[๔๗๘] ปญฺจหิ อนุรุทฺธ ธมฺเมหิ สมนฺนาคโต มาตุคาโม กายสฺส
ฯเปฯ นิรยํ อุปปชฺชติ ฯ กตเมหิ ปญฺจหิ ฯ ปาณาติปาตี
จ โหติ อทินฺนาทายี จ โหติ กาเมสุ มิจฺฉาจารี จ โหติ
มุสาวาที จ โหติ สุราเมรยมชฺชปมาทฏฺฐายี จ โหติ ฯ อิเมหิ
โข อนุรุทฺธ ปญฺจหิ ธมฺเมหิ สมนฺนาคโต มาตุคาโม กายสฺส
เภทา ปรํ มรณา อปายํ ทุคฺคตึ วินิปาตํ นิรยํ อุปปชฺชตีติ ฯ
จุทฺทสมํ ฯ
เปยฺยาลวคฺโค ทุติโย ฯ
[๔๗๙] อถ โข อายสฺมา อนุรุทฺโธ เยน ภควา เตนุปสงฺกมิ
ฯเปฯ เอกมนฺตํ นิสินฺโน โข อายสฺมา อนุรุทฺโธ ภควนฺตํ เอตทโวจ
อิธาหํ ภนฺเต มาตุคามํ ปสฺสามิ ทิพฺเพน จกฺขุนา วิสุทฺเธน อติกฺกนฺตมานุสเกน
กายสฺส เภทา ปรํ มรณา สุคตึ สคฺคํ โลกํ
อุปปชฺชนฺตํ ฯ กตีหิ นุ โข ภนฺเต ธมฺเมหิ สมนฺนาคโต มาตุคาโม
กายสฺส เภทา ปรํ มรณา สุคตึ สคฺคํ โลกํ อุปปชฺชตีติ ฯ
ปญฺจหิ โข อนุรุทฺธ ธมฺเมหิ สมนฺนาคโต มาตุคาโม กายสฺส
เภทา ปรํ มรณา สุคตึ สคฺคํ โลกํ อุปปชฺชติ ฯ กตเมหิ
ปญฺจหิ ฯ สทฺโธ จ โหติ หิริมา จ โหติ โอตฺตปฺปี จ
โหติ อกฺโกธโน จ โหติ ปญฺญวา จ โหติ ฯ อิเมหิ โข
อนุรุทฺธ ปญฺจหิ ธมฺเมหิ สมนฺนาคโต มาตุคาโม กายสฺส เภทา
ปรํ มรณา สุคตึ สคฺคํ โลกํ อุปปชฺชติ ฯ
[๔๘๐] ปญฺจหิ อนุรุทฺธ ธมฺเมหิ สมนฺนาคโต มาตุคาโม
กายสฺส เภทา ปรํ มรณา สุคตึ สคฺคํ โลกํ อุปปชฺชติ ฯ กตเมหิ
ปญฺจหิ ฯ สทฺโธ จ โหติ หิริมา จ โหติ โอตฺตปฺปี จ
โหติ อนุปนาหี จ โหติ ปญฺญวา จ โหติ ฯ อิเมหิ โข
อนุรุทฺธ ปญฺจหิ ธมฺเมหิ สมนฺนาคโต มาตุคาโม กายสฺส เภทา
ปรํ มรณา สุคตึ สคฺคํ โลกํ อุปปชฺชติ ฯ
[๔๘๑] ปญฺจหิ อนุรุทฺธ ธมฺเมหิ สมนฺนาคโต มาตุคาโม
กายสฺส เภทา ปรํ มรณา สุคตึ สคฺคํ โลกํ อุปปชฺชติ ฯ กตเมหิ
ปญฺจหิ ฯ สทฺโธ จ โหติ หิริมา จ โหติ โอตฺตปฺปี จ
โหติ อนิสฺสุกี จ โหติ ปญฺญวา จ โหติ ฯเปฯ
[๔๘๒] อมจฺฉรี จ โหติ ปญฺญวา จ โหติ ฯเปฯ อนติจารี
จ โหติ ปญฺญวา จ โหติ ฯเปฯ สีลวา จ โหติ ปญฺญวา
จ โหติ ฯเปฯ พหุสฺสุโต จ โหติ ปญฺญวา จ โหติ ฯเปฯ
อารทฺธวิริโย จ โหติ ปญฺญวา จ โหติ ฯเปฯ อุปฏฺฐิตสฺสติ
จ โหติ ปญฺญวา จ โหติ ฯ อิเมหิ โข อนุรุทฺธ ปญฺจหิ ธมฺเมหิ
สมนฺนาคโต มาตุคาโม กายสฺส เภทา ปรํ มรณา สุคตึ สคฺคํ
โลกํ อุปปชฺชตีติ ฯ (อิเม อฏฺฐ สุตฺตนฺตา สงฺเขปาปิ) ฯเปฯ
