[๖๐๒] อนุปสมฺปนฺเน อุปสมฺปนฺนสญฺญี อาปตฺติ ทุกฺกฏสฺส ฯ
อนุปสมฺปนฺเน เวมติโก อาปตฺติ ทุกฺกฏสฺส ฯ อนุปสมฺปนฺเน
อนุปสมฺปนฺนสญฺญี อาปตฺติ ทุกฺกฏสฺส ฯ

[๖๐๓] อนาปตฺติ น ภึสาเปตุกาโม รูปํ วา สทฺทํ วา
คนฺธํ วา รสํ วา โผฏฺฐพฺพํ วา อุปสํหรติ โจรกนฺตารํ วา
วาฬกนฺตารํ วา ปิสาจกนฺตารํ วา อาจิกฺขติ อุมฺมตฺตกสฺส
อาทิกมฺมิกสฺสาติ ฯ
ปญฺจมสิกฺขาปทํ นิฏฺฐิตํ ฯ
_____________
# ๑ ม. อยํ ปาโฐ นตฺถิ ฯ
ฉฏฺฐสิกฺขาปทํ

[๖๐๔] เตน สมเยน พุทฺโธ ภควา ภคฺเคสุ วิหรติ สุสุมารคิเร
เภสกลาวเน มิคทาเย ฯ เตน โข ปน สมเยน ภิกฺขู เหมนฺติเก
มาเส อญฺญตรํ มหนฺตํ สุสิรกฏฺฐํ โชตึ สมาทหิตฺวา วิสิพฺเพสุํ ฯ
ตสฺมึ จ สุสิเร กณฺหสปฺโป อคฺคินา สนฺตตฺโต นิกฺขมิตฺวา ภิกฺขู
ปริปาเตสิ ฯ ภิกฺขู ตหึ ตหึ ปธาวึสุ ฯ เย เต ภิกฺขู
อปฺปิจฺฉา ฯเปฯ เต อุชฺฌายนฺติ ขียนฺติ วิปาเจนฺติ กถํ หิ นาม
ภิกฺขู โชตึ สมาทหิตฺวา วิสิพฺเพสฺสนฺตีติ ฯเปฯ สจฺจํ กิร ภิกฺขเว
ภิกฺขู โชตึ สมาทหิตฺวา วิสิพฺเพนฺตีติ ฯ สจฺจํ ภควาติ ฯ วิครหิ
พุทฺโธ ภควา กถํ หิ นาม เต ภิกฺขเว โมฆปุริสา โชตึ
สมาทหิตฺวา วิสิพฺเพสฺสนฺติ เนตํ ภิกฺขเว อปฺปสนฺนานํ วา
ปสาทาย ปสนฺนานํ วา ภิยฺโยภาวาย ฯเปฯ เอวญฺจ ปน
ภิกฺขเว อิมํ สิกฺขาปทํ อุทฺทิเสยฺยาถ โย ปน ภิกฺขุ
วิสีวนาเปกฺโข ๑ โชตึ สมาทเหยฺย วา สมาทหาเปยฺย วา
ปาจิตฺติยนฺติ ฯ เอวญฺจิทํ ภควตา ภิกฺขูนํ สิกฺขาปทํ ปญฺญตฺตํ โหติ ฯ

[๖๐๕] เตน โข ปน สมเยน ภิกฺขู คิลานา โหนฺติ ฯ
คิลานปุจฺฉกา ภิกฺขู คิลาเน ภิกฺขู เอตทโวจุํ กจฺจาวุโส ขมนียํ
กจฺจิ ยาปนียนฺติ ฯ ปุพฺเพ มยํ อาวุโส โชตึ สมาทหิตฺวา วิสิพฺเพม
# ๑ ม. ยุ. วิสิพฺพนาเปกฺโข ฯ เอวมุปริปิ ฯ
เตน โน ผาสุ โหติ อิทานิ ปน ภควตา ปฏิกฺขิตฺตนฺติ
กุกฺกุจฺจายนฺตา น วิสิพฺเพม เตน โน น ผาสุ โหตีติ ฯ ภควโต
เอตมตฺถํ อาโรเจสุํ ฯ อนุชานามิ ภิกฺขเว คิลาเนน ภิกฺขุนา โชตึ
สมาทหิตฺวา วา สมาทหาเปตฺวา วา วิสิพฺเพตุํ เอวญฺจ ปน ภิกฺขเว
อิมํ สิกฺขาปทํ อุทฺทิเสยฺยาถ โย ปน ภิกฺขุ อคิลาโน วิสีวนาเปกฺโข
โชตึ สมาทเหยฺย วา สมาทหาเปยฺย วา ปาจิตฺติยนฺติ ฯ
เอวญฺจิทํ ภควตา ภิกฺขูนํ สิกฺขาปทํ ปญฺญตฺตํ โหติ ฯ

