[๒๗๘] รูปา ภิกฺขเว อนตฺตา อตีตา อนาคตา ปจฺจุปฺปนฺนา ฯ
ยทนตฺตา ตํ เนตํ มม เนโสหมสฺมิ น เมโส อตฺตาติ เอวเมตํ
ยถาภูตํ สมฺมปฺปญฺญาย ทฏฺฐพฺพํ ฯ สทฺทา คนฺธา รสา
โผฏฺฐพฺพา ธมฺมา อนตฺตา อตีตา อนาคตา ปจฺจุปฺปนฺนา ฯ
ยทนตฺตา ตํ เนตํ มม เนโสหมสฺมิ น เมโส อตฺตาติ เอวเมตํ
ยถาภูตํ สมฺมปฺปญฺญาย ทฏฺฐพฺพํ ฯ เอวํ ปสฺสํ ฯเปฯ นาปรํ
อิตฺถตฺตายาติ ปชานาตีติ ฯ
[๒๗๙] จกฺขุํ ภิกฺขเว อนิจฺจํ ฯเปฯ ชิวฺหา อนิจฺจา ฯเปฯ
มโน อนิจฺโจ ฯ เอวํ ปสฺสํ ฯเปฯ นาปรํ อิตฺถตฺตายาติ ปชานาตีติ ฯ
[๒๘๐] จกฺขุํ ภิกฺขเว ทุกฺขํ ฯเปฯ ชิวฺหา ทุกฺขา ฯ กาโย
ทุกฺโข ฯ มโน ทุกฺโข ฯ เอวํ ปสฺสํ ฯเปฯ นาปรํ อิตฺถตฺตายาติ
ปชานาตีติ ฯ
[๒๘๑] จกฺขุํ ภิกฺขเว อนตฺตา ฯเปฯ ชิวฺหา อนตฺตา ฯ
กาโย อนตฺตา ฯ มโน อนตฺตา ฯ เอวํ ปสฺสํ ฯเปฯ นาปรํ
อิตฺถตฺตายาติ ปชานาตีติ ฯ
[๒๘๒] รูปา ภิกฺขเว อนิจฺจา ฯ สทฺทา คนฺธา รสา
โผฏฺฐพฺพา ธมฺมา อนิจฺจา ฯ เอวํ ปสฺสํ ฯเปฯ นาปรํ
อิตฺถตฺตายาติ ปชานาตีติ ฯ
[๒๘๓] รูปา ภิกฺขเว ทุกฺขา ฯ สทฺทา คนฺธา รสา
โผฏฺฐพฺพา ธมฺมา ทุกฺขา ฯ เอวํ ปสฺสํ ฯเปฯ นาปรํ อิตฺถตฺตายาติ
ปชานาตีติ ฯ
[๒๘๔] รูปา ภิกฺขเว อนตฺตา ฯ สทฺทา คนฺธา รสา
โผฏฺฐพฺพา ธมฺมา อนตฺตา ฯ เอวํ ปสฺสํ ฯเปฯ นาปรํ
อิตฺถตฺตายาติ ปชานาตีติ ฯ
สฏฺฐิเปยฺยาโล สมตฺโต ฯ
ตสฺสุทฺทานํ
ฉนฺเทนฏฺฐารสา โหนฺติ อตีเตน จ เทฺว นว
ยทนิจฺจาฏฺฐารสา วุตฺตา ตโย อชฺฌตฺตพาหิรา
เปยฺยาโล สฏฺฐิโก วุตฺโต พุทฺเธนาทิจฺจพนฺธุนาติ ฯ
สุตฺตนฺตานิ สฏฺฐิ ฯ
__________
สมุทฺทวคฺโค ตติโย
[๒๘๕] สมุทฺโท สมุทฺโทติ ภิกฺขเว อสฺสุตวา ปุถุชฺชโน ภาสติ ฯ
เนโส ภิกฺขเว อริยสฺส วินเย สมุทฺโท ฯ มหา เอโส ภิกฺขเว
อุทกราสิ มหา อุทกณฺณโว ฯ จกฺขุํ ภิกฺขเว ปุริสสฺส สมุทฺโท
