[๕๙๒] เตน สมเยน พุทฺโธ ภควา โกสมฺพิยํ วิหรติ
โฆสิตาราเม ฯ เตน โข ปน สมเยน อายสฺมา ฉนฺโน อนาจารํ
อาจรติ ฯ ภิกฺขู เอวมาหํสุ มา อาวุโส ฉนฺน เอวรูปํ อกาสิ
เนตํ กปฺปตีติ ฯ โส อนาทริยํ ปฏิจฺจ กโรติเยว ฯ เย เต ภิกฺขู
อปฺปิจฺฉา ฯเปฯ เต อุชฺฌายนฺติ ขียนฺติ วิปาเจนฺติ กถํ หิ
นาม อายสฺมา ฉนฺโน อนาทริยํ กริสฺสตีติ ฯเปฯ สจฺจํ กิร
ตฺวํ ฉนฺน อนาทริยํ กโรสีติ ฯ สจฺจํ ภควาติ ฯ วิครหิ พุทฺโธ
ภควา กถํ หิ นาม ตฺวํ โมฆปุริส อนาทริยํ กริสฺสสิ เนตํ
โมฆปุริส อปฺปสนฺนานํ วา ปสาทาย ปสนฺนานํ วา ภิยฺโยภาวาย ฯเปฯ
เอวญฺจ ปน ภิกฺขเว อิมํ สิกฺขาปทํ อุทฺทิเสยฺยาถ อนาทริเย
ปาจิตฺติยนฺติ ฯ

[๕๙๓] อนาทริยํ นาม เทฺว อนาทริยานิ ปุคฺคลานาทริยญฺจ
ธมฺมานาทริยญฺจ ฯ ปุคฺคลานาทริยํ นาม อุปสมฺปนฺเนน ปญฺญตฺเตน
วุจฺจมาโน อยํ อุกฺขิตฺโต ๑ วา วมฺภิโต วา ครหิโต วา อิมสฺส
วจนํ อกตํ ภวิสฺสตีติ ฯ อนาทริยํ กโรติ อาปตฺติ ปาจิตฺติยสฺส ฯ
ธมฺมานาทริยํ นาม อุปสมฺปนฺเนน ปญฺญตฺเตน วุจฺจมาโน กถายํ
นสฺเสยฺย วา วินสฺเสยฺย วา อนฺตรธาเยยฺย วาติ ตํ วา น
สิกฺขิตุกาโม อนาทริยํ กโรติ อาปตฺติ ปาจิตฺติยสฺส ฯ
# ๑ ม. อุกฺขิตฺตโก ฯ

[๕๙๔] อุปสมฺปนฺเน อุปสมฺปนฺนสญฺญี อนาทริยํ กโรติ
อาปตฺติ ปาจิตฺติยสฺส ฯ อุปสมฺปนฺเน เวมติโก อนาทริยํ กโรติ
อาปตฺติ ปาจิตฺติยสฺส ฯ อุปสมฺปนฺเน อนุปสมฺปนฺนสญฺญี อนาทริยํ
กโรติ อาปตฺติ ปาจิตฺติยสฺส ฯ

[๕๙๕] อุปสมฺปนฺเนน ๑ อปฺปญฺญตฺเตน วุจฺจมาโน อิทํ น
สลฺเลขาย น ธูตตฺตาย ๒ น ปาสาทิกตาย น อปจยาย น
วิริยารมฺภาย สํวตฺตตีติ อนาทริยํ กโรติ อาปตฺติ ทุกฺกฏสฺส ฯ
อนุปสมฺปนฺเนน ปญฺญตฺเตน วา อปฺปญฺญตฺเตน วา วุจฺจมาโน
อิทํ น สลฺเลขาย น ธูตตฺตาย น ปาสาทิกตาย น อปจยาย น
วิริยารมฺภาย สํวตฺตตีติ อนาทริยํ กโรติ อาปตฺติ ทุกฺกฏสฺส ฯ

[๕๙๖] อนุปสมฺปนฺเน อุปสมฺปนฺนสญฺญี อาปตฺติ ทุกฺกฏสฺส ฯ
อนุปสมฺปนฺเน เวมติโก อาปตฺติ ทุกฺกฏสฺส ฯ อนุปสมฺปนฺเน
อนุปสมฺปนฺนสญฺญี อาปตฺติ ทุกฺกฏสฺส ฯ

