[๖๒๒] อนาปตฺติ อาทิยิตฺวา ปริภุญฺชติ กปฺโป นฏฺโฐ โหติ
กปฺปกโตกาโส ชิณฺโณ โหติ กปฺปกเตน อกปฺปกตํ สํสิพฺพิตํ โหติ
อคฺคเฬ อนุวาเต ปริภณฺเฑ อุมฺมตฺตกสฺส อาทิกมฺมิกสฺสาติ ฯ
อฏฺฐมสิกฺขาปทํ นิฏฺฐิตํ ฯ
_____________
# ๑ ม. ยุ. กาฬสามกํ ฯ
นวมสิกฺขาปทํ

[๖๒๓] เตน สมเยน พุทฺโธ ภควา สาวตฺถิยํ วิหรติ เชตวเน
อนาถปิณฺฑิกสฺส อาราเม ฯ เตน โข ปน สมเยน อายสฺมา
อุปนนฺโท สกฺยปุตฺโต ภาตุโน สทฺธิวิหาริกสฺส ภิกฺขุโน สามํ
จีวรํ วิกปฺเปตฺวา อปจฺจุทฺธารกํ ๑ ปริภุญฺชติ ฯ อถโข โส ภิกฺขุ
ภิกฺขูนํ เอตมตฺถํ อาโรเจสิ อยํ อาวุโส อายสฺมา อุปนนฺโท
สกฺยปุตฺโต มยฺหํ สามํ จีวรํ วิกปฺเปตฺวา อปจฺจุทฺธารกํ
ปริภุญฺชตีติ ฯ เย เต ภิกฺขู อปฺปิจฺฉา ฯเปฯ เต อุชฺฌายนฺติ
ขียนฺติ วิปาเจนฺติ กถํ หิ นาม อายสฺมา อุปนนฺโท สกฺยปุตฺโต
ภิกฺขุสฺส สามํ จีวรํ วิกปฺเปตฺวา อปจฺจุทฺธารกํ ปริภุญฺชิสฺสตีติ
ฯเปฯ สจฺจํ กิร ตฺวํ อุปนนฺท ภิกฺขุสฺส สามํ จีวรํ วิกปฺเปตฺวา
อปจฺจุทฺธารกํ ปริภุญฺชสีติ ฯ สจฺจํ ภควาติ ฯ วิครหิ พุทฺโธ
ภควา กถํ หิ นาม ตฺวํ โมฆปุริส ภิกฺขุสฺส สามํ จีวรํ
วิกปฺเปตฺวา อปจฺจุทฺธารกํ ปริภุญฺชิสฺสสิ เนตํ โมฆปุริส
อปฺปสนฺนานํ วา ปสาทาย ปสนฺนานํ วา ภิยฺโยภาวาย ฯเปฯ
เอวญฺจ ปน ภิกฺขเว อิมํ สิกฺขาปทํ อุทฺทิเสยฺยาถ โย ปน
ภิกฺขุ ภิกฺขุสฺส วา ภิกฺขุนิยา วา สิกฺขมานาย วา สามเณรสฺส
วา สามเณริยา วา สามํ จีวรํ วิกปฺเปตฺวา อปจฺจุทฺธารกํ
ปริภุญฺเชยฺย ปาจิตฺติยนฺติ ฯต
# ๑ ม. ยุ. อปจฺจุทฺธารณํ ฯ เอวมุปริปิ ฯ

