[๑๔๐๔] อถ โข สมฺพหุลา ภิกฺขู เยน ภควา เตนุปสงฺกมึสุ
อุปสงฺกมิตฺวา ภควนฺตํ อภิวาเทตฺวา เอกมนฺตํ นิสีทึสุ ฯ เอกมนฺตํ
นิสินฺเน โข เต ภิกฺขู ภควา เอตทโวจ อตฺถิ นุ โข ภิกฺขเว
เอกธมฺโม ภาวิโต พหุลีกโต จตฺตาโร ธมฺเม ปริปูเรติ จตฺตาโร
ธมฺมา ภาวิตา พหุลีกตา สตฺต ธมฺเม ปริปูเรนฺติ สตฺต ธมฺมา
ภาวิตา พหุลีกตา เทฺว ธมฺเม ปริปูเรนฺตีติ ฯ ภควํมูลกา โน
ภนฺเต ธมฺมา ฯเปฯ ภควโต สุตฺวา ภิกฺขู ธาเรสฺสนฺตีติ ฯ อตฺถิ
ภิกฺขเว เอกธมฺโม ภาวิโต พหุลีกโต จตฺตาโร ธมฺเม ปริปูเรติ
จตฺตาโร ธมฺมา ภาวิตา พหุลีกตา สตฺต ธมฺเม ปริปูเรนฺติ สตฺต
ธมฺมา ภาวิตา พหุลีกตา เทฺว ธมฺเม ปริปูเรนฺติ ฯ

[๑๔๐๕] กตโม จ ภิกฺขเว เอกธมฺโม ภาวิโต พหุลีกโต
จตฺตาโร ธมฺเม ปริปูเรติ จตฺตาโร ธมฺมา ภาวิตา พหุลีกตา
สตฺต ธมฺเม ปริปูเรนฺติ สตฺต ธมฺมา ภาวิตา พหุลีกตา เทฺว
ธมฺเม ปริปูเรนฺติ ฯ อานาปานสฺสติสมาธิ [๑] ภิกฺขเว เอกธมฺโม ภาวิโต
พหุลีกโต จตฺตาโร สติปฏฺฐาเน ปริปูเรติ จตฺตาโร สติปฏฺฐานา
ภาวิตา พหุลีกตา สตฺต โพชฺฌงฺเค ปริปูเรนฺติ สตฺต โพชฺฌงฺคา
ภาวิตา พหุลีกตา วิชฺชาวิมุตฺตึ ปริปูเรนฺตีติ ฯเปฯ (ยถา ทุติยํ
เวยฺยากรณํ ตถา ภิกฺขูนํ กาตพฺพํ) ฯเปฯ

[๑๔๐๖] อานาปานสฺสติสมาธิ ภิกฺขเว ภาวิโต พหุลีกโต
#๑ โป. โข ฯ
สญฺโญชนานํ ปหานาย สํวตฺตติ ฯ

[๑๔๐๗] กถํ ภาวิโต จ ภิกฺขเว อานาปานสฺสติสมาธิ กถํ
พหุลีกโต สญฺโญชนานํ ปหานาย สํวตฺตติ ฯ อิธ ภิกฺขเว ภิกฺขุ
อรญฺญคโต วา ฯเปฯ ปฏินิสฺสคฺคานุปสฺสี อสฺสสิสฺสามีติ สิกฺขติ
ปฏินิสฺสคฺคานุปสฺสี ปสฺสสิสฺสามีติ สิกฺขติ ฯ เอวํ ภาวิโต โข
ภิกฺขเว อานาปานสฺสติสมาธิ เอวํ พหุลีกโต สญฺโญชนานํ ปหานาย
สํวตฺตตีติ ฯเปฯ

[๑๔๐๘] อานาปานสฺสติสมาธิ ภิกฺขเว ภาวิโต พหุลีกโต
อนุสยสมุคฺฆาตาย สํวตฺตติ ฯ (วิตฺถาเรตพฺพํ) ฯ เอวํ ภาวิโต โข
ภิกฺขเว อานาปานสฺสติสมาธิ เอวํ พหุลีกโต อนุสยสมุคฺฆาตาย
สํวตฺตตีติ ฯ

[๑๔๐๙] อานาปานสฺสติสมาธิ ภิกฺขเว ภาวิโต พหุลีกโต
อทฺธานปริญฺญาย สํวตฺตตีติ ฯ (วิตฺถาโร) ฯ เอวํ ภาวิโต โข
ภิกฺขเว อานาปานสฺสติสมาธิ เอวํ พหุลีกโต อทฺธานปริญฺญาย
สํวตฺตตีติ ฯ

[๑๔๑๐] อานาปานสฺสติสมาธิ ภิกฺขเว ภาวิโต พหุลีกโต
อาสวานํ ขยาย สํวตฺตตีติ ฯ (วิตฺถาโร) ฯ เอวํ ภาวิโต โข
ภิกฺขเว อานาปานสฺสติสมาธิ เอวํ พหุลีกโต อาสวานํ ขยาย
สํวตฺตตีติ ฯ
วคฺโค ทุติโย ฯ
ตสฺสุทฺทานํ
อิจฺฉานงฺคลํ สกํภิยํ ๑ อานนฺเท อปเร ทุเว
ภิกฺขุหิ ๒ เทฺว วุตฺตา สญฺโญชนํ อนุสยํ
อทฺธานํ อาสวกฺขยาติ ฯ
อานาปานสํยุตฺตํ นิฏฺฐิตํ ฯ
__________
#๑ ม. ยุ. … กงฺเขยฺยํ, อานนฺทา … ฯ ๒ ม. ภิกฺขู สํโยชนานุสยา, อทฺธานํ
#อาสวกฺขยนฺติ ฯ ยุ. ภิกฺขเว ภิกฺขุ เทฺว วุตฺตา ฯ
โสตาปตฺติสํยุตฺตํ
_______
เวฬุทฺวารวคฺโค ปฐโม

