[๓๑๔] อิมาสํ โข ภิกฺขเว ติสฺสนฺนํ วิธานํ อภิญฺญาย ปริญฺญาย
ปริกฺขยาย ปหานาย อริโย อฏฺฐงฺคิโก มคฺโค ภาเวตพฺโพ ฯ
กตโม อริโย อฏฺฐงฺคิโก มคฺโค ฯ อิธ ภิกฺขเว ภิกฺขุ สมฺมาทิฏฺฐึ
ภาเวติ ฯเปฯ สมฺมาสมาธึ ภาเวติ วิเวกนิสฺสิตํ วิราคนิสฺสิตํ
นิโรธนิสฺสิตํ โวสฺสคฺคปริณามึ ฯ อิมาสํ โข ภิกฺขเว
ติสฺสนฺนํ วิธานํ อภิญฺญาย ปริญฺญาย ปริกฺขยาย ปหานาย
ฯเปฯ อยํ อริโย อฏฺฐงฺคิโก มคฺโค ภาเวตพฺโพติ ฯ
(ยถา เอสนา เอวํ วิตฺถาเรตพฺพา ๑-) ฯเปฯ
[๓๑๕] สาวตฺถีนิทานํ ฯ ตโยเม ภิกฺขเว อาสวา ฯ กตเม
ตโย ฯ กามาสโว ภวาสโว อวิชฺชาสโว ฯ อิเม โข ภิกฺขเว
ตโย อาสวา ฯ
[๓๑๖] อิเมสํ โข ภิกฺขเว ติณฺณํ อาสวานํ อภิญฺญาย
ปริญฺญาย ปริกฺขยาย ปหานาย ฯเปฯ อยํ อริโย อฏฺฐงฺคิโก
มคฺโค ภาเวตพฺโพติ ฯ
[๓๑๗] สาวตฺถีนิทานํ ฯ ตโยเม ภิกฺขเว ภวา ฯ กตเม ตโย ฯ
#๑ ม. วิตฺถาเรตพฺพํ ฯ
กามภโว รูปภโว อรูปภโว ฯ อิเม โข ภิกฺขเว ตโย ภวา ฯ
[๓๑๘] อิเมสํ โข ภิกฺขเว ติณฺณํ ภวานํ อภิญฺญาย ปริญฺญาย
ปริกฺขยาย ปหานาย ฯเปฯ อยํ อริโย อฏฺฐงฺคิโก มคฺโค
ภาเวตพฺโพติ ฯ
[๓๑๙] สาวตฺถีนิทานํ ฯ ติสฺโส อิมา ภิกฺขเว ทุกฺขตา ฯ
กตมา ติสฺโส ฯ ทุกฺขทุกฺขตา สงฺขารทุกฺขตา วิปริณามทุกฺขตา ฯ
อิมา โข ภิกฺขเว ติสฺโส ทุกฺขตา ฯ
[๓๒๐] อิมาสํ โข ภิกฺขเว ติสฺสนฺนํ ทุกฺขตานํ อภิญฺญาย
ปริญฺญาย ปริกฺขยาย ปหานาย ฯเปฯ อยํ อริโย อฏฺฐงฺคิโก
มคฺโค ภาเวตพฺโพติ ฯ
[๓๒๑] สาวตฺถีนิทานํ ฯ ตโยเม ภิกฺขเว ขีลา ฯ กตเม
ตโย ฯ ราโค ขีโล โทโส ขีโล โมโห ขีโล ฯ อิเม โข
ภิกฺขเว ตโย ขีลา ฯ
[๓๒๒] อิเมสํ โข ภิกฺขเว ติณฺณนฺนํ ขีลานํ อภิญฺญาย
ปริญฺญาย ปริกฺขยาย ปหานาย ฯเปฯ อยํ อริโย อฏฺฐงฺคิโก
มคฺโค ภาเวตพฺโพติ ฯ
[๓๒๓] สาวตฺถีนิทานํ ฯ ตีณีมานิ ภิกฺขเว มลานิ ฯ กตมานิ
ตีณิ ฯ ราโค มลํ โทโส มลํ โมโห มลํ ฯ อิมานิ โข
ภิกฺขเว ตีณิ มลานิ ฯ