[๖๒๔] โย ปนาติ โย ยาทิโส ฯเปฯ ภิกฺขูติ ฯเปฯ อยํ
อิมสฺมึ อตฺเถ อธิปฺเปโต ภิกฺขูติ ฯ ภิกฺขุสฺสาติ อญฺญสฺส ภิกฺขุสฺส ฯ
ภิกฺขุนี นาม อุภโตสงฺเฆ อุปสมฺปนฺนา ฯ สิกฺขมานา นาม เทฺว
วสฺสานิ ฉสุ ธมฺเมสุ สิกฺขิตสิกฺขา ฯ สามเณโร นาม
ทสสิกฺขาปทิโก ฯ สามเณรี นาม ทสสิกฺขาปทิกา ฯ สามนฺติ สยํ
วิกปฺเปตฺวา ฯ จีวรํ นาม ฉนฺนํ จีวรานํ อญฺญตรํ จีวรํ วิกปฺปนุปคํ
ปจฺฉิมํ ฯ วิกปฺปนํ นาม เทฺว วิกปฺปนา สมฺมุขาวิกปฺปนา จ
ปรมฺมุขาวิกปฺปนา จ ฯ สมฺมุขาวิกปฺปนา นาม อิมํ จีวรํ ตุยฺหํ
วิกปฺเปมิ อิตฺถนฺนามสฺส วาติ ฯ ปรมฺมุขาวิกปฺปนา นาม อิมํ
จีวรํ วิกปฺปนตฺถาย ตุยฺหํ ทมฺมีติ ฯ เตน วตฺตพฺโพ โก เต
มิตฺโต วา สนฺทิฏฺโฐ วาติ ฯ อิตฺถนฺนาโม จ อิตฺถนฺนาโม จาติ ฯ
เตน วตฺตพฺโพ อหํ เตสํ ทมฺมิ เตสํ สนฺตกํ ปริภุญฺช วา
วิสฺสชฺเชหิ วา ยถาปจฺจยํ วา กโรหีติ ฯ อปจฺจุทฺธารกํ นาม
ตสฺส วา อทินฺนํ ตสฺส วา อวิสฺสาเสนฺโต ๑ ปริภุญฺชติ อาปตฺติ
ปาจิตฺติยสฺส ฯ

[๖๒๕] อปจฺจุทฺธารเก อปจฺจุทฺธารกสญฺญี ปริภุญฺชติ อาปตฺติ
ปาจิตฺติยสฺส ฯ อปจฺจุทฺธารเก เวมติโก ปริภุญฺชติ อาปตฺติ
ปาจิตฺติยสฺส ฯ อปจฺจุทฺธารเก ปจฺจุทฺธารกสญฺญี ปริภุญฺชติ
อาปตฺติ ปาจิตฺติยสฺส ฯ อธิฏฺเฐติ วา วิสฺสชฺเชติ วา อาปตฺติ
ทุกฺกฏสฺส ฯ ปจฺจุทฺธารเก อปจฺจุทฺธารกสญฺญี อาปตฺติ
# ๑ ม. อวิสฺสสนฺโต ฯ
ทุกฺกฏสฺส ฯ ปจฺจุทฺธารเก เวมติโก อาปตฺติ ทุกฺกฏสฺส ฯ
ปจฺจุทฺธารเก ปจฺจุทฺธารกสญฺญี อนาปตฺติ ฯ

[๖๒๖] อนาปตฺติ โส วา เทติ ตสฺส วา วิสฺสาเสนฺโต ๑
ปริภุญฺชติ อุมฺมตฺตกสฺส อาทิกมฺมิกสฺสาติ ฯ
นวมสิกฺขาปทํ นิฏฺฐิตํ ฯ
_____________
# ๑ ม. วิสฺสสนฺโต ฯ
ทสมสิกฺขาปทํ