[๖๐๖] เตน โข ปน สมเยน ภิกฺขู ปทีเปปิ โชติเกปิ
ชนฺตาฆเรปิ กุกฺกุจฺจายนฺติ ๑ ฯ ภควโต เอตมตฺถํ อาโรเจสุํ ฯ
อนุชานามิ ภิกฺขเว ตถารูปปจฺจยา โชตึ สมาทหิตุํ สมาทหาเปตุํ
เอวญฺจ ปน ภิกฺขเว อิมํ สิกฺขาปทํ อุทฺทิเสยฺยาถ โย ปน ภิกฺขุ
อคิลาโน วิสีวนาเปกฺโข โชตึ สมาทเหยฺย วา สมาทหาเปยฺย วา
อญฺญตฺร ตถารูปปจฺจยา ปาจิตฺติยนฺติ ฯ

[๖๐๗] โย ปนาติ โย ยาทิโส ฯเปฯ ภิกฺขูติ ฯเปฯ อยํ
อิมสฺมึ อตฺเถ อธิปฺเปโต ภิกฺขูติ ฯ อคิลาโน นาม ยสฺส วินา
อคฺคินา ผาสุ โหติ ฯ คิลาโน นาม ยสฺส วินา อคฺคินา น
ผาสุ โหติ ฯ วิสีวนาเปกฺโขติ ตปฺปิตุกาโม ฯ โชติ นาม อคฺคิ
วุจฺจติ ฯ สมาทเหยฺยาติ สยํ สมาทหติ อาปตฺติ ปาจิตฺติยสฺส ฯ
# ๑ ยุ. เตน โข ปน สมเยน ภิกฺขู น ปทีเปสุํ โชติเกปิ ชนฺตาฆเรปิ กุกฺกุจฺจายนฺตา ฯ
สมาทหาเปยฺยาติ อญฺญํ อาณาเปติ อาปตฺติ ปาจิตฺติยสฺส ฯ
สกึ อาณตฺโต พหุกํปิ สมาทหติ อาปตฺติ ปาจิตฺติยสฺส ฯ
อญฺญตฺร ตถารูปปจฺจยาติ ฐเปตฺวา ตถารูปปจฺจยํ ฯ

[๖๐๘] อคิลาโน อคิลานสญฺญี วิสีวนาเปกฺโข โชตึ สมาทหติ
วา สมาทหาเปติ วา อญฺญตฺร ตถารูปปจฺจยา อาปตฺติ
ปาจิตฺติยสฺส ฯ อคิลาโน เวมติโก วิสีวนาเปกฺโข โชตึ สมาทหติ วา
สมาทหาเปติ วา อญฺญตฺร ตถารูปปจฺจยา อาปตฺติ ปาจิตฺติยสฺส ฯ
อคิลาโน คิลานสญฺญี วิสีวนาเปกฺโข โชตึ สมาทหติ วา สมาทหาเปติ
วา อญฺญตฺร ตถารูปปจฺจยา อาปตฺติ ปาจิตฺติยสฺส ฯ ปฏิลาตํ
อุกฺขิปติ อาปตฺติ ทุกฺกฏสฺส ฯ คิลาโน อคิลานสญฺญี อาปตฺติ
ทุกฺกฏสฺส ฯ คิลาโน เวมติโก อาปตฺติ ทุกฺกฏสฺส ฯ คิลาโน
คิลานสญฺญี อนาปตฺติ ฯ

[๖๐๙] อนาปตฺติ คิลานสฺส อญฺเญน กตํ วิสิพฺเพติ
วีตจฺฉิตงฺคารํ ๑ วิสิพฺเพติ ปทีเปปิ ๒ โชติเกปิ ๓ ชนฺตาฆเรปิ ๔
ตถารูปปจฺจยา อาปทาสุ อุมฺมตฺตกสฺส อาทิกมฺมิกสฺสาติ ฯ
ฉฏฺฐสิกฺขาปทํ นิฏฺฐิตํ ฯ
_____________
# ๑ ม. วีตจฺจิตงฺคารํ ฯ ๒-๓-๔ ม. ปิสทฺโท นตฺถิ ฯ
สตฺตมสิกฺขาปทํ