[๑๔๑๑] สาวตฺถิยํ ฯ ตตฺร โข ภควา เอตทโวจ กิญฺจาปิ
ภิกฺขเว ราชา จกฺกวตฺติ จตุนฺนํ ทีปานํ อิสฺสริยาธิปจฺจํ รชฺชํ
กาเรตฺวา กายสฺส เภทา ปรํ มรณา สุคตึ สคฺคํ โลกํ อุปปชฺชติ
เทวานํ ตาวตึสานํ สหพฺยตํ ฯ โส ตตฺถ นนฺทนวเน อจฺฉราสงฺฆปริวุโต
ทิพฺเพหิ [๑] ปญฺจหิ กามคุเณหิ สมปฺปิโต สมงฺคิภูโต
ปริจาเรติ ฯ โส จตูหิ ธมฺเมหิ สมนฺนาคโต ฯ อถ โข โส
อปริมุตฺโต จ ๒ นิรยา อปริมุตฺโต จ ๓ ติรจฺฉานโยนิยา อปริมุตฺโต
จ ๔ ปิตฺติวิสยา อปริมุตฺโต จ ๕ อปายทุคฺคติวินิปาตา ฯ

[๑๔๑๒] กิญฺจาปิ ภิกฺขเว อริยสาวโก ปิณฺฑิยาโลเปน ยาเปติ
นนฺตกานิปิ ๖ ธาเรติ ฯ โส จตูหิ ธมฺเมหิ สมนฺนาคโต ฯ อถ โข
โส ปริมุตฺโต จ ๗ นิรยา ปริมุตฺโต จ ๘ ติรจฺฉานโยนิยา ปริมุตฺโต จ ๙-
ปิตฺติวิสยา ปริมุตฺโต จ ๑๐- อปายทุคฺคติวินิปาตา ฯ กตเมหิ จตูหิ ฯ
อิธ ภิกฺขเว อริยสาวโก พุทฺเธ อเวจฺจปฺปสาเทน สมนฺนาคโต โหติ
อิติปิ โส ภควา อรหํ สมฺมาสมฺพุทฺโธ วิชฺชาจรณสมฺปนฺโน สุคโต
โลกวิทู อนุตฺตโร ปุริสทมฺมสารถิ สตฺถา เทวมนุสฺสานํ พุทฺโธ
#๑ ม. ยุ. จ ฯ ๒ โป. ม. ว ฯ ๓-๔-๕-๗-๘-๙-๑๐ โป. ม. จสทฺโท
#นตฺถิ ฯ ๖ ม. ยุ. นนฺตกานิ จ ฯ
ภควาติ ฯ ธมฺเม อเวจฺจปฺปสาเทน สมนฺนาคโต โหติ สฺวากฺขาโต
ภควตา ธมฺโม สนฺทิฏฺฐิโก อกาลิโก เอหิปสฺสิโก โอปนยิโก ปจฺจตฺตํ
เวทิตพฺโพ วิญฺญูหีติ ฯ สงฺเฆ อเวจฺจปฺปสาเทน สมนฺนาคโต โหติ
สุปฏิปนฺโน ภควโต สาวกสงฺโฆ อุชุปฏิปนฺโน ภควโต สาวกสงฺโฆ
ญายปฏิปนฺโน ภควโต สาวกสงฺโฆ สามีจิปฏิปนฺโน ภควโต สาวกสงฺโฆ ฯ
ยทิทํ จตฺตาริ ปุริสยุคานิ อฏฺฐ ปุริสปุคฺคลา เอส
ภควโต สาวกสงฺโฆ อาหุเนยฺโย ปาหุเนยฺโย ทกฺขิเณยฺโย อญฺชลิกรณีโย
อนุตฺตรํ ปุญฺญกฺเขตฺตํ โลกสฺสาติ ฯ อริยกนฺเตหิ สีเลหิ
สมนฺนาคโต โหติ อกฺขณฺเฑหิ อจฺฉิทฺเทหิ อสพเลหิ อกมฺมาเสหิ
ภุชิสฺเสหิ วิญฺญูปสตฺเถหิ อปรามฏฺเฐหิ สมาธิสํวตฺตนิเกหิ ฯ อิเมหิ
จตูหิ ธมฺเมหิ สมนฺนาคโต โหติ ฯ

[๑๔๑๓] โย จ ภิกฺขเว จตุนฺนํ ทีปานํ ปฏิลาโภ โย จ ๑
จตุนฺนํ ธมฺมานํ ปฏิลาโภ จตุนฺนํ ทีปานํ ปฏิลาโภ จตุนฺนํ
ธมฺมานํ ปฏิลาภสฺส กลํ นาคฺฆติ โสฬสินฺติ ฯ