[๖๒๗] เตน สมเยน พุทฺโธ ภควา สาวตฺถิยํ วิหรติ เชตวเน
อนาถปิณฺฑิกสฺส อาราเม ฯ เตน โข ปน สมเยน สตฺตรสวคฺคิยา
ภิกฺขู อสนฺนิหิตปริกฺขารา โหนฺติ ฯ ฉพฺพคฺคิยา ภิกฺขู สตฺตรสวคฺคิยานํ
ภิกฺขูนํ ปตฺตํปิ จีวรํปิ อปนิเธนฺติ ฯ สตฺตรสวคฺคิยา
ภิกฺขู ฉพฺพคฺคิเย ภิกฺขู เอตทโวจุํ เทถาวุโส อมฺหากํ ปตฺตํปิ
จีวรํปีติ ฯ ฉพฺพคฺคิยา ภิกฺขู หสนฺติ ฯ เต โรทนฺติ ฯ ภิกฺขู
เอวมาหํสุ กิสฺส ตุเมฺห อาวุโส โรทถาติ ฯ อิเม อาวุโส
ฉพฺพคฺคิยา ภิกฺขู อมฺหากํ ปตฺตํปิ จีวรํปิ อปนิเธนฺตีติ ฯ เย เต
ภิกฺขู อปฺปิจฺฉา ฯเปฯ เต อุชฺฌายนฺติ ขียนฺติ วิปาเจนฺติ กถํ
หิ นาม ฉพฺพคฺคิยา ภิกฺขู ภิกฺขูนํ ปตฺตํปิ จีวรํปิ อปนิเธสฺสนฺตีติ
ฯเปฯ สจฺจํ กิร ตุเมฺห ภิกฺขเว ภิกฺขูนํ ปตฺตํปิ จีวรํปิ อปนิเธถาติ ฯ
สจฺจํ ภควาติ ฯ วิครหิ พุทฺโธ ภควา กถํ หิ นาม
ตุเมฺห โมฆปุริสา ภิกฺขูนํ ปตฺตํปิ จีวรํปิ อปนิเธสฺสถ เนตํ
โมฆปุริสา อปฺปสนฺนานํ วา ปสาทาย ปสนฺนานํ วา ภิยฺโยภาวาย
ฯเปฯ เอวญฺจ ปน ภิกฺขเว อิมํ สิกฺขาปทํ อุทฺทิเสยฺยาถ โย
ปน ภิกฺขุ ภิกฺขุสฺส ปตฺตํ วา จีวรํ วา นิสีทนํ วา สูจิฆรํ วา
กายพนฺธนํ วา อปนิเธยฺย วา อปนิธาเปยฺย วา อนฺตมโส
หสฺสาเปกฺโขปิ ๑ ปาจิตฺติยนฺติ ฯ
# ๑ ม. หสาเปกฺโขปิ ฯ ยุ. หาสาเปกฺโขปิ ฯ เอวมุปริปิ ฯ

[๖๒๘] โย ปนาติ โย ยาทิโส ฯเปฯ ภิกฺขูติ ฯเปฯ อยํ
อิมสฺมึ อตฺเถ อธิปฺเปโต ภิกฺขูติ ฯ ภิกฺขุสฺสาติ อญฺญสฺส ภิกฺขุสฺส ฯ
ปตฺโต นาม เทฺว ปตฺตา อโยปตฺโต มตฺติกาปตฺโต ฯ จีวรํ
นาม ฉนฺนํ จีวรานํ อญฺญตรํ จีวรํ วิกปฺปนุปคํ ปจฺฉิมํ ฯ
นิสีทนํ นาม สทสํ วุจฺจติ ฯ สูจิฆรํ นาม สสูจิกํ วา อสูจิกํ
วา ฯ กายพนฺธนํ นาม เทฺว กายพนฺธนานิ ปฏฺฏิกํ ๑ สูกรนฺตกํ ฯ
อปนิเธยฺยาติ สยํ อปนิเธติ อาปตฺติ ปาจิตฺติยสฺส ฯ อปนิธาเปยฺยาติ
อญฺญํ อาณาเปติ อาปตฺติ ปาจิตฺติยสฺส ฯ สกึ อาณตฺโต
พหุกํปิ อปนิเธติ อาปตฺติ ปาจิตฺติยสฺส ฯ อนฺตมโส
หสฺสาเปกฺโขปีติ กีฬาธิปฺปาโย ฯ

