[๗๘๔] อเสกฺโข อเสกฺโขติ อาวุโส อนุรุทฺธ วุจฺจติ กิตฺตาวตา
นุ โข อาวุโส อเสกฺโข โหตีติ ฯ จตุนฺนํ โข อาวุโส สติปฏฺฐานานํ
สมตฺตํ ภาวิตตฺตา อเสกฺโข โหติ ฯ กตเมสํ จตุนฺนํ ฯ อิธาวุโส
ภิกฺขุ กาเย กายานุปสฺสี วิหรติ อาตาปี สมฺปชาโน สติมา วิเนยฺย
โลเก อภิชฺฌาโทมนสฺสํ ฯ เวทนาสุ จิตฺเต ธมฺเมสุ ธมฺมานุปสฺสี
วิหรติ อาตาปี สมฺปชาโน สติมา วิเนยฺย โลเก อภิชฺฌาโทมนสฺสํ ฯ
อิเมสํ โข อาวุโส จตุนฺนํ สติปฏฺฐานานํ สมตฺตํ
ภาวิตตฺตา อเสกฺโข โหตีติ ฯ
[๗๘๕] ตํเยว นิทานํ ฯ เอกมนฺตํ นิสินฺโน โข อายสฺมา
สารีปุตฺโต อายสฺมนฺตํ อนุรุทฺธํ เอตทโวจ
[๗๘๖] กตเมสํ อายสฺมา อนุรุทฺโธ ๑ ธมฺมานํ ภาวิตตฺตา
พหุลีกตตฺตา มหาภิญฺญตํ ปตฺโตติ ฯ จตุนฺนํ อาวุโส สติปฏฺฐานานํ
ภาวิตตฺตา พหุลีกตตฺตา มหาภิญฺญตํ ปตฺโต ฯ กตเมสํ จตุนฺนํ ฯ
อิธาหํ อาวุโส กาเย กายานุปสฺสี วิหรามิ อาตาปี สมฺปชาโน
สติมา วิเนยฺย โลเก อภิชฺฌาโทมนสฺสํ ฯ เวทนาสุ จิตฺเต ธมฺเมสุ
ธมฺมานุปสฺสี วิหรามิ อาตาปี สมฺปชาโน สติมา วิเนยฺย โลเก
อภิชฺฌาโทมนสฺสํ ฯ อิเมสํ ขฺวาหํ อาวุโส จตุนฺนํ สติปฏฺฐานานํ
ภาวิตตฺตา พหุลีกตตฺตา มหาภิญฺญตํ ปตฺโต ฯ อิเมสํ จ ปนาหํ
อาวุโส จตุนฺนํ สติปฏฺฐานานํ ภาวิตตฺตา พหุลีกตตฺตา สหสฺสํ
#๑ ม. อาวุโส อนุรุทฺธ ฯ
โลกํ อภิชานามีติ ฯ
[๗๘๗] เอกํ สมยํ อายสฺมา อานนฺโท ราชคเห วิหรติ เวฬุวเน
กลนฺทกนิวาเป ฯ เตน โข ปน สมเยน สิริวฑฺโฒ คหปติ อาพาธิโก
โหติ ทุกฺขิโต พาฬฺหคิลาโน ฯ อถ โข สิริวฑฺโฒ คหปติ อญฺญตรํ
ปุริสํ อามนฺเตสิ เอหิ ตฺวํ อมฺโภ ปุริส เยนายสฺมา อานนฺโท
เตนุปสงฺกม อุปสงฺกมิตฺวา มม วจเนน อายสฺมโต อานนฺทสฺส
ปาเท สิรสา วนฺท สิริวฑฺโฒ ภนฺเต คหปติ อาพาธิโก ทุกฺขิโต
พาฬฺหคิลาโน โส อายสฺมโต อานนฺทสฺส ปาเท สิรสา วนฺทตีติ
เอวญฺจ วเทหิ สาธุ กิร ภนฺเต อายสฺมา อานนฺโท เยน สิริวฑฺฒสฺส
คหปติสฺส นิเวสนํ เตนุปสงฺกมตุ อนุกมฺปํ อุปาทายาติ ฯ
เอวํ ภนฺเตติ โข โส ปุริโส สิริวฑฺฒสฺส คหปติสฺส ปฏิสฺสุตฺวา
เยนายสฺมา อานนฺโท เตนุปสงฺกมิ อุปสงฺกมิตฺวา อายสฺมนฺตํ
อานนฺทํ อภิวาเทตฺวา เอกมนฺตํ นิสีทิ ฯ เอกมนฺตํ นิสินฺโน