[๖๑๐] เตน สมเยน พุทฺโธ ภควา ราชคเห วิหรติ เวฬุวเน
กลนฺทกนิวาเป ฯ เตน โข ปน สมเยน ภิกฺขู ตโปเท นฺหายนฺติ ฯ
อถโข ๑ ราชา มาคโธ เสนิโย พิมฺพิสาโร สีสํ นฺหายิสฺสามีติ
ตโปทํ คนฺตฺวา ยาว อยฺยา นฺหายนฺตีติ เอกมนฺตํ ปฏิมาเนสิ ฯ
ภิกฺขู ยาว สมนฺธการา นฺหายึสุ ฯ อถโข ราชา มาคโธ เสนิโย
พิมฺพิสาโร วิกาเล สีสํ นฺหายิตฺวา นครทฺวาเร ถกฺกิเต ๒ พหินคเร
วสิตฺวา กาลสฺเสว อสมฺภินฺเนน วิเลปเนน เยน ภควา
เตนุปสงฺกมิ อุปสงฺกมิตฺวา ภควนฺตํ อภิวาเทตฺวา เอกมนฺตํ นิสีทิ ฯ
เอกมนฺตํ นิสินฺนํ โข ราชานํ มาคธํ เสนิยํ พิมฺพิสารํ ภควา
เอตทโวจ กิสฺส ตฺวํ มหาราช กาลสฺเสว อาคโต อสมฺภินฺเนน
วิเลปเนนาติ ฯ อถโข ราชา มาคโธ เสนิโย พิมฺพิสาโร ภควโต
เอตมตฺถํ อาโรเจสิ ฯ อถโข ภควา ราชานํ มาคธํ เสนิยํ พิมฺพิสารํ
ธมฺมิยา กถาย สนฺทสฺเสสิ สมาทเปสิ สมุตฺเตเชสิ สมฺปหํเสสิ ฯ
อถโข ราชา มาคโธ เสนิโย พิมฺพิสาโร ภควตา ธมฺมิยา กถาย
สนฺทสฺสิโต สมาทปิโต สมุตฺเตชิโต สมฺปหํสิโต อุฏฺฐายาสนา
ภควนฺตํ อภิวาเทตฺวา ปทกฺขิณํ กตฺวา ปกฺกามิ ฯ อถโข ภควา
เอตสฺมึ นิทาเน เอตสฺมึ ปกรเณ ภิกฺขุสงฺฆํ สนฺนิปาตาเปตฺวา
ภิกฺขู ปฏิปุจฺฉิ สจฺจํ กิร ภิกฺขเว ภิกฺขู ราชานํปิ ปสฺสิตฺวา น
# ๑ ม. ยุ. เตน โข ปน สมเยน ฯ ๒ ม. ถกิเต ฯ
มตฺตํ ชานิตฺวา นฺหายนฺตีติ ฯ สจฺจํ ภควาติ ฯ วิครหิ พุทฺโธ
ภควา กถํ หิ นาม เต ภิกฺขเว โมฆปุริสา ราชานํปิ ปสฺสิตฺวา
น มตฺตํ ชานิตฺวา นฺหายิสฺสนฺติ เนตํ ภิกฺขเว อปฺปสนฺนานํ วา
ปสาทาย ปสนฺนานํ วา ภิยฺโยภาวาย ฯเปฯ เอวญฺจ ปน
ภิกฺขเว อิมํ สิกฺขาปทํ อุทฺทิเสยฺยาถ โย ปน ภิกฺขุ โอเรนฑฺฒมาสํ ๑
นฺหาเยยฺย ปาจิตฺติยนฺติ ฯ เอวญฺจิทํ ภควตา ภิกฺขูนํ สิกฺขาปทํ
ปญฺญตฺตํ โหติ ฯ

[๖๑๑] เตน โข ปน สมเยน ภิกฺขู อุณฺหสมเย ปริฬาหสมเย
กุกฺกุจฺจายนฺตา น นฺหายนฺติ เสทคเตน คตฺเตน สยนฺติ ฯ จีวรํปิ
เสนาสนํปิ ทุสฺสติ ฯ ภควโต เอตมตฺถํ อาโรเจสุํ ฯ อนุชานามิ
ภิกฺขเว อุณฺหสมเย ปริฬาหสมเย โอเรนฑฺฒมาสํ นฺหายิตุํ เอวญฺจ
ปน ภิกฺขเว อิมํ สิกฺขาปทํ อุทฺทิเสยฺยาถ โย ปน ภิกฺขุ
โอเรนฑฺฒมาสํ นฺหาเยยฺย อญฺญตฺร สมยา ปาจิตฺติยํ ฯ ตตฺถายํ
สมโย ทิยฑฺโฒ มาโส เสโส คิมฺหานนฺติ วสฺสานสฺส ปฐโม
มาโส อิจฺเจเต อฑฺฒเตยฺยมาสา อุณฺหสมโย ปริฬาหสมโย
อยํ ตตฺถ สมโยติ ฯ เอวญฺจิทํ ภควตา ภิกฺขูนํ สิกฺขาปทํ
ปญฺญตฺตํ โหติ ฯ