[๔๘๓] ปญฺจหิ อนุรุทฺธ ธมฺเมหิ สมนฺนาคโต มาตุคาโม
กายสฺส เภทา ปรํ มรณา สุคตึ สคฺคํ โลกํ อุปปชฺชติ ฯ กตเมหิ
ปญฺจหิ ฯ ปาณาติปาตา ปฏิวิรโต จ โหติ อทินฺนาทานา
ปฏิวิรโต จ โหติ กาเมสุ มิจฺฉาจารา ปฏิวิรโต จ โหติ มุสาวาทา
ปฏิวิรโต จ โหติ สุราเมรยมชฺชปมาทฏฺฐานา ปฏิวิรโต จ โหติ ฯ
อิเมหิ โข อนุรุทฺธ ปญฺจหิ ธมฺเมหิ สมนฺนาคโต มาตุคาโม
กายสฺส เภทา ปรํ มรณา สุคตึ สคฺคํ โลกํ อุปปชฺชตีติ ฯ
เปยฺยาลวคฺโค สมตฺโต ฯ
ตสฺสุทฺทานํ
เทฺว มนาปา อมนาปา จ อาเวณิกา ตีหิ อนุรุทฺโธ ๑
โกธโน อุปนาหี จ อิสฺสุกี มจฺฉเรน จ ฯ
อติจารี จ ทุสฺสีลํ ๒ อปฺปสฺสุโต จ กุสิโต
มุฏฺฐสฺสติ [๓] ปญฺจเวรํ กณฺหปกฺเข ปกาสิโต ฯ
อนุรุทฺโธ อกฺโกธโน ๔ อนุปนาหี อนิสฺสุกี
อมจฺฉรี อนติจารี สีลวา จ พหุสฺสุโต
วิริยสติ ปญฺจสีลา จ ๕ สุกฺกปกฺเข ปกาสิโตติ ฯ
___________________
#๑ ม. มาตุคาโม ปุริโส จ อาเวณิกา ติธมฺโม จ ฯ ๒ ม. ยุ. ทุสฺสีโล ฯ
#๓ ยุ. จ ฯ ๔ ม. ทุติเย จ อกฺโกธโน ฯ ๕ ม. วีริยํ สติสีล จ ฯ
มาตุคามสฺส พลวคฺโค ตติโย
[๔๘๔] ปญฺจิมานิ ภิกฺขเว มาตุคามสฺส พลานิ ฯ กตมานิ
ปญฺจ ฯ รูปพลํ โภคพลํ ญาติพลํ ปุตฺตพลํ สีลพลํ ฯ อิมานิ โข
ภิกฺขเว ปญฺจ มาตุคามสฺส พลานิ ฯ อิเมหิ โข ภิกฺขเว ปญฺจหิ
พเลหิ สมนฺนาคโต มาตุคาโม วิสารโท อคารํ อชฺฌาวสตีติ ฯ
ปฐมํ ฯ
[๔๘๕] ปญฺจิมานิ ภิกฺขเว มาตุคามสฺส พลานิ ฯ กตมานิ
ปญฺจ ฯ รูปพลํ โภคพลํ ญาติพลํ ปุตฺตพลํ สีลพลํ ฯ อิมานิ
โข ภิกฺขเว ปญฺจ มาตุคามสฺส พลานิ ฯ อิเมหิ โข ภิกฺขเว
ปญฺจหิ พเลหิ สมนฺนาคโต มาตุคาโม สามิกํ ปสยฺห อคารํ
อชฺฌาวสตีติ ฯ ทุติยํ ฯ
[๔๘๖] ปญฺจิมานิ ภิกฺขเว มาตุคามสฺส พลานิ ฯ กตมานิ
ปญฺจ ฯ รูปพลํ โภคพลํ ญาติพลํ ปุตฺตพลํ สีลพลํ ฯ อิมานิ
โข ภิกฺขเว ปญฺจ มาตุคามสฺส พลานิ ฯ อิเมหิ โข ภิกฺขเว
ปญฺจหิ พเลหิ สมนฺนาคโต มาตุคาโม สามิกํ อภิภุยฺย วตฺตติ ฯ
เอเกน จ โข ภิกฺขเว พเลน สมนฺนาคโต ปุริโส มาตุคามํ อภิภุยฺย
วตฺตติ ฯ กตเมน เอเกน พเลน [๑] ฯ อิสฺสริยพเลน อภิภูตํ ภิกฺขเว
มาตุคามํ เนว รูปพลํ ตายติ น โภคพลํ ตายติ น ญาติพลํ
ตายติ น ปุตฺตพลํ ตายติ น สีลพลํ ตายตีติ ฯ ตติยํ ฯ
#๑ ยุ. อิสฺสริยพเลน ฯ
[๔๘๗] ปญฺจิมานิ ภิกฺขเว มาตุคามสฺส พลานิ ฯ กตมานิ
ปญฺจ ฯ รูปพลํ โภคพลํ ญาติพลํ ปุตฺตพลํ สีลพลํ ฯ