โข โส ปุริโส อายสฺมนฺตํ อานนฺทํ เอตทโวจ สิริวฑฺโฒ
ภนฺเต คหปติ อาพาธิโก ทุกฺขิโต พาฬฺหคิลาโน โส อายสฺมโต
อานนฺทสฺส ปาเท สิรสา วนฺทติ เอวญฺจ วเทติ สาธุ กิร
ภนฺเต อายสฺมา อานนฺโท เยน สิริวฑฺฒสฺส คหปติสฺส นิเวสนํ
เตนุปสงฺกมตุ อนุกมฺปํ อุปาทายาติ ฯ อธิวาเสสิ โข อายสฺมา
อานนฺโท ตุณฺหีภาเวน ฯ
[๗๘๘] อถ โข อายสฺมา อานนฺโท ปุพฺพณฺหสมยํ ๑ นิวาเสตฺวา
#๑ ยุ. อยํ ปาโฐ นตฺถิ ฯ
ปตฺตจีวรมาทาย เยน สิริวฑฺฒสฺส คหปติสฺส นิเวสนํ เตนุปสงฺกมิ
อุปสงฺกมิตฺวา ปญฺญตฺเต อาสเน นิสีทิ ฯ นิสชฺช โข อายสฺมา
อานนฺโท สิริวฑฺฒํ คหปตึ เอตทโวจ
[๗๘๙] กจฺจิ เต คหปติ ขมนียํ กจฺจิ ยาปนียํ กจฺจิ
ทุกฺขา เวทนา ปฏิกฺกมนฺติ โน อภิกฺกมนฺติ ฯ ปฏิกฺกโมสานํ
ปญฺญายติ โน อภิกฺกโมติ ฯ น เม ภนฺเต ขมนียํ น ยาปนียํ
พาฬฺหา เม ทุกฺขา เวทนา อภิกฺกมนฺติ โน ปฏิกฺกมนฺติ
อภิกฺกโมสานํ ปญฺญายติ โน ปฏิกฺกโมติ ฯ
[๗๙๐] ตสฺมา ติห เต คหปติ เอวํ สิกฺขิตพฺพํ กาเย กายานุปสฺสี
วิหริสฺสามิ อาตาปี สมฺปชาโน สติมา วิเนยฺย โลเก อภิชฺฌาโทมนสฺสํ ฯ
เวทนาสุ จิตฺเต ธมฺเมสุ ธมฺมานุปสฺสี วิหริสฺสามิ
อาตาปี สมฺปชาโน สติมา วิเนยฺย โลเก อภิชฺฌาโทมนสฺสนฺติ ฯ
เอวญฺหิ เต คหปติ สิกฺขิตพฺพนฺติ ฯ
[๗๙๑] เยเม ภนฺเต ภควตา จตฺตาโร สติปฏฺฐานา เทสิตา
สํวิชฺชนฺติ เต ธมฺมา มยิ อหํ จ เตสุ ธมฺเมสุ สนฺทิสฺสามิ ฯ
อหญฺหิ ภนฺเต กาเย กายานุปสฺสี วิหรามิ อาตาปี สมฺปชาโน
สติมา วิเนยฺย โลเก อภิชฺฌาโทมนสฺสํ ฯ เวทนาสุ จิตฺเต ธมฺเมสุ
ธมฺมานุปสฺสี วิหรามิ อาตาปี สมฺปชาโน สติมา วิเนยฺย โลเก
อภิชฺฌาโทมนสฺสํ ฯ
[๗๙๒] ยานิ จิมานิ ภนฺเต ภควตา ปญฺโจรมฺภาคิยานิ
สญฺโญชนานิ เทสิตานิ นาหํ ภนฺเต ยงฺกิญฺจิ อตฺตนิ อปฺปหีนํ
สมนุปสฺสามีติ ฯ ลาภา เต คหปติ สุลทฺธํ เต คหปติ
อนาคามิผลนฺตยา คหปติ พฺยากตนฺติ ฯ
[๗๙๓] ตํเยว นิทานํ ฯ เตน โข ปน สมเยน มานทินฺโน
คหปติ อาพาธิโก โหติ ทุกฺขิโต พาฬฺหคิลาโน ฯ อถ โข มานทินฺโน
คหปติ อญฺญตรํ ปุริสํ อามนฺเตสิ เอหิ ตฺวํ อมฺโภ ปุริส
ฯเปฯ น เม ภนฺเต ขมนียํ น ยาปนียํ พาฬฺหา เม ทุกฺขา
เวทนา อภิกฺกมนฺติ โน ปฏิกฺกมนฺติ อภิกฺกโมสานํ ปญฺญายติ โน
อภิกฺกโมติ ฯ