาหํ ภนฺเต ภควนฺตํ
ทสฺสนาย อุปสงฺกมิตุกาโม อปิจาหํ เกหิจิ ๒ กิจฺจกรณีเยหิ พฺยาวโฏ
เอวาหํ นาสกฺขึ ภควนฺตํ ทสฺสนาย อุปสงฺกมิตุนฺติ ฯ อถ โข
ภควา เอตมตฺถํ วิทิตฺวา ตายํ เวลายํ อิมํ อุทานํ อุทาเนสิ
สุขํ วต ตสฺส น โหติ กิญฺจิ
สงฺขาตธมฺมสฺส พหุสฺสุตสฺส
สกิญฺจนํ ปสฺส วิหญฺญมานํ
ชโน ชนมฺหิ ๓ ปฏิพนฺธรูโปติ ฯ ปญฺจมํ ฯ

[๕๖] ๖ เอวมฺเม สุตํ ฯ เอกํ สมยํ ภควา สาวตฺถิยํ
วิหรติ เชตวเน อนาถปิณฺฑิกสฺส อาราเม ฯ เตน โข ปน สมเยน
อญฺญตรสฺส ปริพฺพาชกสฺส ทหรา มาณวิกา ปชาปตี โหติ
#๑ ยุ. ผุเสยฺยุํ ฯ ๒ ม. อาเมณฺฑิตํ ฯ ๓ โป. ม. ชนสฺมึ ฯ
คพฺภินี อุปวิชญฺญา ๑ ฯ อถ โข สา ปริพฺพาชิกา [๒] ปริพฺพาชกํ
เอตทโวจ คจฺฉ ตฺวํ พฺราหฺมณ เตลํ อาหร ยํ เม วิชาตาย
ภวิสฺสตีติ ฯ เอวํ วุตฺเต โส ปริพฺพาชโก ปริพฺพาชิกํ เอตทโวจ
กุโต ปนาหํ โภติยา ๓ เตลํ อาหรามีติ ฯ ทุติยมฺปิ โข สา
ปริพฺพาชิกา ตํ ปริพฺพาชกํ เอตทโวจ คจฺฉ ตฺวํ พฺราหฺมณ
เตลํ อาหร ยํ เม วิชาตาย ภวิสฺสตีติ ฯ ทุติยมฺปิ โข โส
ปริพฺพาชโก ตํ ปริพฺพาชิกํ เอตทโวจ กุโต ปนาหํ โภติยา เตลํ
อาหรามีติ ฯ ตติยมฺปิ โข สา ปริพฺพาชิกา ตํ ปริพฺพาชกํ
เอตทโวจ คจฺฉ ตฺวํ พฺราหฺมณ เตลํ อาหร ยํ เม วิชาตาย
ภวิสฺสตีติ