ตสฺส รูปมโย เวโค โย ตํ รูปมยํ เวคํ สหติ อยํ วุจฺจติ
ภิกฺขเว อตริ จกฺขุสมุทฺทํ สอุมฺมึ สาวฏฺฏํ สคาหํ สรกฺขสํ ติณฺโณ
ปารคโต ถเล ติฏฺฐติ พฺราหฺมโณ ฯเปฯ ชิวฺหา ภิกฺขเว ปุริสสฺส
สมุทฺโท ตสฺส รสมโย เวโค โย ตํ รสมยํ เวคํ สหติ อยํ
วุจฺจติ ภิกฺขเว อตริ ชิวฺหาสมุทฺทํ สอุมฺมึ สาวฏฺฏํ สคาหํ สรกฺขสํ
ติณฺโณ ปารคโต ถเล ติฏฺฐติ พฺราหฺมโณ ฯเปฯ มโน ภิกฺขเว
ปุริสสฺส สมุทฺโท ตสฺส ธมฺมมโย เวโค โย ตํ ธมฺมมยํ ๑
เวคํ สหติ อยํ วุจฺจติ ภิกฺขเว อตริ มโนสมุทฺทํ สอุมฺมึ สาวฏฺฏํ
สคาหํ สรกฺขสํ ติณฺโณ ปารคโต ถเล ติฏฺฐติ พฺราหฺมโณติ ฯ
อิทมโวจ ฯเปฯ สตฺถา
[๒๘๖] โย อิมํ สมุทฺทํ สคาหํ สรกฺขสํ สอุมฺมึ [๒] ภยํ ทุตฺตรํ อจฺจตริ
สเวทคู วุสิตพฺรหฺมจริโย โลกนฺตคู ปารคโตติ วุจฺจตีติ ฯ
[๒๘๗] สมุทฺโท สมุทฺโทติ ภิกฺขเว อสฺสุตวา ปุถุชฺชโน ภาสติ ฯ
เนโส ภิกฺขเว อริยสฺส วินเย สมุทฺโท ฯ มหา เอโส ภิกฺขเว
อุทกราสิ มหา อุทกณฺณโว ฯ สนฺติ ภิกฺขเว จกฺขุวิญฺเญยฺยา
#๑ ยุ. ธมฺมเวคํ ฯ ๒ ม. สาวฏฺฏํ สภยํ ฯ
รูปา อิฏฺฐา กนฺตา มนาปา ปิยรูปา กามูปสญฺหิตา รชนิยา อยํ
วุจฺจติ ภิกฺขเว อริยสฺส วินเย สมุทฺโท ๑ เอตฺถายํ สเทวโก โลโก
สมารโก สพฺรหฺมโก สสฺสมณพฺราหฺมณี ปชา สเทวมนุสฺสา
เยภุยฺเยน สมุทฺทา ๒ กนฺตา กุลกชาตา กุลคุณฺฑิกชาตา ๓ มุญฺชปพฺพชภูตา
อปายํ ทุคฺคตึ วินิปาตํ สํสารํ นาติวตฺตนฺติ ฯเปฯ
สนฺติ ภิกฺขเว ชิวฺหาวิญฺเญยฺยา รสา ฯเปฯ สนฺติ ภิกฺขเว มโนวิญฺเญยฺยา
ธมฺมา อิฏฺฐา กนฺตา มนาปา ปิยรูปา กามูปสญฺหิตา
รชนิยา อยํ วุจฺจติ ภิกฺขเว อริยสฺส วินเย สมุทฺโท เอตฺถายํ
สเทวโก โลโก สมารโก สพฺรหฺมโก สสฺสมณพฺราหฺมณี ปชา
สเทวมนุสฺสา เยภุยฺเยน สมุทฺทา ๒ กนฺตา กุลกชาตา กุลคุณฺฑิกชาตา ๓
มุญฺชปพฺพชภูตา อปายํ ทุคฺคตึ วินิปาตํ สํสารํ นาติวตฺตนฺตีติ ฯ