[๖๒๙] อุปสมฺปนฺเน อุปสมฺปนฺนสญฺญี ปตฺตํ วา จีวรํ วา
นิสีทนํ วา สูจิฆรํ วา กายพนฺธนํ วา อปนิเธติ วา อปนิธาเปติ วา
อนฺตมโส หสฺสาเปกฺโขปิ อาปตฺติ ปาจิตฺติยสฺส ฯ อุปสมฺปนฺเน
เวมติโก ปตฺตํ วา จีวรํ วา นิสีทนํ วา สูจิฆรํ วา กายพนฺธนํ
วา อปนิเธติ วา อปนิธาเปติ วา อนฺตมโส หสฺสาเปกฺโขปิ
อาปตฺติ ปาจิตฺติยสฺส ฯ อุปสมฺปนฺเน อนุปสมฺปนฺนสญฺญี ปตฺตํ
วา จีวรํ วา นิสีทนํ วา สูจิฆรํ วา กายพนฺธนํ วา อปนิเธติ
วา อปนิธาเปติ วา อนฺตมโส หสฺสาเปกฺโขปิ อาปตฺติ
ปาจิตฺติยสฺส ฯ อญฺญํ ปริกฺขารํ อปนิเธติ วา อปนิธาเปติ วา อนฺตมโส
หสฺสาเปกฺโขปิ อาปตฺติ ทุกฺกฏสฺส ฯ อนุปสมฺปนฺนสฺส ปตฺตํ วา
# ๑ ม. ปฏฺฏิกา ฯ
จีวรํ วา อญฺญํ วา ปริกฺขารํ อปนิเธติ วา อปนิธาเปติ วา
อนฺตมโส หสฺสาเปกฺโขปิ อาปตฺติ ทุกฺกฏสฺส ฯ อนุปสมฺปนฺเน
อุปสมฺปนฺนสญฺญี อาปตฺติ ทุกฺกฏสฺส ฯ อนุปสมฺปนฺเน เวมติโก
อาปตฺติ ทุกฺกฏสฺส ฯ อนุปสมฺปนฺเน อนุปสมฺปนฺนสญฺญี อาปตฺติ
ทุกฺกฏสฺส ฯ

[๖๓๐] อนาปตฺติ น หสฺสาธิปฺปาโย ทุนฺนิกฺขิตฺตํ ปฏิสาเมติ
ธมฺมึ กถํ กตฺวา ทสฺสามีติ ปฏิสาเมติ อุมฺมตฺตกสฺส
อาทิกมฺมิกสฺสาติ ฯ
ทสมสิกฺขาปทํ นิฏฺฐิตํ ฯ
สุราปานวคฺโค ฉฏฺโฐ ฯ
__________________
ตสฺสุทฺทานํ
สุรา องฺคุลิ หาโส จ ๑ อนาทริยญฺจ ภึสนา ๒
โชติ นฺหานทุพฺพณฺณํ สามํ อปนิเธน จาติ ฯ
__________________
# ๑ โตยญฺจ ฯ อิติปิ ปาโฐ ฯ ๒ ม. ภึสนํ ฯ
สปฺปาณกวคฺคสฺส ปฐมสิกฺขาปทํ

[๖๓๑] เตน สมเยน พุทฺโธ ภควา สาวตฺถิยํ วิหรติ เชตวเน
อนาถปิณฺฑิกสฺส อาราเม ฯ เตน โข ปน สมเยน อายสฺมา
อุทายิ อิสฺสาโส โหติ ฯ กากา จสฺส อมนาปา โหนฺติ ฯ โส
กาเก วิชฺฌิตฺวา [๑] สีสํ ฉินฺทิตฺวา สูเล ปฏิปาฏิยา ฐเปสิ ฯ ภิกฺขู
เอวมาหํสุ เกนิเม อาวุโส กากา ชีวิตา โวโรปิตาติ ฯ มยา
อาวุโส อมนาปา เม กากาติ ฯ เย เต ภิกฺขู อปฺปิจฺฉา
ฯเปฯ เต อุชฺฌายนฺติ ขียนฺติ วิปาเจนฺติ กถํ หิ นาม อายสฺมา
อุทายิ สญฺจิจฺจ ปาณํ ชีวิตา โวโรเปสฺสตีติ ฯเปฯ สจฺจํ กิร
ตฺวํ อุทายิ สญฺจิจฺจ ปาณํ ชีวิตา โวโรเปสีติ ฯ สจฺจํ ภควาติ ฯ
วิครหิ พุทฺโธ ภควา กถํ หิ นาม ตฺวํ โมฆปุริส สญฺจิจฺจ
ปาณํ ชีวิตา โวโรเปสฺสสิ เนตํ โมฆปุริส อปฺปสนฺนานํ วา
ปสาทาย ปสนฺนานํ วา ภิยฺโยภาวาย ฯเปฯ เอวญฺจ ปน
ภิกฺขเว อิมํ สิกฺขาปทํ อุทฺทิเสยฺยาถ โย ปน ภิกฺขุ สญฺจิจฺจ
ปาณํ ชีวิตา โวโรเปยฺย ปาจิตฺติยนฺติ ฯ