[๔๒๔] ตคฺฆ ภควา โพชฺฌงฺคา ตคฺฆ สุคต โพชฺฌงฺคาติ ฯ
อิทมโวจ ภควา ฯ อตฺตมโน อายสฺมา มหาโมคฺคลฺลาโน ภควโต
ภาสิตํ อภินนฺทิ ฯ วุฏฺฐาหิ จายสฺมา มหาโมคฺคลฺลาโน ตมฺหา
อาพาธา ตถา ปหีโน จายสฺมโต มหาโมคฺคลฺลานสฺส โส
อาพาโธ อโหสีติ ฯ

[๔๒๕] เอกํ สมยํ ภควา ราชคเห วิหรติ เวฬุวเน กลนฺทกนิวาเป ฯ
เตน โข ปน สมเยน ภควา อาพาธิโก โหติ ทุกฺขิโต
พาฬฺหคิลาโน ฯ

[๔๒๖] อถ โข อายสฺมา มหาจุนฺโท เยน ภควา เตนุปสงฺกมิ
อุปสงฺกมิตฺวา ภควนฺตํ อภิวาเทตฺวา เอกมนฺตํ นิสีทิ ฯ เอกมนฺตํ
นิสินฺนํ โข อายสฺมนฺตํ มหาจุนฺทํ ภควา เอตทโวจ ปฏิภนฺตุ
ตํ จุนฺท โพชฺฌงฺคาติ ฯ สตฺติเม ภนฺเต โพชฺฌงฺคา ภควตา
สมฺมทกฺขาตา ภาวิตา พหุลีกตา อภิญฺญาย สมฺโพธาย นิพฺพานาย
สํวตฺตนฺติ ฯ กตเม สตฺต ฯ

[๔๒๗] สติสมฺโพชฺฌงฺโค โข ภนฺเต ภควตา สมฺมทกฺขาโต
ภาวิโต พหุลีกโต อภิญฺญาย สมฺโพธาย นิพฺพานาย สํวตฺตติ ฯเปฯ
อุเปกฺขาสมฺโพชฺฌงฺโค โข ภนฺเต ภควตา สมฺมทกฺขาโต ภาวิโต
พหุลีกโต อภิญฺญาย สมฺโพธาย นิพฺพานาย สํวตฺตติ ฯ อิเม โข
ภนฺเต สตฺต โพชฺฌงฺคา ภควตา สมฺมทกฺขาตา ภาวิตา พหุลีกตา
อภิญฺญาย สมฺโพธาย นิพฺพานาย สํวตฺตนฺตีติ ฯ

[๔๒๘] ตคฺฆ จุนฺท โพชฺฌงฺคา ตคฺฆ จุนฺท โพชฺฌงฺคาติ ฯ
อิทมโวจายสฺมา มหาจุนฺโท ๑ สมนุญฺโญ สตฺถา อโหสิ ฯ วุฏฺฐาหิ
จ ภควา ตมฺหา อาพาธา ตถา ปหีโน จ ภควโต โส อาพาโธ
อโหสีติ ฯ

[๔๒๙] สตฺติเม ภิกฺขเว โพชฺฌงฺคา ภาวิตา พหุลีกตา อปารา
ปารงฺคมนาย สํวตฺตนฺติ ฯ กตเม สตฺต ฯ สติสมฺโพชฺฌงฺโค ฯเปฯ
อุเปกฺขาสมฺโพชฺฌงฺโค ฯ อิเม โข ภิกฺขเว สตฺต โพชฺฌงฺคา ภาวิตา
พหุลีกตา อปารา ปารงฺคมนาย สํวตฺตนฺตีติ
[๒]

[๔๓๐] อปฺปกา เต มนุสฺเสสุ เย ชนา ปารคามิโน
อถายํ อิตรา ปชา ตีรเมวานุธาวติ ฯ
เย จ โข สมฺมทกฺขาเต ธมฺเม ธมฺมานุวตฺติโน
เต ชนา ปารเมสฺสนฺติ มจฺจุเธยฺยํ สุทุตฺตรํ ฯ
กณฺหํ ธมฺมํ วิปฺปหาย สุกฺกํ ภาเวถ ปณฺฑิโต
โอกา อโนกมาคมฺม วิเวเก ยตฺถ ทูรมํ ฯ
ตตฺราภิรติมิจฺเฉยฺย หิตฺวา กาเม อกิญฺจโน
ปริโยทเปยฺย อตฺตานํ จิตฺตเกฺลเสหิ ปณฺฑิโต ฯ
เยสํ สมฺโพธิยงฺเคสุ สมฺมา จิตฺตํ สุภาวิตํ
อาทานปฏินิสฺสคฺเค อนุปาทาย เย รตา
ขีณาสวา ชุติมนฺโต เต โลเก ปรินิพฺพุตาติ ฯ

[๔๓๑] เยสํ เกสญฺจิ ภิกฺขเว สตฺต โพชฺฌงฺคา วิรทฺธา วิรทฺโธ
#๑ ม. จุนฺโท ฯ ๒ ยุ. อิทมโวจ ฯเปฯ
เตสํ อริโย มคฺโค สมฺมาทุกฺขกฺขยคามี ฯ เยสํ เกสญฺจิ ภิกฺขเว
สตฺต โพชฺฌงฺคา อารทฺธา อารทฺโธ เตสํ อริโย มคฺโค
สมฺมาทุกฺขกฺขยคามี ฯ กตเม สตฺต ฯ สติสมฺโพชฺฌงฺโค ฯเปฯ8
อุเปกฺขาสมฺโพชฺฌงฺโค ฯ

[๔๓๒] เยสํ เกสญฺจิ ภิกฺขเว อิเม สตฺต โพชฺฌงฺคา วิรทฺธา
วิรทฺโธ เตสํ อริโย มคฺโค สมฺมาทุกฺขกฺขยคามี ฯ เยสํ เกสญฺจิ
ภิกฺขเว อิเม สตฺต โพชฺฌงฺคา อารทฺธา อารทฺโธ เตสํ อริโย
มคฺโค สมฺมาทุกฺขกฺขยคามีติ ฯ

[๔๓๓] สตฺติเม ภิกฺขเว โพชฺฌงฺคา ภาวิตา พหุลีกตา อริยา
นิยฺยานิกา นิยฺยนฺติ ตกฺกรสฺส สมฺมาทุกฺขกฺขยาย ฯ กตเม สตฺต
สติสมฺโพชฺฌงฺโค ฯเปฯ อุเปกฺขาสมฺโพชฺฌงฺโค ฯ อิเม โข ภิกฺขเว
สตฺต โพชฺฌงฺคา ภาวิตา พหุลีกตา อริยา นิยฺยานิกา นิยฺยนฺติ
ตกฺกรสฺส สมฺมาทุกฺขกฺขยายาติ ฯ