[๕๙๗] อนาปตฺติ เอวํ อมฺหากํ อาจริยานํ อุคฺคโห
ปริปุจฺฉาติ ภณติ อุมฺมตฺตกสฺส อาทิกมฺมิกสฺสาติ ฯ
จตุตฺถสิกฺขาปทํ นิฏฺฐิตํ ฯ
___________________
# ๑ ม. อยํ ปาโฐ นตฺถิ ฯ ๒ ม. ธุตตฺตาย ฯ เอวมุปริปิ ฯ
ปญฺจมสิกฺขาปทํ

[๕๙๘] เตน สมเยน พุทฺโธ ภควา สาวตฺถิยํ วิหรติ เชตวเน
อนาถปิณฺฑิกสฺส อาราเม ฯ เตน โข ปน สมเยน ฉพฺพคฺคิยา
ภิกฺขู สตฺตรสวคฺคิเย ภิกฺขู ภึสาเปนฺติ ฯ เต ภึสาปิยมานา โรทนฺติ ฯ
ภิกฺขู เอวมาหํสุ กิสฺส ตุเมฺห อาวุโส โรทถาติ ฯ อิเม อาวุโส
ฉพฺพคฺคิยา ภิกฺขู อเมฺห ภึสาเปนฺตีติ ฯ เย เต ภิกฺขู อปฺปิจฺฉา ฯเปฯ
เต อุชฺฌายนฺติ ขียนฺติ วิปาเจนฺติ กถํ หิ นาม ฉพฺพคฺคิยา
ภิกฺขู ภิกฺขู ๑ ภึสาเปสฺสนฺตีติ ฯเปฯ สจฺจํ กิร ตุเมฺห ภิกฺขเว
ภิกฺขู ๒ ภึสาเปถาติ ฯ สจฺจํ ภควาติ ฯ วิครหิ พุทฺโธ ภควา กถํ
หิ นาม ตุเมฺห โมฆปุริสา ภิกฺขู ๓ ภึสาเปสฺสถ เนตํ โมฆปุริสา
อปฺปสนฺนานํ วา ปสาทาย ปสนฺนานํ วา ภิยฺโยภาวาย ฯเปฯ
เอวญฺจ ปน ภิกฺขเว อิมํ สิกฺขาปทํ อุทฺทิเสยฺยาถ โย ปน
ภิกฺขุ ภิกฺขุํ ภึสาเปยฺย ปาจิตฺติยนฺติ ฯ

[๕๙๙] โย ปนาติ โย ยาทิโส ฯเปฯ ภิกฺขูติ ฯเปฯ
อยํ อิมสฺมึ อตฺเถ อธิปฺเปโต ภิกฺขูติ ฯ ภิกฺขุนฺติ อญฺญํ ภิกฺขุํ ฯ
ภึสาเปยฺยาติ อุปสมฺปนฺโน อุปสมฺปนฺนํ ภึสาเปตุกาโม รูปํ วา
สทฺทํ วา คนฺธํ วา รสํ วา โผฏฺฐพฺพํ วา อุปสํหรติ ภาเยยฺย
วา โส น วา ภาเยยฺย อาปตฺติ ปาจิตฺติยสฺส ฯ โจรกนฺตารํ
วา วาฬกนฺตารํ วา ปิสาจกนฺตารํ วา อาจิกฺขติ ภาเยยฺย วา
# ๑-๒-๓ ม. ภิกฺขุํ ฯ
โส น วา ภาเยยฺย อาปตฺติ ปาจิตฺติยสฺส ฯ

[๖๐๐] อุปสมฺปนฺเน อุปสมฺปนฺนสญฺญี ภึสาเปติ อาปตฺติ
ปาจิตฺติยสฺส ฯ อุปสมฺปนฺเน เวมติโก ภึสาเปติ อาปตฺติ
ปาจิตฺติยสฺส ฯ อุปสมฺปนฺเน อนุปสมฺปนฺนสญฺญี ภึสาเปติ อาปตฺติ
ปาจิตฺติยสฺส ฯ

[๖๐๑] อุปสมฺปนฺโน ๑ อนุปสมฺปนฺนํ ภึสาเปตุกาโม รูปํ วา
สทฺทํ วา คนฺธํ วา รสํ วา โผฏฺฐพฺพํ วา อุปสํหรติ ภาเยยฺย
วา โส น วา ภาเยยฺย อาปตฺติ ทุกฺกฏสฺส ฯ โจรกนฺตารํ
วา วาฬกนฺตารํ วา ปิสาจกนฺตารํ วา อาจิกฺขติ ภาเยยฺย วา
โส น วา ภาเยยฺย อาปตฺติ ทุกฺกฏสฺส ฯ