[๕๐๔] กตเมสํ สตฺตนฺนํ โพชฺฌงฺคานํ ฯ สติสมฺโพชฺฌงฺคสฺส
ฯเปฯ อุเปกฺขาสมฺโพชฺฌงฺคสฺส เย หิ เกจิ ภิกฺขเว อตีตมทฺธานํ
สมณา วา พฺราหฺมณา วา ติสฺโส วิธา ปชหึสุ ฯเปฯ
ปชหิสฺสนฺติ ฯเปฯ ปชหนฺติ สพฺเพ เต อิเมสํเยว สตฺตนฺนํ
โพชฺฌงฺคานํ ภาวิตตฺตา พหุลีกตตฺตาติ ฯ
[๕๐๕] รญฺโญ ภิกฺขเว จกฺกวตฺติสฺส ปาตุภาวา สตฺตนฺนํ รตนานํ
ปาตุภาโว โหติ ฯ กตเมสํ สตฺตนฺนํ ฯ จกฺกรตนสฺส ปาตุภาโว
โหติ หตฺถิรตนสฺส ปาตุภาโว โหติ อสฺสรตนสฺส ปาตุภาโว โหติ
มณิรตนสฺส ปาตุภาโว โหติ อิตฺถีรตนสฺส ปาตุภาโว โหติ
คหปติรตนสฺส ปาตุภาโว โหติ ปริณายกรตนสฺส ปาตุภาโว
โหติ ฯ รญฺโญ ภิกฺขเว จกฺกวตฺติสฺส ปาตุภาวา อิเมสํ สตฺตนฺนํ
รตนานํ ปาตุภาโว โหติ ฯ
[๕๐๖] ตถาคตสฺส ภิกฺขเว ปาตุภาวา อรหโต สมฺมาสมฺพุทฺธสฺส
สตฺตนฺนํ โพชฺฌงฺครตนานํ ปาตุภาโว โหติ ฯ กตเมสํ สตฺตนฺนํ
โพชฺฌงฺครตนานํ ๑ ฯ สติสมฺโพชฺฌงฺครตนสฺส ปาตุภาโว โหติ ฯเปฯ
อุเปกฺขาสมฺโพชฺฌงฺครตนสฺส ปาตุภาโว โหติ ฯ ตถาคตสฺส ภิกฺขเว
ปาตุภาวา อรหโต สมฺมาสมฺพุทฺธสฺส อิเมสํ สตฺตนฺนํ โพชฺฌงฺครตนานํ
ปาตุภาโว โหตีติ ฯ
[๕๐๗] มารเสนปฺปมทฺทนํ โว ภิกฺขเว มคฺคํ เทสิสฺสามิ ตํ
สุณาถ ฯ กตโม จ ภิกฺขเว มารเสนปฺปมทฺทโน มคฺโค ฯ ยทิทํ
สตฺต โพชฺฌงฺคา ฯ กตเม สตฺต ฯ สติสมฺโพชฺฌงฺโค ฯเปฯ
อุเปกฺขาสมฺโพชฺฌงฺโค ฯ อยํ ภิกฺขเว มารเสนปฺปมทฺทโน มคฺโคติ ฯ
[๕๐๘] สาวตฺถี ฯ อถ โข อญฺญตโร ภิกฺขุ เยน ภควา
เตนุปสงฺกมิ ฯเปฯ เอกมนฺตํ นิสินฺโน โข โส ภิกฺขุ ภควนฺตํ
เอตทโวจ ทุปฺปญฺโญ เอฬมูโค ทุปฺปญฺโญ เอฬมูโคติ ภนฺเต
วุจฺจติ กิตฺตาวตา นุ โข ภนฺเต ทุปฺปญฺโญ เอฬมูโคติ
วุจฺจตีติ ฯ
[๕๐๙] สตฺตนฺนํ โข ภิกฺขุ โพชฺฌงฺคานํ อภาวิตตฺตา อพหุลีกตตฺตา
ทุปฺปญฺโญ เอฬมูโคติ วุจฺจติ ฯ กตเมสํ สตฺตนฺนํ ฯ
สติสมฺโพชฺฌงฺคสฺส ฯเปฯ อุเปกฺขาสมฺโพชฺฌงฺคสฺส ฯ อิเมสํ โข
#๑ ม. ยุ. อยํ ปาโฐ นตฺถิ ฯ
ภิกฺขุ สตฺตนฺนํ โพชฺฌงฺคานํ อภาวิตตฺตา อพหุลีกตตฺตา ทุปฺปญฺโญ
เอฬมูโคติ วุจฺจตีติ ฯ
[๕๑๐] สาวตฺถี ฯ ปญฺญวา อเนฬมูโค ปญฺญวา อเนฬมูโคติ
ภนฺเต วุจฺจติ กิตฺตาวตา นุ โข ภนฺเต ปญฺญวา อเนฬมูโคติ
วุจฺจตีติ ฯ
[๕๑๑] สตฺตนฺนํ โข ภิกฺขุ โพชฺฌงฺคานํ ภาวิตตฺตา พหุลีกตตฺตา
ปญฺญวา อเนฬมูโคติ วุจฺจติ ฯ กตเมสํ สตฺตนฺนํ ฯ
สติสมฺโพชฺฌงฺคสฺส ฯเปฯ อุเปกฺขาสมฺโพชฺฌงฺคสฺส ฯ อิเมสํ โข
ภิกฺขุ สตฺตนฺนํ โพชฺฌงฺคานํ ภาวิตตฺตา พหุลีกตตฺตา ปญฺญวา
อเนฬมูโคติ วุจฺจตีติ ฯ
[๕๑๒] สาวตฺถีนิทานํ ฯ ทฬิทฺโท ทฬิทฺโทติ ภนฺเต วุจฺจติ
กิตฺตาวตา นุ โข ภนฺเต ทฬิทฺโทติ วุจฺจตีติ ฯ
[๕๑๓] สตฺตนฺนํ โข ภิกฺขุ โพชฺฌงฺคานํ อภาวิตตฺตา
อพหุลีกตตฺตา ทฬิทฺโทติ วุจฺจติ ฯ กตเมสํ สตฺตนฺนํ ฯ สติสมฺโพชฺฌงฺคสฺส
ฯเปฯ อุเปกฺขาสมฺโพชฺฌงฺคสฺส ฯ อิเมสํ โข ภิกฺขุ
สตฺตนฺนํ โพชฺฌงฺคานํ อภาวิตตฺตา อพหุลีกตตฺตา ทฬิทฺโทติ วุจฺจตีติ ฯ